ETSHYENE badi kumpala kwa bantu bamushikwe. Bu bibabadi bantu abasambisha ku tumiladi tukata twa Sanedrine, ba nsushi 71 bantu bakata ba mu Isaleele. Babadi bebabungye kwi Kefase Tshiite mwakwidi mukata e pa nundu, badi mukunkushe tumiladi tukata myeshi ipeela kumpala pababadi batshibile Yesu kibawe kya lufu. (Mateo 26:57, 59; Bikitshino 6:8-12) Pababadi abatwala bantu babadi abatusha bu kamonyi bwa madimi bwa kudimbiila Etshyene, abamwene mwanda wa kukaanya ku meeso kwaye—lukyebo lwaye lubadi alumweneka “bu lukyebo lwa mwikeeyilu.”—Bikitshino 6:13-15.

Etshyene badi mulombene kwikala na butaale, kushii moo kumpala kwa uno mwanda wi bukopo naminyi? Kumpala kwabadya kwenda naye ku Sanedrine, Etshyene badi mwipaane ngofu mu mudimo wa bulungudi ku bukwashi bwa bukome bwa kikudi ky’Efile Mukulu. (Bikitshino 6:3-7) Pabadi mu lukano, kino kikudi kimune kibadi akifubu mwadi, bu kintu akimusamba na bu kintu akimutentekyesha myanda. (Yowano 14:16) Pabadi Etshyene asamba n’eshimba dinyingye, bu byabadi baleshe mu mukanda wa Bikitshino shapitre a 7, kikudi kiselele kibadi kimutentekyeshe ma verse akile pa 20 a mu Bifundwe bya kina Ebelu. (Yowano 14:26) Anka lukumino lwa Etshyene lubadi lunyishe kunyinga nsaa ibapetele kimonwa kya Yesu mwimane ku mboko ibalume y’Efile Mukulu.—Bikitshino 7:54-56, 59, 60.

Dingi efuku twi balombene kwikala kumpala kwa mwanda awitutshinyisha na kwitubingabinga. (Yowano 15:20) Su tubekala atudi myanda i mu Eyi dy’Efile Mukulu, na kwikala na katshintshi mu bulungudi, atupa kikudi ky’Efile Mukulu mushindo wakidya kufuba mwatudi. Atukapete dingi bukome bwa kunyingiila kumpala kwa bitompwanga na kulama butaale bwetu bwa mu eshimba.—1 Mpyeele 4:12-14.