1, 2. (a) Atuuku naminyi’shi mbibofule bwatudya kufwala muntu mupya? (b) Ngikashi kinyi ya muntu mupya yatulongo mu Beena-Kolose 3:10-14?

MU BIBLE a Les Saintes Écritures. Traduction du monde nouveau, mwi kishima “muntu mupya” misango ibidi. (Beena-Efeso 4:24; Beena-Kolose 3:10) Bino abilesha muntu “mupangibwe muyiile bikumine Efile Mukulu.” Mbibofule bwatudya kufwala muntu mupya su? Oolo. Yehowa bapangile bantu kwifwanyiko dyaaye, nyi bwakinyi twi na mushindo wa kwambula ngikashi yaaye.​—Kibangilo 1:26, 27; Beena-Efeso 5:1.

² Eyendo’shi, pa mwanda twi bapyane kukutwa kwa kupwidika, atwikalaa na lwabi lwibubi. Twi kwambula mwikelo wa bantu betwifunyishe. Kadi ku bukwashi bwa Yehowa, twi balombene kwikala bantu be na mwikelo ausankisha Yehowa. Bwatudya kupeta mushindo wa kwibikita, tubandeyi kutala ngikashi ya muntu mupya. (Badika Beena-Kolose 3:10-14.) Akupu, atukamono mushindo watudya kulesha ino ngikashi mu mudimo wetu wa bulungudi.

3. Eyikashi kinyi di mu ngikashi ya muntu mupya?

³ Mpoolo badi mwakule’shi kukutwa ntondo nyi ndimune dya ku ngikashi ya muntu mupya. Bambile’shi: “Takukii mwina Greke na mwina Yuda, musadibwe na shii-musadiibwe, mupatamine sunga mupatulukye mpika sunga muntu mulungangu.” Mu kakongye muntu su ngumune ta mulombene kwiata na muulo kukila mungi pa mwanda w’ekoba, eumbo, sunga mwasu waye nya. Bwakinyi? Mwanda bu byatudi balondji ba Kidishitu, twi “kintu kimune.”​—Beena-Kolose 3:11; Beena-Ngalatea 3:28.

4. (a) Abitungu bafubi ba Yehowa bekale abakitshina bangi myanda naminyi? (b) Mmwanda kinyi ulombeene kulwisha buumune bwa bena Kidishitu?

⁴ Nsaa yatufwala muntu mupya, atwata bangi bantu na kanemo, sunga twekala n’ekoba kinyi sunga’shi twi batukile mbalo kinyi. (Beena-Looma 2:11) Bino mbilombene kwikala bukopo mu angi maumbo. Kileshesho, kala mu Afrique du Sud, mbulamatadi badi mwabuule bantu mupunda ekoba dyabo. Bantu bebungi be mu dino eumbo, mpa na ba Temwe, mbashale mu aa ma mbalo. Kasaka ka Bakunkushi-Bakulu kabadi kanyingishe bakwetu bwabadya “kushitula mashimba” aabo. Byabya, mu mweshi w’Ekumi mu kipwa kya 2013, abadi baate mpàngo ilombene kukwasha bakwetu be na malangi a bikoba elekenelekene bwabadya kwiukena kalolo.​—2 Beena-Kodinda 6:13.

5, 6. (a) Mpàngo kinyi ibabadi baate mu dingi eumbo bwa kukwasha bafubi b’Efile Mukulu bwa’shi bekale mu buumune? (Tala kifwatulo ki ku mbangilo.) (b) Mbipeta kinyi bibadi bituukye?

⁵ Bakwetu abatshile mpàngo ya’shi, ku mpwilo kwa ingi mbingo, ba Temwe ba mu tukongye tubidi twa bantu abakula ndimi ilekene sunga be na malangi a ekoba elekene bakishe nsaa pamune. Bakwetu balume na bakashi ba mu twatwa tukongye abadi abalungula mukandu wibuwa pamune, abende ku bisangilo, na kwitembeshena. Tukongye nkama tubadi tulonde ino mpàngo, na biro bya filiale bibapetele ma rapore ebuwa. Bibadi bikanyishe bangi bantu bashi ba Temwe. Kileshesho, ungi mukata a kipwilo bambile’shi: “Ami ntshi Temwe, kadi namba’shi, nwi belumbuule kalolo bwa kukita bulungudi, na nwi mu buumune bw’ekoba.” Bakwetu balume na bakashi abapushishe naminyi pabitale ino mpàngo?

⁶ Mukwetu Noma akulaa ludimi lwa Xhosa badi apusha moo wa kwitamina ba Temwe ba mu kakongye ka Anglais ku kashibo kaye. Kadi kunyima kwa’ye kwenda mu bulungudi na ba Temwe basungu na kwenda mu nkebatembela ku mashibo kwabo, eshimba dibamunyingile. Bambile’shi: “Mbantu be nka bi bantu boso!” Byabya nsaa ibafikile bakwetu ba mu kakongye ka Anglais bwa kwenda mu bulungudi pamune na bena kakongye ka Xhosa, Noma betamine bangi bakwetu kwaye. Bakanyine ngofu pa kumona shi umune a kwabadi musungu mukulu mu kakongye, badi na muloo wa kushala mu ka kyata. Twi na muloo bwa ino mpàngo, bakwetu balume na bakashi mbapete bakuuku bapya na baky’abatungunuka na kwiukena na bakwetu ba ingi mpese.

7. Bwakinyi abitungu twikale na lusa nsaa yoso?

⁷ Mu mafuku ooso atudi mu uno ndumbulwilo a Satana, atwikala nka atufumankana na nkalakashi. Kukutwa kwa midimo, mikumbo, kubingwabingwa, masaku aatukila ku bintu bipangibwe, kushimisha bintu byetu pa mwanda wa ba ntomboshi, sunga ingi myanda ibubi ayitukwata atwe boso. Bwatudya kwikwashena mu bitompwanga, abitungu twikale na lusa lw’eyendo. Lusa lukata aluketutakula bwa kukitshina bangi myanda na kalolo. (Beena-Efeso 4:32) Ino ngimune ya ku ngikashi ya muntu mupya. Ayiketukwasha bwatudya kwambula Efile Mukulu na kusamba bangi.​—2 Beena-Kodinda 1:3, 4.

8. Mmyanda kinyi ibuwa ilombene kukitshika su twekala na lusa na kalolo mu kakongye ketu? Tusha kileshesho.

 ⁸ Twi kulesha kalolo kwi bantu bafikye mu angi maumbo sunga balanda be mu kakongye ketu naminyi? Abitungu twibakuukile, twikale ba kuuku sunga ba lole babo, na kwibakwasha bwabadya kumona’shi twi nabo lukalo mu kakongye. (1 Beena-Kodinda 12:22, 25) Bu kileshesho, Dannykarl bakatukile mu Philippines enda mu Japon. Bu bibadi muntu mwenyi, tababadi abamukitshina myanda kalolo bu bangi bena mudimo naye nya. Kunyima kwa mafuku batwelele mu bisangilo bya ba Temwe ba Yehowa. Dannykarl bambile’shi: “Bantu boso babadi mu bisangilo mbena Japon, anka babadi bankuukile na maboko abidi, nka bu bantu banadi mupwe kwiukena nabo kumpala.” Kalolo kababadi bamuleshe kwi bakwetu kabatungunukile na kumukwasha bwadya kwifubwila pepi na Yehowa. Kunyima kwa mafuku Dannykarl bapetele lubatshisho, na lelo uno kwete kufuba bu mukulu mu kakongye. Bangi bakulu ba mu kakongye kabo be na muloo wa kwikala naye na mukash’aye Jennifer mu kakongye kamune na abakula’shi: “Be na nshalelo mupelepele, bakwete kufuba bu ba mbala-mashinda na bakwete kutusha kileshesho kibuwa kya kutula Bufumu pa mbalo ya kumpala.”​—Luka 12:31.

9, 10. Tusha kileshesho akilesha bipeta bibuwa byatupete nsaa yatulesha bantu lusa mu bulungudi.

⁹ Twi na mushindo wa kukitshina “bantu booso myanda ibuuwa” nsaa yatwende mu kulungula mukandu wibuwa wa Bufumu. (Beena-Ngalatea 6:10) Ba Temwe bebungi bakwete kupusha bantu beenyi lusa na abekitshisha bwa kulonga ludimi lwabo. (1 Beena-Kodinda 9:23) Kwikitshisha kwabo nkutushe bipeta bibuwa. Bu kileshesho, ungi mukwetu mukashi mbala-mashinda a mu Australie abetanyinaa bu Tiffany balongyele Kiswayidi bwadya kumona bya kukwasha mu kakongye ka ludimi lwa Kiswayidi ke mu kibundji kya Brisbane. Sunga byekala’shi kulonga ludimi akutungu kwikitshisha ngofu, nshalelo aaye badi mulumbulukye. Tiffany akula’shi: “Su okyebe kupeta muloo mu bulungudi, nda okakwashe mu kakongye ka ludimi lwenyi. Kwi nka bu muntu bende mu lwendo kushi kutuuka mu kibundji kyabo. Kya kumpala, omono bi kifuko kya bakwetu be mu nsenga ishima na kumona byatudi mu buumune bwa kukaanya.”

¹⁰ Bantu ba mu kingi kifuko kya mu Japon abakitshine nabo uno mwanda. Sakiko, nsongwakashi a mu kino kifuko akula’shi: “Misusa ibungi tubadi atufumankana na bantu bafilukye mu Brésil nsaa ibatudi atwende mu bulungudi. Pabatudi atwibaleesha ma verse mu Bible a mu ludimi lwa Portugais, bu mukanda wa Kibafumbwilwe 21:3, 4 sunga wa Misambo 37:10, 11, 29, babadi abateemesha  kalolo, ingi nsaa babadi abanosha nka na mpolo.” Kino kifuko kibadi akipusha bano bantu bafilukye lusa na kutompa kwibakwasha bwabadya kuuka bya binyibinyi, dingi ababangile kulonga ludimi lwa Portugais mu kifuko. Kunyima, kino kifuko kibadi kikwashe bwa kubanga kakongye ka ludimi lwa Portugais. Munda mwa bipwa, babadi bakwashe bantu bebungi bafilukye bwabadya kwikala bafubi ba Yehowa. Sakiko akula’shi: “Bibadi abitupa mudimo wibungi bwa kulonga ludimi lwa Portugais, anka twi bapete myabi ibungi ikile kwitatshisha kwetu. Atutumbula Yehowa ngofu.”​—Badika Bikitshino 10:34, 35.

11, 12. (a) Bwakinyi abitungu twikale na binangu bibuwa bwatudya kufwala muntu mupya? (b) Nkinyi akiketukwasha bwa kushala beyishe?

¹¹ Abitungu kepatshila keetu ka kufwala muntu mupya kekale ka kutumbisha Yehowa, kushi ka kupeta ntumbo ya bangi bantu. Tentekyesha’shi mpa na mwikeyilu mupwidikye babangile kwitatula aye nkukita mulwisho. (Tala byabidi bipushene na Esekyele 28:17.) Bu byatudi bantu bakutwe kupwidika, ngi bwakinyi abitwelelaa bukopo bwa kusumbula kwitatula. Na dingi, twi balombene kufwala kwiyisha. Nkinyi ki bya kwitukwasha bwa kukita bino?

¹² Kimune kya ku bintu abiketukwasha bwa kwikala na kwiyisha nkubadika Eyi dy’Efile Mukulu efuku dyoso na kunangushena ku myanda yatubadika. (Miiya Ikituulwe 17:18-20) Abitungu tunangushene ngofu pa myanda yabadi betulongyeshe kwi Yehowa mu kileshesho kyaye kya kwiyisha. (Mateo 20:28) Yesu badi na kwiyisha ngofu mu kipaso kibadi mpa na mutumpe mikoolo ya batumibwa baye. (Yowano 13:12-17) Kingi kintu kyatudi balombene kukita, nkuteka kikudi ki selele kya Yehowa. Kikudi kyaye ki kwitukwasha bwa kukambila kinangu kyoso kya kumona’shi twi bakile bangi.​—Beena-Ngalatea 6:3, 4; Beena-Fidipe 2:3.

13. Mmyabi kinyi yatukapete su tubekala na kwiyisha?

¹³ Badika Nkindji 22:4. Yehowa etutekye bwatudya kwikala na kwiyisha. Kwiyisha akwitupetesha myabi ibungi. Nsaa yatudi na kwiyisha, kakongye akanyisha kwikala mu butaale na mu buumune. Na dingi, Yehowa aketulesha kalolo kaye kakata. Mpyeele mutumibwa bambile’shi: “Booso bwenu, mu bwikashi bwenu kwi muntu na muntu, fwalaayi kwiyisha, mwanda Efile Mukulu mmushikwe baa-sha kwitatula, anka eelela beeyishe mwabi.”​—1 Mpyeele 5:5.

14. Nnanyi mwikale kileshesho kya kumpala mu kulesha kupopeela na lwishinko?

¹⁴ Mu uno ndumbulwilo, su muntu e na kwipeelesha na lwishinko, bangi bantu ababanga kumwamba’shi e ntshimba. Anka bino ta mbya binyibinyi nya. Ino ngikashi ibuwa ayifiki kwi Yehowa, Muntu sha bukome bukile bwa bantu boso be mwiyilu na be pa nsenga. Aye ngi muntu a kumpala mu kulesha kupopeela na lwishinko. (2 Mpyeele 3:9) Bu kileshesho, banda kunangushena lwishinko lubabadi baleshe kwi Yehowa nsaa ibadi aluula Abrahame na Loota ku bukwashi bwa ba mwikeyilu. (Kibangilo 18:22-33; 19:18-21) Na dingi nangushena lwishinko lubabadi baleshe kwi Yehowa pabadi mu kipwano na mwilo wa Isaleele wi na bantu bakutwe kukookyela munda mwa bipwa bikile pa 1500.​—Esekyele 33:11.

15. Yesu badi mwitulekyele kileshesho kinyi pabitale kulesha kupopeela na lwishiko?

¹⁵ Yesu badi “mupopeele.” (Mateo 11:29) Badi na lwishinko lwibungi pabitale kubofula kwa balongi baye. Mu mudimo waye wa pano pa nsenga, bantu abadi abamusabuula na kumudimbila myanda. Anka badi mupopeele na lwishinko mpa na ku lufu lwaye. Pabadi na mitanyo ibukopo ku mutshi wa makyenga, batekyele Nshaye bwadya kufwila bantu babadi abamwipaa lusa. Bambile’shi: “Tabauku kyabakitshi.” (Luka 23:34)  Mpa na pabadi Yesu mukalakashwe sunga pabadi apusha busungu, badi nka na kupopeela na lwishinko.​—Badika 1 Mpyeele 2:21-23.

16. Twi kulesha kupopeela na lwishinko naminyi?

¹⁶ Mpoolo badi mutemune mushindo umune watudi balombene kulesha kupopeela na lwishinko nsaa ibafundile’shi: “Ikalayi na lwishinko ku muntu na muntu, dingi, su muntu e na kilumbu na ungi, efwileneeyi lusa ku muntu na muntu bu binufwile Yehowa lusa; binulekyeele nfumu, kitayi bya mumune anwe namu.” (Beena-Kolose 3:13) Bwa kufwila bangi lusa, abitungu twikale na kupopeela na lwishinko. Kukita bino akukatamisha na kulama buumune mu kakongye.

17. Bwakinyi kupopeela na lwishinko bi na muulo?

¹⁷ Yehowa etutekye bwatudya kwikala bapopeele na beyishe kumpala kwa bangi. Ino ngikashi i na muulo kwatudi su atukumina nkashala mu ndumbulwilo aaye mupya. (Mateo 5:5; Shake 1:21) Nsaa yatudi bapopeele na bepeleshe, atutumbisha Yehowa na kukwasha bangi bwabadya kwitwambula.​—Beena-Ngalatea 6:1; 2 Timote 2:24, 25.

18. Kifulo na kukutwa kwa ntondo mbipushene naminyi?

¹⁸ Ino ngikashi yoso ibatukatuka mu kwisambila ngipushene na kifulo. Bu kileshesho, Shake mulongi a Yesu badi mulangye bakwabo mwanda babadi abakitshina ba mpeta myanda ibuwa kukila bibabadi abakitshina balanda. Badi mwibapatulwile’shi, bino mbikutwene na mwiya w’Efile Mukulu wa ‘kufula muntu-noobe buu’be nabeene.’ Kunyima badi mulombashe’shi: “Su nwaikala na ntondo, anukitshi milwisho.” (Shake 2:8, 9) Su twi bafule bantu, tatukebalesha ntondo pa mwanda wa kilongyelo, elangi dy’ekoba, sunga mudimo wabakwete kufuba nya. Tabitungu tukatushe ntondo penda mu myanda yabetumono kwi bantu nya. Abitungu tukatushe ntondo mu myanda yetu yoso.

19. Bwakinyi bi na muulo bwatudya kufwala kifulo?

¹⁹ Kifulo nkikale dingi na “lwishinko na kalolo” na “takitatulaa sunga kwisadika.” (1 Beena-Kodinda 13:4) Abitungu twikale na lwishinko, kalolo, na kwiyisha bwatudya kumona bya kutungunuka na kulungula mukandu wibuwa kwi bantu netu. (Mateo 28:19) Ino ngikashi ayitukwasha dingi bwatudya kwikala mu buumune na bakwetu booso balume na bakashi be mu kakongye. Su boso bwetu tubekala atulesha kino kifulo, kakongye ketu akekala mu buumune na atukatumbisha Yehowa. Bangi bantu abakamono buno buumune na abakatwele mu bya binyibinyi. Ngi bwakinyi kunyima kwa kupatuula akipushisha kufwala muntu mupya, Bible afudiisha’shi: “Kunundu a byooso, leeshaayi kifulo: akyo ngi akinubungu mu buumune bulombanyine.”​—Beena-Kolose 3:14.

20. (a) Abitungu twiyipushe nkonko kinyi? Bwakinyi? (b) Mmyanda kinyi ibuwa yatukulupila mu mafuku aafiki?

²⁰ Boso bwetu abitungu twiyipushe’shi, ‘Abitungu nshintuule myanda kinyi bwandya kufuula na kusumbula muntu a kala?’ Abitungu tutekye Yehowa na kumusendeela bwa’shi etukwashe. Abitungu twikitshishe ngofu bwatudya kukatusha binangu na bikitshino bibubi bwatudya kumona bya ‘kupyana Bufumu bw’Efile Mukulu.’ (Beena-Ngalatea 5:19-21) Abitungu twiyipushe dingi’shi, ‘Nkwete kutungunuka na kulumbuula binangu byande bwandya kusankisha Yehowa su?’ (Beena-Efeso 4:23, 24) Twi bantu bakutwe kupwidika, ngi bwakinyi abitungu tutungunukye na kwikitshisha bwatudya kufwala na kulama muntu mupya. Uno nyi mwanda ushi na nfudilo. Atukekala na muloo wibungi nsaa ayikafwala bantu boso muntu mupya na kwambula ngikashi ibuwa ya Yehowa mu kipaso kipwidikye!