1, 2. Diabulu badi mufubishe kinyi kibadi kilwishishe bantu ngofu?

BINGI bintu byabadi batushe kwi bantu, bu ma telefone, malampi, myootoka, na ma frigo, mbilongamishe nshalelo ngofu. Bimo bintu namu byabadi batushe, bu bwilu sunga nfwanda ya mu mputu, ma mine, nfwanka, na ma bombe a luwa (abetanyinaa bu bombe atomique) mbilwishe nshalelo ngofu. Anka kwi kintu kya kumpala kwa bino bintu byoso kilwishishe bantu ngofu. Nkintu kinyi? Nyi madimi! Kudimba madimi nkwakula kintu kyouku’shi ta nky’eyendo bwa kulubisha muntu. Muntu kinyi a kumpala badi mwakule madimi? Nyi Diabulu! Yesu Kidishitu badi mumwitanyine bu “Nshee madimi.” (Badika Yowano 8:44.) Nsaa kinyi ibadi mwakule madimi a kumpala?

² Badi mukite bino takudi bipwa binunu na binunu mu lupango lwa Edene. Adame na Eeva abadi na nshalelo ebuwa mu Mpaladiso ababadi bebakitshine kwi Yehowa. Efile Mukulu bebalungwile’shi su babadi kikuba kya “mutshi wa kushinguula buuwa sunga bubi,” abafu. Sunga mbibadi auku uno mwanda, Satana bafubile na nyoka bwa kulungula Eeva’shi: “Taanufu’nwe.” Ano ngi madimi a kumpala abadi mwakule. Satana bambile dingi’shi: “Efile Mukulu awuku’shi efuku dyanwikidi, meeso eenu aabuuluka, dingi anwikala bu b’efile, balombeene kushinguula buuwa na bubi.”—Kibangilo 2:15-17; 3:1-5.

3. Bwakinyi madimi a Satana abadi bubi ngofu, na mmyanda kinyi ituukye pa mwanda wa ano madimi aaye?

³ Ano madimi a Satana abadi bubi ngofu mwanda badi auku’shi su  Eeva bakumina myanda yamulungula na kudya kikuba, afu. Na bino ngi bibakitshikile. Adame na Eeva abadi bakutwe kukookyela mwiya wa Yehowa abo nkufwa kunyima. (Kibangilo 3:6; 5:5) Kunundu kwa byabya, pa mwanda wa mulwisho wa Adame, “lufu alukwata bantu boso.” Byabya, “lufu lubàdi’nka lubikale pa bantu . . . , na baba bashi balwishe kipaso kibalwishîshe Adame.” (Beena-Looma 5:12, 14, EEM) Ngi pa mwanda kinyi twi bantu bakutwe kupwidika na ta twi na muwa wa ikalaika bu bibadi abikumina Efile Mukulu. Anka, twi na muwa nka penda munda mwa ‘bipwa 70 . . . , [sunga] 80 su muntu e na mbidi bukome,’ na nshalelo mmuule nka na “makyenga na mpombo.” (Misambo 90:10) Ino myanda yoso ikwete kukitshika pa mwanda wa madimi a Satana!

4. (a) Nkonko kinyi ayitungu’shi tupete ngalulo? (b) Muyile mukanda wa Misambo 15:1, 2, mbantu nkinyi balombene kwikala ba kuuku ba Yehowa?

⁴ Yesu bakwile pabitale Satana’shi: “Tammushimatshiile mu biinyibiinyi mwanda biinyibiinyi tabi munda mwaye.” Satana ta mushintulukye nya. Ki’atungunuka nka na ‘kulubisha ba pa nsenga boso’ na madimi aaye. (Kibafumbwilwe 12:9, EEM) Anka atwe tatukumina’shi Satana etudimbe nya. Ngi bwakinyi twi na lukalo lwa kuuka ngalulo ya ku ino nkonko isatu. Satana kwete kudimba bantu naminyi leelo uno? Bwakinyi bantu bakwete kudimba? Na twi kwikala atwilungusheena bya binyibinyi nsaa yoso naminyi bwa’shi tatushimishanga kipwano kyetu na Yehowa, bu bibashimishe Adame na Eeva?—Badika Misambo 15:1, 2.

5. Satana kwete kudimba bantu naminyi lelo uno?

⁵ Twi balombene kupela bwa’shi Satana tetudimbanga. Mpoolo mutumibwa bambile’shi: ‘Mwanda tatwi balube binangu byeye nya.’ (2 Beena-Kodinda 2:11) Atuuku’shi Satana kwete kukunkusha nsenga yoso ishima, mpa na bipwilo bya madimi, mbulamatadi i bubi, na ndumbulwilo a busunga bwa bu ngifi. (1 Yowano 5:19) Ngi bwakinyi tabitukemesha pa kumona’shi Satana na ba demo baye bakwete kutakula bantu bakata bwabadya kwakula myanda ya “madimi.” (1 Timote 4:1, 2) Bu kileshesho, bangi bantu be mu myanda ya busunga bakwete kudimba bantu mu ma publicité bwabadya kuudisha bintu byabo bibubi sunga kwibadimba bwabadya kwibayiba makuta.

6, 7. (a) Bwakinyi bi bubi ngofu nsaa yabakula myanda ya madimi kwi bakata ba bipwilo? (b) Mmyanda kinyi ya madimi yodi mupushe abalongyesha kwi bakata ba bipwilo?

⁶ Abinyisha kwinyongosha bantu ngofu nsaa yabakula myanda ya madimi kwi bakata ba bipwilo. Bwakinyi? Mwanda su muntu bakumina ano malongyesha aabo a madimi na kukita myanda yabadi bashikwe kwi Efile Mukulu, uno muntu mulombene kukutwa nkapeta muwa wa ikalaika. (Osea 4:9) Yesu badi auku’shi bakata ba bipwilo ba mu mafuku aaye babadi abadimbi bantu. Badi mwibalungule patooka’shi: “Nwi baa-malwa, anwe balambukishi ba bishila na Baafadisee baasha-mpala ibidi, anwe abatambakana mu meema a kalunga na mu nsenga yooso bwa kupeta mulondji umune; paanumupete, anumupiisha misuusa ibidi kwinukila bwa’shi atwele mu [Ngeena],” kwamba’shi, mu kabutu ka ikalaika. (Mateo 23:15) Yesu bambile’shi baba bakata ba bipwilo babadi nka bu nshabo Diabulu, kwete “kwipaisha bantu.”—Yowano 8:44.

⁷ Mpa na lelo uno namu kwi bakata ba bipwilo bebungi. Bakwete kwibetanyina bu ba mpashiteele, ba tshite mwakwidi, ba Labi, ba swamis (bakata ba kipwilo kya ba hindous) sunga mu ingi myasu. Nka bu Baafadisee, tabakwete kulongyesha bantu bya binyibinyi bi mu Eyi dy’Efile Mukulu nya, anka “mbashintule biinyibiinyi by’Efile Mukulu ku madimi.” (Beena-Looma 1:18, 25) Amune a ku malongyesha aabo a madimi ngano: iferno a kaalo, bantu be na anyima shafwiyaa, bantu bafwe abatandjibwaa dingi, na’shi Efile Mukulu akumina lusandji lwa mulume na mulume sunga  mukashi na mukashi na kwiyibakishena kwa mulume na mulume sunga mukashi na mukashi.

8. Mmwanda kinyi wa madimi wabakyebe kwakula binobino kwi bakata ba politike, kadi abitungu tukite naminyi?

⁸ Na bakata ba politike namu bakwete kwakula myanda ya madimi bwa kulubisha bantu. Amune a ku madimi akile bukata abakyebe nkakula binobino nga’shi abatwesha “kufukama na kwiyikeela” mu nsenga. Anka kunyima kwa’bo kwakula bino “yawa ngi nguba eebapulukila kabutu musuusa umune.” Ngi bwakinyi tatukumanga kukumina myanda yabakula kwi bano bakata ba politike’shi myanda ikwete kulumbuluka. Mwanda wa binyibinyi wi’shi ‘atuuku kalolo’shi efuku dya Yehowa adikafiki bu ngifi bufuku.’—1 Beena-Tesalonika 5:1-4.

9, 10. (a) Bwakinyi bantu abadimbaa, na mbipeta kinyi bi bubi bitushe ano madimi? (b) Abitungu tutentekyeshe kinyi pabitale Yehowa?

⁹ Lelo uno, ta nka penda bantu be na matalwa ngi bakwete kudimba nya. Mwisambo wa Yudhijit Bhattacharjee, wi na mutwe wa mwanda awamba’shi “Akitutakulaa mu kudimba,” awamba’shi: “Mbasangane’shi madimi nyi eyikashi adikalaa dishimate ngofu mwi bantu.” Mu ungi ngakwilo, bantu abanangushena’shi madimi nyi mwanda wabadi betupangye nao na’shi ta e bubi nya. Bantu abadimbaa misango ibungi pa mwanda wa kudila kwikalwila, pangi bwa kudila kufya bilubilo sunga bibeshi byabadi bakite. Na dingi abadimbaa bwabadya kupeta makuta sunga kupeta buwa kampanda. Uno mwisambo awamba dingi’shi bangi bantu tabapushaa bibubi nsaa yabadimbi “bantu beenyi, bena mufubo nabo, bakuku sunga baloole babao, na bantu babadi bafule nya.”

¹⁰ Ano madimi ngatushe bipeta kinyi? Bantu ta be na lukulupilo mwi benabo, na bino bikwete kulwisha kipwano ki pankatshi pabo. Bu kileshesho, banda kunangushena mulume e na lulamato byadi mulombene kutapika kwishimba nsaa yakauku’shi mukashi’aye ekalanga mukite mwanda wibubi akupu amudimba bwa kufya kilubilo kyaye. Sunga’shi banda kunangushena bilombene kwinyongola mukashi na bana nsaa yabamono’shi mulume kwete kwibakitshina myanda ibubi ku nshibo, kadi nsaa yabadi munkatshi mwa bantu, adimbi kwibalesha’shi mmwibafule na kwete kwibapasukila. Bano bantu mbalombene kudimba bangi bantu nabo, anka abitungu tutenkyeshe’shi ta mbalombene kudimba Yehowa nya. Bible amba’shi “[bintu] byooso bii mwasa ku meeso kwaye. Aye ngi atudi naa kya kulubwila byooso.”—Beena-Ebelu 4:13.

11. Kileshesho kibubi kya Ananii na Safire akitulongyesha kinyi? (Tala kifwatulo ki ku mbangilo.)

¹¹ Mu Bible, mwi kileshesho kya mulume na mukashi bena Kidishitu bababadi batakule kwi Satana bwabadya kudimba Efile Mukulu. Ananii na Safire abatompele kudimba batumibwa. Abadi baudishe efuba dyabo akupu, abo nkutusha kipindji kya makuta kwi batumibwa. Ananii na Safire abadi abakyebe kukemesha bangi bantu mu kakongye, ngi bwakinyi babalungwile batumibwa’shi abatusha makuta ooso. Anka Yehowa badi auku’shi bakwete kudimba, aye nkwibanyooka.—Bikitshino 5:1-10.

12. Nkinyi akikafikila bantu boso abadimbi madimi kushii kwilanga, na bwakinyi?

¹² Yehowa apushaa naminyi pabitale bantu abadimbaa? Bantu abadimbi madimi bashi’abelanga abakebeele mu “eshiba aditembe kaalo” nka bu Satana. Kwamba’shi, abakebabutula bwa ikalaika. (Kibafumbwilwe 20:10; 21:8; Misambo 5:6) Bwakinyi? Mwanda Yehowa amonaa bano bantu abadimbi madimi mu mushindo umune wamonaa bangi “bantu babi” boso abakitshi myanda ibubi ku meso kwaye.—Kibafumbwilwe 22:15, Kilombeno kipya.

13. Nkinyi kyatuuku pabitale Yehowa, na bino abitutakula bwatudya kwikala atukitshi kinyi?

¹³ Atuuku kalolo’shi Yehowa “ta mmuntu bwa kudimba” nya na’shi “Efile Mukulu t’eûku kudimba, ooo.” (Mbadiko 23:19; Beena-Ebelu 6:18, EEM) ‘Yehowa mmushikwe . . . ludimi lwa  madimi.’ (Nkindji 6:16, 17) Su atukumina kumusankisha, abitungu twikale atwakula binyibinyi. Ngi bwakinyi tatwikalanga ‘atwidimbeena.’—Beena-Kolose 3:9.

14. (a) Nkinyi kikashe bena kidishitu ba binyibinyi bu bantu belekene na bena bipwilo bya madimi? (b) Patuula eyi dya kulonda di mu Luka 6:45.

¹⁴ Bena Kidishitu mbelekene na bena bipwilo bya madimi mu mushindo pabwao naminyi? ‘Atwilungusheenaa myanda ya biinyibiinyi.’ (Badika Sekadya 8:16, 17.) Mpoolo bambile’shi: “Atwileesha atwe banabeene mu byooso bu bafubi b’Efile Mukulu, . . . na bishima bya biinyibiinyi.” (2 Beena-Kodinda 6:4, 7) Na dingi Yesu bambile’shi bantu abakulaa muyiile ‘kyaakya akituuku mwishimba.’ (Luka 6:45) Bino abipushisha’shi muntu mululame akulaa nka bya binyibinyi. Akulaa bya binyibinyi kwi bantu benyi, bena mudimo naye, bakuku baye, na kwi bantu baadi mufule. Tubandeyi kwisambila bimo bileshesho abilesha mushindo watudi balombene kulesha’shi tukwete kwikitshisha bwa kwikala bantu balulame mu myanda yoso.

15. (a) Bwakinyi bibubi kwikala na nshalelo a mpala ibidi? (b) Nkinyi kilombene kukwasha ba nsongwa bwabadya kupela kukita myanda yabebatakula kwi benaabo? (Tala mayi e kuushi kw’esaki.)

¹⁵ Su we nsongwa, we kwikala na lukalo lwa’shi benobe bekale bakufule. Anka pa mwanda wa luno lukalo, bamo ba nsongwa be na nshalelo a mpala ibidi. Abakula’shi be na binangu bitookane nsaa yabadi na bakwabo na bantu ba mu kakongye, anka nsaa yabesamba na bantu ku Internete na pabadi na bantu bashi’abafubila Yehowa, abalesha ungi mwikelo. Mbalombene kwikala abakula myanda ibubi, abafwala nfwadilo e bubi, abateemesha misambo i na bishima bi butete, abakwatshika maalwa, abatomo bintu abikolwanaa, abayila bakashi mu bufyefye, sunga kukita ingi myanda ibubi. Abadimbi bebatande, bakwabo, na Yehowa. (Misambo 26:4, 5) Anka Yehowa auku su tukwete kwakula penda kukanwa’shi atumunemeka aku namu tukwete kukita myanda yadi mushikwe. (Maako 7:6) Mbikile buwa kukita bino byabadi bakule mu mukanda wa Nkindji: “Topushiinshanga baa-sha-milwisho kyuùtu, anka, efuku dyooso, ikala na moloo wa Yehowa.”—Nkindji 23:17. *

16. Abitungu twaluule nkonko i ku esaki dya kuteka bwa kutwela mu mudimo wa nsaa yoso mushindo kinyi?

¹⁶ Su we na lukalo lwa kwikala mbala-mashinda a myeshi yoso sunga kubanga mudimo wa nsaa yoso wi pa bwao, bu kwenda ku Betele,  abitungu’shi oushe esaki dya kuteka bwa kufuba uno mudimo. Bi na muulo ngofu bodya kwela ngaluulo youku’shi ngya binyibinyi ku nkonko yabakwipusha pabitale bukome bwa mbidi yobe, mushindo wa kukisha kapapi okuminaa, na pabitale myanda yokuminaa. (Beena-Ebelu 13:18) Bi kwikala naminyi su we mukite mwanda wabadi bashikwe kwi Yehowa sunga mwanda aukalakasha kondo kobe k’eshimba kushii kulungula bakulu? Ebatekye bukwashi bwa’shi omone bya kufubila Yehowa na kondo k’eshimba katookane.—Beena-Looma 9:1; Beena-Ngalatea 6:1.

17. Abitungu tukite kinyi nsaa yabetwipusha nkonko pabitale bakwetu kwi bantu abetubingabinga?

¹⁷ Nkinyi akitungu okite su mudimo wetu ngukandjikibwe mu mbalo yodi mushale na su bakata ba mbulamatadi abakukwata na nkwipusha pabitale bakwetu? Abitungu webalungule myanda yoso youku su? Yesu bakitshine naminyi nsaa ibabadi abamwele nkonko kwi guvernere a bena Looma? Yesu badi mutumikile eyi dya kulonda dya mu Bible adyamba’shi kwi “kipungo bwa kuumina na kipungo bwa kwakula,” na ingi nsaa tabadi akula kintu su nkimune! (Mulungudi 3:1, 7; Mateo 27:11-14) Su twi kumpala kwa mwanda wi bino, abitungu tulame myanda ifwame na kwikala na budimu bwa kupela kutuula bakwetu mu masaku.—Nkindji 10:19; 11:12.

18. Mbushito kinyi bwatudi nabo nsaa yabetwipusha mwanda wa ungi mukwetu kwi bakulu?

¹⁸ We kukita naminyi su ouku’shi mwina kakongye bakitshi mulwisho ukata? Bakulu be na bushito bwa kulama bwiselele bwa kakongye, ngi bwakinyi mbalombene nkwipusha pabitale uno mwanda ouku. We kukita naminyi, bikishekishe su uno muntu nkuuku obe sunga mukwenu a mu kifuko? Bible amba’shi: “Kamonyi kalulame akâkulâ’nka bya bînyibînyi.” (Nkindji 12:17; 21:28, EEM) Ngi bwakinyi we na bushito bwa kulungula bakulu myanda yoso ya binyibinyi kushii kwibafya mwanda su ngumune. Bakulu be na matalwa a kuuka mwanda oso bwa’shi bamone bya kupeta mushindo wa kukwasha muntu mukite mulwisho bwadya kulumbuula kipwano kyaye na Yehowa.—Shake 5:14, 15.

19. Nkinyi kyatukesambila mu mwisambo aulondo?

¹⁹ Daavide batekyele Yehowa’shi: “Obe okyebâ’shi munda mwa muntu mwikale bya bînyibînyi.” (Misambo 51:8, EEM) Daavide badi auku’shi ki na muulo ngofu mbyatudi munda mwetu. Bena Kidishitu ba binyibinyi ‘abelungushenaa myanda ya biinyibiinyi’ nsaa yoso. Ungi mushindo watudi balombene kulesha’shi twi belekene na bantu ba mu bipwilo bya madimi nkulongyesha bangi bantu bya binyibinyi bya mu Bible. Mu mwisambo aulondo, atukesambila mushindo watudi balombene kukita bino mu mudimo wa bulungudi.