NE NA muloo wa kukushibwa na baledi bena Kidishitu Fred na Edna Molohan, babadi batweshe mwandi binangu bya kulamata Efile Mukulu na babadi Balongi ba Bible banyingye (Ba Temwe ba Yehowa) munda mwa bipwa 20 kumpala kwa’mi kutandjikwa mu kipwa kya 1934. Kifuko kyetu kibadi mu Parsons kabundji kapeela ke ku lupese lwa kuushi na kutunduka nguba kwa Kansas. Tubadi mu kakongye kabadi na bantu bebungi bena Kidishitu bedibwe mwimu. Kifuko kyetu kibadi na kyubishi kibuwa kya kwendanga mu bisangilo na mu kulungula bangi mukandu wa bya binyibinyi bi mu Eyi dy’Efile Mukulu. Mu dya Mposo dyoso kunyima kwa midi tubadi atwende mu bulungudi bwa mu miseese, nyi bibatudi atwitamina bulungudi bwa pa mbalo i bantu bebungi mu aa mafuku. Ingi nsaa tubadi atukooko, anka Papa badi etuudila ma kreme e mashika kunyima kwa bulungudi.

Kakongye ketu kapela kabadi na teritware mukata badi na tu bibundji tupela na mafuba e bungi abadi pepi. Nsaa ibatudi atwende mu kutala ba kidime, tubadi atwibapa mikanda abo namu abetupa ma pome, mayi abishi, sunga nsoolo ayitala. Bu bibadi Papa mupwe kutusha makuta a ino mikanda kumpala kwa nsaa, tubadi atudi bino bintu.

Baledi bande abaudile ka fono, kababadi abafubu nako mu bulungudi. Nadi bukinga bukile ntshinadi na mushindo wa kutumika nako nya, anka pababadi abakisha mwisambo wa mukwetu Rutherford kwi Papa na Mama nsaa yabalukiila mu kutala bantu na kulonga nabo Bible, nadi na muloo wa kwibakwasha.

Papa badi mwalule motoka wetu wabetamina bu Ford 1936, twabanga kwiwitamina bu motoka wa bikolo, ubadi na bikolo bikata kunundu kwao. Uno motoka ubadi aukwasha ngofu bwa kupalakasha mukandu wa Bufumu. Misusa ibungi tubadi atwele ngono kumpala bwa kukaka binangu bya bantu, akupu atwele mwisambo wa mu Bible wabadi bakobole. Kunyima kwa kupushisha mwisambo, tubadi atupa bantu abasankila wanka mikanda.

 Mu kabundji kapeela ka Cherryvale, mu Kansas mpulushi balungwile Papa’shi, takumanga kutwesha motoka wi na bikolo mu parc [mbalo yabalamina nyema], mubadi bantu abende bwa kwikisha mu dya Lubingo moso, anka su e pasha pa parc e kufungula bikolo. Papa ta mupele, bayile akatula motoka wi na bikolo busambu bwa parc bilombene’shi bantu be mwanka bapusha mukandu, akupu atungunuka na mwisambo. Nadi na muloo wa kwikala pamune na Papa na tutu ande Jerry, mu wawa mudimo.

Ku nfudilo kwa kipwa kya 1930, tubadi bepaane ngofu bwa kukita kampanye ke pabwako bwatudya kupudisha teritware bukidibukidi mwanda wa bantu babadi betushikwe ngofu. Tubadi atubuuku kukii kafito (bu bibatukitshine mu Joplin, mu Missouri) na kutuula ma trakte na mikanda muushi mwa biibi bya mashibo a bantu kushii kwela tuleo. Kunyima, tubadi atwibungu pasha pa kibundji bwa kutala su abakwata umune a kwatudi kwi ba mpulushi.

Mu byabya bipwa, ungi mushindo wa bulungudi ubadi awitusankisha tubadi atwiwitanyina bu lwendo lwa kulungula mukandu. Bwa kulungula mukandu wa Bufumu, tubadi atukwata mabaaya e na myaku ifunde na kwela mulongo bwa kutambuka mu kibundji. Natentekyesha ungi musango ubabadi batambukye mu kibundji kyetu kwi bakwetu bafwale tubaaya twi na myaku ifunde’shi: “Kipwilo nyi muteo na bu ngifi.” Babadi befunye kibundji kyoso kishima ki na bula bwa kilometre kimune na kipindji, kunyima abafikile kwetu ku nshibo. Mwanda wa muloo, ta mbafumankane na beshikwanyi mu lwendo lwabo nya, anka abafumankene na bantu bebungi babadi abasankila kwibatala.

Kifuko kyetu kibadi akikatuka ku Kansas bwa kwenda ku Texas bwa kukatwela mu bikongeno. Papa badi afubu ku ndjandja ya kukatuka ku Missouri-Kansas-Texas Railroad, byabya bibadi bikwashe bwashi tutwele mu mashuwa na mukanda waye wa bu mufubi a ku ndjandja, awukwasha bwatudya kwenda mu kutala bena kifuko netu na kutwela pamune mu bikongeno. Fred Wismar tutu a mama na mukashi aaye Eulalie babadi mu kibundji kya Temple mu Texas. Badi mulongye bya binyibinyi pabadi ki mwana mukinga mu kipwa kya 1900, aye nkubatshishibwa, na badi alungula bakwabo mpa na nyinaaye myanda ibadi mulongye. Bakwetu ba mu Texas boso babadi bamuukye, mubadi afubu bu mufubi a zone (abetamina lelo uno bu mukunkushi a kifunda). Badi muntu sha kalolo, sha muloo na ebuwa kwikala pepi naye. Badi na katshintshi bwa bya binyibinyi, na badi munkwashe ngofu nsaa inadi mukinga.

Mu 1941 kifuko kyetu kibadi kitwele mu mashuwa a ndyandya bwa kwenda ku St. Louis, mu Missouri ku kikongeno kikata. Babadi balungule ba nsongwa boso bwabadya kushala pamune mu mbalo ibabadi bebalungule ibadi mu kipalwe bwabadya kupusha mwisambo wa mukwetu Rutherford awamba’shi: “Bana ba Nfumu.” Ku nfudilo kwa mwisambo waye, muntu ooso a mu kisaka kyetu badi mukaanye pakupeta mukanda upya, a wambashi: Bana, wikale bu kya buntu, ubabadi bebape kwi mukwetu Rutherford na bantu babadi abamukwasha. Kubadi ba nsongwa bakile pa 15 000 babadi bapete uno mwabi wa mu kikudi.

Mu Mweshi wa 4/1943 tubadi batwele mu ka kikongeno kapeela kadi ke na muulo kabadi na mutwe wa mwanda awamba’shi: “Un appel à l’action” mu kibundji kya Coffeyville mu Kansas. Kalasa ka mudimo wa Teokrasi kapya kababadi balombene kukita mu tukongye tooso abekakitshine kwanka bwa mususa wa kumpala, na kaka ka mukanda kapeela ke na malongyesha 52  kabatukile bwabadya kutumika nako mu kaka kalasa. Akupu mu kyakya kipwa kimune, nadi mukite mwisambo wande wa kumpala. Bwande’mi kyakya kikongeno kibadi kya pabwakyo, nadi mubatshishibwe mwanka pamune na bangi benami balume babidi mu kishiba kimune ki mema e butshafu.

Nadi mupudishe kalasa mu 1951, na bibadi abitungu’shi ngate bitshibilo bikata pabitale mafuku e kumpala. Lukalo lwande lukata lubadi lwa kufuba ku Betele, Jerry baadi afubu kwanka kumpala, ami nkutuma mukanda wande mususa umune ku biro bya ku Brooklyn. Kino kitshibilo kibekele bu bukwashi bukata bwa pabwabo bwa mu kikudi. Mu mafuku apela, babadi baluule ku wawa mukanda unatumine, na abo nkungitamina bwa kubanga kufuba ku Betele mu 10/03/1952.

Nadi nakulupila kufuba mu kibambalo kya mikanda bwa kukwasha mu kutusha kwa ma jurnale na ingi mikanda. Anka, babadi bampe mudimo wa kutulanga bidibwa ku mesa, kunyima abo nkutuma bwa nkafuba mu kikuku, ne mulongye myanda ibungi mwanka. Byabya kasha tabantumine mu kufuba mu kibambalo kya mikanda. Anka, mushindo ubabadi babofushe mudimo wa mu kikuku ubadi unkwashe na wampa mushindo wa kupeta nsaa ya kwilongyela na kukimbuula mu mikanda i mu mbalo yabalaminaa mikanda ku Betele. Bino bibadi binkwashe bwa kunyinga mu kikudi na kunyingisha lukumino lwande. Bibadi binyingishe dingi kitshibilo kyande kya kufubila Yehowa ku Betele mafuku oso andi mukumbene kwikufuba. Jerry badi mukatukye ku Betele mu 1949 aye nkwibakila Patricia, anka babadi bashale pepi na Brooklyn. Babadi abankwasha nsaa yoso na kunyingisha mu bipwa byande bya kumpala ku Betele.

Mafuku apela kunyima kwa’mi kufika ku Betele, babadi bate mpango ya kufundisha bakwetu balume bebungi ku esaki dya Betele bwa bantu abakitaa miisambo. Bakwetu babadi bafundjibwe ku dyadya esaki, abadi abebatumu mu kipwa kimune bwa nkatala tukongye mu ma mbalo e mu bilometre 322 ku lupese lwa Brooklyn bwabadya nkakita miisambo ya bantu boso na bwabadya kulungula mukandu wibuwa pamune na tukongye. Nadi mupete mwabi ukata wa kumona eshina dyande ku dino esaki. Nabangile kukita mwisambo wande wa kumpala na kenyongoshi kakata, dingi nadi mwiukite munda mwa peepi na nsaa mushima. Nadi nende mu kutala tukongye na mashuwa a ndyandya. Natentekyesha kipungo kya hiver mu dya lubingo kunyima kwa midi mu kipwa kya 1954, nadi mwende na mashuwa mutadiile dya ku New York nadi mupushe nka bya kwaluka ku Betele ku mbangilo kwa kyolwa. Anka, kubadi kukitshikye kipapi kibukopo kibadi kibweshe lufufi na ma neje. Myoshi ya kaalo ka nsembwe ya mu mashuwa ibatshibikile na abadi akutwe bukume. Ku nfudilo, mashuwa abayimene mu New York mu nsaa ya 5h00 (pakutooka) mu dimune. Kubanga nka yaya nsaa, natshile mashuwa nenda ku Brooklyn bwa nkabanga mudimo mu kikuku, kapindi kapeela na kukooka kunadi nako kunyima kwa kushala bufuku bushima mu ki mashuwa kishii buwa. Anka ino nkalakashi ibadi ishadile pe muloo unadi nao wa kufubila bakwetu na kwibunga pamune na bakuuku bapya mu luno lubingo lwi pa bwalo.

Mu kipwa kyande kya kumpala ku Betele, abadi bangitanyine bwandya kufuba ku kisaashi kya WBBR. Kino kisashi kibadi mu kitenta kya kabidi kya nshibo ya mu 124 Columbia Heights. Abadi bampe mudimo wa kwikala umune a ku bantu abalongo Bible mu programe ababadi abalesha ku lubingo. Mukwetu Macmillan, badi mufube munda mwa bipwa bibungi mu kifuko kya Betele, badi mufube misusa ibungi mu uno programe a ku kisaashi. Uno mukwetu andi mufule abetanyinaa bu mukwetu Mac, badi bu kileshesho kibuwa kwi’twe ba nsongwa ba mu kifuko kya Betele kya muntu munyingiile mu mudimo wa Yehowa.

Mu kipwa kya 1958 napetele lungi lwitanyino lwa kufuba ku kalasa ka Gileade. Mudimo wande ubadi wa kukwasha bakwetu babapu kano kalasa bwabadya kupeta mikanda y’eshinda na akupu nkulubulwila bano bakwetu basha katshintshi bwabadya kwenda mu maumbo ababadi bebatume. Mu byabya bipwa, lwendo lwa mu ndekye lubadi alutungu makuta akile bungi, ngi bwakinyi nka penda bantu bapeela abatwele mu kano kalasa ngi abadi abende lwendo lwa mu ndekye. Bebungi babadi abende mu Afrique na mu maumbo a ku lupese lwa kutunduka nguba e kula, babadi abende mu mashuwa a mema. Pababangile mudimo wa ma ndekye a ba nsunga, lwendo lwa mu ndekye lubayikile muulo na kubanga nka paapa ba misionere bebungi bababangile kwata ma ndekye bwa kwenda mu ma mbalo abadi bebatume.

Mu kipwa kya 1960, mudimo wande ubatamine ngofu mwanda nadi nalumbuula lwendo lwa ku ndekye lwa bantu abakatuka mu États-Unis bwabadya kwenda mu Europe mu kikongeno kya maumbo  ebungi kibakitshikile mu kipwa kya 1961. Tubadi batushe makuta bwa kwashima ndekye bwa kukatuka ku New York na kwenda ku Hamburg, mu Allemagne, bwa nkatwela mu kino kikongeno. Kunyima kwa kikongeno, ami na bangi bakwetu basatu babatudi nabo ku Betele tubaatshile mootoka kukatuka mu Allemagne na ku Italie, bwa nkatala biro bya filiale bya mu Rome. Pabatudi kwakwa, tubakatukile twenda mu France, twakila mu myengye yabetanyinaa bu Pyrénées atwe nkutwela mu Espagne, mubabadi bakandjikye mudimo wetu. Tubadi na mushindo wa kupa bantu imo mikanda yetu, ibatudi abanyina bu bya buntu byatutumina bakwetu ba mu Barcelone. Tubadi na muloo wa kwimonena na bano bakwetu! Tubayile na mootoka ku Amsterdam, atwe nkwata ndekye bwa kwenda mu New York.

Kunyima kwa kipwa kimune ku Betele, abampeele mudimo wa kulumbuula nyendo bwa bakwetu abende ku bikongeno bya maumbo esangye bibadi abikitshika mu nsenga ishima. Mu kikongeno kibadi na mutwe wa mwanda awamba’shi: « La bonne nouvelle éternelle » kibakitshikile mu kipwa kya 1963, kubadi kwatshibwe mpango ya’shi bantu 583 ba mu maumbo elekene a mu nsenga ishima bakatwele mu kino kikongeno mu Europe, mu Asie, na mu Pacifique Sud, na bano bantu babadi bafudishe kwifunya kwabo mu bibundji bu mu Honolulu, Hawaï, na mu Pasadena, mu Californie. Bamo bantu babadi mu luno lwendo babadi bemane mu eumbo dya Liban na mu Jordanie bwabadya kwenda na kwifunya mu kukimbuula ingi myanda mu maumbo ababafundile Bible. Kukatusha kulumbuula lwendo lwa bantu na kwibakimbila ma mbalo ku ma hotel, kibambalo kyetu ku Betele kibapetele mikanda y’eshinda bwa bakwetu boso babadi na kya kwimana mu maumbo ebungi.

Kipwa kya 1963 kibadi kipwa ki pa bwakyo kwandi bwa kangi kabingilo. Mu 29/06, nadi mwibakile Lila Rogers a mu Missouri, badi mutwele mu kifuko kya Betele bipwa bisatu kumpala. Lubingo lumune kunyima kwa kwiyibakishena, ami na Lila tubayile mu lwendo lwa kwifunya mu nsenga ishima atwe nkwenda mu Grèce, mu Égypte, na mu Liban. Tubakitshine ka lwendo kepi mu ndekye akatuka mu Beyrouth bwa nkapona mu ka kipalwe kapeela ka mu Jordanie. Bu bibabadi bakandjikye mudimo wetu mu eumbo, bibabetulungwile’shi ba Temwe ba Yehowa tabakwete kwibapa mikanda y’eshinda bwabadya kutwela mu Jordanie, tubabangile kwiyipusha akikakitshika patukafiki mwanka. Tubadi bakeme ngofu pa kumona’shi nsaa ibatufikile mwanka, tubamwene kisaka kya bantu bemane ku nsongo kwa kipalwe kya ndekye mbakwate kilamba kifunde’shi: “Tubenukuukilayi ba Temwe ba Yehowa”! Tubadi na muloo wibungi wa kumona mususa wa kumpala maumbo ababadi bafunde Bible! Tubayile mu kutala ma mbalo ababadi bashale kwi ba nfumu ba bifuko ba kala, mu ma mbalo mubabadi balungule mukandu wibuwa kwi Yesu na balongi baye, na mu ma mbalo mubabangile kupalakana lulangwilo lwa bena kidishitu mpa na kufudile nsenga.—Bikitshino 13:47.

Munda mwa bipwa 55, Lila badi mwinami badi anshindikila mu ma mbalo oso ababadi abetutumu bwa kufuba. Twi bapete mushindo wa kwenda mu Espagne na mu Portugal misusa ibungi mu mafuku ababadi bakandjikye mudimo wetu mu ano maumbo. Tubadi na mushindo wa kukankamika bakuuku betu na kwibatwadila mikanda na bingi bintu bibabadi nabyo lukalo. Tubadi bapete mpa na mushindo wa kutembela bamo bakwetu bedibwe mu lukano lwa basalayi lwa mu Cádiz, mu Espagne. Nadi na muloo wibungi mwishimba  dyande wa kupeta mwabi wa kwibakankamika ku bukwashi bwa mwisambo wa mu Bible.

Munda mwa bipwa bibungi kubanga mu kipwa kya 1963, ne mupete mwabi wa kukwasha mu kulumbuula bikongeno bibadi abikitshika mu maumbo elekene a mu Afrique, mu Australie, mu Amérique a pankatshi na kuushi, mu Europe, maumbo e ku lupese lwa kutunduka nguba, mu Hawaï, mu Nouvelle-Zélande, na mu Puerto Rico. Ami na Lila twi bapete muloo wa kutwela pamune mu bikongeno byatushi balombene kuluba, mpa na kya mu Varsovie, mu Pologne, kibakitshikile mu 1989. Bakwetu bebungi ba mu Russie babapetele mushindo wa kutwela mu kikongeno kikata—bwa mususa wa kumpala! Bakwetu bebungi babatudi bafumankane nabo babadi bakishe bipwa bibungi mu lukano pa mwanda wa lukumino lwabo mu Union Soviétique.

Nadi mupete mwabi ukata pami kwenda na kwifunya mu nsenga ishima mu kutala na kunyingisha bena bifuko bya Betele na ba misionere. Mu lwendo lwa nfudilo lubatudi bende mu kutala filiale a mu Corée du Sud, tubapetele mushindo wa kwimonena na bakwetu 50 babadi mu lukano lwa mu Suwon. Bano bakwetu boso abadi baleshe binangu bibuwa na babadi abakulupila’shi abatungunuka dingi na mufubo wabo. Kwimonena nabo ngi mwanda ubadi unkankamikye ngofu!—Beena-Looma 1:11, 12.

Ne mumone Yehowa kwelela mwilo waye myabi na mwilo waye nkutama mu kukila kwa bipwa, kubadi penda balungudi 100 000 nsaa inatambwile mu kipwa kya 1943, binobino kwi bantu bakile pa 8 000 000 bakwete kulangwila Yehowa mu maumbo 240. Bino mbikambe kukitshika pa mwanda wa mudimo wa bulungudi wabadi bakunkushe kwi balongi ba ku Gileade. Nadi na muloo ukata wa kufuba pamune na ba misionere bebungi na kwibakwasha bwabadya kwenda mu ma mbalo abadi bebatume!

Ne na muloo wibungi wa kwata kitshibilo ami ki mukinga kya kutamisha mudimo wande pa kuteka bwa kutwela ku Betele. Yehowa mmungyelele myabi ibungi mu matabula ooso a mu muwa wande. Kunundu kwa mwabi wa kufuba ku Betele, munda mwa bipwa bibungi ami na Lila twi na muloo wa kufuba mu bulungudi pamune na tukongye twa mu Brooklyn, mwatudi bekwatene na bakuuku batudi bayishe nabo ngofu.

Mudimo wande wa ku Betele uki’autungunuka na Lila kwete kunkwasha efuku dyoso. Sunga mbitandi na bipwa bikile pa 84 lelo uno, ne na ngobesha ya kufuba, na kukwasha mu kusemuna mikanda yabatumina tukongye kwi biro bya filiale.

Ne na muloo ukata wa kwikala mu ndumbulwilo a Yehowa na kumona kwilekena kukata kwi pankatshi pa bantu abafubila Yehowa na bashi’abamufubila. Twi balombene kupusha kalolo mayi e mu Malaki 3:18: “Anumono kwilekeena kwi pankatshi pa mululame na mubi, afubila Efile Mukulu na shyamufubila.” Efuku dyoso adikidi, tukwete kumona mushindo ukwete kulwila ndumbulwilo a Satana, muule na bantu bashii na lukulupilo be na ka muloo kapeela mu muwa wabo. Anka bantu boso bafule na abafubila Yehowa be na nshalelo a muloo—sunga mbyatudi mu ano mafuku e bubi—na dingi be na lukulupilo lwa binyibiniyi bwa mafuku aafiki. Twi na mwabi ukata wa kupalakasha mukandu wibuwa wa Bufumu! (Mateo 24:14) Twi na kisukusuku kya kumona binobino efuku dyabakafudisha uno ndumbulwilo e bubi na kutwela mu ndumbulwilo mupya akafiki na myabi ibungi yabadi betulee, bu kukatusha mikumbo na kupeta muwa ishi na nfudilo. Akupu, bafubi ba Yehowa boso basha lulamato abakekala pano pa nsenga abakapete muwa wa ikalaika.