1, 2. Bantu mbakule myanda kinyi pabitale ba Temwe ba Yehowa?

BANTU bebungi bakwete kumona’shi ba Temwe ba Yehowa mbelekene na bangi bantu. Bu kileshesho, ungi mufundi abetanyinaa bu Anton Gill badi mukampule ngikashi ya ba Temwe ba mu mafuku a bena Nazi mu Allemagne. Bafundile’shi: “Bena Nazi abadi bashikwe ba Temwe ba Yehowa ngofu. . . . Mu kipwa kya 1939 babadi bakwate ba Temwe ba Yehowa 6 000 bebeela mu [nkano na kwibafubisha midimo ibukopo].” Bakwile dingi’shi, sunga mbibabadi bebakyengyeshe, ba Temwe ba Yehowa babadi nka abaukibwa bu batu ba kukulupila, bafule butaale mpa na pabadi mu makyenga, basha lulamato kwi Efile Mukulu aabo, na be mu buumune.

² Mu mafuku ashale, bantu ba mu Afrique du Sud bekeele bamone ungi mwanda wi pa bwao munkatshi mwa ba Temwe ba Yehowa. Mu angi mafuku, mbulamatadi a mu dino eumbo badi mukandjikye ba Temwe be na malangi a bikoba elekeene bwabadya kwibunga pamune. Anka mu dya Lubingo mu 18/12/2011, ba Temwe bakile pa 78 000 be na bikoba bya malangi elekeene, ba mu Afrique du Sud na ba mu angi maumbo e mu bwipi abadi bebungye pamune bwabadya kulondesha kikongeno ki pa bwakyo mu kipalwe kikile bukata kya mu kibundji kya  Johannesburg. Umune a ku bakata ba kipalwe bambile’shi: “Kino ngi kisaka kya bantu be na mwikeelo wibuwa kukila bingi bisaka byoso byandi mumone mu kino kipalwe. Boso bwenu nwi bafwale kalolo. Na nwibalumbuule kipalwe kalolo bwakidya kushala kitookye. Ungi mwanda wi na muulo ngofu, nwi besangye bantu be na bikoba bya malangi eelekene.”

3. Nkinyi akikasha kifuko kya bakwetu be mu nsenga ishima bu kilekene na bangi bantu boso?

³ Byabya, mpa na bantu bashi ba Temwe mbalombene kumona kifuko kya bakwetu ki mu nsenga ishima byakidi kilekene na bangi bantu boso. (1 Mpyeele 5:9) Bwakinyi twi belekene ngofu na ingi ndumbulwilo yoso? Mwanda, ku bukwashi bwa Bible na kikudi kiselele ky’Efile Mukulu, tukwete kwikitshisha ngofu bwa kushintula myanda yoso ishi’ayisankisha Yehowa. Twi ‘bafuule muntu mukulu,’ na kufwala “muntu mupya.”​—Beena-Kolose 3:9, 10, Kilombeeno kipya 2014.

4. Mu uno mwisambo atukyebe kwisambila myanda kinyi? Na bwakinyi?

⁴ Kunyima kwa’twe kufuula muntu a kala, abitungu tumusumbule. Mu uno mwisambo, atukalongo, kya kumpala, mushindo watudi balombene kufuula muntu a kala na bwakinyi kukita bino kwi na muulo. Atukamono mushindo wa’shi muntu ashintuula myanda ikata mu muwa waye sunga ekala mupwe kwipaana mu kukita myanda ibubi. Kunyima atukamono myanda ilombenene kukita bantu abapu kukita bipwa bibungi mu bya binyibinyi bwabadya kusumbula muntu a kala bwa loso. Bwakinyi atukyebe kwisambila ino myanda? Mwanda, bamo bantu abadi bafubile Yehowa kumpala ta mbatungunukye na kwikala badimukye nya. Mbabangye kunangushena na kukita myanda ibabadi abakitshi kumpala kwabadya kuuka Yehowa. Oso a kwatudi e na lukalo lwa kutentekyesha kuno kudimusha: “Yaawa apwandjikisha’shi mmwimane adimukye tala apona.”​—1 Beena-Kodinda 10:12.

5. (a) Tusha kileshesho akilesha bwakinyi abitungu kufuula muntu a kala bukidibukidi. (Tala kifwatulo ki ku mbangilo.) (b) Mbikitshino kinyi bya muntu a kala byabadi baleshe mu mukanda wa Beena-Kolose 3:5-9?

⁵ We kukita naminyi su omona’shi bilamba byobe bi na mako e bungi na bibabanga kutusha eshiko dibubi? Okitshi bukopo bobe boso bodya kwibifuula bukidi. Mu mushindo umune, su tubamono’shi tukwete kukita myanda yabadi bashikwe kwi Yehowa, abitungu tukite bukopo bwetu boso bwa kushintuluka bukidi. Mpoolo pabadi akula bwa ino myanda i bubi, bambile’shi: “Futaalayi bino byooso.” Tubadeyi kutalula ibidi ya ku yanka: lusandji na bikitshino bi butete.​—Badika Beena-Kolose 3:5-9.

6, 7. (a) Mayi a Mpoolo aalesha naminyi’shi abitungu kwikitshisha bwa kufuula muntu a kala? (b) Sakura badi na nshalelo e naminyi? Nkinyi kibamupeele bukome bwa kushintuluka?

⁶ Lusandji. Mu Bible, “lusandji” alulesha muntu efikena pepi na ungi muntu ashii mwiyibakishene naye muyile miya ya mbulamatadi. Mpoolo bambile’shi, abitungu bena Kidishitu ‘bayipee bina mbidi byabo’ pabitale kutambuka lusandji. Bino abilesha’shi, abitungu twikitshishe ngofu bwa kukambila malaka ebubi. Kukita bino kwi kwikala mwanda wibukopo, anka twi balombene kwiakambila!

⁷ Twi kumona bino mu kileshesho kya mukwetu mukashi a mu Japon abetanyinaa bu Sakura. * Sakura pabadi ende na kukula, badi emono bu’ye e bupenka na badi enyongola. Bwa kukambila bino binangu bya kwimona bu e bupenka, babangile kutambuka lusandji pabalombeshe bipwa 15. Sakura badi mutambukye lusandji na bantu belekene aye nkukatusha mayimi asatu. Bambile’shi: “Ku mbangilo napushishe bu’mi e mu bulungantu panadi natambuka masandji, namonanga’shi bantu mbanfule. Anka panadi munyishe kutambuka masandji, nadi munyishe kwipusha bu’mi shi mu bulungantu.” Sakura badi mutungunukye na uno  nshalelo mpa na pabalombeshe bipwa 23. Kunyima babangile kulonga Bible na ba Temwe ba Yehowa, na kufula myanda ibadi alongo. Yehowa bamukwashishe bwadya kwimika kutambuka lusandji na kukambila binangu bibubi bya bufu na kwipusha bu e na dibasa dya mase. Lelo uno, Sakura kwete kufuba bu mbala-mashinda, na takwete kwipusha dingi bu e bupenka nya. Amba’shi: “Ne na muloo binyibinyi p’ami kwikala mu kifulo kya Yehowa bufuku na kaanya.”

8. Mbikitshino kinyi bilombene kutakula Efile Mukulu bwadya kwitumona bu bantu be butete?

⁸ Bikitshino bi butete. Mu Bible, “bikitshino bi butete” abilesha myanda ibungi kushii penda kutambuka lusandji. I kulesha myanda bu kutoma nfwanka, sunga kwakula myanda i butete. (2 Beena-Kodinda 7:1; Beena-Efeso 5:3, 4) I kulesha dingi myanda ibubi yabakitshi kwi bantu mu bufyefye, bu kubadika mikanda ayibebweshesha malaka e bubi sunga kubandjila pornografi. Ino myanda ngilombene kutakula muntu ku bikitshino bibubi bya kufinafina bipindji bya mbidi bya buufu. (Beena-Kolose 3:5) *

9. Nkinyi ki bya kukitshika su muntu bekala na ‘malaka a masandji ashi bya kukambila dimo’?

⁹ Bantu ababandjilaa pornografi misusa ibungi abebweshaa “malaka a masandji abashi bya kukambila dimo” na mbalombene kwikala na kyubishi kya kutambuka masandji. Bantu abakimbulaa myanda mbasangane’shi, kyubishi kya kubandjila pornografi ki mumune na kyubishi kya kukwatshika maalwa sunga bingi bintu bya lengo. Ngi bwakinyi kyubishi kya kubandjila pornografi akitusha bipeta bibubi. Munkatshi mwabyo mwi kwikala na buufu, kukutwa kwa kufuba ngofu, kukatusha muloo mu kifuko, kutshiba mayibakishi, na kutakula bantu mu kwiyipaa. Kunyima kwa ungi muntu kukatuka mu bupika bwa kubandjila pornografi, bambile’shi, binobino napete mushindo wa kwineemeka ami nabene.

10. Ribeiro badi mukambile kyubishi kya kubandjila pornografi naminyi?

¹⁰ Bantu bebungi be na lukalo lwa kulwa ngoshi ibukopo bwabadya kutuka mu bupika bwa kubandjila pornografi, anka mbalombene kutshokola ino ngoshi. Tubande kwata kileshesho kya Ribeiro a mu Brésil. Pabadi mu bipwa ekumi na bungi, bakatukile ku nshibo kwabo enda mu kufuba ku mudimo wabatushaa masaki a mikanda. Kwakwa babangile kubandjila ma jurnale a pornografi. Ribeiro bambile’shi: “Ku kapela kapela, nabangile kwikala na kyubishi kya kubandjila bino bifwanyi. Nadi mulwile ngofu mu kipaso kyanshinadi mulombene kutengyela mwana mukashi anadi mushale naye bwa’shi akatukye mu nshibo na kundekyela nsaa ya kubandjila video ya pornografi.” Dingi efuku pabadi ku mudimo, Ribeiro bakimbile ku mututo wa mikanda ibabadi abakyebe kulwisha, aye nkumona mukanda wabetanyina’shi, Le secret du bonheur familial. Beusangwile eubadika. Myanda ibapushishe mwanka, ibamutakwile bwadya kulonga Bible na ba Temwe ba Yehowa. Anka kubakidile mafuku ebungi bwa’shi Ribeiro akambile kipikwa kya kubandila pornografi. Nkinyi kibadi kimukwashe? Apatuula’shi: “Ku bukwashi bwa nteko na kulonga kwa Bible, na kunangushena ku myanda inadi nalongo, nadi mubangye kusankila ngikashi ibuwa y’Efile Mukulu mpa na bibafikile kifulo kyande bwa Yehowa bukopo kukila malaka a kubandjila pornografi.” Ku bukwashi bwa Bible na kikudi ki selele ky’Efile Mukulu, Ribeiro badi mushintuule mwikelo waye, aye nkubatshishibwa, na binobino kwete kufuba bu mukulu mu kakongye.

11. Nkinyi ki bya kukwasha muntu bwadya kutuka mu bupika bwa pornografi?

¹¹ Lamina’shi bwa kutuka mu bupika bwa kubandjila pornografi, Ribeiro tabadi mwimene nka penda mu kubadika Bible nya. Badi anangushena ngofu pa myanda ibadi abadika mu Bible na kutadila bwa’shi ino myanda ikume eshimba dyaye. Badi atekye Yehowa, na kumusendeela bwa’shi amukwashe. Ino myanda ibakwashishe Ribeiro  bwadya kunyingisha kifulo kyaye bwa Yehowa, na kukambila malaka aaye a kubandjila pornografi. Bwa kukatuka mu bupika bwa pornografi, n’atwe namu abitungu tufule Yehowa ngofu na kushikwa myanda yoso ibubi.​—Badika Misambo 97:10.

12. Nkinyi kibakwashishe Stephen bwadya kukatusha nsungu na kukayishena?

¹² Bamo bantu be na kyubishi kya kukwata nsungu bukidibukidi na kubanga kwakula myanda ibubi na kukaa bangi mulomo. Apakitshika uno mwanda, kifuko kyabo kyoso kishima akikyengye. Ungi nshe bana a mu Australie abetanyinaa bu Stephen badi na kyubishi kya kukayishena na badi afitshi munda mpa na mu tu myanda tupeela. Akula’shi: “Ami na mukash’ande tubadi beabuule misusa isatu na tubadi atukimbi bya kutshiba eyibakishi.” Kunyima ababangile kulonga Bible na ba Temwe ba Yehowa. Stephen babangile kwikitshisha bwa kutumikila myanda ibadi alongo. Akula’shi, kumpala kwadya kuuka Yehowa, badi afitshi munda nsaa yoso yadi na mwanda aumukalakasha, na badi apusha nsungu ayimukaamina musango umune nka bu bombe batanyika. Anka kunyima kwa Stephen kubanga kutumikila malango a mu Bible, myanda ibabangile kulumbuluka. Akula’shi: “Nshalelo a mu kifuko kyetu badi mushintulukye mu mushindo wa kukaanya. Ku bukwashi bwa Yehowa, binobino ne na binangu bya butaale na kufukama.” Lelo uno, Stephen kwete kufuba bu mufubi a midimo mu kakongye, na mukash’aye mmufube bu mbala mashinda munda mwa bipwa bibungi. Bakulu ba mu kakongye ka Stephen abamba’shi: “Stephen nyi mukwetu mulume mupopeele, kwete kufuba ngofu, na e na kwiyisha.” Abakwile dingi’shi kasha tabamumwene padi mufiite munda nya. Stephen tesaamuna aye nabene bwa kupeta nkumo ya kushintuluka kwaye nya. Akula’shi: “Ntshinadya kupeta mwabi su ngumune wa ku ino yandi mupete su ntshi mukumine bwa’shi Yehowa ankwashe bwandya kushintuula mwikelo wande.”

13. Bwakinyi nsungu i bubi? Bible etudimusha naminyi pabitale nsungu?

¹³ Bible etudimusha bwatudya kusuuka nsungu, kwakula bangi myanda ibubi, na kwikala na tuleo. (Beena-Efeso 4:31) Misusa ibungi, ino myanda ayitwalaa bantu mu kukita myanda ya bu ntomboshi. Lelo uno, bantu be bungi bakwete kunangushena’shi nsungu, na mwikelo wa bu ntomboshi ngi myanda ibuwa. Anka kukita bino nkubepuula Mupangi eetu. Bibadi abitungu’shi bakwetu bebungi bashintuule mwikelo wabo na kufwala muntu mupya.​—Badika Misambo 37:8-11.

14. Muntu ntomboshi e kufika muntu mupopeele su?

¹⁴ Mukwetu abetanyinaa bu Hans kwete kufuba bu mukulu mu kakongye ka mu Australie. Mukunkushi a kasaka ka bakulu ba mu kakongye ka Hans amba’shi: “Nyi ngumune a ku bakweu balume be na kwiyisha kwibungi batudi nabo.” Anka Hans tabadi nka na kwiyisha mu muwa waye nya. Pabadi mu bipwa ekumi na bungi, babangile kutoma maalwa ebungi, aye nkufika muntu e na bukyelo. Ungi mususa pabadi mukwatshikye maalwa, badi mufite munda ngofu mu kipaso kibadi mwipee mpa na nsongwakashi abadi ayiila. Abelele Hans mu lukano munda mwa bipwa 20, anka lukano tandumushintuule nya. Kunyima nyinaye balungwile ungi mukulu mu kakongye bwadya kumutembela, na Hans babangile kulonga naye Bible. Bambile’shi: “Nadi mulwe ngoshi i bukopo bwandya kufuula muntu a kala. Ma verse a mu Bible abadi ankankamikye, nyi Yeeshaya 55:7, akula’shi: ‘Muntu-mubi alekye eshinda dyaaye,’ na 1 Beena-Kodinda 6:11, akula pabitale bantu boso balekye mashinda a kukita milwisho’shi: ‘Byabya ngi bibaadi bamo ba kwanudi.’ Munda mwa bipwa bibungi, Yehowa mmukwashe bantu bebungi na lwishinko loso ku bukwashi bwa kikudi kyaye ki selele bwabadya kufwala muntu mupya.” Hans pabapetele lubatshisho badi ki mu lukano, na abadi bamutushe kunyima kwa’ye kukita bipwa 17 na kipindji mu lukano. Akula’shi: “Natumbula Yehowa ngofu bwa lusa na kundekyela kwaye.”

15. Eyikashi kinyi dya muntu a kala dyatudi balombene kukatusha? Na Bible akula kinyi pabitale uno mwanda?

 ¹⁵ Kudimba madimi nyi ngimune ya ku ngikashi ya muntu mukulu. Bu kileshesho, bantu bebungi abadimbaa bwa kupela kufuta bitadi na kupela kunyookibwa bwa bilubilo byabo. Anka, Yehowa nyi “Efile Mukulu a binyibinyi.” (Misambo 31:5) Ngi bwakinyi atekye balangwidi baye boso bwa’shi bekale “abakula bya binyibinyi” na tabekalanga na “madimi.” (Beena-Efeso 4:25; Beena-Kolose 3:9) Bwa kwakula kalolo, abitungu twikale atwakula bya binyibinyi sunga nsaa yabidi bukopo bwa kwibikita.​—Nkindji 6:16-19.

16. Nkinyi ki bya kwitukwasha bwa kufuula muntu a kala?

¹⁶ Kufuula muntu a kala mu bukome bwetu’twe banabene ta nkubofule nya. Sakura, Ribeiro, Stephen, na Hans babadi balwe ngoshi ibukopo bwa kushintuula nshalelo aabo a kala mu muwa wabo. Kintu kibadi kibakwashe nyi mbukome bw’Eyi dy’Efile Mukulu na kikudi kyaye. (Luka 11:13; Beena-Ebelu 4:12) Bwatudya kupeta buno bukome, abitungu tubadikye Bible Eyi dy’Efile Mukulu efuku dyoso, tunangushene ku myanda i mwanka, na kwela nteko ngofu bwa kuteka binangu bya kutumikila myanda yatulongo. (Yooshwa 1:8; Misambo 119:97; 1 Beena-Tesalonika 5:17) Atupete dingi bukwashi bw’Eyi dy’Efile Mukulu na kikudi kyaye ki selele nsaa yatulumbuula na kutwela mu bisangilo bya kakongye. (Beena-Ebelu 10:24, 25) Na dingi abitungu tufubishe bingi bintu byabadi betupe kwi ndumbulwilo a Yehowa, bu ma jurnale, televizion a JW, programe a JW Library, na jw.org.​—Luka 12:42.

17. Mu mwisambo aulondo atukesambila kinyi?

¹⁷ Tubesambila bikitshino bibungi bi bubi abitungu’shi bena Kidishitu bafuule na kusumbula bwabadya kusankisha Yehowa. Anka kwi ingi myanda ayitungu’shi tukite. Abitungu tufwale muntu mupya na kumulama mu muwa wetu oso. Mu mwisambo aulondo, atukesambila mushindo watudi balombene kufwala muntu mupya.