1, 2. (a) Kushintuluka akwitufikila mu kimpulunkamba nkulombene kwikala na bukitshishi kinyi kwatudi? (Tala kifwatulo ki ku mbangilo.) (b) Muyile mukanda wa Misambo 131, nkinyi kilombene kwitukwasha bwatudya kwikala na butaale bwa mwishimba?

LLOYD na Alexandra mbafube ku Betele munda mwa bipwa bikile pa 25, kunyima babebatumine mu ingi mbalo bwabadya nkalungula mukandu wibuwa. Ku mbangilo, abadi benyongole ngofu. Lloyd akula’shi: “Nadi napusha’shi mudimo wande wa ku Betele ngi undombene. Mu binangu byande nadi musankile tubingilo tubabadi bashintulwile mudimo wetu, anka mu mbingo na mu myeshi ibalondele, misusa ibungi nadi napusha’shi babetusumbushena.” Ingi nsaa Lloyd badi apusha binangu bibuwa abimufwila pabitale kushintuluka kwa mudimo wabo, anka ingi nsaa namu badi enyongola ngofu.

² Ku nsaa na nsaa, kukwete kukitshika kushintuluka kwa mu kimpulunkamba mu muwa wetu, na kuno kushintuluka nkulombene kwitwinyongosha. (Nkindji 12:25) Nsaa yatupusha bukopo bwa kukumina kushintuluka, twi balombene kukita kinyi bwa kulama butaale bwa mwishimba? (Badika Misambo 131:1-3.) Tubandeyi kutala mushindo  ubabadi bapete bya kulama butaale bwa mwishimba kwi bafubi ba Yehowa ba kala mpa na ba ano mafuku nsaa ibabadi bapete kushintuluka kubadi kwibafikile mu kimpulunkamba.

3. Nshalelo a Yoosefe badi mushintulukye mu kimpulunkamba naminyi?

³ Banda kwela binangu ku kileshesho kya Yoosefe. Yoosefe ngi mwana ababadi bakumine ngofu kwi Yaakobo mu bana baye boso. Bino bibadi bitakule bakwabo bwabadya kumukwatshila kyutu. Pabadi Yoosefe na bipwa 17, abamupaanyine bu mpika. (Kibangilo 37:2-4, 23-28) Badi mukyengye mu Ejiipitu munda mwa bipwa 13, bu mpika akupu badi mukyengye mu lukano. Yoosefe badi kula ngofu na nshaye, abadi mufule ngofu. Uno nshalelo aaye badi mulombene kumutakula bwadya kushimisha lukulupilo na kufita munda, anka ta mukite bino nya. Nkinyi kibadi kimukwashe?

4. (a) Yoosefe badi akitshi kinyi pabadi mu lukano? (b) Yehowa badi mwalule nteko ya Yoosefe naminyi?

⁴ Pabadi Yoosefe akyengye mu lukano, badi mulombene kutula binangu byaye ku mushindo wabadi balombene kumukwasha kwi Yehowa. (Kibangilo 39:21; Misambo 105:17-19) Pangi badi mwele binangu ku kilootwa kya butemuki kibadi mumone pabadi ki mwana mukinga na badi apusha’shi Yehowa e naye. (Kibangilo 37:5-11) Pangi badi eele nteko misusa ibungi na kulungula Yehowa myanda yoso i mwishimba dyaye. (Misambo 145:18) Yehowa namu balulwile nteko ya Yoosefe paye kumushinkamisha’shi Akekala “naye” sunga afumankana na mwanda wi naminyi.—Bikitshino 7:9, 10. *

5. “Butaale bw’Efile Mukulu” mbulombene kwitukwasha bwatudya kwikala na kitshibilo kya kutungunuka na kufubila Yehowa naminyi?

⁵ Sunga twekala na mwanda wi bukopo bwi naminyi, twi balombene kupeta “butaale bw’Efile Mukulu” abo abulama “mashimba . . . na binangu” byetu na kwitukwasha bwatudya kwikala na butaale. (Badika-Fidipe 4:6, 7.) Nsaa yatudi benyingole na patudi bakalakashwe, “butaale bw’Efile Mukulu” mbulombene kwitunyingisha bwatudya kutungunuka na kufubila Yehowa na kupela kutshooboloka. Tubandeyi kutalula bileshesho bya bakwetu balume na bakashi ba mu ano mafuku eetu bafumankane na uno mwanda.

6, 7. Nteko yetu ngilombene kwitukwasha bwa kupeta butaale bwa mwishimba naminyi? Tuusha kileshesho.

⁶ Nsaa ibapushishe Ryan na Juliette’shi mudimo wabo wa bu ba mbala mashinda ba nsaa yoso bakwashi ubapu, abadi batshobolokye ngofu. Ryan akula’shi: “Tubalungwile Yehowa uno mwanda mu luteko nkatwe baki’abeupusha. Tubaukile’shi uno mwanda awitukwasha bwatudya kulesha’shi twi bakulupile mwadi. Bantu bebungi ba mu kakongye ketu babadi baki bapya mu bya binyibinyi, ngi bwakinyi tubatekyele bwa’shi Yehowa etukwashe bwatudya kwibalekyela kileshesho kibuwa pa kulesha lukumino.”

⁷ Yehowa badi mwaluule ku luteko lwabo naminyi? Ryan akula’shi: “Mususa umune kunyima kwa’twe kwela luteko, binangu bibubi na kinyongwa kibatudi bapushe kumpala bibakatukile. Butaale bw’Efile Mukulu bubadi bulame mashimba eetu na binangu byetu. Tubamwene’shi twi balombene kutungunuka na kufubila Yehowa su twekala na binangu bibuwa.”

8-10. (a) Kikudi ky’Efile Mukulu nkilombene kwitukwasha nsaa yatudi na twinyongoshi naminyi? (b) Yehowa mulombene kwitukwasha nsaa yatutuulu binangu mu kumufubila naminyi?

⁸ Kikudi ky’Efile Mukulu nkilombene kwitupetesha butaale, na dingi ki kwituludika bwatudya kupeta ma verse a mu Bible alombene kwitukwasha bwa kushinguula mwanda wi na muulo ukata mu muwa wetu. (Badika Yowano 14:26, 27.) Banda kutala uno mwanda ubadi ufikile Philip na Mary, ungi mulume na mukashi babadi bafube ku Betele munda mwa bipwa bifikye ku 25. Munda mwa myeshi inanka, ba nyinabo boso babidi na bangi bakwabo babafwile, na bibadi abitungu’shi  bende bakalame nshaye na Mary, badi na mukumbo wa mu bongo wabetanyinaa bu démence.

⁹ Philip akula’shi: “Nadi nanangushena’shi nkwete kukila na ino myanda kalolo, anka kwi kintu kinadi mukutwe. Napetele mukanda wa Beena-Kolose 1:11 panadi nabadika mwisambo wa kulonga wi mu Kitenta kya Mulami. Eyendo’shi nadi nanyingiila uno mwanda, anka ntshinadi neunyingiila kalolo nya. Bibadi abitungu’shi neunyingiile na “lwishinko looso . . . na kusepeela.” Uno verse badi muntentekyeshe’shi kwikala na muloo mu nshalelo ande takutuukila mu nshalelo andi naye nya, anka akutuukila ku bukitshishi bwi na kikudi ky’Efile Mukulu mu muwa wande.”

¹⁰ Bu bibadi Philip na Mary bashale batuule binangu byabo mu kufubila Yehowa, badi mwibelele mwabi mu mishindo ibungi. Mafuku apeela kunyima kwa’bo kukatuka ku Betele, boso bwabo abapetele balongi ba Bible babadi abende ku meso na babadi abakumina kulonga Bible misusa ibungi ku lubingo. Mary akula’shi: “Babadi abetupetesha muloo wibungi na uno ngi mushindo ubadi Yehowa etulungula’shi myanda yoso ayende na kulumbuluka.”

11, 12. (a) Yoosefe bakitshine mwanda ubabadi balombene kwelela mwabi kwi Yehowa naminyi? (b) Yehowa badi mufute Yoosefe naminyi?

¹¹ Nsaa ayishintuluka nshalelo eetu mu kimpulunkamba, twi balombene kwinyongola mu kipaso kyatudi balombene kubanga kwela binangu ku myanda yetu. Pangi uno mwanda ubadi ukitshikile Yoosefe. Anka, basangwile bwadya kukita myanda ibuwa muyile ngobesha yaye na nshalelo aaye. Nka bu bibadi Yoosefe afubu ngofu ku nshibo ya Potifare, badi afubu dingi ngofu nsaa ibadi mu lukano pababadi abamupa mudimo oso wawa kwi mukata a bena lukano.—Kibangilo 39:21-23.

¹² Dingi efuku, abapeele Yoosefe mudimo wadya kwikala alama bangi bena lukano babidi babadi abafubu mu ebalasa dya nfumu Faraone. Yoosefe badi mwibaleshe kalolo, na bano bantu abadi bepushe bibuwa mu kipaso kibabadi bamulungule myanda ibadi ayibakalakasha na bilootwa bibabadi bamone bufuku bwa dyadya efuku. (Kibangilo 40:5-8) Yoosefe tabadi auku nya, anka uno mwisambo wabo ubadi umutwale mu kutushibwa mu lukano. Kunyima kwa bipwa bibidi, abadi bamutuushe mu lukano abo nkumutuula bu mukunkushi mu Ejiipitu. Nka penda Faraone ngi badi na matalwa kukila a Yoosefe!—Kibangilo 41:1, 14-16, 39-41.

13. Twi kukita myanda mu mushindo wabadi balombene kwitwelela myabi kwi Yehowa patudi kumpala kwa mwanda wibukopo naminyi?

¹³ Nka bu Yoosefe, twi balombene kwikala na mwanda witutabukile. Anka su tubekale na lwishinko na kukita myanda ibuwa muyile ngobesha yetu, Yehowa aketwelela myabi. (Misambo 37:5) Mpa na mu nsaa yatumono’shi myanda ibetukidi bungi na patudi na twinyongoshi, tatukashala bantu “bafudiile” sunga kushimisha lukulupilo nya. (2 Beena-Kodinda 4:8) Yehowa akekala netu, bikishekishe su tubashala batuule binangu byetu ku mudimo wetu wa bulungudi.

14-16. Fidipe mulungudi a mukandu wibuwa badi mutuule binangu byaye ku mudimo wa bulungudi pabadi pashintulukye nshalelo aaye naminyi?

¹⁴ Fidipe mulungudi a mukandu wibuwa badi kileshesho kibuwa kya muntu mutuule binangu byaye ku mudimo wa bulungudi sunga mbibadi bishintulukye nshalelo aaye. Ungi mususa, badi na muloo wa kupeta mudimo upya mu Yeelusaleme. (Bikitshino 6:1-6) Kunyima kwa kwipaa Etshyene. Bena Kidishitu abapetele kubingwabingwa kwi bukopo, na bakatuka mu Yeelusaleme. Mwanda Fidipe badi akumina kutuula binangu byaye mu kufubila Yehowa, ngi bwakinyi bayiile mu kibundji kya Samadiya, mubadi bantu be na lukalo lwa kupusha mukandu wibuwa.—Mateo 10:5; Bikitshino 8:1, 5.

¹⁵ Fidipe badi akumina kwenda mu mbalo yoso mwabamukunkusha kwi kikudi ky’Efile Mukulu. Ngi bwakinyi Yehowa bafubile naye bwadya kwenda mu kulungula mu ma mbalo mwi bantu bashi’abandile kupusha mukandu wibuwa. Bena Yuuda bebungi abayile mu Samadiya mu kwibakyengyesha. Anka Fidipe tabadi na ntondo nya, na badi mwibalungule mukandu wibuwa. Bena Samadiya namu abadi bamuteemeshe “n’eshimba dimune”!—Bikitshino 8:6-8.

¹⁶ Akupu, kikudi ky’Efile Mukulu kibakunkwishe Fidipe bwadya kwenda mu kulungula mukandu wibuwa mu bibundji bya mu Ashedode na mu Kezaree, na mu bino bibundji mubadi bantu ba milo yabene bebungi. (Bikitshino 8:39, 40) Dingi Nshalelo a Fidipe bashintulukile. Badi mwalale kuushi na kifuko kyaye. Anka mu mishindo yoso mubadi nshalelo a Fidipe mushintulukye, badi nka mwipaane mu mudino wa bulungudi, na Yehowa batungunukile na kumwelela myabi aye na kifuko kyaye.—Bikitshino 21:8, 9.

17, 18. Nsaa ayishintuluka nshalelo eetu, kwikala bepaane mu mudimo wa bulungudi nkulombene kwitukwasha naminyi?

¹⁷ Bantu bebungi be mu mudumo wa nsaa yoso bakwete kwakula’shi kutula binangu ku mudimo wabo akwibakwasha bwabadya kwikala na muloo na binangu bibuwa sunga nshalelo aabo ashintuluka. Bu kileshesho, pabadi ungi mulume na mukashi ba mu Afrique du Sud babetanyinaa bu Osborne na Polite bakatukye ku Betele, abadi abeele meshi’shi mbilombene kwikala bibofule bwabadya kupeta mudimo wabafubu munda mwa mafuku apeela ku lubingo na kupeta mbalo ya kushala. Anka Osborne akula’shi: “Mwanda wa malwa, mudimo wa ku mbidi ta ngumwenekye bukidi bu bibatudi atupwandikisha nya.” Polite namu akula’shi: “Twi bakite myeshi isatu kushii kupeta mudimo, na tatubadi na makuta nya. Tubadi na lukalakashi lukata.”

¹⁸ Nkinyi kibakwashishe Osborne na Polite mu uno mwanda ubadi awibenyongosha? Osborne akula’shi: “Kulungula mukandu wibuwa pamune na bakwetu ba mu kakongye nkwitukwashe ngofu bwatudya kutuula binangu byetu ku mudimo wa  bulungudi na kwikala na binangu bibuwa.” Pamutwe pa kushala penda ku nshibo na twinyongoshi, abaatshile kitshibilo kya kwikala na bibungi bya kukita mu mudimo wa bulungudi. Kukita bino kubadi kwibapeteshe muloo wibungi! Na dingi Osborne alombasha’shi: “Tubatungunukile na kukimba midimo, atwe nkwiyipeta kunyima kwa mafuku.”

19-21. (a) Nkinyi akiketukwasha bwatudya kulama butaale bwa mu binangu? (b) Mushindo kinyi watudi balombene kupeta myabi nsaa ayishintuluka nshalelo eetu mu kimpulunkamba?

¹⁹ Nka bu bibatukatuka mu kwibimona, su tubakimbi bya kumona myanda ibuwa mu nshalelo eetu na kukulupila mwi Yehowa n’eshimba dimune, atukapete ngobesha ya kutungunuka na kulama butaale bwa mu binangu sunga twekala kumpala kwa mwanda wi naminyi. (Badika Mika 7:7.) Ingi nsaa, twi balombene kumona’shi su tubekala na nkatshinkatshi mu kushintuluka kwatupete, atunyingisha kipwano kyetu na Yehowa. Polite apatuula’shi kukatuka kwabo kwa ku Betele nkumulongyeshe bwadya kuuka akipushisha kukulupila kwi Yehowa mpa na mu mafuku abadi na nkalakashi. Akula’shi: “Kipwano kyande naye nkinyingye ngofu.”

²⁰ Mary, atudi bateemune ku mbangilo, kwete kulama nshaye tadi mununu na kwete kufuba bu mbala-mashinda. Akula’shi: “Ne mulongye’shi nsaa yoso yampusha kinyongwa, abitungu ngimane, ngyele luteko, akupu ngikishe. Kutuula myanda yoso mu maasa mwa Yehowa ngi dilongyesha dikata dyandi mulongye, na dingi nakekala na lukalo lwa kwiditumikila mpa na mu mafuku aafiki.”

²¹ Lloyd na Alexandra abakumina’shi kushintuluka kwabadi bapete mu muwa wabo kubadi kutompe lukumino lwabo mu mushindo wabashi’abapwandikishanga. Anka babadi balombene kumona mushindo wa kupeta bukwashi kukiila ku kino kitompwanga. Binobino abauku’shi lukumino lwabo ndunyingye ngofu mu mushindo waludi lulombene kwibasamba nsaa yabadi na myanda, na abapusha’shi binobino tabadi bantu bebuwa.

22. Su tubekala atukitshi myanda ibuwa muyiile nshalelo eetu, atwikala bashinkamishe kinyi?

²² Mu uno ndumbulwilo, nshalelo eetu mulombene kushintuluka mu kimpulunkamba. Mbalombene kwitushintuula mudimo mu ndumbulwilo a Yehowa, twi kupeta mukumbo, sunga kwikala na lukalo lwa kulama bena kifuko kyetu. Anka sunga twekala kumpala kwa mwanda kinyi, tukulupileyi’shi Yehowa etulombesha nkalo yetu na’shi aketukwasha pa nsaa ilombane. (Beena-Ebelu 4:16; 1 Mpyeele 5:6, 7) Na dingi, kubanga binobino tukiteyi myanda ibuwa muyile ngobesha yetu. Twele luteko kwi Nsheetu, Yehowa, na tulongye bya kukulupila kwadi n’eshimba dyetu dyoso. Su tubakitshi byabya, sunga nshalelo eetu ashintuluka naminyi, atukatungunuka na kwikala na butaale bwa mwishimba abufiki kwi Yehowa.