1. Bwakinyi atwe boso twi na lukalo na kusambibwa?

BOSO bwetu twi na lukalo lwa kusambibwa. Pangi mu nshalelo eetu twi na twinyongoshi tukile bungi, nkalakashi na mpombo. Twi kwikala atukyengye pa mwanda wa mukumbo, bununu, sunga pa mwanda wa lufu lwa muntu atudi bafule. Bamo ba kwatudi bakwete kwibakitshina myanda ibubi kwi bangi bantu. Kunundu kwa byabya, bantu betwifunyishe bakwete kwenda na kutamisha bu ntomboshi. Eyendo, bino “bipungo biibukopo” abilesha kalolo’shi twi mu “mafuku a nfudiilo” na’shi efuku dyoso adikidi, tukwete kwifubwila pepi na ndumbulwilo mupya. (2 Timote 3:1) Anka, bi kwikala’shi tubapu kutengyela munda mwa mafuku e bungi bwa’shi milayilo ya Yehowa ilombane, na twi bapete nkalakashi i bungi. Byabya nkunyi kwatudi balombene kupeta kusambibwa?

2, 3. (a) Mmyanda kinyi yatuuku pabitale Abakuke? (b) Bwakinyi atukyebe kutaluula mukanda wa Abakuke?

² Tubandeyi kutala akyamba mukanda wa Abakuke bwa kupeta ngaluulo ku lwalwa lukonko. Sunga byekala’shi Bifundwe tabitulungula myanda ibungi pabitale nshalelo a Abakuke, mukanda waye ngulombene kwitukankamika ngofu. Pangi eshina Abakuke  adipushisha “kukwata kiipa.” Bino mbilombene kwipushena na mushindo ausambaa Yehowa, nka bu’ye akwata balangwidi baaye biipa na kwibanyingisha. Sunga’shi mbilombene kulesha mushindo aulamataa balangwidi baaye Kwadi. Abakuke badi mwisambe n’Efile Mukulu aye nkumwela nkonko. Yehowa badi mumuyookyele Abakuke bwadya kufunda ino myanda ibabadi besambe mwanda badi auku’shi ngilombene kwitukwasha.—Abakuke 2:2.

³ Uno mwisambo ubadi pankatshi pa Yehowa na mutemuki badi na kinyongwa, ngi mwanda oso wabetulungula kwi Bible pabitale Abakuke. Uno mukanda nyi ngumune wa ku bintu “byooso bibabadi bafunde kala” mu Eyi dy’Efile Mukulu, “bwashi, ku katshintshi na kusambibwa abitukila mu Bifundwe, tupete lukulupilo.” (Beena-Looma 15:4) Mukanda wa Abakuke ngulombene kukwasha muntu oso a kwatudi naminyi? Awitukwasha bwatudya kumona akipushisha kukulupila kwi Yehowa. Na dingi butemuki bwa Abakuke abwitushinkamisha’shi twi balombene kwikala na butaale bwa mu binangu sunga twekala na myanda sunga nkalakashi i naminyi.

4. Bwakinyi Abakuke badi mwinyongole?

⁴ Badika Abakuke 1:2, 3. Abakuke badi kwanka mu mafuku e bukopo bukile. Abadi bamwifunyishe kwi bantu babi na ba ntomboshi, na bino bibadi abimwinyongosha ngofu. Koso kubadi atala, badi amono nka bena Isaleele abekitshishena myanda ibubi na ya kukutwa kululama. Abakuke badi eyipusha’shi: ‘Ino myanda ibubi ayikafudiila mafuku kinyi? Bwakinyi Yehowa kwete kunyengakana bino?’ Badi apusha’shi ta kwi muntu mulombene kumukwasha. Ngi bwakinyi batekyele Yehowa bwadya kukita kintu kampanda. Pangi Abakuke babangile kwela binangu’shi Yehowa tatalaa dingi myanda ya mwilo Waye sunga’shi taakitshi kintu. Nobe namu tobandile kupusha bino su?

5. Nkinyi kyatudi balombene kulonga mu mukanda wa Abakuke? (Tala kifwatulo ki ku mbangilo.)

⁵ Abakuke badi mwele ino nkonko pa mwanda wa’shi badi mukatushe lukulupilo kwi Yehowa na mu milayilo yaye su? Ta mbyabya nya! Abakuke badi atekye Yehowa bwa’shi amukwashe pa mwanda wa mpaka na myanda ibadi nayo, na bino abilesha’shi tabadi mukatushe lukumino nya, anka badi ki’atungunuka na kukulupila Mwadi. Abakuke badi binyibinyi na twinyongoshi na tabadi auku kya kukita nya. Tabadi auku bwakinyi Yehowa badi atengyela bwa kufudisha makyenga na bwakinyi Badi amutadila akyengye bino nya. Bu bibadi Yehowa muyookyele Abakuke bwadya kufunda myanda yaye, bino abitupetesha dilongyesha di na muulo ukata. T’abitungu twikale atutshinyi kulungula Yehowa myanda yatudi nayo na mpaka i mu mashimba eetu nya. Anka, etulungula na kalolo kooso bwatudya kumuteka na kumulungula byatupusha mu mashimba mwetu. (Misambo 50:15; 62:8) Mukanda wa Nkindji 3:5 awitukankamika boso bwetu’shi: “Kulupila kwi Yehowa n’eshimba dyoobe dyooso, olekye kulonda binangu byoobe’be nabene.” Abakuke badi mutumikile ano mayi mu muwa waye.

6. Bwakinyi kwela nteko kwi na muulo?

⁶ Abakuke badi mukulupile kwi Yehowa, Kuuku’aye na Nshaye, na dingi badi mukimbe bya kwifubwila pepi naye. Abakuke tabadi anangushena nka pa myanda yaye na kukimba bya kwiyipudisha aye nabene nya. Anka badi mutekye pabitale byapusha. Kino nyi nkileshesho kibuwa kwatudi. Yehowa, aye Apushaa nteko, etutekye bwatudya kumulesha’shi twi bakulupile mwadi pa kumuteka na kumulungula myanda yetu. (Misambo 65:2) Nsaa yatukitshi bino, atukamono mushindo wabalulaa nteko yetu kwi Yehowa. Atukapusha bu mwitukwate kiipa nsaa yetusamba na kwitukunkusha. (Misambo 73:23, 24) Aketukwasha bwatudya kushinguula mushindo wamono myanda yetu, sunga twekala kumpala kwa lukalakashi lwi naminyi. Kwela nteko kwi Yehowa nyi ngumune  wa ku mishindo ikile buwa yatudi balombene kulesha’shi twi bakulupile mwadi.

7. Yehowa bakitshine kinyi pabadi Abakuke mumulungule myanda ibadi ayimukalakasha?

⁷ Badika Abakuke 1:5-7. Kunyima kwa Abakuke kulungula Yehowa myanda ibadi ayimukalakasha, badi mulombene kwiyipusha mushindo ubadi Yehowa mulombene kumwaluula. Nka bu Nshe bana e na kifulo, Yehowa badi mushinguule bibadi abipusha Abakuke. Badi awuku’shi Abakuke badi akyengye na badi amutekye bukwashi. Yehowa tabadi musashile Abakuke nya, anka badi mumulungule byakyebe kukita bena Yuuda bashibadi na lulamato. Byabya, Abakuke badi muntu a kumpala ababadi balungule kwi Yehowa’shi dinyooka dyabo tadidi peepi.

8. Bwakinyi lwalulo lwa Yehowa lubadi lwilekene na bibadi abipwandikisha Abakuke?

⁸ Yehowa badi mulungule Abakuke’shi tadi peepi na kufudisha bubi. Badi na kya kunyooka ba ntomboshi na bantu babi ba bena Yuuda. Bu bibamulungwilwe’shi bino bi na kya kikutshika “mu ano mafuku enu,” Yehowa badi muleshe’shi kino kiimu akikafiki nsaa i Abakuke na muwa sunga mu mafuku a bena Isaleele abadi bamwifunyishe na muwa. Yehwowa badi mwaluule Abakuke mu mushindo washibadi anangushena. Bena Kaldeya na beena Babilone, abadi ba ntomboshi. Abadi na bu ntomboshi bukile bwa bena Isaleele, babadi abauku miiya ya Yehowa. Byabya, bwakinyi Yehowa badi mufubishe uno mwilo wa ba mpangano ba ntomboshi bwa kunyooka mwilo waye? Bino bibadi bilombene kukyengyesha bena Yuuda ngofu. * Su bodya kwikala bu Abakuke bodya kupusha naminyi?

9. Ngingi nkonko kinyi ibabadi bepushe kwi Abakuke?

⁹ Badika Abakuke 1:12-14, 17. Sunga mbibapushishe Abakuke’shi Yehowa akyebe kufuba na bena Babilone bwa kunyooka bantu babi babadi bamwifunyishe, bibadi’nka abimukalakasha. Kadi badi na kwiyisha na badi nka na kitshibilo kya kutungunuka na kukulupila mwi Yehowa. Bakwile’shi Yehowa atungunuka’nka na kwikala “lubwebwe” lwaye. (Miiya Ikituulwe 32:4; Yeeshaya 26:4) Abakuke baadi mushinkamishe’shi Efile Mukulu e na kifulo na kalolo, ngi bwakinyi tabadi na moo wa kwipusha Yehowa ingi nkonko nya. Bamwipwishe’shi: Bwakinyi Yehowa mulombene kulekyela bwa’shi myanda inyiishe kulwila mu Yuuda na bwa’shi mwilo waye ukyengye ngofu bino? Bwakinyi ta mulombene kulumbuula myanda mususa umune? Bwakinyi sha bukome boso ‘ashala muumine’ na kutadila bubi abukitshika mbalo yoso? Aku namu Yehowa “eeseleele” na e na “meeso akile kutooka bwa kumona bubi.”

10. Bwakinyi ingi nsaa twi balombene kwipusha bu bibayipwishe Abakuke?

¹⁰ Ingi nsaa twi balombene kupusha nka bu Abakuke. Tukwete kupushisha Yehowa na dingi atukulupila mwadi na atubadika na kulonga Eyi dyaye, bino abinyingisha lukulupilo lwetu. Twi bapushe dingi pabitale milayilo yaye patuteemesha myanda yabetulongyesha kwi ndumbulwilo aaye. Anka pangi twi balombene kutungunuka na kwiyipusha’shi: ‘Twinyongoshi twetu atukapu nsaa kinyi?’ Twi balombene kupeta dilongyesha ku bibakitshine Abakuke kunyima.

11. Abakuke badi na kitshibilo kya kukita kinyi?

¹¹ Badika Abakuke 2:1. Mwisambo wa Abakuke na Yehowa ubadi umupeteshe butaale bwa mwishimba. Ubamukwashishe bwadya kwata kitshibilo kya kutengyela Yehowa. Abakuke badi mwakule dingi kitshibilo kyaye nsaa ibambile’shi: “Nee na kya kwindjila na lwishinko efuku dya mpombo.” (Abakuke 3:16) Bangi bafubi b’Efile Mukulu basha lulamato abatungunukile na kutengyela na lwishinko bwa’shi Yehowa ebapwile myanda yabo.  Kileshesho kyabo akitukankamika mwanda akilesha’shi natwe namu twi balombene kwibambula.—Mika 7:7; Shake 5:7, 8.

12. Ndilongyesha kinyi dyatupetela kwi Abakuke?

¹² Kitshibilo kya Abakuke akitulongyesha kinyi? Kya kumpala, t’abitungu tulekye kwela nteko kwi Yehowa sunga twekala na mwanda wi naminyi nya. Kya kabidi abitungu tutemeshe kyoso kyabetulungula kwi Yehowa ku bukwashi bwa Eyi dyaye na ndumbulwilo aaye. Na kya kasatu, abitungu tutengyele Yehowa na lwishinko bwadya kulombasha milayilo yaye na tukulupile’shi akakatusha makyenga eetu pa kipindji kyadi mutshibe. Su tubambula Abakuke, atukekala na butaale bwa mwishimba na kupeta mushindo wa kunyingiila. Lukulupilo lwetu aluketukwasha bwa kwikala na lwishinko na muloo sunga twapeta mwanda wi naminyi. Atukulupila’shi Nshetu e mwiyilu akitshi kintu kampanda—Beena-Looma 12:12.

13. Yehowa badi musambe Abakuke naminyi?

¹³ Badika Abakuke 2:3. Abitungu tushinkamishe’shi Yehowa badi musankye pabitale kitshibilo kya Abakuke kya kumutengyela bwa’shi aluule. Sha bukome boso badi mukye kalolo mushindo ubadi aukyengye Abakuke, na Badi mukankamikye mutemuki na kifulo kyoso amushinkamisha’shi aluula ku nkonko ibeele n’eshimba dyaye dyooso. Abakuke badi na kya kusambibwa ku twinyongoshi twaye. Bibadi nka bu Yehowa badi alungula Abakuke’shi: “Tengyela na lwishinko na tungunuka na kunkulupila. Nakaluula luteko lobe, sunga byamweneka bu kubayisha kipindji ki bula.” Yehowa badi atentekyesha Abakuke’shi badi mupwe kwata kitshibilo kya kulombasha milayilo yaaye. Ngi bwakinyi badi munyingishe Abakuke bwadya kutungunuka na kutengyela. Byabya, mutemuki tabadi mulombene kutshoboloka nya.

14. Nkitshibilo kinyi kyatudi balombene kwikala nakyo nsaa yatudi mu nkalakashi?

¹⁴ Natwe namu twi na lukalo lwa kutengyela Yehowa bwa’shi aluule ku nteko yetu. Na dingi abitungu tuteemeshe kalolo myanda yoso y’etulungula. Su tubakitshi byabya, atwikala na lukulupilo na butaale bwa mwishimba sunga twapeta nkalakashi ibukopo bwi naminyi. Yesu badi mwitukankamikye bwa kupela kutula binangu byetu pabitale “nguba na kipungo” byabashii betulungule kwi Efile Mukulu. (Bikitshino 1:7) Abitungu tukulupile’shi Yehowa auku nsaa ibwa yadya kwalula. Byabya ta twi balombene kukooka nya, anka abitungu twikale beyishe na basha lwishinko na lukumino mwi Efile Mukulu. Pano patuki’atutengyela, abitungu tufube na nsaa yetu kalolo bwa kufubila Yehowa muyiile ngobesha yetu.—Maako 13:35-37; Beena-Ngalatea 6:9.

15, 16. (a) Mmilayilo kinyi yatupete mu mukanda wa Abakuke? (b) Ino milayilo ayitulongyesha kinyi?

¹⁵ Yehowa mmwitulee’shi: ‘Mululame ashala na muuwa bwa lulamato lwaye,’ na dingi “pa nsenga poso, mîlo aikaulu na kiukilo kya ntumbo ya Yehowa.” (Abakuke 2:4, 14, EEM) Kushi mpaka, Yehowa mulee bwa kupa baba boso basha lwishinko na bakulupile mwadi muwa wa ikalayika.

¹⁶ Wawa mulayilo watupete mu Abakuke 2:4 wi na muulo ukata, ngi bwakinyi Mpoolo mutubwa badi mwiufunde misango isatu mu mikanda yaaye! (Beena-Looma 1:17; Beena-Ngalatea 3:11; Beena-Ebelu 10:38) Byabya tushinkamisheyi’shi sunga twapeta nkalakashi i naminyi, atukamono kulombana kwa milayilo ya Yehowa su twi bakulupile mwadi. Yehowa akumina’shi tutuule meeso eetu ku lukulupilo lwetu lwa mu mafuku aafiki.

17. Yehowa etushinkamisha’shi aketukitshina kinyi su tubakulupila mwadi?

¹⁷ Mukanda wa Abakuke wi na dilongyesha di na muulo ukata kwatudi atwe boso be mu ano mafuku a ku nfudilo. Yehowa mmulee muwa wa ikalayika kwi muntu oso sha kululama na mukulupile mwadi. Byabya tutungukyeyi na kunyingisha lukulupilo lwetu mwi Efile  Mukulu, sunga twapeta nkalakashi na twinyongoshi twi naminyi. Myanda ibabadi balungule Abakuke kwi Yehowa ayitushinkamisha’shi aketusamba na kwitupasha. Etulungula na kalolo koso bwatudya kukulupila mwadi na kutengyela na lwishinko bwa nguba na kipungo kyadi mupwe kutshiba bwa’shi Bufumu bubangye kumunana pano pa nsenga. Mu kyakya kipungo, nsenga ayikaulu na bantu abalangwila Yehowa mu butaale na muloo.—Mateo 5:5; Beena-Ebelu 10:36-39.

18. Bishima bibabadi balungule Abakuke kwi Yehowa bibadi na bukitshishi kinyi kwadi?

¹⁸ Badika Abakuke 3:16-19. Myanda ibabadi balungule Abakuke kwi Yehowa ibadi na bukitshishi bukata kwadi. Abakuke badi munangushene ku myanda ikata ibabadi bakitshine bantu kwi Yehowa mu mafuku a kala. Ngi bwakinyi lukulupilo lwaye mwi Yehowa lubadi lunyingye. Badi mushinkamishe’shi mu kapindji kapela’mu Yehowa akumbasha mulayilo waye! Bino bibadi bisambe mutemuki, sunga bibadi muukye’shi atungunuka nka na kukyenga ingi nsaa. Munda mwa mafuku apeela Abakuke badi mubangye kwialashena mwishimba. Anka badi na lukumino’shi Yehowa mulombene kumupasha. Sunga mbyabya, myanda yatubadika ibadi mwakule i mu verse a 18 nyi mbimune bya ku bishima abilesha lukulupilo lwi bukopo byatusangana mu Bible. Bangi bantu balongye myanda ya mu Bible abakumina’shi bino abipushisha’shi: “Nakekala na muloo mwi Mwanana; nakatambuka na kusangala mwi Efile Mukulu.” Dino nyi ndilongyesha dikata kwi oso a kwatudi! Yehowa ta mmwitupe nka penda milayilo i buwa bwa mafuku aafiki nya, kadi etushinkamisha dingi’shi kubashala mafuku apeela, alombasha milayilo yaye yoso.

19. Twi kwikala basambibwe na Yehowa bu bibadi bisambibwe Abakuke naminyi?

¹⁹ Dilongyesha dyatupete mu mukanda wa Abakuke nyi nkukulupila mwi Yehowa. (Abakuke 2:4) Bwatudya kutunguka na kukulupila mwi Yehowa, abitungu kunyingisha kipwano kyetu naye. Kyatudya kukita nkino. (1) Kutungunuka na kulungula Yehowa pabitale twinyongoshi twetu na myanda yetu. (2) Tuteemeshe kalolo ku myanda yabetulungula kwi Yehowa i mu Eyi dyaye, na kulonda buludiki bwabetupa kwi ndumbulwilo aaye. (3) Twikale na lulamato na lwishinko nsaa yatukyatutengyela Yehowa bwa’shi alombashe milayilo yaye. Bino ngi bibakitshine Habakuke. Sunga mbibadi mwinyongole ngofu nsaa ibabangile kwisamba na Yehowa, ku nfudilo, badi munyingishibwe na aye nkupeta muloo! Su tubambula Abakuke, natwe namu atukapete kusambibwa ku mushindo awitukukila Yehowa, Nshetu a mwiyilu na muloo. Nkusambibwa kukata kinyi kwatupete mu uno ndumbulwilo e bubi?