1, 2. (a) Nkinyi ki bya kwitutakula mu kwipusha’shi, “Na ku nguba kinyi?” (b) Bwakinyi bileshesho bya bafubi basha lukumino ba mu mafuku a kala abitukankamika atwe be lelo?

“NA KU nguba kinyi?” Luno ngi lukonko lubabayipwishe kwi batemuki basha lukumino Yeeshaya na Abakuke. (Yeeshaya 6:11; Abakuke 1:2) Pabadi Nfumu Daavide mufunde mukanda wa Misambo 13, bayipwishe luno lukonko lumune misango inanka. (Misambo 13:1, 2) Pabadi Yesu Kidishitu munkatshi mwa bantu bashi na lukumino, bebayipwishe’shi: “Na ku nguba kinyi?” (Mateo 17:17) Natwe namu lelo uno, twi balombene kwiyipusha luno lukonko.

² Nkinyi kilombene kwitutakula mu kwiyipusha’shi, “Na ku nguba kinyi?” Pangi nsaa yabetukitshina mwanda wa kukutwa kululama. Patudi na maladi sunga pa mwanda wa bununu. Ingi nsaa twi kwikala bakalakashwe pa mwanda wa’shi twi mu “bipungo bi bukopo.” (2 Timote 3:1) Pangi mpa mwanda wa’shi mwikelo wibubi wa bantu betwifunyishe awitukookyesha na kwitubofusha. Sunga wekala na kabingilo ke naminyi, abitunyingisha ngofu pa kuuka’shi Yehowa tabadi mutopekye bano bafubi baye basha lukumino abamwelele luno lukonko mu mafuku a kala nya.

3. Nkinyi ki bya kwitukwasha mu nsaa yatudi na mwanda wibukopo?

 ³ Nkinyi ki bya kwitukwasha nsaa yatudi na mwanda wi bukopo? Shake mwina a Yesu badi muyookyelwe bwadya kwitulungula’shi: “Anwe bakwetu, ikalaayi na lwishinko, mpaa na pa kufika kwa Mwanaana.” (Shake 5:7) Byabya, boso bwetu twi na lukalo lwa kwikala na lwishinko. Lwishinko nkinyi, na twikulesha dino eyikashi dibuwa naminyi?

4, 5. (a) Lwishinko nkinyi, na twi kwikala nalo naminyi? (b) Shake badi mupatuule lwishinko naminyi? (Tala kifwatulo ki ku mbangilo.)

⁴ Bible akula’shi lwishinko alufikaa ku bukwashi bwa kikudi kiselele ky’Efile Mukulu. Kushii bukwashi bw’Efile Mukulu, bi kwikala bukopo bwa’shi bantu bakutwe kupwidika bekale na lwishinko mu myanda yoso. Lwishinko nkya buntu kyabadi betupe kwi Efile Mukulu, na nsaa yatulesha lwishinko, atulesha’shi twi bafule Yehowa na bangi bantu. Su ta twi na lwishinko, kifulo ki munkatshi mwetu na bangi bantu akipeele. (1 Beena-Kodinda 13:4; Beena-Ngalatea 5:22) Kwikala na lwishinko akulesha kinyi? Akulesha kwikala na binangu bibuwa mu nsaa yatukwete kunyingiila myanda ibukopo. (Beena-Kolose 1:11; Shake 1:3, 4) Lwishinko alwitukwasha dingi bwa kushala na lulamato kwi Yehowa sunga twekala na myanda i naminyi. Aluketukwasha bwa kupela kwalusha bubi ku bubi nsaa yabetukyengyesha. Bible akula’shi, abitungu tukumine kutengyela na lwishinko. Dino nyi dilongyesha dikata dyatupete mu mukanda wa Shake 5:7, 8. (Badika.)

⁵ Bwakinyi abitungu tukumine kutengyela Yehowa? Shake mulongi a Yesu apwandjikisha nshalelo eetu na a muntu adimaa mafuba. Sunga byekala’shi, kidime afubaa ngofu bwa kukuna mbyo, ta mulombene kukusha sunga kukunkusha bikunwanga mushindo wabidya kukula nya. Abitungu’shi atengyele na lwishinko loso bwa kupeta “bikuba bineeme bya ku nsenga.” Mu mushindo umune, kwi bintu bibungi byatushi balombene kukitshisha mu ano mafuku atutengyela Yehowa bwa’shi alombashe milayilo yaye. (Maako 13:32, 33; Bikitshino 1:7) Nka bu kidime, abitungu tutengyele na lwishinko loso.

6. Kileshesho kya mutemuki Mika akitulongyesha kinyi?

⁶ Mutemuki Mika badi munyingiile myanda ibukopo, i mumune na yatukwete kunyingiila lelo uno. Badi kwanka mu kipungo kibadi Akaaze bu nfumu. Akaaze badi nfumu e bubi bukile. Ngi bwakinyi kubadi myanda ya kukutwa kululama ibungi ibadi ayikitshika. Myanda ibadi inyishe kulwila mu kipaso akyakula Bible’shi, bantu abadi “basha bukalamwino bwa kukita bibubi.” (Badika Mika 7:1-3.) Mika badi auku’shi ta mulombene kushintuula ino myanda ibadi ayikitshika. Byabya, badi mulombene kukita kinyi? Etulungula’shi: “Ank’ami, natengyela Yehowa, nanyindjila Efile Mukulu, mupaashi ande; anteemesha, Efile Mukulu ande.” (Mika 7:7) Nka bu Mika, abitungu natwe namu twikale na ‘binangu bya kutengyela.’

7. Bwakinyi abetutekye ingi myanda kunyima kwa kutengyela bwa’shi Yehowa alombashe milayilo yaye?

⁷ Su twi na lukumino bu lwa Mika, atukakumina kutengyela Yehowa. Nshalelo eetu te bu a mwina lukalo atengyela efuku dya kwipayibwa mu nshibo ya lukano nya. Yawa mwina lukano abamukitshisha pa bukopo bwa’shi atengyele, na takumina’shi dyadya efuku dilombane nya. Nshalelo a uno muntu mwilekene ngofu na eetu! Atukumina kutengyela Yehowa mwanda atuuku’shi akalombasha mulayilo waye wa kwitupa muwa wa ikalaika pa nsaa ilombane! Ngi bwakinyi abitungu ‘twikale banyingamane mu byoso na lwishinko [na muloo, NWT].’ (Beena-Kolose 1:11, 12, EEM) Bu byatukwete kutengyela, abitungu twikale badimukye bwa kupela kwikala atutompola na kwakula’shi Yehowa kwete kunyengakana. Su tubakitshi byabya, tatumusangasha nya.​—Beena-Kolose 3:12.

8. Bantu basha lukumino ba mu mafuku a kala abetulongyesha kinyi?

⁸ Nkinyi akiketukwasha bwa kunyisha kukumina kutengyela? Twi balombene kunangushena pa bileshesho bya bantu basha lukumino abadi kwanka mu mafuku a kala na babadi abatengyela na lwishinko loso bwa’shi Yehowa alombashe milayilo yaye. (Beena-Looma 15:4) Nsaa yonangushena pa bino bileshesho, bibuwa otentekyeshe bungi bwa mafuku ababadi batengyele, bwakinyi babakuminyine kutengyela, na kipaso kibabadi bebelele myabi kwi Yehowa pa mwanda wa lwishinko lwabo.

9, 10. Abrahame na Sara abadi batengyele Yehowa munda mwa bipwa binga?

⁹ Tubande kwata kileshesho kya Abrahame na Sara. Bu bibabadi na “lukumiino na lwishinko,” abapyanyine ‘milayilo.’ Bible etulungula’shi: “Abrahame p’aye kupeta lwishinko,” Yehowa bamulayile’shi akamwelela myabi na kumwikasha bu nshaye na mwilo ukata. (Beena-Ebelu 6:12, 15, Esambi dipya 2015) Bwakinyi Abrahame badi na lukalo lwa kwikala na lwishinko? Mwanda kubadi kukile mafuku ebungi kumpala kwa’shi buno butemuki bulombane. Mu efuku dya 14 dya mweshi wa Nisane mu kipwa kya 1943 kumpala kwa Kidishitu, Abrahame na Sara na bantu boso abadi mu nshibo mwabo abasabukile mwela wa Efrate na kutwela mu Nsenga ya mulayilo. Anka kunyima kwa paapa, bibadi abitungu’shi Abrahame atengyele dingi munda mwa bipwa 25 kumpala kwa’shi mwan’aye Isaake atandjikwe na kutengyela bingi bipwa 60 bwa’shi bekulu baye Esau na Yaakobo batandjikwe.​—Beena-Ebelu 11:9.

¹⁰ Abrahame badi mupyane kipindji kya nsenga ya mulayilo ki bukata bwi naminyi? Bible akula’shi, Yehowa “tamumupe kintu sunga nkimune mu  dino eumbo, sunga peenyi pa kutuudila lwao, anka bamulayile kumupa ino nsenga, aye na bekulu baaye kunyima kwaye, sunga mbibadi Abrahame te na mwana.” (Bikitshino 7:5) Bipwa 430 kunyima kwa Abrahame kusabuka mwela wa Efrate ngi pabafikile bekulu baye bu mwilo ulombene kushala mu dino eumbo.​—Efilu 12:40-42; Beena-Ngalatea 3:17.

11. Bwakinyi Abrahame badi akumina kutengyela, na mmyabi kinyi yakapete bu kipata kya lwishinko lwaye?

¹¹ Abrahame badi akumina kutengyela mwanda badi mushinkamishe’shi, Yehowa akalombasha milayilo yaye. Badi na lukumino mwi Yehowa. (Badika Beena-Ebelu 11:8-12.) Abrahame badi na muloo wa kutengyela sunga mbyashi mumone kulombana kwa matemuki ooso a Efile Mukulu kumpala kwa kufwa. Kadi banda kunangushena muloo aukapusha Abrahame nsaa yakasanguka mu mpaladiso pa nsenga. Akakaanya ngofu nsaa yakabadika bibadi nshalelo aaye na a kifuko kyaye mu Bible. * Banda kunangushena muloo wakapusha pa kuuka’shi badi mukite mudimo ukata mu kulombasha kwa mpàngo y’Efile Mukulu pabitale Mesiya ababadi balee! Twi kwikala bashinkamishe’shi akapusha aye nabene’shi badi na tubingilo twibuwa twa kutengyela ino myabi.

12, 13. Bwakinyi Yoosefe badi na lukalo lwa kwikala na lwishinko, na badi na binangu bibuwa naminyi?

¹² Yoosefe ka nkwata-manwi ka Abrahame badi mukumine n’aye namu kwikala na lwishinko. Badi mupete myanda ibukopo ya kukutwa kululama. Kya kumpala, bakwabo abamupaanyine mu bupika pabadi na bipwa 17. Kunyima, abadi bamudimbiile’shi batompo kutambuka na mukashi a mukata aaye pa bukopo, abo nkumwela mu lukano. (Kibangilo 39:11-20; Misambo 105:17, 18) Sunga mbibadi Yoosefe bu mufubi a Efile Mukulu sha lulamato, abimweneka’shi badi apete malwa pamutwe pa kupeta myabi. Anka kunyima kwa bipwa 13, myanda yoso ibadi ishintulukye. Yoosefe batukile mu lukano aye nkufika kindonda kya nfumu a mu Ejiipitu.​—Kibangilo 41:14, 37-43; Bikitshino 7:9, 10.

¹³ Ino myanda ya kukutwa kululama ibadi itakule Yoosefe bwadya kulama ngo su? Badi mupushe’shi Yehowa bamusumbushena? Nya. Yoosefe badi mutengyele na lwishinko loso. Nkinyi kibamukwashishe? Nyi ndukumino lwaye mwi Yehowa. Badi mushinkamishe’shi Yehowa auku myanda yoso. Atushinkamisha bino ku bukwashi bwa myanda ibalungwile bakwabo. Bambile’shi: “Tanutshinanga nya. Ami ne pa mbalo y’Efile Mukulu nyi? Nwi bakyebe kunkitshina bibi, Efile Mukulu mmukumiine kwibyaluula bibuwa, bwa kulamina mwilo wibungi muwa, bu byabikumbana lelo.” (Kibangilo 50:19, 20) Yoosefe badi auku’shi badi na tubingilo twibuwa twa kutengyela myabi ya Yehowa.

14, 15. (a) Bwakinyi lwishinko lwa Daavide alwitukemesha? (b) Nkinyi kibakwashishe Daavide bwadya kutengyela na lwishinko?

¹⁴ Na Nfumu Daavide namu badi mupete myanda ya kukutwa kululama ibungi. Yehowa badi mwele Daavide mwimu bwadya kwikala nfumu a Isaleele pabadi ki mwana mukinga. Anka bibadi abitungu’shi Daavide atengyele munda mwa bipwa 15 kumpala kwa’ye kwikala nfumu a kisamba kyabo. (2 Samwele 2:3, 4) Munda mwa ano mafuku, Daavide badi na kya kusuuka na kufwama Nfumu Saule, badi akimbi bya kumwipaa. * Pa mwanda wa kusuuka, Daavide badi mukutwe mpa na nshibo yadya kushala. Badi asuukila mu maumbo abeene sunga mu meena e mushi mwa nsenga mu kisuku. Kunyima kwa mafuku, Saule badi mwipayibwe ku ngoshi. Anka Daavide badi mutengyele dingi munda mwa bipwa musambo kumpala kwa’ye kufika nfumu a mwilo wa Isaleele oso ushima.​—2 Samwele 5:4, 5.

 ¹⁵ Bwakinyi Daavide badi mukumine kutengyela na lwishinko loso? Etupa lwalulo mu wawa musambo umune mubadi mwele lukonko’shi: “Mpa na ku nguba kinyi?” Amba’shi: “Anka’mi, nakulupila [kifulo kyobe ki na lulamato, NWT.] Su bompasha, nakasangala. Nakakwimbila obe Yehowa pa mwanda wa bibuwa byokankitshina.” (Misambo 13:5, 6, EEM) Daavide badi auku’shi Yehowa mmumufule na akekala nka na lulamato kwadi. Badi munangushene pa bibabamukwashishe kwi Yehowa mu mafuku ashale, na badi akulupila mafuku abakakatusha kubingwabingwa kwaye kwi Yehowa. Daavide badi auku’shi, e na tubingilo twa kutengyela myabi ya Yehowa.

16, 17. Yehowa Efile Mukulu na Yesu Kidishitu mbetulekyele bileshesho bibuwa bwa kukumina kutengyela naminyi?

¹⁶ Yehowa ta mwitutekye bwatudya kukita kintu kyashi’akumina kukita aye nabene nya. Mmwitulekyele kileshesho kibuwa bukile kya kukumina kutengyela. (Badika 2 Mpyeele 3:9.) Bu kileshesho, bipwa binunu mu lupango lwa Edene, Satana badi mudimbile Yehowa’shi mmukutwe kululama. Mpa na binobino Yehowa “mmutengyele” na lwishinko loso efuku adikekashwa eshina dyaye bu dya kishila mu myanda yoso. Bantu boso abamutengyela na meso kwishinda abakapete myabi ibungi.​—Yeeshaya 30:18.

¹⁷ Na Yesu namu badi mukumine kutengyela. Pabadi pano pa nsenga, badi mushale na lulamato mpa na ku lufu. Mu kipwa kya 33, bayiile akalubula muulo wa mulambu waye wa nkuulo kwi Yehowa mwiyilu. Anka bibadi abitungu’shi atengyele mpa na mu kipwa kya 1914 bwadya kubanga kumunana bu Nfumu. (Bikitshino 2:33-35; Beena-Ebelu 10:12, 13) Sunga mbyabya, Yesu atungunuka na kutengyela mpa na ku nfudilo kwa kumunana kwa bipwa kinunu bwa’shi babutule beshikwanyi naye boso. (1 Beena-Kodinda 15:25) Abitungu’shi atengyele kipungo ki bula ngofu; mwanda, ino myabi ngilombene kutengyelwa.

18, 19. Nkinyi akiketukwasha bwatudya kukumina kutengyela na lwishinko?

¹⁸ Abimweneka kalolo’shi Yehowa akumina twikale na lwishinko, na tukumine kutengyela. Nkinyi akiketukwasha bwa kukita bino? Abitungu tutekye Efile Mukulu kikudi kyaye kiselele. Tentekyesha’shi lwishinko atwilupete ku bukwashi bwa kikudi ki selele ky’Efile Mukulu. (Beena-Efeso 3:16; 6:18; 1 Beena-Tesalonike 5:17-19) Ngi bwakinyi ikala osendeela Yehowa bwa’shi akukwashe bodya kunyingila na lwishinko!

¹⁹ Tentekyesha dingi kibakwashishe Abrahame, Yoosefe, na Daavide bwabadya kutengyela kulombana kwa milayilo ya Yehowa na lwishiko loso. Nyi ndukumino na lukulupilo lwabo mwi Yehowa. Tababadi abeele meshi penda pa myanda yabo nya. Patunangushena pa mushindo ubadi ulumbulukye myanda yabo, n’atwe namu atukanyingishibwa bwatudya kwikala na binangu bya kutengyela.

20. Abitungu twikale na kitshibilo kya kukita kinyi?

²⁰ Byabya sunga twekala na nkalakashi, twikaleyi na kitshibilo kya kulesha ‘binangu bya kutengyela.’ Ingi nsaa twi kwiyipusha’shi, “O Yehowa, na ku nguba kinyi?” (Yeeshaya 6:11) Anka ku bukwashi bwa kikudi kiselele ky’Efile Mukulu, twi kwambula mutemuki Yeelemiya na kwamba’shi: “Yehowa nyi ampeya byoso byandi nabyo lukalo. Nyi pa wawa mwanda ne mumukulupile.”​—Kwidila kwa Yeelemiya 3:21, 24, EEM.