NE MUTANDJIKWE bu mwana a musambo mu bana mwanda, na mbetutande kwi baledi abadi abafubu ngofu mu kibundji kya Karítsa ki mu eumbo dya Grèce. Ne mutandjikwe mu kipwa kya 1926.

Kipwa kimune kumpala kwa’mi kutandjikwa, baledi bande abafumankene na John Papparizos, badi Mulongi a Bible badi auku kukita miisambo kalolo. Kumpala ba Temwe ba Yehowa abadi n’eshina dya bu Balongi ba Bible. Pa mwanda wa kipaso kibadi John apatuula Bifundwe na kunangushena na bantu, bino bibebatakwile mu kubanga kutwela mu bisangilo bya Balongi ba Bible bibadi abikitshika mu kibundji kyetu. Nyinami badi na lukumiino lwi bukopo mwi Yehowa Efile Mukulu, na dingi sunga mbibaadi na kilema, badi alungula bangi mukandu wibuwa nsaa yooso yapete mushindo. Mwanda wa malwa, nshami badi mukambe kubekyeela ku bilubilo bya bangi bantu na ku kapela kapela babangile kuleka kutwela mu Bisangilo bya bena Kidishitu.

Ami na bakwetu tubadi atunemeka Bible ngofu, kadi pabatudi atwende na kukula, malaka a bu nsogwalume abaadi atakule binangu byetu ku myanda ya bisumanga. Kunyima, mu kipwa kya 1939, pabatwelele ngoshi ya kabidi ya nsenga ishima mu Europe, mu musoko wetu mubakitshikile mwanda ubadi witukalakashe ngofu. Nkungishanyi netu mwikale dingi mukwetu a mu kifuko abetanyinaa bu Nicolas Psarras, badi ki’akatuka mu kubatshishibwa bu Temwe a Yehowa, abamukwatshile bwa kumutwesha bu musalayi a bena Grèce. Pabadi na bipwa 20, Nicolas balungwile bakata ba basalayi kushii kutshina’shi, “Ami ntshi mulombene kwenda ku ngoshi mwanda ne musalayi a Kidishitu.” Abamusambishe ku tumiladi twa basalayi abo nkumutshibila bwadya kutwela mu lukano munda mwa bipwa ekumi. Uno mwanda ubadi witukalakashe ngofu!

Biya byoso, mafuku apeela mu kipwa kya 1941, basalayi ba angi maumbo esangye abatwelele mu Grèce abo nkutuusha Nicolas mu lukano. Balukile ku Karítsa, pabafikile kwanka, tutu’ande, Ilias bamwelele nkonko ibungi pabitale myanda ya mu Bible. Nadi nebateemesha kalolo. Kunyima kwa paapa, ami na Ilias na mwin’etu mukashi  Efmorfia, tubabangile kulonga Bible, na kutwela mu bisangilo bya ba Temwe lubingo looso. Mu kipwa kibalondele, boso bwetu busatu tubelambwile kwi Yehowa na kubatshishibwa. Kunyima, bangi bakwetu bananka abafikile n’abo namu ba Temwe ba Yehowa.

Mu kipwa kya 1942, kakongye ka mu Karítsa kabadi na ba nsongwalume na ba nsongwakashi kitema be na bipwa kubanga pa 15 na ku 25. Atwe booso tubadi atuuku’shi lukalakashi lwi bukopo alwitutengyela kumpala. Bwatudya kwinyingishena, tubabangile kwibunga pamune nsaa yooso yatudi na mushindo bwatudya kulonga Bible, kuyimba misambo ya mu kikudi, na kwela nteko. Pa mwanda wa byabya, lukumino lwetu lubanyingile pepoo.

Mafuku apeela kunyima kwa ngoshi ya kabidi ya nsenga ishima, ba communiste ba mu Grèce abadi batombokyele mbulamatadi a mu Grèce abo nkwibwesha ngoshi ya miilo i bukopo. Ba communiste abaadi abalu ngoshi abayiile mu bibundji bi ku mpengwa abo nkubanga kutakula bantu pa bukopo bwabadya kukila ku lupese lwabo. Pababatwelele mu musoko wetu, abakwatshile ba nsongwalume basatu ba Temwe ba Yehowa​—Antonio Tsoukaris, Ilias, n’ami. Tubebalungwile’shi atwe twi bena Kidishitu bashi’abatwelakanaa mu myanda ya ngoshi; anka abetutambwishe pa bukopo bwa kwenda ku Mwengye wa Olympe, atwe nkukita nsaa 12 bwa nkekufika.

Mafuku apeela kunyima kwa paapa, mukata a ba communiste betulungwile’shi tutwele mu kisaka kya basalayi babo abadi abefunyu mu kyakya kipindji. Nsaa ibatumulungwile’shi bena Kidishitu ba binyibinyi tabasemunaa ma mputu bwa kwenda mu kulwa na bangi bantu, bafiitshile munda ngofu aye nkwitusukuma kumpala kwa ungi mukata a basalayi. Pabatulondeele uno mukata a basalayi bi mwanda wetu, betulungwile’shi, “Su mbyabya, atayi nyema a mpunda bwa’shi nwikale anusemuna basalayi abatapika ku ngoshi bwa kwenda nabo ku lupitalo.”

Tubamwipwishe’shi “Su basalayi ba mbulamatadi abetumono mbalombene kwitukita naminyi? Tabetumono nka bu bangi bantu abalu nabo ngoshi su?” Aye namu nkwitwalula’shi, “Su mbyabya ikalayi anutwadila be ku ngoshi mikate.” Tubamwipwishe dingi’shi “Twi kukita naminyi su ungi mukata a basalayi betumono kwatufiki na mpunda na betutumina eyi dya kusemuna ma mputu na kwenda ku ngoshi?” Uno mukata a basalayi bauminyine eela binangu ngofu munda mwa kipindji kikata. Kunyima bakwile’shi: “Bibuwa, nwi balombene kwikala anulama mikooko! Shalayi ku mwengye nwikale anudisha mikooko.”

Mu mafuku ooso abadi bantu betwifunyishe abelwila ngoshi, busatu bwetu tubadi atupusha’shi kondo keetu k’eshimba aketutakula bwa kwikala atulama mikooko. Kunyima kwa kipwa, Ilias, bu bibaadi mwana mbedi, abamufungwile bwa’shi alukye akatale mama mwanda papa badi mupwe kufwa. Antonio bakumbile maladi abo nkumupoosola. Anka penda ami nabene ngi bashadile mukwatshibwe.

Mu aa mafuku, kisaka kya basalayi ba bena Grèce kibefubwidile peepi ngofu na ba communisete. Kisaka kya ba communiste abaadi bankwate abasuukile ku myengye pepi na Albanie. Pabatufikile pepi na ku mikalo, basalayi ba bena Grèce abetwelele munkatshi. Bano ba ntomboshi abapushishe moo basuuka. Ami nkufwama kunyima kwa mutshi ubadi upone, pano ngi panadi mufumankane na mwanda wa basalayi wandji mulonde ku mbangilo.

Panalungwile basalayi ba bena Grèce’shi abekalanga bankwate kwi ba communiste, abantumine bwabadya kunsambisha kwi kisaka kya basalayi kibadi ku Véroia, kino kibundji abadi abekitanyina mu mafuku a kala bu Beree.  Panafikile kwakwa abantumine mu kubundula meena a kufwamina basalayi. Bu binapelele, mukata a basalayi bantumine mu lukano lwabakyengyeshaa bantu ngofu mu kibundji kya Makrónisos.

Mu ino nshibo ya dikyenga, ishii meema, i mufito yabetanyina bu Makrónisos i mu kisangi kya Attica ki mu bilometre 50 kukatuka ku Ateene. Kino kisangi ki na penda bula bwa bilometre 13 na bukata bwa ntaba 500. Anka, kubanga mu kipwa kya 1947 na ku kya 1958, mu kino kisangi mubaadi bena lukano bakile pa 100 000, munkatshi mwabo mubadi basalayi ba ba communiste, bangi bantu abaadi abalu ngoshi, na ba Temwe ba Yehowa bebungi.

Panafikile kwanka kumbangilo kwa kipwa kya 1949, bena lukano abaadi mu tusaka tusaka. Abaadi bantuule mu kasaka kabashibadi abakamba kulama mubadi bangi bantu nkama na nkama. Bantu 40 abadi abalala mu nsenga mu kashibo ka mapema kabadi bakite bwa bantu 10. Tubadi atutomo meema ashii buwa na tubadi atukamba kudya nkunde na mpwa. Bu bibamudi amwele lufufi nsaa na nsaa na lupunga lubadi alwele, nshalelo badi mukopokye ngofu. Kunyima kwa mafuku tatubadi atupete dingi bukome bwa kutunda mabwe, pa mwanda wa kwitukyengyesha kwibukopo kubadi akukookyesha mbidi mpa na binangu bya bena lukano.

Dingi efuku, panadi natambuka ku kyese, nadi mwimonene na ba Temwe bebungi ba mu bingi bisaka. Tubapushishe muloo wibungi wa kwimonena! Tubadi na kyubishi kya kwibunga pamune, anka tubadi atukitshi mu bufyefye, bwa kupela betumona. Tubadi atulungula mukandu wibuwa mu bufyefye kwi bangi bena lukano, kunyima kwa mafuku bangi ba kwabadi abafikile ba Temwe ba Yehowa. Ino myanda na nteko ibatudi atwele na mashimba amune ibetukwashishe bwatudya kushala banyingye mu kikudi.

Myeshi ekumi kunyima kwa’bo “kuntuula bibuwa,” na kupetuula mbidi bukome, bano bantu abadi bankwate abadi baate kitshibilo kya’shi mbangye kufwala bilamba bya basalayi. Bu binapelele, abantwadile kwi mukata a kisaka kya basalayi. Natambikile uno mukata a basalayi mayi anadi mufunde ku kasaki’shi: “Nakumina nka penda kwikala musalayi a Kidishitu.” Kunyima kwa’bo kunkyengyesha, uno mukata a basalayi bampeele kindonda kyaye, na uno kindonda mmwikale mukata a kipwilo kya bena Orthodox kya mu Grèce badi mufwale bilamba byaye bya mu kipwilo. Panamwalulwile nkonko yaye yooso ibadi angyele ku bukwashi bwa Bifundwe, batumine eyi na nsungu yooso’shi: “Mukatusheyi pano. Nyi muntu sha bukumiinekumiine!”

Butookye bwa dyadya efuku ku namashika, basalayi abandungwile dingi bwandya kufwala bilamba bya basalayi. Panapelele, babaadi bankupile makofi, na mitshi. Akupu abantumine kwi munganga a lukano bwa’shi ampime bwa kuuka su mifufwa yande ngitshokokye akupu abangalwishe mu katshibo ka mapema kanadi mushale. Abadi abankupila bino efuku dyooso munda mwa myeshi ibidi.

Bu bibabamwene’shi ntshi mulombene kusumbula lukumino lwande, basalayi abakimbile ungi mushindo wa kuntompa. Abangalwishe maboko ku mongo banganya myoshi, basalayi babanga kunkupila nkodi mushi mwa ngwa yande. Panadi napusha busungu bwibukopo, natentekyeshe ano mayi a Yesu: “Nwi ba mwabi pabenukaa na pabenupombesha na pabenudimbila myanda ibubi . . . Ikalayi na muloo na kusepeela, mwanda efuto dyenu ndikata mwiyilu; mwanda byabya ngi bibabapombeeshe batemuki babaadi benubadidiile.” (Mateo 5:11, 12) Ku nfudilo, kunyima kwa’mi kupusha dino dikyenga dibadi bu dishii bya kupwa, binangu bibanshimine.

Nakapasukile mu kashibo ke mashika mushii mikate, meema, kushii su nkilamba kya kwipuuta. Sunga mbyabya, napushishe biya na binangu bibadi bingalukye. Nka bu abyakula Bible, “butaale bw’Efile Mukulu” bubaadi ‘abulama eshimba dyande na binangu byande.’ (Beena-Fidipe 4:7) Butookye bwa dyadya efuku, ungi musalayi badi na kalolo bampeele mukate na meema na avoka. Kunyima ungi musalayi bampeele ndambo y’ekuta. Bino bintu na bingi binadi mupete, bibaadi binkwashe bwa kupusha bi kalolo ka Yehowa.

Bakata ba mbulamatadi abadi abammono bu ntomboshi shii mulombene kushintuluka abo nkuntuma ku Ateene ku tumiladi twa basalayi. Panafikile kwanka, abantshibidile lukano lwa bipwa bisatu mu lukano lwa mu Yíaros, lwi mu kisangi kya Makrónisos ki bukata bwa bilometre 50.

Lukano lwa ku Yíaros nyi nshibo ikata yabadi bebakye na matafwadi amonga e bukopo mwi bena lukano bakile pa 5 000. Mwanka mubadi ba Temwe ba Yehowa musambobidi bababadi bakwate, pa mwanda wa kupela kutwelakana mu myanda ya politike. Sunga byekala’shi babadi betupeleshe, boso bwetu musambobidi tubadi atwibungu mu bufyefye bwatudya kulonga Bible. Tubadi  abapete dingi jurnale a Kitenta kya Mulami mu bufyefye, akupu tubadi atutentula myanda i mwanka ku maboko bwatudya kwiabishena mu bisangilo byetu.

Dingi efuku pabatudi atulongo mu bufyefye, ungi ndami a ku lukano batwelele mu nshibo ibatudi bebungile aye nkwitunyenga mikanda yooso ibatudi nayo. Abadi betwitanyine ku biro bya mukata a lukano, atwe nkukulupila’shi kuno kwatwende abaketutshibila kibawe kibukopo. Anka pabatufikile kwadi, mukata a lukano bambile’shi: “Atwinuuku kalolo kyanudi, na atwinunemeka. Atuuku’shi twi balombene kwinukulupila. Alukayi ku mudimo.” Bapeele bamo ba kwatudi midimo ipelepele. Tubadi na lutumbu lwibungi mu mashimba eetu. Tubamwene’shi mpa na patudi mu lukano kunyingiila kwetu kwa bu bena Kidishitu kubadi kutumbishe Yehowa.

Kunyingiila kwetu kubadi kutushe bingi bipeta bibuwa. Kunyima kwa kubekyeela mwikelo wetu wibuwa, ungi mwina lukano badi mulongyeshi a mukanda wa makumi (Mathematique) badi mwitwipushe pabitale malongyesha eetu. Pababadi betutushe atwe ba Temwe ba Yehowa mu lukano mu kipwa kya 1951, n’aye namu abadi bamutuushe. Kunyima kwa mafuku, bafikile Temwe a Yehowa mubatshishibwe aye nkwata mudimo wa nsaa yooso.

Bwande’mi, kunyima kwa kutuuka mu lukano, nalukile kwi kifuko kyande ku Karítsa. Kunyima, tubakatukile na bangi bantu ba mwiumbo dyetu twenda mu kibundji kya Melbourne, mu Australie. Panafikile kwakwa nafumankeene na Janette ami nkumwibakila, mmwikale mwina Kidishitu ebuwa, na tubatandile mwan’etu a kumpala mulume, na bana bakashi basatu atwe nkwibakusha mwishinda dya binyibinyi.

Lelo uno, ntandi na bipwa bikile pa 90, kadi ne mwikale nka mukulu mu kakongye kwete kufuba ngofu. Pa mwanda wa bibabadi bankyengyeshe, mbidi yande na mikolo ayintanyikaa ingi misusa, bikishekishe su natuuku mu bulungudi. Sunga mbyabya, ne nka na kitshibilo kya kwikala “musalayi a Kidishitu.”​—2 Timote 2:3.