DAAVIDE a mu Isaleele a kala ngi bakwile ano mayi e kunundu bwa kukampula mwana mukashi bafikile mu kufumankana naye. Eshina dyaye nyi Abigaile. Nkinyi kibatakwile Daavide bwadya kumukampula, na kileshesho kyaye nkilombene kwitulongyesha kinyi?

Daavide bafumankene na uno mwana mukashi mwibakilwe pabadi asuuku Nfumu Saule. Abigaile badi mukashi a Nabale, ungi muntu badi mpeta na badi mumune kisaka kikata kya mikooko mu kipindji kya nsenga ki na myengye ibungi dya kuushi kwa Yuuda. Daavide na basalayi baye abadi nka “bu kimano” akikalwila balami ba mikooko ya Nabale na mikooko yaye. Kunyima kwa mafuku, Daavide batumine bantu kwi Nabale, bwa kumuteka bwa’shi ‘ebakwashe na bya kudya byoso byadi mulombene kwibapa.’ (1 Samwele 25:8, 15, 16) Patutala bibabadi balame bintu bya Nabale kwi Daavide na basalayi baye, luno luteko lwaye talubadi bu mwanda wibubi nya.

Anka Nabale, sh’eshina adipushisha’shi “mupupakane” sunga “kitesha,” badi mukite myanda nka muyiile eshina dyaye. Badi mwaluule na mayi a kapeesha na a mulomo, aye nkusumina Daavide bintu. Pa mwanda wa byabya, Daavide belumbulwile bwadya kufika mu kunyooka Nabale bwa lwalulo lwaye lwi bubi na lushii lwa binangu. Nabale na kifuko kyaye kishima babadya kupeta masaku pa mwanda wa butesha bwaye.​—1 Samwele 25:2-13, 21, 22.

Pabadi munangushene pabitale masaku aakyebe kwibafikila, Abigailee badi mukite myanda n’eshimba dinyingye. Bayiile na kanemo kooso mu kuteka Daavide lusa mwishina dya kipwano kyaye na Yehowa. Na dingi bapeele Daavide na bantu baye bya kudya bibungi, mwanda badi auku’shi Daavide ngi akashala ku bufumu. Ku lwaye lupese namu, Daavide bashingulwile’shi Yehowa ngi bamutumu bwadya kumukutshishwa kukita mwanda ubadya kumupetesha dibasa dya mase kumpala kwaye. Daavide balungwile Abigaile’shi: “Kisampibwe, kinangu kyobe kibuwa! Osampibwe obe nabene bwa pobonkanda lelo uno bwa kufika mu kwipayishena.”​—1 Samwele 25:18, 19, 23-35.

Ta twikalanga bu Nabale, pa kwikala bantu bashii na lutumbu ku bibuwa byabadi betukitshine. Na dingi, nsaa yatumono mwanda wibubi aukyebe kukitshika, abitungu tukite byoso byatudi balombene kukita bwa kwiwimika. Eyendo, twi kupeta binangu bu bya mufundji a misambo bambile’shi: “Ndambukishe buwa bwa binangu na kapatupatu.”​—Misambo 119:66.

Bangi bantu namu mbalombene kumona binangu, kapatupatu, na bikitshino byetu. Be kwibyakula sunga kukutwa kwibyakula, anka be kupusha bu Daavide, bambile’shi: “Kisampibwe, kinangu kyoobe kibuwa!”