1, 2. (a) Mmwanda kinyi ukata utale bantu boso? (b) Bwakinyi uno mwanda wi na muulo kwatudi?

BWA bantu bebungi lelo uno, nfwalanga ngi i na muulo ukata. Ngi bwakinyi abekalakasha na kunangushena nka ku yanka. Abakisha nsaa yabo mu kukimba makuta ebungi sunga kulama abadi nao. Bwa bangi namu, kifuko, kwikala na mbidi bukome, sunga bingi bintu byabakyebe kukita ngi bi na muulo ukata mu muwa wabo.

² Kwi mwanda wi na muulo ukata kukila bingi bintu byoso. Uno mwanda nyi kukalwila kwa matalwa a kumunana a Yehowa. Uno mwanda wi na muulo ukata ngi bwakinyi abitungu tutuule binangu byetu pa wanka. Su twakutwa kudimuka, twi kwipaana ngofu mu myanda ya mu nshalelo a kwifuku n’efuku sunga kwikalakasha ngofu pabitale myanda yetu na kufika mu kwilwankana uno mwanda wi na muulo. Su tubakwatshishena matalwa a kumunana a Yehowa, atukekala na ngobesha ya kukambila myanda yatufumankana nayo mu nshalelo eetu, na atukanyiisha kwifubwila pepi na Yehowa.

3. Satana badi mwakule naminyi pabitale matalwa a kumunana a Efile Mukulu?

³ Satana Diabulu badi mweleshe mpaka pabitale matalwa a kumunana  a Yehowa. Satana akyebe bantu banangushene’shi Yehowa Mmukunkushi e bubi, na’shi takuminaa bantu bekala bibuwa nya. Satana badi mwakule’shi bantu mbalombene kwikala na muloo su bekala abeludika abo banabene. (Kibangilo 3:1-5) Badi mwambe dingi’shi, bantu tambalombene kwikala na lulamato kwi Efile Mukulu. Nsaa yabapete nkalakashi, bantu boso mbalombene kupela kuludikibwa naye. (Yoobo 2:4, 5) Ngi bwakinyi Yehowa mmutadile bwa’shi mu kukila kwa mafuku bantu boso bawukye’shi nshalelo ta mulombene kwikala bibuwa su Aye ta mwikale mukunkushi a bantu.

4. Bwakinyi abitungu’shi mwanda wa matalwa a kumunana a Yehowa upwe?

⁴ Yehowa auku’shi ino myanda yoso yabadi bakule kwi Satana ngya madimi. Byabya, bwakinyi mmutadile mafuku aakidi bwa’shi Satana atompe kulesha bino byadi mwakule? Lwalulo lwa ku luno lukonko ndutale bantu boso be mwiyilu na be pa nsenga. (Badika Misambo 83:19.) Adame na Eeva abatombokyele kumunana kwa Yehowa, na kubanga nka paapa, bangi bantu bebungi mbamutombokyele. Bangi mbalombene kwela binangu’shi bino bibakwile Satana mbya binyibinyi. Munda mwa mafuku ooso ashapwile uno mwanda mu binangu bya bantu na bya ba mwikeyilu, ta nkulombene kwikala butale na buumune bwa binyibinyi nya. Anka kunyima kwa kukalwila matalwa a kumunana a Yehowa, bantu boso abakashala mu bukunkushi bwaye bwi buwa na bwa ikalaika. Akukekala butaale pa nsenga na mwiyilu.​—Beena-Efeso 1:9, 10.

5. Mwanda wa matalwa a kumunana a Yehowa ngwitutale ku kinyi?

⁵ Kilumbu kya kukalwila matalwa a kumunana a Efile Mukulu akikapu, na mafumu ooso abakunkusha kwi Satana na bantu aakabutulwa na kukatushibwa. Bufumu bw’Efile Mukulu bwabakunkusha kwi Mesiya ngi abukabikala. Bantu basha lukumiino abakalesha’shi bantu mbalombene kulama lulamato lwabo na kukwatshishena matalwa a kumunana a Efile Mukulu na lulamato. (Yeeshaya 45:23, 24) Atukumina kwikala munkatshi mwa bano bantu basha lukumino su? Oolo! Ngi bwakinyi abitungu tushinguule’shi uno mwanda wi na muulo ukata.

6. Kukalwila matalwa a kumunana a Yehowa kwi na muulo kinyi?

⁶ Kukalwila kwa matalwa a kumunana a Yehowa kwi na muulo kukila buwa bwetu’twe banabene. Anka bino tabilesha’shi kupashibwa kwetu ta kwi na muulo na’shi Yehowa tetupasukila nya. Atuuku bino naminyi?

7, 8. Kukalwila kwa matalwa a kumunana a Yehowa akuketupetesha myabi naminyi?

⁷ Yehowa mmufule bantu, na twi na muulo ku meso kwaye. Ngi bwakinyi batushishe Mwan’aye bwa’shi tupete muwa wa ikalaika. (Yowano 3:16; 1 Yowano 4:9) Su Yehowa tamulombashe milayilo yaye, Satana na bangi bantu basumbule lukumino abadya kwikala na nsambu. Satana bakwile’shi Yehowa e na madimi, asuminaa bantu bintu bibuwa na’shi tamunana mu kipaso kibuwa nya. Ba ntomboshi bakwete kusabuula milayilo ya Yehowa na kwakula’shi: “Taadi pekunyi yawa winyi balayile kufika? Mwanda kashaa ba-mashetu bafwa, byooso mbishaale anka mu kipaso kimune bu bibabidi ku kipangilo kya bintu.” (2 Mpyeele 3:3, 4) Anka Yehowa akalombasha milayilo yaye. Mmwitushinkamiishe’shi kukalwila kwa matalwa aaye a kumunana akukafiki pamune na kupashibwa kwa bantu basha kukookyela. (Badika Yeeshaya 55:10, 11.) Kumunana kwa Yehowa nkwimeene pa kifulo. Byabya twikaleyi bashinkamishe’shi Yehowa mmfule bafubi baye na aataa lulamato lwabo na muulo.—Efilu 34:6.

⁸ Bu bikale’shi matalwa a kumunana a Yehowa mwanda wi na muulo ukata, tabilesha’shi kupashibwa kwetu ta kwi na muulo ku meso kwaye nya. Yehowa etupasukilaa  ngofu. Abitungu tulame mwanda wi na muulo mu binangu byetu na kukwatshishena matalwa a kumunana a Yehowa na lulamato looso.

9. Satana bakwile kinyi pabitale Yoobo? (Tala kifwatulo ki ku mbangilo.)

⁹ Bi na muulo bwa’shi twikale na mweneno ebuwa pabitale matalwa a kumunana a Yehowa. Twi kuuka bino nsaa yatubadika mukanda wa Yoobo, umune wa ku mikanda ya kumpala ya mu Bible. Mu wawa mukanda atusangana’shi Satana bambile’shi su Yoobo ekala mu makyenga ebukopo, mulombene kupela Efile Mukulu. Satana batekyele mpa na Yehowa bwadya kukyengyesha Yoobo. Yehowa tamulombene kukita bino nya, anka batadidile Satana bwa’shi akatompe Yoobo, amulungula’shi: “Kumina kol’eyaasa dyoobe okume pa kyoso kyadi nakyo.” (Badika Yoobo 1:7-12.) Mafuku apeela kunyima kwa paapa, Yoobo badi mushimishe bafubi baye na bintu byaye byooso. Kunyima, bana baye booso ekumi abafwile ku masaku. Satana bakitshine bwa’shi bimwenekye bu’shi Efile Mukulu ngi bebwesha ano makyenga. (Yoobo 1:13-19) Kunyima kwa paapa, Satana bakumbishe Yoobo mukumbo wi bukopo, wi busungu na wi butete. (Yoobo 2:7) Bwa kunyiisha kulwisha myanda, mukashi a Yoobo na bakuuku baye ababangile kumwamba myanda ibubi na ayimubofusha.—Yoobo 2:9; 3:11; 16:2.

10. (a) Yoobo balesheshe lulamato lwaye kwi Efile Mukulu naminyi? (b) Bwakinyi bibadi abitungu’shi Yoobo alumbuule mweneno aaye a myanda?

¹⁰ Satana bakwile bya binyibinyi su? Nya. Sunga mbibadi Yoobo mupete ano makyenga ebukopo, tamutombokyele Yehowa nya. (Yoobo 27:5) Anka, munda mwa kapindji kapeela, Yoobo balubile mwanda wi na muulo ngofu abanga kwela binangu pa mwanda waye aye nabene. Babangile kwakula’shi ta mukite mwanda su ngumune wi bubi. Yoobo bamwene dingi bu’ye e na matalwa a kuuka bwakinyi kwete kukyenga. (Yoobo 7:20; 13:24) Pangi twi kushinguula bibadi abipusha Yoobo. Na dingi Yehowa badi auku’shi Yoobo badi na mweneno ebubi, aye nkukwasha Yoobo bwadya kulumbuula mweneno aaye a myanda. Bakitshine bino naminyi?

11, 12. Yehowa bakitshine kinyi bwa kukwasha Yoobo? Yoobo namu bakitshine naminyi?

¹¹ Twi kubadika myanda ibabalungwile Yoobo kwi Yehowa kubanga mu ​—shapitre a 38 na ku a 41 a mukanda wa Yoobo. Yehowa tamupatulwile Yoobo bwakinyi kwete kukyenga nya. Anka, bamukwashishe bwadya kuuka byadi bupeela kumpala kw’Efile Mukulu. Balongyeshe Yoobo’shi kwi mwanda wi na muulo ngofu kukila myanda yaye. (Badika Yoobo 38:18-21.) Mayi a Yehowa abakwashishe Yoobo bwadya kushintuula mweneno aaye.

 ¹² Bino abilesha’shi, Yehowa bakutshilwe kulesha Yoobo kalolo pa kwisamba naye mu kino kipaso kunyima kwaye kukyenga bino su? Nya, na Yoobo aye nabene ta mwele byobyo binangu nya. Yoobo batemeeshe na kwata elango dya Yehowa na muulo. Amba’shi: “Nekalashena bwa kwakula kwande, dingi nealaasha na kinyongwa mu nsenga na mu buto.” (Yoobo 42:1-6) Kumpala kwa paapa, Elihu bakwashishe Yoobo bwadya kushintuula binangu byaye. (Yoobo 32:5-10) Kunyima kwa Yoobo kuteemesha dino elango dya kifulo dibabamupeele kwi Yehowa na kushintuula mweneno aaye, Yehowa badi muukishe bangi bantu’shi basangala ngofu pa mwanda wa lulamato lwa Yoobo.—Yoobo 42:7, 8.

13. Elango dya Yehowa dibadi dikwashe Yoobo kunyima kwa makyenga abadi mupete naminyi?

¹³ Elango dya Yehowa dibatungunukile na kukwasha Yoobo mpa na kunyima kwa makyenga aaye. “Yehowa basampile Yoobo ngofu mu aa mafuku, kukila kwibedi.” Kunyima kwa mafuku, “bapetelenyi bana balume musambobidi na bana bakashi basatu.” (Yoobo 42:12-14) Sunga mbibadi Yoobo mufule bano bana baye, badi nka na kinyongwa kya bana baye abafwile. Pangi ta mwilwankane myanda yoso ibukopo ibadi imufikile na kifuko kyaye nya. Sunga byekala’shi kunyima kwa mafuku Yoobo baukile kabingilo kabadi mupetele ino nkalakashi, badi mulombene kwiyipusha bwakinyi Efile Mukulu badi mutadile’shi akyengye mu kino kipaso. Su Yoobo badi na bino binangu, badi mulombene kutentekyesha mayi ababamulungwilwe kwi Yehowa. Bino bibadi bimusambe na kumukwasha bwadya kwikala na mweneno ebuwa.—Misambo 94:19.

14. Mwanda wa Yoobo awitulongyesha kinyi?

¹⁴ Kunangushena ku myanda ibadi ifikile Yoobo kwi kwitukwasha bwatudya kushintuula binangu byetu na kwitusamba. Mukanda wa Yoobo ngumune wa ku mikanda yabadi bafundishe kwi Yehowa “bu elango dyetu, bwa’shi, ku katshintshi [keetu]na kusambibwa abituukila mu Bifundwe tupete lukulupilo.” (Beena-Looma 15:4) Awitulongyesha’shi tabitungu twekala na kyubishi kya kunangushena ngofu pa myanda yetu mu kipaso kyatudya kufika na mu kuleka kunangushena pa kukalwila kwa matalwa a kumunana a Yehowa. Nka bu Yoobo, tulesheyi’shi tukwete kukwatshishena matalwa a kumunana a Yehowa pa kushala na lulamato kwadi sunga mpatudi mu nshalelo ebukopo.

15. Kushala na lulamato mu nsaa yatudi na myanda ibukopo kwi na bukitshishi kinyi?

¹⁵ Mwanda wa Yoobo ngulombene kwitusamba na kwitukankamika, mwanda awitulesha’shi su twi na nkalakashi, bino tabilesha’shi Yehowa e netu nsungu nya. Nkalakashi ayitupa mushindo wa kukwatshishena matalwa a kumunana a Yehowa. (Nkindji 27:11) Nsaa yatunyingila nkalakashi na lulamato, atusangasha Yehowa na atunyingisha lukulupilo lwetu lwa myanda yatukapete mu  mafuku aafiki. (Badika Beena-Looma 5:3-5.) Uno mwanda wa Yoobo awitulesha’shi “Yehowa . . .  en’eshimba dya kalolo na nsha-lusa.” (Shake 5:11) Su tubakwatshishena matalwa a kumunana a Yehowa, aye namu aketupa bwedi. Kuuka bino akwitukwasha bwatudya kupeta “katshintshi na lwishinko bwa kukambila bitompwanga byooso [na muloo NWT]”​—Beena-Kolose 1:11.

16. Bwakinyi abitungu tutentekyeshe’shi kukalwila matalwa a kumunana a Yehowa kwi na muulo ngofu?

¹⁶ Eyendo, bi kwitwelela bukopo bwa kutuula binangu pa mwanda wa kukalwila matalwa a kumunana a Yehowa mu nsaa yatudi na nkalakashi ya mu nshalelo. Mpa na tu myanda tupeela twi kumweneka bu myanda ikata su tubekala atunangushena nsaa yoso ku twanka. Ngi bwakinyi sunga twekala na nkalakashi i naminyi abitungu tutentekyeshe nsaa yoso’shi kukwatshishena matalwa a kumunana a Efile Mukulu kwi na muulo.

17. Kwikala na bibungi bya kukita mu mudimo wa Yehowa akwitukwasha bwa kutuula binangu byetu pa mwanda wi na muulo naminyi?

¹⁷ Kwikala na bibungi bya kukita mu mudimo wa Yehowa nkulombene kwitukwasha bwatudya kulamina myanda i na muulo. Bu kileshesho, ungi mukwetu abetanyina bu Renee badi mufwe lupoolo, badi na mitanyo ibukopo, mpa na mukumbo wa cancer. Pabadi mu lupitalo, badi alungula mukandu wibuwa kwi bena mudimo ba ku lupitalo, bena maladi, na bantu abadi abafiki mu kumutembela. Ungi musango pabadi Renee mulamibwe mu lupitalo munda mwa mbingo ibidi na kipindji, badi mulungule mukandu wibuwa munda mwa nsaa 80. Sunga mbibadi Renee auku’shi akyebe kufwa, ta mwilwankane mwanda wi na muulo nya. Kukwatshishena matalwa a kumunana a Yehowa kubamupeele butaale.

18. Kileshesho kya Jennifer akitulongyesha kinyi pabitale kukwatshishena matalwa a kumunana a Yehowa?

¹⁸ Twi kukwatshishena dingi matalwa a kumunana a Yehowa mu nsaa yatudi na tu myanda tupeela twa mu nshalelo a efuku dyoso. Ungi mukwetu abetanyina bu Jennifer badi mukishe mafuku asatu ku kipalwe kya ndekye kubadi atengyela ndekye a kwenda naye. Bu bibabadi abatentuula mafuku aaye a kwenda, Jennifer bapushishe nsungu na bushiye. Badi mulombene kubanga kwinyongola. Anka pamutwe pa byabya, Jennifer batekyele Yehowa bwa’shi amukwashe bwadya kulungula mukandu wibuwa kwi bantu abadi abatengyela ndekye. Balungwile mukandu wibuwa kwi bantu bebungi na kwibapa mikanda ibungi. Jennifer bambile’shi: “Napushishe’shi Yehowa badi mungyelele myabi, sunga mbinadi na mwanda aunkalakasha, badi mumpe bukome bwandya kumona bya kulungula bantu eshina dyaye mu mushindo wibuwa.”

19. Nkinyi akilesha’shi twi balangwidi ba binyibinyi?

¹⁹ Nka penda bafubi ba Yehowa ngi abapusha kalolo bi muulo wi na matalwa a kumunana a Yehowa. Uno mpushisho ebuwa ngi alesha’shi atwe ngi balangwidi ba binyibinyi. Ngi bwakinyi abitungu’shi ooso a kwatudi etatshishe bwa kukwatshishena matalwa a kumunana a Yehowa.

20. Yehowa apusha naminyi pabitale byoso byokitshi bwa kukwatshishena matalwa aaye a kumunana?

²⁰ Yehowa kwete kumona na aata myanda yooso yokitshi bwa kukwatshishena matalwa aaye a kumunana na muulo p’obe kumufubila na lulamato loso na kunyingiila nkalakashi. (Misambo 18:25) Mwisambo aulondo auketupatulwila myanda ibungi ayilesha bwakinyi we mulombene kukwatshishena matalwa a kumunana a Yehowa na mushindo wibuwa oodi mulombene kwibikita.