1-3. (a) Ndilongyesha kinyi dyatudi balombene kuteemuna munkatshi mwa malongyesha eetu akata? (b) Bwakinyi lusangukilo lwi na muulo ukata? (Tala kifwatulo ki ku mbangilo.)

SU MUNTU akwipusha’shi malongyesha kinyi akata oodi mukumine, we kumwalula naminyi? Kushii mpaka we kumwalula’shi, we mukumine’shi Yehowa ngi Mupangi na nsulo ya muwa wetu. Pangi we kumulungula dingi’shi we na lukumino mwi Yesu Kidishitu, bafwile bu mulambu wa nkuulo pa mwanda wetu. Na we kumushinkamiisha dingi pabitale Mpaladiso akafiki mu mafuku e kumpala pa nsenga, amukashala mwilo w’Efile Mukulu bwa looso. Byabya we mulombene kuteemuna lusangukilo bu dimune dya ku malongyesha akata oodi mukumine ngofu su?

² Twi na tubingilo twi buwa twa kuteemuna lusangukilo bu dimune dya ku malongyesha eetu akata, sunga byekala’shi twi na lukulupilo lwa nkapanda ku mpombo ikata na kwikala na muwa wa ikalaika pa nsenga. Mpoolo mutumibwa badi muleshe bwakinyi lusangukilo lwi na muulo ukata. Bambile’shi: “Su takwi kusanguka kwa bafwe, byaabya sunga Kidishitu ta mmusangukye.” Su Yesu tamusangukye, tabadya kwikala akunkusha bu Nfumu mwiyilu nya, na mudimo wetu wa bulungudi ubadya kwikala wa bisumanga. (Badika 1 Beena-Kodinda 15:12-19.) Anka, atuuku’shi Yesu basangukile. Bu byatudi na lukumino mu lusangukilo lwaye, ta twi bu bena Yuuda bababadi abetanyina bu Baasaduseo, babadi abapele’shi bafwe tabakekala dingi na muwa. Mpa na nsaa yabetusepe kwi  bangi, lukumino lwetu lwa’shi Efile Mukulu mulombene kubusha bantu bafwe lwi nka lunyingye pepoo.​—Maako 12:18; Bikitshino 4:2, 3; 17:32; 23:6-8.

³ Mpoolo bambile’shi dilongyesha dya “kusanguka kwa bafwe” dibadi bu “ndambukisho ya ku mbangilo pabitale Kidishitu.” (Beena-Ebelu 6:1, 2) Badi mushimikye kasele’shi badi na lukumino lwi bukopo mu lusangukilo. (Bikitshino 24:10, 15, 24, 25) Sunga dyekala bu lulambukisho lwa ku mbangilo, dimune dya ku malongyesha a kitako atulongaa mu Eyi dy’Efile Mukulu, twi nka na lukalo lwa kulonga mwanda wa lusangukilo kalolo. (Beena-Ebelu 5:12) Bwakinyi?

4. Nkonko kinyi yatudi balombene kwiyipusha pabitale lusangukilo?

⁴ Apabanga bantu kulonga Bible, misango ibungi ababadikaa myanda ya bantu abadi basangukye mu mafuku a kala, bu lusangukilo lwa Lazaare. Abalongaa dingi’shi Abrahame, Yoobo, na Ndanyele, abadi bashinkamishe’shi mu mafuku aafiki bafwe abakekala dingi na muuwa. Na dingi, we kwakula naminyi su muntu akwipusha bwa kumushinkamisha ku bukwashi bwa Bible bwakinyi twi balombene kukulupila milayilo ya lusangukilo yabadi betulee takudi bipwa nkama na nkama? Bible akula mafuku aakakitshika lusangukilo mu mafuku aafiki su? Ngalulo ya ku ino nkonko ayikanyingisha lukumino lwetu.

5. Atukyebe kubanda kwisambila mwanda kinyi?

⁵ Twi kunangushena’shi bi kwikala bipeelepeele bwabadya kusangula muntu kapindji kapeela kunyima kwa lufu lwaye. (Yowano 11:11; Bikitshino 20:9, 10) Byabya twi kukulupila mulayilo wa’shi muntu akasanguka kunyima kwa bipwa, sunga kunyima kwa bipwa nkama na nkama, mu mafuku aafiki su? Twi balombene kukumina wanka sunga byekala’shi abadi beulee muntu tabapwile kufwa takudi bipwa bibungi sunga muntu bafwile kunyima kwa mafuku apeela? Kushi mpaka, we mupwe kwikala na lukumino mu lusangukilo lubakitshikile bipwa nkama na nkama kunyima kwabo kwilulaa. Ndusangukilo kinyi? Na lwi na bukitshishi kinyi ku lukulupilo loobe lwa lusangukilo alukakitshika mu mafuku aafiki?

6. Mayi e mu mukanda wa Misambo 118 abadi alombane mwi Yesu naminyi?

⁶ Ku bukwashi bwa mukanda wa Misambo 118, ubabadi bafunde kwi Daavide, tubandeyi kwisambila lusangukilo lubabadi batemukye kumpala kwa bipwa bibungi. Mu uno Musambo mwi ano mayi: “Yehowa, atukusendêla, wetupâshe!” na “Ende ntumbo, uno afiki mwishina dya Yehowa!” Bantu babadi bateemune ano mayi a butemuki atale Mesiya nsaa ibatwelele Yesu mu Yeelusaleme mushale ku mpunda mu efuku dya 9 dya mweshi wa Nisane, mafuku apeela kumpala kwa lufu lwaye. (Misambo 118:25, 26; Mateo 21:7-9) Byabya, mukanda wa Misambo 118 ubadi awisambila lusangukilo lubadi na kya kukitshika kunyima kwa bipwa bi bungi mu mafuku aafiki naminyi? Banda kutala ungi mwanda wabadi bateemune mu uno musambo: “Ebwe dibaasumbwilwe kwi beebaki, dibaafiki ebwe dya mwitungi.”​—Misambo 118:22.

7. Bena Yuuda abadi basumbule Yesu naminyi?

⁷ “Beebaki” abadi basumbule Mesiya nyi mbakata ba bena Yuuda. Tababadi nka penda bapele kuuka Yesu sunga kupela kumukumina bu Kidishitu nya, anka, bebungi abamusumbwile p’abo kuteka Mpilaato bwadya kumwipaa. (Luka 23:18-23) Eyendo, abo ngi babadi bayipee Yesu.

8. Yesu bafikile “ebwe dya mwitungi” naminyi?

⁸ Bu bibabadi basumbule na kwipaa Yesu, badi mulombene kufika “ebwe dya mwitungi” naminyi? Bino bibadi bilombene kukitshika nka su abamusangula. Yesu badi muleshe bino patooka nsaa ibadi mulonde mwanda wa muntu sha kipindji kyaye kya nsenga badi atumu mikyendji kwi bantu abadi abamudimina mafuba. Bantu abadi abamudimina mafuba abadi abakyengyesha  bantu boso babadi abafiki bu mikyendji. Kunyima, muntu sha nsenga batumine mwan’aye, na kukulupila’shi apamumono bantu abamudimina mafuba mbalombene kumupushisha. Anka abakwatshile mwana a sha nsenga bamwipaa. Kunyima kwa kulonda uno mwanda, Yesu batemwine butemuki bwi mu mukanda wa Misambo 118:22. (Luka 20:9-17) Mpyeele mutumibwa bafubile na uno verse umune nsaa ibadi esamba kumpala kwa ‘banfumu, bakulu na balambukishi ba bishila babeebungile mu Yeelusaleme.’ Badi mwisambe pabitale ‘[Yesu Kidishitu a mu Nazarete, NWT], abanudi baipaishe [ku mutshi wa makyenga], Efile Mukulu bamusangwile ku bafwe.’ Kunyima bambile’shi: “Aye nyi ‘ebwe dibaanudi, anwe beebaki basumbusheene, adyo ngi dibeekala binobino ebwe dya mwitungi.’”—Bikitshino 3:15; 4:5-11; 1 Mpyeele 2:5-7.

9. Mmwanda kinyi ukata ubabadi batemukye mu mukanda wa Misambo 118:22?

⁹ Abimweneka kalolo’shi butemuki bwi mu Misambo 118:22 bubadi abulesha lusangukilo lubadi na kya kulombana kunyima kwa bipwa nkama na nkama. Mesiya badi na kya kusumbulwa na kwipayibwa. Anka badi na kya kusanguka na kufika ebwe dya mwitungi. Kunyima kwa’ye kusanguka, Yesu bafikile muntu penda umune “munkatshi mwa bâna ba bantu mupwandjikile kwitupâsha.”—Bikitshino 4:12, EEM; Beena-Efeso 1:20.

10. (a) Mu mukanda wa Misambo 16:10 mwi butemuki kinyi? (b) Bwakinyi twi kwikala bashinkamishe’shi mayi e mu mukanda wa Misambo 16:10 taabadi atale Daavide?

¹⁰ Tutaluleyi ungi verse badi mwakule pabitale lusangukilo. Badi mulombane kunyima kwa bipwa bikile pa kinunu. Uno mwanda ngulombene kwitushinkamisha’shi lusangukilo ndulombene kukitshika bipwa bibungi kunyima kwa’bo kwilutemuka sunga kwilulaa. Mu mukanda wa Misambo 16, atubadika ano mayi a Daavide’shi: “Twe kunsumbusheena [mu Mashaama], sunga kuleka mukulamate aalaala mu bwina.” (Misambo 16:10) Daavide tabadi akyebe kwamba’shi aye tabadi mulombene kufwa na kushikiibwa mu Mashama nya. Eyi dy’Efile Mukulu adyakula kalolo’shi Daavide badi mununupe na kufwa na ‘bayiile mu kwikisha na ba mashaaye; baashiikilwe mu lupata lwaye lwa Daavide.’ (1 Banfumu 2:1, 10) Byabya uno verse akwila muntu kinyi?

11. Mpyeele badi mupatuule mukanda wa Misambo 16:10 nsaa kinyi?

¹¹ Bipwa bikile pa kinunu kunyima kwa Daavide kufunda ano mayi, Mpyeele badi mpatuule muntu abadi bakwile mu mukanda wa Misambo 16:10. Mbingo ipeela kunyima kwa Yesu kufwa na kusanguka, Mpyeele badi esamba kumpala kwa kisaka kikata kya bena Yuuda na bantu ba miilo yabeene. (Badika Bikitshino 2:29-32.) Badi mwibatentekyeshe’shi Daavide bafwile abo nkumushiika. Bible takula’shi muntu su ngumune badi mweleshe Mpyeele mpaka nsaa ibakwile’shi Daavide “badi mubadiile kumona [na kwakula] kusanguka kwa Kidishitu.”

12. Mukanda wa Misambo 16:10 ubadi ulombane naminyi? Bino abitushikamisha kinyi pabitale mulayilo wa lusangukilo?

¹² Mpyeele badi mukwatshishene mwisambo waye pa kuteemuna mayi a Daavide e mu Misambo 110:1. (Badika Bikitshino 2:33-36.) Mushindo ubadi Mpyeele munangushene mu Bifundwe ubadi ukwashe kisaka kya bantu bwa kushinkamisha’shi Yesu badi “Nfumu na Kidishitu.” Bantu abadi bashinguule’shi mukanda wa Misambo 16:10 ubadi ulombane nsaa ibadi Yesu musangukye ku bafwe. Kunyima kwa mafuku, Mpoolo badi mufube na kino kishinkamisho kimune nsaa ibadi esamba na bena Yuuda mu kibundji kya Antyoshe a Pisidii. Kino kishinkamisho kibadi kikemeshe bantu binyibinyi, na abadi na lukalo lwa kupusha ingi myanda ibungi. (Badika Bikitshino 13:32-37, 42.) Nkilombene kwitukuminyisha natwe namu’shi ano matemuki a mu Bible atale lusangukilo lwa mu mafuku aafiki nga binyibinyi sunga mbibaadi alombana kunyima kwa bipwa nkama na nkama.

13. Nkonko kinyi yatudi balombene kwiyipusha pabitale lusangukilo?

¹³ Abitunyingisha ngofu pa kuuka’shi lusangukilo ndulombene kukitshika bipwa bibungi kunyima kwa’bo kwilutemuka. Kadi, bamo mbalombene kwipusha’shi: ‘Bino abilesha’shi abitungu ntengyele munda mwa bipwa bibungi bwa kwimonena na bakwetu bandi mufule? Lusangukilo alukakitshika mafuku kinyi?’ Eyendo, Yesu balungwile batumibwa baye’shi kwi bintu byabashi balombene kuuka. Kwi myanda ibungi itale “nguba na bipungo bifunde Yaaya ku matalwa aaye’ye nabeene.” (Bikitshino 1:6, 7; Yowano 16:12) Anka, twi na myanda ipeela ayitulesha mafuku aakakitshika lusangukilo.

14. Lusangukilo lwa Yesu ndwilekene na lwa bangi bantu abadi basangukye kumpala kwaye naminyi?

¹⁴ Lusangukilo lwi na muulo ngofu lwabadi baleshe mu Bible nka lwa Yesu. Su ta musangukye ku bafwe, muntu su ngumune a kwatudi tabadya kwikala na lukulupilo lwa kwimonena dingi na bakwetu batudi bafule bapwe kufwa. Bantu abadi basangukye kumpala kwa Yesu, bu bababadi basangule kwi Eliya na Elisha, ta mbashale na muwa bwa looso nya. Abafwile dingi na kufika lufuufi lwa nsenga mu mashama. Kadi Yesu “musangukye ku bafwe.” “Taafu dimo nya; kwadi lufu talukii na matalwa nya.” Mwiyilu mwadi, e na muwa “bwa ikalaika.”​—Beena-Looma 6:9; Kibafumbwilwe 1:5, 18; Beena-Kolose 1:18; 1 Mpyeele 3:18.

15. Bwakinyi abayitanyina Yesu bu “kilombola”?

¹⁵ Lusangukilo lwa Yesu bu muntu a mu kikudi bwa kwenda mwiyilu nyi lwa kumpala na lwi na muulo ukata ku nsangukilo yoso ya mu kino kipaso. (Bikitshino 26:23) Anka, ta nka penda aye bupenka bwaye ngi asanguka bwa kwenda mwiyilu nya. Yesu balayile’shi batumibwa baye basha lulamato abakamunana naye pamune mwiyilu. (Luka 22:28-30) Anka mbalombene kupeta buno bwedi nka kunyima kwa kufwa. Kunyima, nka bu Yesu, abasanguka na mbidi ya mu kikudi. Mpoolo bafundile’shi: “Kidishitu mmusangukye ku bafwe, bu kilombola kya bafwe.” Kunyima, Mpoolo bambile’shi kwi bantu abakasanguka bwa kwenda mwiyilu “muntu ooso mu mulongo waye: Kumpala akukekala mulombwe, nyi Kidishitu, na booso abakekala balamate kwadi pa kufika kwaye.”​—1 Beena-Kodinda 15:20, 23.

16. Nkinyi akitukwasha bwa kuuka mafuku aakitshika lusangukilo lwa bantu abende mwiyilu?

¹⁶ Mayi a Mpoolo aetushikamisha mafuku aakitshika lusangukilo lwa baaba abende mwiyilu. Alukakitshika mu mafuku a kufika kwa Kidishitu. Munda mwa bipwa bibungi, ba Temwe ba Yehowa mbaleshe bantu ku bukwashi bwa Bible’shi, “kufika” kwa Kidishitu kubabangile mu kipwa kya 1914. Tuki nka mu mafuku a “kufika” kwa Kidishitu, na dingi nfudiilo a uno ndumbulwilo mulwile befubwila peepi ngofu.

17, 18. Nkinyi akikafikila bangi bedibwe mwimu mu mafuku a kufika kwa Kidishitu?

 ¹⁷ Bible alesha myanda ibungi pabitale lusangukilo lwa kwenda mwiyilu. Alesha’shi: ‘Taatukyebe kwinuleka mu kuluba pa abitala bafwe. . . . Mwanda su atukumina’shi Yesu bafwile, na’shi mmusangukye, mpa na baaba bafwile mwadi, Efile Mukulu akebasangula mwi Yesu. . . . Atwe baki na muuwa abakapetekyelwa pa kufika kwa Mwanana, taatubadiila kumpala kwa bapwe kufwa nya; mwanda aye nabeene Mwanaana, apakedibwa musaase, . . . awiki mwiyilu: paapa bafwe munda mwa Kidishitu ababadiila kusanguka; akupu, atwe be na muuwa abekala bashaale, abeetutwala mu makumbi pamune nabo, bwa kwimoneena na Mwanana [mu lupunga], byaabya atwikala na Mwanana nguba ooso.’​—1 Beena-Tesalonike 4:13-17.

¹⁸ Lusangukilo lwa kumpala lubadi na kya kukitshika mafuku apeela kunyima kwa kubanga mafuku a kufika kwa Kidishitu. Bedibwe mwimu abakekala na muwa mu mafuku a mpombo ikata ‘abakatwadibwa mu makumbi.’ (Mateo 24:31) Bino abipushisha kinyi? Baaba ‘abakatwadibwa’ tabakalaala mu ‘lufu’ nya, kwamba’shi, tabakakita mafuku ebungi mu lufu. Anka, nsaa yabafu, ‘abakashintuluka, mu kapindji kapeela, mu kipopwelo ky’eyiso, mu mpungi a ku nfudilo.’​—1 Beena-Kodinda 15:51, 52.

19. “Kusanguka kukile bukata” nkinyi?

¹⁹ Lelo uno, bena Kidishitu basha lulamato bebungi ta mbedibwe mwimu nya na tambasangulwe bwa kwenda mu kumunana pamune na Kidishitu mwiyilu nya. Anka, mbakulupile “efuku dya Yehowa” na meso kwishinda, efuku dyakafudisha uno ndumbulwilo ebubi. Ta kwi muntu su ngumune auku kalolo efuku adikafiki ino nfudilo nya, anka, myanda ayikitshika ayilesha’shi dino efuku tadidi peepi. (1 Beena-Tesalonike 5:1-3) Apakafiki ndumbulwilo mupya a Efile Mukulu, akukakitshika lusangukilo lwa mu ungi mushindo. Mu aa mafuku, bantu abakasanguka bwa kwikala na muwa pa nsenga na abakekala na lukulupilo lwa kufika bantu bapwidikye bashi’abafu dingi. Kuno akukekala “kusanguka kukile bukata” kukile nsangukilo ya bantu babadi basangukye mu mafuku a kala kadi babafwile dingi kunyima kwa mafuku.​—Beena-Ebelu 11:35.

20. Bwakinyi twi kwikala bashinkamishe’shi lusangukilo alukekala lulumbuulwe kalolo?

²⁰ Bible akula’shi baaba abende mwiyilu abasanguka “muntu ooso mu mulongo waye.” (1 Beena-Kodinda 15:23) Byabya, twi kukulupila’shi lusangukilo lwa bantu abakashala pa nsenga alukekala mu mulongo, sunga lulumbuulwe kalolo. Bino bi kwitutakula mu kwipusha’shi: Bantu bafwe binobino abakasanguka kumpala, ku mbangilo kwa kumunana kwa Kidishitu kwa bipwa kinunu bwabadya kwibakuukila kwi bakwabo abebauku su? Bantu basha lulamato ba kala babadi bakunkushi bebuwa ngi a bakasanguka kumpala bwabadya kulumbuula mwilo w’Efile Mukulu mu ndumbulwilo mupya su? Abikekala naminyi bwa bantu bashi bafubile Yehowa? Mmafuku kinyi na mbalo kinyi yabakasangukila? Kwi nkonko ibungi yatudi balombene kwipusha. Anka tabitungu kubanda kwikalakasha bwa ino myanda binobino nya. Mbikile buwa tutengyele na kumona abikakitshika. Twikaleyi bashinkamishe’shi abikekala buwa bukile pa kumona mushindo wabakakita myanda kwi Yehowa.

21. We na lukulupilo kinyi?

²¹ Binobino, twi kunyingisha lukumino lwetu mwi Yehowa. Badi mwitulee kukidila kwi Yesu’shi bafwe be mu binangu Byaye na’shi abakekala dingi na muwa. (Yowano 5:28, 29; 11:23) Bwa kwitupa kingi kishinkamisho akilesha’shi Yehowa akasangula bafwe, Yesu bakwile ungi mususa’shi Abrahame, Isaake, na Yaakobo “booso bee na muuwa kwadi’ye.” (Luka 20:37, 38) Abimweneka kalolo’shi, twi na tubingilo twi bungi twi buwa twa kwakula, nka bibakwile Mpoolo mutumibwa’shi: “Nee na lukulupilo mwi Efile Mukulu . . . shi akwikala lusangukilo.”​—Bikitshino 24:15.