1. Nkinyi akilesha’shi Yehowa apeyaa bangi bintu na kalolo?

MU ANGI mafuku Yehowa badi nka bupenka bwaye. Kunyima baatshile kitshibilo kya kupa bipangwa bi na binangu bi mwiyilu na bi pa nsenga kya buntu kya muwa. Yehowa, “Efile Mukulu a muloo,” akuminaa kupa bangi bintu bibuwa. (1 Timote 1:11; Shake 1:17) Bu bi Yehowa akumina’shi natwe namu twikale na muloo, etulongyesha bwatudya kwikala atupa bangi bantu bintu na kalolo koso.—Beena-Looma 1:20.

2, 3. (a) Bwakinyi atwikalaa na muloo nsaa yatupa bangi bintu na kalolo? (b) Mu uno mwisambo atukyebe kulonga kinyi?

² Efile Mukulu bapangile bantu mwifwanyiko dyaye. (Kibangilo 1:27) Bino abipushisha’shi Yehowa betupangile na ngikashi yadi nayo. Bwatudya kwikala na muloo wa binyibinyi na kupeta myabi ya Yehowa, abitungu tulonde kileshesho kyaye. Abitungu twikale atupasukila bangi bantu na kwikala bantu abapanaa. (Beena-Fidipe 2:3, 4; Shake 1:5) Bwakinyi? Mwanda bino ngi byabadi betupangye kwi Yehowa. Sunga twekala bantu bakutwe kupwidika, twi balombene kwambula Yehowa na kwikala atupaana na kalolo.

³ Binobino atukyebe kwisambila malongyesha atupete mu Bible  pabitale kupaana. Atukalongo bwakinyi Yehowa asankaa nsaa yatupaana na kalolo kooso. Atukalongo dingi mushindo wi kwikala na kalolo akwitukwasha bwa kufuba mudimo wabadi betupe kwi Yehowa na bwakinyi atwikala na muloo nsaa yatudi na kalolo. Na dingi atukesambila bwakinyi abitungu tutungunukye na kwikala na kalolo ka kupaana.

4, 5. Yehowa na Yesu mbaleshe bangi bantu kalolo naminyi, na twi balombene kwibambula naminyi?

⁴ Yehowa akumina’shi tumwambule, ngi bwakinyi atumusankisha nsaa yatupa bangi bintu na kalolo. (Beena-Efeso 5:1) Yehowa akumina’shi bantu bekale na muloo. Atuuku bino mwanda mmwitupangye mu mushindo wa kukaanya, na badi mupangye nsenga ibuwa na bingi bintu bi panka bwa’shi twikale na muloo. (Misambo 104:24; 139:13-16) Byabya nsaa yatwikitshisha bwa kusankisha bangi, atupa Yehowa kinemo.

⁵ Atwambula dingi Yesu, badi mwitulekyele kileshesho kipwidikye akilesha mushindo ulombene bantu kwikala na kalolo. Bambile’shi: “Byaabya ngi bifikye Mwan’a-muntu, kushii bwa kufubilwa, anka bwa kufubila bantu, na kupaana muuwa waye bwa kukuula mwilo wa bantu.” (Mateo 20:28) Na dingi Mpoolo badi mukankamikye bena Kidishitu’shi: ‘Ikalai na kinangu bu kino ky’abádi n’akyo kwi Kidishitu Yesu: . . . Anka, balekyele nabêne [kinemo kyê] ê nkwitûla mu mulongo wa mpika.’ (Beena-Fidipe 2:5, 7, EEM) Byabya twi balombene kwiyipusha’shi: ‘Ne kunyisha kulonda kileshesho kya Yesu su?’—Badika 1 Mpyeele 2:21.

6. Yesu badi mwitulongyeshe kinyi mu mwanda wa mwina Samadiya e buwa? (Tala kifwatulo ki ku mbangilo.)

⁶ Yehowa asankaa nsaa yatulondo kileshesho kipwidikye kyabadi betulekyele aye na Yesu. Atwambula kino kileshesho kyabo pa’twe kwikala atupasukila bantu na kukimba mishindo ya kwibakwasha. Yesu balesheshe muulo wa kukita bino nsaa ibakwile mwanda wa mwina Samadiya e buwa. (Badika Luka 10:29-37.) Balongyeshe balondji baye’shi abitungu bekale abakwasha bangi, kushi kutala byabadi na mbalo yabadi bashale. Otentekyesha bwakinyi Yesu badi mulonde uno mwanda su? Mpa mwanda wa’shi ungi mwina Yuuda bamwipwishe’shi: “A muntu-naami nnanyi?” Lwaluulo lwa Yesu alwitulongyesha’shi su atukumina kusankisha Yehowa, abitungu twikale na kalolo nka bu mwina Samadiya.

7. Twi kulesha’shi atukumina’shi mushindo wabakitaa myanda kwi Yehowa ngi ukile buwa naminyi? Patuula.

⁷ Kangi kabingilo aketutakula bwa kwikala na kalolo nkatale mwanda ubadi ukitshikye mu lupango lwa Edene. Satana badi mwakule’shi Adame na Eeva abakekala na muloo su babakutwa kukookyela Yehowa na su babekala abele binangu nka penda bwabo’bo banabene. Eeva badi mwifule nka aye nabene na badi mukumine kwikala bu Efile Mukulu. Adame namu badi mwifule nka penda aye nabene na bakuminyine kusankisha Eeva pamutwe pa kusankisha Efile Mukulu. (Kibangilo 3:4-6) Uno mwanda ngutushe bipeta bibubi. Abimweneka kalolo’shi, muntu ta mulombene kwikala na muloo su mmwifule nka penda aye nabene. Anka su twi bafule bangi bantu na kwibapa bintu na kalolo, atulesha’shi twi bakumine’shi mushindo wabakitaa myanda kwi Yehowa ngi ukile buwa.

8. Bwakinyi Adame na Eeva babadi balombene kwela binangu bwa bangi bantu?

⁸ Sunga mbibadi Adame na Eeva bubidi bwabo mu lupango lwa Edene, babadi balombene kwela binangu bwa bangi bantu. Bwakinyi? Mwanda Yehowa bebapeele mudimo  wa kukita. Bebalungwile bwabadya kuusha nsenga na bana babo na kwiyikasha mpaladiso. (Kibangilo 1:28) Adame na Eeva babadi balombene kukumina’shi bana babo babakatanda mu mafuku aafiki bekale na muloo, nka bibadi abikumina Yehowa’shi bantu booso bekale na muloo. Babadi na kya kufuba pamune boso bwabo bwa kwikasha nsenga yoso ishima mpaladiso. Uno mmudimo ukata!

9. Bwakinyi bantu babadya kwikala na muloo wibungi nsaa yabatumika bwa kwikasha nsenga mpaladiso?

⁹ Bantu bapwidikye babadya kwikala dingi na lukalo lwa kutumika pamune na Yehowa bwabadya kwikasha nsenga mpaladiso na kukita kikyebe ky’eshimba dyaye. Mu uno mushindo, babadya kutwela mu kwikisha kwaye. (Beena-Ebelu 4:11) Banda kupwandikisha buwa na muloo ubadya kupusha bantu bwa uno mudimo! Yehowa badya kwibelela myabi ibungi bwa kifulo kyabadi bafule bangi bantu na kwibapasukila kwabo.

10, 11. Nkinyi akiketukwasha bwa kulungula mukandu wibuwa na kwikasha bantu bu balongi?

¹⁰ Lelo uno, Yehowa mmwitupe mudimo wi pabwao. Akumina’shi tulungule mukandu wibuwa na kwikasha bantu bu balongi. Bwa kukita uno mudimo, abitungu tupasukile bantu ngofu. Byabya, bwatudya kutungunuka na kukita uno mudimo, abitungu twikale na binangu bibuwa: Tufule Yehowa na bantu.

¹¹ Mpoolo bambile’shi aye na bangi bena Kidishitu ba mu siekele a kumpala abadi ‘abafubu pamune n’Efile Mukulu’ mwanda babadi abalungula na kulongyesha bantu bya binyibinyi. (1 Beena-Kodinda 3:6, 9) Natwe namu lelo uno twi balombene “kufuba pamune n’Efile Mukulu” pa kwikala atupaana na kalolo kooso nsaa yetu, bukome, na bintu byetu bya ku mbidi bwa kufuba mudimo wa bulungudi wabadi betupe kwi Efile Mukulu. Uno mmwabi ukata watudi nao!

12, 13. Mmyanda kinyi yatudi balombene kwitanyina bu efuto dyatupete ku mudimo wa kwikasha bantu bu balongi?

¹² Kupaana nsaa na bukome bwetu patulungula na kulongyesha bantu akwitupa muloo wibungi. Bino ngi abyakula bakwetu bebungi bapete mushindo wa kulonga na bantu Bible. Abakula dingi’shi twi na muloo wa kumona bantu batulongo nabo abasanka nsaa yabashinguula akitulongyesha Bible, abatamisha lukumino, abashintuula nshalelo aabo, na kubanga kulungula bangi bantu myanda yabalongo. Na Yesu namu badi na muloo wibungi nsaa ibadi balungudi 70 babadi mutume, “babalukiile na muloo” pa mwanda wa myanda i buwa ibabadi bamone.—Luka 10:17-21.

¹³ Bakwetu balume na bakashi be mu nsenga ishima be na muloo nsaa yabamono mushindo wi mukandu wa mu Bible aukwasha bantu bwabadya kulongamisha nshalelo aabo. Bu kileshesho, ungi mukwetu mukashi e bukupi abetanyinaa bu Anna badi akumina  kufubila Yehowa ngofu. * Ngi bwakinyi bakatukile enda ku mbalo i ku lupese lwa kutunduka nguba kwa Europe mu mbalo i lukalo lukata lwa balungudi. Bafundile’shi: “Kuno kwi mushindo wa kulonga Bible na bantu bebungi, na ne na muloo wa kukita bino. Mudimo wande aumpa muloo ukata. Nsaa yangaluka ku nshibo, ntshi na nsaa ya kwimena penda pa myanda intale’mi nabene nya. Nanangushena pa bantu bankwete kulonga nabo—nkalakashi yabadi nayo na twinyongoshi twabo. Nakimbi mushindo wa kwibakankamika na kwibakwasha na bintu bya ku mbidi. Na dingi nadi mushinkamishe’shi: ‘[Muloo] wa mu kupaana ngukile wa mu kupeebwa.’”—Bikitshino 20:35.

14. We kusankila kulungula mukandu wibuwa sunga bantu bapela kukuteemesha naminyi?

¹⁴ Sunga bantu tabetutemesha nsaa yatulungula mukandu wibuwa, twi balombene kwikala na muloo mwanda atwibapa mishindo wa kwiupusha. Yehowa etutekye bwatudya kukita uno mwanda ubatekyele Esekyele. Bamulungwile’shi: “Webalungula myaaku yande, bakuteemeshe sunga bapele nkuteemesha.” (Esekyele 2:7; Yeeshaya 43:10) Byabya su bantu bakumina kwituteemesha sunga kupela, Yehowa aata kwitatshisha kwetu na muulo. (Badika Beena-Ebelu 6:10.) Ungi mukwetu bambile pabitale mudimo waye wa bulungudi’shi: “Nakunu, namyamina mema, akupu natekye na lukulupilo loso bwa’shi Yehowa atamishe lukalo.”—1 Beena-Kodinda 3:6.

15. Twi balombene kwikala atupaana nka nsaa yabetutumbula kwi bangi su? Patuula.

¹⁵ Yesu akumina’shi twikale atupa bantu bintu na kalolo kooso mwanda abitwikasha na muloo. Nsaa yatupaana na kalolo kooso, bantu abaketupa namu. Byabya etukankamika’shi: “Paanaayi, abeenupa naamu: Nkipimo kii buuwa, kifiitshinwe, kisampulwe, akitampuka, kyaabakeele mu lwembe lwa kyoobe kilamba; mwanda kipimo kyaanupimi nakyo, ngi kyabakee-nupimina naamu nakyo.” (Luka 6:38) Eyondo shi, sunga twekala atupaana na kalolo kooso, ta mbantu boso  abakekala na lutumbu nya. Kadi sunga bakutwa nkutumbula, tungunuka nka na kupaana. Touku bukata bwa muloo ulombene kupusha muntu bwa penda kantu kapeela kodi mumukitshine.

16. Abitungu twikale na kalolo kwi bantu kinyi, na bwakinyi?

¹⁶ Bantu be na kalolo ka binyibinyi tabapaanaa na binangu bya’shi bebape namu nya. Yesu bambile’shi: “Pooteekyesha bya-kudya, itaanyina balanda, baa-sha-bikopo, abasumpikita, bampofu, byaabya opete mwabi, mwanda tabee na kya nkwalwisha.” (Luka 14:13, 14) Bible amba’shi: “Sha-kalolo asampibwa.” Amba dingi’shi: “Sha-mwabi nguno atentekyesha mulanda!” (Nkindji 22:9; Misambo 41:2) Atukekala na muloo wa binyibinyi su tubekala atukwasha bangi.

17. Ngingi mishindo kinyi ya kupaana ilombene kwitupetesha muloo?

¹⁷ Pabadi Mpoolo mutemune mayi a Yesu aamba’shi, “muloo wa kupaana ngukile wa kupeebwa,” tabadi akwila nka penda bwa kupaana bintu bya ku mbidi nya. Twi balombene kupa bantu mayi a kwibanyingisha, malango a mu Bible, na kwibakwasha na bingi bintu. (Bikitshino 20:31-35) Ku mayi na ku bikitshino bya Mpoolo, badi mwitulongyeshe muulo wa kwikala atupaana nsaa yetu, bukome bwetu, sunga kwikala atupasukila bangi na kwibafula.

18. Bantu bebungi abakimbulaa myanda abakula naminyi pabitale kwikala na kalolo?

¹⁸ Bantu abakimbulaa myanda ya mu mwikelo wa bantu mbasangane dingi’shi kupaana akupeyaa bantu muloo. Muyile abilesha ungi mukanda, bantu bebungi abakulaa’shi be na muloo kunyima kwa’bo kukitshina bangi bantu myanda ibuwa. Bantu abakimbulaa myanda abamba’shi nsaa yatukwasha bangi, atupusha’shi nshalelo eetu balongama. Ngi bwakinyi bangi bantu balongye myanda ibungi abamba’shi bibuwa bantu bekale abakwasha bangi bwabadya kwikala na mbidi bukome na muloo. Byabya, ino myanda yabadi bafumbule tayitukemesha nya, mwanda Yehowa Mupangi eetu sha kifulo, mmupwe kwitulungula’shi kupaana akwitupetesha muloo.—2 Timote 3:16, 17.

19, 20. Bwakinyi okumina kwikala na kalolo?

¹⁹ Nsaa i bantu betwifunyishe abepasukila nka penda abo banabene, mbilombene kwitwelela bukopo bwa kutungunuka na kupaana. Anka Yesu badi mwitutentekyeshe’shi miiya ibidi ikile ingi ku bukata nkufula Yehowa n’eshimba dyetu dyoso, kikudi kyetu kyoso, binangu byetu byoso, na bukome bwetu boso; na kufula muntu netu bu’twe banabene. (Maako 12:28-31) Mu uno mwisambo tubalongo’shi bantu bafule Yehowa abamwambulaa. Yehowa na Yesu boso bwabo be na kalolo, na abetukankamika bwatudya kwambula kileshesho kyabo, mwanda bino abitupetesha muloo wa binyibinyi. Su tubekitshisha bwa kwikala na kalolo mu myanda yoso yatukitshina Yehowa na yatukitshina bantu neetu, atukapa Yehowa kinemo na dingi atukapete bipeta bibuwa atwe banabene mpa na bangi bantu.

²⁰ Kushi mpaka we mupwe kwikitshisha bwa kwikala na kalolo na kukwasha bangi bantu, bikishekishe bakwetu balume na bakashi. (Beena-Ngalatea 6:10) Su botungunuka na kukita bino, bantu abakakutumbula na nkufula, na okekala na muloo. Bible amba’shi: “Yawa apana bibungi akatambula namu bi bungi. Yawa akwasha bangi akatambula namu bukwashi.” (Nkindji 11:25, EEM) Mu nshalelo eetu na mu mudimo wetu wa bulungudi, mwi mishindo ibungi ya kupa bangi bantu na kalolo kooso na kwibakwasha. Mu mwisambo aulondo atukesambila imune ya ku ino mishindo.