1, 2. Ungi mukwetu mulume badi mutundule kinyi pabadi mwitaluule, na bakitshine kinyi pabitale wawa mwanda?

ROBERT badi mubatshishibwe aye ki mu bipwa ekumi na bungi, anka bya binyibinyi tabibadi na muulo ngofu mu muwa waye nya. Akula’shi: “Ntshinadi nakitshi mwanda wibubi su ngumune, anka nadi nakitshi myanda yoso ayinfikila mu binangu. Nadi namweneka bu munyingye mu kikudi, pa kutwela mu bisangilo byoso na nadi nafubu mudimo wa bu mbala-mashinda a kipindji mu angi mafuku ku kipwa. Anka nadi mukutwe kintu kimune.”

² Robert tabadi auku kintu kibadi mukutwe mpa na pabafikile mu kwibakila. Mu maasha, ingi nsaa aye na mukashi aye babadi abeyipushena nkonko ya mu Bible. Mukashi aye badi muukye Bible kalolo na badi mulombene kutusha ngalulo kushi lukalakashi. Anka Robert kebungi tabadi akamba kuuka kutusha ngalulo na dingi bibadi abimukalakasha. Akula’shi: “Bibadi nka bu’mi shauku kintu su nkimune. Nadi munangushene’shi, ‘Bwandya kwikala nfumu a mukashi’ande mu kikudi, abitungu nkite mwanda kampanda.’” Bakitshine nka byabya. Akula’shi: “Nalongyele Bible, misusa na misusa, namulonga munda mwa mafuku ebungi, na myanda yoso inadi nalongo ibabangile kwilungeena ku kapelakapela. Nafikile mu kushinguula myanda ibungi, na mwanda wi na muulo ngofu, nadi mutamishe kipwano kyande na Yehowa.”

3. (a) Ndilongyesha kinyi dyatudi balombene kupetela ku kileshesho kya Robert? (b) Mmyanda kinyi i na muulo yatukyebe kwisambila binobino?

 ³ Twi balombene kulonga mwanda wi na muulo ku kileshesho kya Robert. Twi balombene kwikala na kyukilo kya myanda ya mu Bible na kutwela mu bisangilo, kulungula mukandu wibuwa nsaa yoso, anka bino tabitwikasha na binangu bya mu kikudi nya. Sunga’shi twi bafube ngofu bwa kwikala na binangu bya mu kikudi, anka nsaa yatwitalula atwe banabene, atusangana ma mbalo aatungu’shi tulumbuule. (Beena-Fidipe 3:16) Mu uno mwisambo, atukalula ino nkonko isatu i na muulo ukata: (1) Nkinyi akiketukwasha bwa kutalula bumuntu bwetu bwa mu kikudi? (2) Abitungu tukite kinyi bwatudya kunyisha kunyinga mu kikudi? (3) Kwikala banyingye mu kikudi nkulombene kwitukwasha mu nshalelo eetu a kwifuku n’efuku naminyi?

4. Nnanyi abapa elango di mu mukanda wa Beena-Efeso 4:23, 24?

⁴ Nsaa ibatubangile kufubila Efile Mukulu, tubadi bashintuule myanda yoso ya mu nshalelo eetu. Anka kuno kushintuluka tankupwe nsaa ibatudi babatshishibwe nya. Bible etulungula’shi: ‘Tungunukayi na kwaluluka mu mpango ya mu binangu byenu.’ (Beena-Efeso 4:23, 24) Bu byatudi bantu bashi bapwidikye, abitungu’shi tutungunukye na kushintuluka. Sunga twekala’shi tubapu kufubila Yehowa munda mwa bipwa bibungi, twi nka na lukalo lwa kulama kipwano kyetu kinyingye.​—Beena-Fidipe 3:12, 13.

5. Nkonko kinyi ilombene kwitukwasha bwatudya kuuka su twi na binangu bya mu kikudi?

⁵ Sunga twekala bakinga sunga bakulu, abitungu twitalule atwe banabene na kululama. Twi kwiyipusha’shi: ‘Nashinkamisha’shi nkwete kutama mu kikudi su? Nkwete kunyisha kwambula Kidishitu? Mwikelo wande na mushindo wangikalaa mu bisangilo aulesha kinyi? Ngakwilo ande alesha kinyi pabitale myanda yankumina binyibinyi mu nshalelo? Kiubishi kyande kya kwilongyela, nfwadilo na ntshibisho ande a nyene, na byankitaa nsaa yabampa elango abilesha’shi ne muntu e naminyi? Nakitaa naminyi nsaa yantompibwaa bwa kukita kintu kibubi? Ne mupwe kwikala mwina Kidishitu munyingye su?’ (Beena-Efeso 4:13) Ino nkonko yoso ngilombene kwitukwasha bwa kumona mushindo watudi batame mu kikudi.

6. Nkinyi dingi kilombene kwitukwasha bwa kuuka su twi na binangu bya mu kikudi?

⁶ Ingi nsaa atwikalaa na lukalo lwa’shi bangi bantu betukwashe bwatudya kutundula su twi na binangu bya mu kikudi. Mpoolo mutumibwa badi mupatule’shi muntu a ku mbidi, sunga elaa binangu ku myanda ya ku mbidi, tashingulaa’shi nshalelo aaye tasangasha Efile Mukulu nya. Anka muntu a mu kikudi ashinguula bi mweneno a Efile Mukulu mu myanda yoso. Auku’shi Yehowa takuminaa nshalelo a kwipana ku myanda ya ku mbidi. (1 Beena-Kodinda 2:14-16; 3:1-3) Bakulu be na kinangu kya Kidishitu abamonaa bukidibukidi nsaa ayibanga mukwetu kwikala na mwikelo wa ku mbidi, na abakitaa bukopo bwa kumukwasha. Su bakulu abetatshisha bwa kwitukwasha, atukakumina bukwashi bwabo na kushintuula myanda ayitungu kushintuula su? Su tubakitshi byabya, atukalesha’shi atukumina kunyisha kunyinga mu kikudi binyibinyi.​—Mulungudi 7:5, 9.

7. Atuuku naminyi’shi kwikala na kiukilo kya mu Bible ta nkupwa kwa mwanda bwa kwikala muntu e na binangu bya mu kikudi?

⁷ Bwatudya kwila na binangu bya mu kikudi, kwikala na kiukilo kya mu Bible ta nkupwa kwa mwanda nya. Nfumu Salomone badi auku myanda ibungi pabitale Yehowa, na amo mayi a binangu ababadi bakule kwi Salomone mbeafunde mu Bible. Anka kunyima kwa mafuku, kipwano kyaye na Yehowa kibatshimbile, na ta mutungunukye na kwikala na lulamato nya. (1 Banfumu 4:29, 30; 11:4-6) Byabya, nkinyi dingi akitungu’shi tukite kunyima kwa kupeta kiukilo kya mu Bible? Abitungu tutungunukye na kunyingisha lukumino lwetu. (Beena-Kolose 2:6, 7) Twi kukita bino naminyi?

8, 9. (a) Nkinyi akiketukwasha bwatudya kunyingisha lukumino lwetu? (b) Abitungu twikale na kepatshila kinyi nsaa yatulongo na yatunangushena ku myanda yatulongo? (Tala kashibo “ Byodi mulombene kukita bwa kukula mu kikudi.”)

 ⁸ Mu siekele a kumpala, Mpoolo badi munyingishe bena Kidishitu bwabadya ‘kwenda kumeeso bwa kwifubwila ku [bu] muntu mukulu.’ (Beena-Ebelu 6:1) Twi kufubila dino elango lelo uno naminyi? Umune wa ku mishindo ya kukita bino nkulonga mukanda wa Elameeyi mu kifulo ky’Efile-Mukulu. Kukita bino akukukwasha bodya kushinguula bya kufubisha mayi a kulonda a mu Bible mu muwa oobe. Su we mupwe kulonga uno mukanda, kwi ingi mikanda yodi mulombene kulonga bwa kunyingisha lukumino lobe. (Beena-Kolose 1:23) Abitungu dingi tunangushene pa myanda yatubadika na kuteka Yehowa bwa’shi etukwashe bwatudya kumona bya kwiyitumikila.

⁹ Nsaa yatulongo na kunangushena pa myanda yatulongo, abitungu twikale na kitshibilo kya kwikala na lukalo lukata lwa kusankisha na kukookyela Yehowa. (Misambo 40:8; 119:97) Abitungu dingi tusumbule kintu kyoso kilombene kwitukutshishwa bwatudya kukula mu kikudi.​—Tite 2:11, 12.

10. Ba nsongwa mbalombene kukita kinyi bwabadya kunyisha kunyinga mu kikudi?

¹⁰ Su we nsongwa, we na bipatshila bya mu kikudi su? Ungi mukwetu mulume kwete kufuba ku Betele esambaa na ba nsongwa abakyebe kubatshishibwa ku bikongeno bya kifunda na kwibayipusha pabitale bipatshila byabo bya mu kikudi. Asanganaa’shi bebungi mbanangushene kalolo pabitale mushindo wabakumina kufubila Yehowa mu mafuku aafiki. Bamo be na mpango ya kufubila Yehowa mu mudimo wa nsaa yoso sunga kwenda mu mbalo mwi lukalo lwa balungudi. Anka bangi ba nsongwa tabamonaa bya kwalula lukonko lwaye nya. Bino abilesha’shi tabapusha lukalo lwa kwikala na bipatshila bya mu kikudi su? Su we nsongwa, eyipushe’shi: ‘Nendaa mu bisangilo na mu bulungudi penda bwa kusangasha bantande su? Su ne na kipwano kyande’mi nabene n’Efile Mukulu?’ Byabya, boso bwetu twi balombene kwikala na bipatshila bya mu kikudi, byatwikala bakulu sunga bakinga. Bino bipatshila abiketukwasha bwatudya kunyisha kunyinga mu kikudi.​—Mulungudi 12:1, 13.

11. (a) Abitungu tukite kinyi bwatudya kwikala na binangu bya mu kikudi? (b) Nkileshesho kinyi kya mu Bible kyatudi balombene kwambula?

¹¹ Kunyima kwa kumona ma mbalo atudi balombene kulumbuula, abitungu tubangye kushintuluka. Bino bi na muulo ngofu mwanda mbilombene kwitupasha sunga kwitwipayisha. (Beena-Looma 8:6-8) Yehowa tetutekye bwatudya kwikala bapwidikye nya, na etupeyaa kikudi kyaye bwakidya kwitukwasha. Anka abitungu twikitshishe ngofu. Mukwetu John Barr, badi mufube mu Kasaka ka Bakunkushi-Bakulu, badi mupatuule mayi e mu Luka 13:24. Bambile’shi: “Bantu bebungi abaponaa mwanda tabekitshishaa bwa kwikala banyingye.” Abitungu twikale bu Yaakobo, badi mulwe na mwikeyilu kushi kuleka mpa na pabadi mumwelele myabi. (Kibangilo 32:26-28) Sunga byekala’shi twi kupeta muloo mu kulonga kwa Bible, tatukulupilanga’shi Bible ekale bu mukanda wa kukisha nao kapapi abikalaa mukanda wa myanda ya mpwandikishi. Abitungu tufube ngofu bwa kufumbula bya binyibinyi bi na muulo bilombene kwitukwasha.

12, 13. (a) Nkinyi kilombene kwitukwasha bwa kutumikila mayi e mu Beena-Looma 15:5? (b) Kileshesho na elango dya Mpyeele bi kwitukwasha naminyi? (c) We kukita kinyi bodya kwenda na kunyinga mu kikudi? (Taala kashibo akamba’shi, “Byodi mulombene kukita bwa kukula mu kikudi.”)

¹² Nsaa yatwikitshisha bwa kukula mu kikudi, kikudi ki selele akiketukwasha bwatudya kushintuula ngyelelo eetu a binangu. Ku kapelakapela, atukalongo bya kunangushena bu bibadi abinangushena Kidishitu. (Beena-Looma 15:5) Kikudi ki selele nkilombene kwitukwasha bwatudya kukambila malaka e bubi na kwikala na ngikashi ayisankisha Efile Mukulu. (Beena-Ngalatea 5:16, 22, 23) Su tubasangana’shi twi bepaane mu myanda ya ku mbidi sunga bisepeelwa, tatukookanga nya. Abitungu tutungunukye na kuteka Yehowa kikudi kiselele bwa’shi kitukwashe bwatudya kwipaana mu myanda ya mu  kikudi. (Luka 11:13) Tentekyesha Mpyeele mutumibwa. Tabadi anangushena bibadi abinagushena Kidishitu nsaa yoso nya. (Mateo 16:22, 23; Luka 22:34, 54-62; Beena-Ngalatea 2:11-14) Anka tabadi mukookye nya, na Yehowa namu badi mumukwashe. Ku kapelakapela, Mpyeele balongyele bya kunangushena mu mushindo ubadi aunangushena Kidishitu. Natwe namu twi balombene kumwambula.

¹³ Kunyima kwa mafuku, Mpyeele badi mutemune ngikashi ilombene kwitukwasha. (Badika 2 Mpyeele 1:5-8.) Abitungu tufube ngofu bwatudya kwikala na butontshi bwa mbidi, kunyingiila, kifulo kya bwina muntu, na ingi ngikashi ibuwa. Efuku dyoso twi kwiyipusha’shi, ‘Eyikashi kinyi dyandi mulombene kwikitshisha bwa kwikala nadyo lelo dilombene kunkwasha bwandya kunyisha kwikala muntu munyingye mu kikudi?’

14. Kwikala na binangu bya mu kikudi akukekala na bukitshishi mu muwa wetu naminyi?

¹⁴ Su tubekala atunangushena mu mushindo ubadi aunangushena Kidishitu, bino abikekala na bukitshishi mu mwikelo wetu wa ku mudimo sunga ku kalasa, mu ngakwilo eetu, na mu mushindo watwata bitshibilo efuku dyoso. Bitshibilo byetu abikalesha’shi atwikitshisha bwa kwambula Kidishitu. Bu byatudi bantu be na binangu bya mu kikudi, tatukumina kutadila kintu su nkimune bwakidya kulwisha kipwano kyetu na Yehowa. Nsaa yabetutompo bwatudya kukita kintu kibubi, binangu byetu bya mu kikudi abiketukwasha bwatudya kukambila kitompwanga. Kumpala kwatudya kwata kitshibilo, atukemana na kwiyipusha’shi: ‘Eyi kinyi dya kulonda dya mu Bible dilombene kunkwasha? Kidishitu badya kukita naminyi mu uno mwanda? Nkinyi kilombene kusangasha Yehowa?’ Abitungu twikale na kyubishi kya kunangushena mu kino kipaso. Byabya, tubandeyi kwisambila imo myanda ilombene kwitufikila. Bwa mwanda oso, atukatala eyi dya kulonda dya mu Bible dilombene kwitukwasha bwa kwata kitshibilo kibuwa.

15, 16. Kunangushena mu mushindo ubadi aunangushena Kidishitu kwi kwitukwasha naminyi bwa kwata bitshibilo bibuwa pabitale (a) kusangula muntu a kwiyibakishena naye? (b) kusangula bakuuku sunga balole betu?

¹⁵ Patusangula muntu a kwiyibakishena naye. Eyi dya kulonda dya mu Bible di mu 2 Beena-Kodinda 6:14, 15. (Badika.) Mpoolo badi muleshe patoka’shi bantu be na binangu bya mu kikudi mbelekene ngofu na bantu ba ku mbidi, sunga bantu be na binangu bya ku mbidi. Bano bantu babidi tabamonaa myanda mu mushindo umune nya. Dino eyi dya kulonda ndilombene nkukwasha bwa kusangula muntu a kwiyibakishena naye naminyi?

¹⁶ Patusangula bakuuku sunga ba lole betu. Eyi dya kulonda dya mu Bible di mu 1 Beena-Kodinda 15:33. (Badika.) Muntu e na binangu bya mu kikudi ta mulombene kwikala kuuku sunga lole a bantu balombene kubofusha lukumino lwaye nya. Nangushena byodi mulombene kutumikila dino eyi dya kulonda mu nshalelo ilekene. Bu kileshesho, di nkukwasha naminyi bodya kwata bitshilo pabitale balole sunga ba kuuku bodi nabo ku Internete? Di nkukwasha naminyi bodya kwata kitshibilo kya kukumina sunga kupela kwasha maasha ku Internete na bantu boshi’ouku?

17-19. Kwikala muntu e na binangu bya mu kikudi akukukwasha naminyi (a) bwa kusuuka midimo ishi na muulo? (b) bwa kwikala na bipatshila bibuwa? (c) bwa kupudisha bilumbu?

¹⁷ Myanda ayilwisha nshalelo eetu a mu kikudi.  Mayi e na muulo akwitudimusha nao atwiapete mu Beena-Ebelu 6:1. (Badika.) “Mmifubo ifwe” kinyi ayitungu tusuukye? Ino nyi mifubo ya bisumanga ishi ilombene kwitukwasha bwatudya kwikala bantu banyingye mu kikudi. Kuno kudimusha pabitale midimo ifwe nkulombene kwitukwasha bwa kwalula nkonko bu ino: ‘Uno mudimo wankitshi wi na muulo, su ta wi na muulo? Ne mulombene kutwela mu uno mudimo wa busunga su? Bwakinyi ntshi mulombene kutwela mu kisaka kya bantu abalu bwa kushintuula myanda mu uno ndumbulwilo?’

¹⁸ Bipatshila bya mu kikudi. Mu Mwisambo waye wa pa mwengye, Yesu batushishe elango dibuwa pabitale bipatshila. (Mateo 6:33) Muntu e na binangu bya mu kikudi atulaa Bufumu bw’Efile Mukulu pa mbalo ya kumpala mu muwa waye. Dino eyi dya kulonda adiketukwasha bwa kwaluula nkonko bu ino: ‘Abitungu ntwele mu universite kunyima kwa kupudisha kalasa kakata su? Ne mulombene kukumina mudimo kampanda su?’

¹⁹ Bilumbu. Elango dya Mpoolo dibadi mufundjile bena Kidishitu ba mu Looma ndilombene kwitukwasha nsaa yatudi na bilumbu pankatshi petu na bakwetu. (Beena-Looma 12:18) Atwambula Kidishitu, ngi bwakinyi atwikitshishaa bwa “kushala mu butaale na bantu boso.” Atukitaa naminyi patudi na kilumbu pankatshi petu na bangi bantu? Abitwelelaa bukopo bwa kukumina mweneno a ungi muntu su? Su abetuuku bu muntu ekitshishaa bwa kutwesha butaale?—Shake 3:18.

20. Bwakinyi atukumina kwenda kumpala mu kikudi?

²⁰ Bino bileshesho abilesha mushindo ulombene mayi a kulonda a mu Bible kwitukwasha bwatudya kwata bitshibilo abilesha’shi tukwete kukunkushibwa na kikudi ky’Efile Mukulu. Su tubekala na binangu bya mu kikudi, atukekala na nshalelo a muloo. Robert, atudi bateemune ku mbangilo, akukula’shi: “Kunyima kwa’mi kwikala mu kipwano kibuwa na Yehowa, nekeele mulume ebuwa na nshe bana ebuwa. Nadi na muloo wibungi.” Su tubekitshisha na mwetu moso bwatudya kwenda kumpala mu kikudi, atukapete ingi myabi ibungi. Atukekala na nshalelo a muloo kubanga binobino, na mu mafuku aafiki atukapete “muwa wa binyibinyi.”​—1 Timote 6:19.