We mubadikye kalolo Bitenta bya Mulami bituukye binobino su? Banda kutala su we kwalula ino nkonko ayilondo:

Nsaa yabakwasha bana babo mu kikudi, bwakinyi abitungu ba nambutwile bafilukye bataluule mwanda wa ludimi?

Bana abakalongo ludimi lwa mu kibundji kyanudi bashaale ku kalasa na kwi bantu benwifunyishe. Kuuka ndimi ibungi kwi na bukwashi bukata kwi mwana. Abitungu ba nambutwile bataluule bwa kuuka ludimi lulombene bana babo kupusha bya binyibinyi kalolo na kwenda kumpala mu kikudi. Kunyima mbalombene kusangula su abatwele mu kakongye ka ludimi lwabakula mu kibundji kyabadi bashale sunga mu ka ludimi lwabo lwa butandwa. Ba nambutwile bena Kidishitu abatulaa myanda ya mu kikudi ya bana babo pa mbalo ya kumpala.​—w17.05, esk. 9-11.

Pabadi Yesu mwipushe Mpyeele’shi: “We munfule kukila [bino] su?” badi akwila bintu kinyi? (Yowano 21:15)

Abimweneka’shi Yesu badi akwila mishipa ibadi mu bwipi mwabo sunga mudimo wa kuloba. Kunyima kwa lufu lwa Yesu, Mpyeele balukiile mu mudimo waye ubadi nao kumpala—mudimo wa kuloba. Abitungu bena Kidisitu bataluule mbalo i na midimo ya ku mbidi mu mashimba aabo.​—w17.05, esk. 22-23.

Bwakinyi Abrahame badi mulungule mukash’aye bwadya kwakula’shi mmwin’aye mukashi? (Kibangilo 12:10-13)

Sara badi mwina a Abrahame abadi nshabo umune. Su Sara badya kwakula’shi mmukash’aye, babadi balombene kwipaa Abrahame na tabadya kutanda mwana ababadi bamulee kwi Efile Mukulu nya.—wp17.3, esk. 14-15.

Mmayele kinyi ababadi bafube nao kwi Elias Hutter bwa kukwasha boso babadi abakumina kulonga kina Ebelu?

Badi mukwashe balongi bwabadya kushinguula kwilekeena kwi pankatshi pa bishima bya mu kina Ebelu bi mu Bible na maleta ababadi abalungu kumpala kwa kishima (prefixe) sunga ku nfudilo kwa kishima (sufixe). Bwa kukita bino, badi mutushe kishima kyoso na maleta akata, anka maleta ooso ababadi abalungu kumpala sunga kunyima kwa kishima, badi mwiafunde na maleta apeela. Yawa nfundilo umune e mu mayi e kushi kw’esaki mu Bible a Les Saintes Écritures. Traduction du monde nouveau—avec notes et références.— wp17.4, esk. 11-12.

Mmayi a kulonda kinyi alombene kuludika mweneno a mwina Kidishitu pabitale kwikala na mputu ya kwikalwila kwi bangi bantu?

Amune a ku anka ngano: Efile Mukulu ataa muuwa bu kintu kya kishila. Yesu tamulungule balongi baye bwabadya kwata mpete bwa kwikalwila nya. (Luka 22:36, 38) Abitungu tufushe mpete yetu ya ngoshi bu bintu bya kufuba nabyo. Muwa wi na muulo kukila bintu byoso bya ku mbidi. Atunemeka kondo k’eshimba ka bangi bantu, na dingi abitungu’shi twikale bantu ba kileshesho. (2 Beena-Kodinda 4:2)​—w17.07, esk. 31-32.

Bwakinyi mukanda wa Mateo na wa Luka ayilondo mbangilo a muwa wa Yesu mu mishindo ilekene?

Mukanda wa Mateo ngwimene pa myanda ibadi ifikile Yoosefe, bu bibakitshine pabapushishe’shi Madiya e n’eyimi na pabadi mupete mukandu wa kusukila mu Ejiipitu na nkalukila kunyima. Mukanda wa Luka namu ngwimene

pa myanda ibadi ifikile Madiya; bu kileshesho, nsaa ibayile mu kutembela Elizabete na bibakitshine nsaa ibashaadile Yesu mu ntepelo.—w17.08, esk. 32.

Bible mmukambile myanda kinyi?

Bipatulwilo bya bingi bishima na mayi ababadi bafubishe mu Bible bibaadi bishintulukye kunyima kwa mafuku. Kushintuluka kwa myanda ya politike kubadi kwikale na bukitshishi bukata mu ludimi lwa bantu bebungi. Babadi bashikwe bantu abaadi abalula Bible mu ndimi ya bantu boso.—w17.09, esk. 19-21.

Twi na mwikeyilu etulamaa su?

Nya. Yesu bakwile bwa mikeyilu ya balongi baye imane kumpala kw’Efile Mukulu. (Mateo 18:10) Badi akyebe kwamba’shi ba mwikeyilu abalamaa balongi baye, nta kwamba’shi ba mwikeyilu abakalwilaa balongi baye umune ku umune mu kilengyeleshi nya.—wp17.5, esk. 5.

Nkifulo kya mushindo kinyi kikile bingi byoso ku bukata?

Nkifulo nkimeene mu mayi a kulonda, a·gaʹpe kyakya ngi kifulo kikile bingi byoso ku bukata. Mwi kwikala kifulo kya bu bana na bana na muloo. Anka, abitungu kileshe’shi nkitukile mu mayi a kulonda, bu kukitshina bangi myanda ibuwa.​—w17.10, esk. 7.