1. Mmishindo kinyi yatudi balombene kufuba pamune na Yehowa?

NSAA ibabapangile bantu kwi Yehowa, badi mukumine’shi bekale abafubu pamune naye. Sunga bi bantu mbakutwe kupwidika lelo uno, bantu basha lulamato mbalombene kutungunuka na kufuba pamune na Yehowa efuku dyoso. Bu kileshesho, “tukwete kufuba pamune n’Efile Mukulu” nsaa yatulungula mukandu wibuwa wa Bufumu na kwikasha bantu bu balongi. (1 Beena-Kodinda 3:5-9) Nyi nkinemo kikata kyabadi betupe kwi Mupangi eetu p’aye kwitusangula bwatudya kukita uno mudimo wi na muulo ukata! Na dingi, ta nka penda kulungula mukandu wibuwa ngi mushindo watukwete kufuba pamune na Yehowa nya. Mu uno mwisambo, atukalongo mishindo yatukwete kufuba pamune naye nsaa yatukwasha bena kifuko kyetu na bantu be mu kakongye, nsaa yatukuukila benyi, nsaa yatukwasha ku midimo ya ndumbulwilo yabakwete kufuba mu nsenga ishima, na nsaa yatutamisha mudimo wetu watufubila Yehowa.—Beena-Kolose 3:23.

2. Bwakinyi ta twi balombene kupwandjikisha myanda yatukitshina Yehowa na yabamukitshina kwi bangi?

² Nsaa yatulongo uno mwisambo, bi na muulo bwatudya kutentekyesha’shi bantu ta be mumune. Bungi bwa bipwa byetu, mbidi, nshalelo, na ngobesha yetu ta i mumune nya. Ngi bwakinyi  tokumanga kupwandikisha myanda yodi mulombene kukitshina Yehowa na yabamukitshina kwi bangi. Mpoolo mutumibwa bambile’shi: “Muntu ooso ataluule bwikashi bwaye nabeene; paapa, su atundula mwanda wa kwitumbiisha, eetumbishe mu’ye nabeene, kushii kwipwandjikisha na ungi muntu.”—Beena-Ngalatea 6:4.

3. Bwakinyi twi kwamba’shi muntu apasukila kifuko kyaye kwete kufuba pamune n’Efile Mukulu?

³ Yehowa etutekye bwatudya kupasukila bifuko byetu. Bu kileshesho, abitungu okimbe makuta bwa kulombasha nkalo ya kifuko kyobe. Ba nyina bana bebungi abashala ku mashibo bwabadya kulama bana babo. Na dingi nsaa i betutande ta be na mushindo wa kushala abo banabene, abitungu’shi twibapasukile. Ino myanda i na muulo. Bible amba’shi: “Su muntu taabàmba bakwabo, nkibinkibi baadi nabo mu nshibo yaaye, byaabya mmutune lukumiino; nyi mmubi mukile shii-na-lukumiino.” (1 Timote 5:8) Su we na bushito bwa kifuko, we mulombene kukutwa kufubila Yehowa ngofu bu byokumina. Anka tobofulanga! Yehowa asanka ngofu nsaa yakumono olombasha nkalo ya bantu ba mu kifuko kyobe.—1 Beena-Kodinda 10:31.

4. Ba nambutwile be kutuula myanda ya Bufumu pa mbalo ya kumpala naminyi, na nkinyi akikitshikaa su babakitshi bino?

⁴ Ba nambutwile bena Kidishitu mbalombene kufuba pamune na Yehowa p’abo kukwasha bana babo bwabadya kwikala na bipatshila bya kufubila Yehowa. Ba nambutwile bebungi mbakite bino. Ngi bwakinyi, bana babo mbafikye mu kwata kitshibilo kya kufubila Yehowa mu mudimo wa nsaa yoso, mpa na mu ma mbalo e kula. Bamo bakwete kufuba bu ba misionere, bangi abafubu bu ba mbala-mashinda mu ma mbalo mwi lukalo lukata lwa balungudi, na bangi namu bakwete kufuba ku Betele. Byabya, nsaa i bana be ku mbalo i kula, ba nambutwile ta mbalombene kukisha nabo nsaa ibungi bu byabakumina kushala nabo nya. Anka bakwete kukankamika bana babo bwabadya kutungunuka na kufubila Yehowa mu ma mbalo abadi bebatume kushi kukimba penda buwa bwabo. Bwakinyi? Mwanda be na muloo wi bungi pa mwanda wa’shi bana babo mbatule Yehowa pa mbalo ya kumpala mu muwa wabo. (3 Yowano 4) Bebungi ba ku bano ba nambutwile abapusha nka bu Anna, bambile’shi ‘balambula’ mwan’aye Samwele kwi Yehowa. Abapusha’shi mbapete mwabi ukata wa kufuba pamune na Yehowa mu uno mushindo.—1 Samwele 1:28.

5. We kukwasha bakwetu be mu kakongye naminyi? (Tala kifwatulo ki ku mbangilo.)

⁵ Su twe na mashito a mu kifuko aatungu’shi olombashe binobino, we kukwasha bakwetu be na kukumba, bapwe kununupa sunga be na ingi nkalo. Sunga’shi we mulombene kukwasha baba abebapasukila. Kimba bantu be mu kakongye kenu be na lukalo lwa bukwashi. Bu kileshesho, nwi kwikala na mukwetu mukashi kwete kulama nshaye sunga nyinaye tadi mununu. We kushala pamune na nshaye sunga na nyin’aye bwadya kumona bya kukita ingi myanda su? Sunga’shi we mulombene kukwasha muntu pa kumutwala bwa kwenda naye mu bisangilo, mu kuula bintu, sunga mu kutala muntu abadi balame mu lupitaalo. Nsaa yokitshi byabya, we kutumika pamune na Yehowa bwadya kwaluula ku luteko lwa muntu.—Badika 1 Beena-Kodinda 10:24.

6. Twi kwikala atukuukila benyi naminyi?

⁶ Bantu abafubu pamune n’Efile Mukulu abaukibwa bwa kyubishi kyabo kya kukuukila benyi. Mu Bible, kishima kya mu kina Greke kyabadi baluula bu “kukuukila benyi” akipushisha kulesha “kalolo, kwi bantu benyi.” (Beena-Ebelu 13:2) Mu Eyi dy’Efile Mukulu, mwi bileshesho abitulongyesha mushindo watudi balombene kwikala na kalolo ka uno mushindo. (Kibangilo 18:1-5) Twi balombene na  dingi abitungu twikale atukwasha bangi mu nsaa yoso yatudi na mushindo wa kwibakwasha, byabekala “bakwetu mu lukumiino” sunga bangi bantu.—Beena-Ngalatea 6:10.

7. Mmyabi kinyi yodi mulombene kupeta nsaa yokuukila bafubi ba nsaa yoso?

⁷ We kufuba pamune na Yehowa pobe kukuukila bakwetu abafubu mufubo wa nsaa yoso be na lukalo lwa mbalo ya kushala su? (Badika 3 Yowano 5, 8.) Nsaa yatukitshi byabya, abo abapete miloo mpa n’atwe namu. Bible ayitanyina bino bu ‘kwikankamishena.’ (Beena-Looma 1:11, 12, EEM) Tubande kwisambila mwanda wa Olaf. Pabadi ki mwana mukinga, ungi mukunkushi a kifunda badi ki bukupi bafikile mu kutala kakongye kaabo na badi na lukalo lwa mbalo ya kushala, anka takubatukile muntu su ngumune mu kakongye badi mukumine kumukwasha na mbalo ya kushala nya. Olaf batekyele bamutande bashi ba Temwe, su abakumina bwa’shi mukunkushi a kifunda afikye ashale mu nshibo mwabo. Abakuminyine kadi babalungwile Olaf’shi ekala alaala mu nkwasa. Olaf bakuminyine, anka ta mwinyongole bwa uno mwanda nya. Badi mukishe lubingo lwi buwa bukile na uno mukunkushi a kifunda! Ku namashika koso babadi ababuuku bwa kwisamba myanda ibuwa nsaa ibabadi abadi kya kudya kya namashika. Mukunkushi a kifunda badi mukankamikye Olaf ngofu mu kipaso kibadi mwate kitshibilo kya kubanga kufubila Yehowa mudimo wa nsaa yoso. Olaf badi mufube bu misionere mu maumbo ebungi munda mwa bipwa 40.

8. Bwakinyi abitungu twikale na kalolo sunga bantu bakutwa kwitutumbula bwa musango wa kumpala? Tuusha kileshesho.

⁸ Twi balombene kulesha bantu benyi kalolo mu mishindo ibungi, sunga bakutwa kwitutumbula bwa musango wa kumpala. Bu kileshesho, ungi mukwetu mukashi a mu Espagne badi mulongye Bible na Yesica, mwana mukashi a mu Équateur. Dingi efuku pababadi abalongo Bible, Yesica badi mudile ngofu. Mukwetu mukashi bamwipwishe bwakinyi kwete kudila. Yesica bamulungwile’shi kumpala kwadya kufika mu Espagne, badi na bulanda bukile. Dingi efuku badi mukutwe mpa na kya kudya kya kupa mwan’aye, aye nkumupa penda mema. Yesica badi mwele luteko bwa kuteka bukwashi pabadi aladisha mwan’aye. Kunyima kwa kapindji kapeela, ba Temwe babidi babafikile mu kutembela Yesica abo nkumupa jurnale. Anka bakutshilwe kwibatambula kalolo aye nkukonyakana uno jurnale, na kwamba’shi: “Bino ngi bya kudya byanumpa bwandya kupa mwan’ande?” Mukwetu mukashi batompele kumusamba, anka Yesica ta mumupushishe nya. Kunyima, mukwetu mukashi bafikile aleka kitunga kya byakudya pa kibelo kyaye. Binobino, nsaa ibabadi abalongo, babangile kudila pa mwanda wa’shi badi mushinguule’shi mmukutwe kumona lwaluulo lw’Efile Mukulu ku luteko lwaye. Anka Yesica badi mwate kitshibilo kya kufubila Yehowa. Abimweneka kalolo’shi, bano bakwetu bakashi babadi bapete bipeta bibuwa pa mwanda wa kalolo kaabo.—Mulungudi 11:1, 6.

9, 10. (a) Mmishindo kinyi ibabadi nayo kwi bena Isaleele bwa kukwasha ku midimo? (b) Mmishindo kinyi yabadi balombene kukwasha kwi bakwetu balume be mu kakongye lelo uno?

⁹ Mu mafuku a kala, bena Isaleele abadi na mishindo ibungi ya kukwasha ku midimo. (Efilu 36:2; 1 Myanda 29:5; Neemiya 11:2) Lelo uno, n’obe namu we na mishindo ibungi ya kukwasha, pa kutusha nsaa yobe, bintu byobe, na ngobesha yoobe bwa kukwasha bakwenu balume na bakashi. Nsaa yokitshi bino, okapete miloo ibungi na Yehowa akakwelela myabi.

¹⁰ Eyi dy’Efile Mukulu adikankamika bana balume be mu kakongye bwabadya kufuba pamune na Yehowa pa kufubila bangi bu bafubi ba midimo na bu bakulu. (1 Timote 3:1, 8, 9; 1 Mpyeele 5:2, 3) Bantu abafubu bino  abakumina kukwasha bangi ku mbidi mpa na mu lulangwilo lwabo. (Bikitshino 6:1-4) Bakulu ba mu kakongye kenu mbakupe mudimo wa kukuukila bantu ku bisangilo sunga bwa kufuba ku mikanda, mu kwabila ma teritware, sunga ungi mudimo su? Bakwetu balume abakwasha mu ino midimo abakula’shi be na muloo wa kufuba ino midimo.

11. Ungi mukwetu mukashi mmupete myabi pa kufuba ku mudimo wa lwibako naminyi?

¹¹ Misusa ibungi, bantu abakwashaa ku midimo ya kwibaka abapetaa ba kuuku bapya. Ungi mukwetu mukashi abetanyinaa bu Margie badi mufube ku lwibako lwa Mashibo a Bufumu munda mwa bipwa 18. Mu uno mudimo, badi atala abifubu bakwetu ba nsongwakashi na kwibalongyesha bya kufuba. Akula’shi uno mudimo aupa bantu bafikye mu kukwasha ku mudimo wa lwibako mushindo wabadya kwikankamishena. (Beena-Looma 1:12) Nsaa ibadi apete myanda ibukopo mu muwa waye, bantu babadi mudye nabo bu kuuku mu uno mudimo babadi abamukankamika. We mupwe kukwasha ku mudimo wa lwibako su? We mulombene kufuba sunga twe na ngobesha ya kufuba midimo ikata.

12. We kukwasha kunyima kwa masaku naminyi?

¹² Twi balombene dingi kufuba pamune na Yehowa pa kukwasha bakwetu bapete masaku. Bu kileshesho, twi kutusha makuta. (Yowano 13:34, 35; Bikitshino 11:27-30) Ungi mushindo watudi balombene kukwasha nkwibasulwila sunga kwibalumbulwila mashibo aabo alwile kunyima kwa masaku. Gabriela, ungi mukwetu mukashi a mu Pologne sha nshibo yaye ibadi ilwile pa mwanda wa mpeshi mukile bungi banokyele, badi na muloo ukata wa kumona bakwetu ba mu tukongye twibefunyishe abafikile mu kumukwasha. Akula’shi: “Uno mwanda ubadi unshinkamishe’shi kwikala mu kakongye ka bena Kidishitu nyi mmwabi wi pa bwao na nkwikale bu nsulo ya muloo na ya mwabi.” Bantu bebungi bapete bukwashi kunyima kwa masaku abakula’shi abapushaa nka bino. Na baba boso bakwete kufuba pamune na Yehowa bwa kukwasha bakwetu be na muloo ukata.—Badika Bikitshino 20:35; 2 Beena-Kodinda 9:6, 7.

13. Nsaa yatwipana mu kukwasha ku mifubo, kifulo kyetu bwa Yehowa akitama naminyi? Tusha kileshesho.

¹³ Ungi mukwetu mukashi abetanyinaa bu  Stephanie na bangi balungudi ba mukandu wibuwa ba mu teritware aabo babadi bafube pamune n’Efile Mukulu pa kukwasha ba Temwe babasukile ngoshi mwiumbo dyabo benda mu États-Unis. Babadi bakwashe bano bantu bafilukye bwabadya kupeta mashibo a kushala na kupeta bintu bya mu nshibo. Akula’shi: “Tubadi bakankamikibwe pa kumona muloo wabo na bibabadi abasanka pa’bo kumona bi kifulo ki mu kifuko kya bakwetu be mu nsenga ishima. Bano bakwetu abanangushena’shi tubebakwasha, aku namu mu binyibinyi, abo ngi babetukwasha ngofu. Kifulo, buumune, lukumino, na kukulupila kwabo mwi Yehowa, ino myanda yatudi bamone kwabadi ngitamishe kifulo kyetu bwa Yehowa, na bino mbitulongyeshe bwatudya kwikala atusankila ngofu bintu byoso byabetupa kwi Yehowa ku bukwashi bwa ndumbulwilo aaye.”

14, 15. (a) Mutemuki Yeeshaya badi na binangu kinyi? (b) Bena Kidishitu mbalombene kwambula binangu bya Yeeshaya naminyi?

¹⁴ We kukumina kutamisha mufubo oobe ofubu na Yehowa su? We kukumina kwenda mu mbalo mwi lukalo lukata lwa balungudi su? Byabya, tabitungu nka twende ku mbalo i kula bwatudya kwikala na kalolo nya. Kadi kwi bakwetu be na mushindo wa kwenda. Be na binangu nka bu bya mutemuki Yeeshaya. Pabadi Yehowa mwipushe’shi: “Nnaanyi andy’a kutuma? Nnaanyi ee kwenda pa mbalo yeetu?” Yeeshaya bambile’shi: “Nnaami uno, ntume!” (Yeeshaya 6:8) We na mushindo na okumina kukwasha ndumbulwilo a Yehowa su? Mmishindo kinyi yodi mulombene kukwasha?

¹⁵ Yesu bambile pabitale kulungula mukandu wibuwa na kwikasha bantu bu balongi’shi: “Bya-kunwa bii bungi, anka bafubi mbapeela; byaabya tekaayi Mfumu a byuùmbùlwanga bwadya kutuma bafubi mu efuba dyaaye.” (Mateo 9:37, 38) We kufuba bu mbala mashinda mu mbalo mwi lukalo lukata lwa balungudi. Sunga’shi we kukwasha ungi muntu bwadya kukita bino. Bakwetu bebungi abapusha’shi mushindo wibuwa wa kulesha kifulo kyabo bw’Efile Mukulu na muntu nabo nkufuba bu mbala mashinda mu mbalo mwi lukalo lukata lwa balungudi. We kunangushena ingi mishindo ya kutamisha mudimo oobe su? Su bokitshi byabya, okekala na muloo wibungi.

16, 17. Ngingi mishindo kinyi yodi mulombene kutamisha mudimo oobe mu ndumbulwilo a Yehowa?

¹⁶ We na lukalo lwa kufuba ku Betele sunga kukwasha ku mudimo wa lwibako, munda mwa myeshi ipeela sunga mafuku apeela ku lubingo? Ndumbulwilo a Yehowa e na lukalo lwa bantu abakumina kufuba mu ma mbalo moso mwabebatumu na abakumina kufuba mufubo oso wabebapa sunga bekala na kiukilo mu ingi midimo. Yehowa asankilaa muntu oso akumina kwisumina ingi miloo na kufuba mu mbalo yoso i lukalo.—Misambo 110:3.

¹⁷ We na lukalo lwa kulongyeshibwa ngofu bodya kumona bya kunyisha kufubila Yehowa su? Pangi we kuteka bodya kutwela mu Kalasa ka balungudi ba Bufumu. Kano kalasa akalongyesha bakwetu bapwe kunyinga mu kikudi abakumina kufubila Yehowa mudimo wa nsaa yoso bwa’shi ndumbulwilo a Yehowa ebatume bwabadya kufuba ngofu. Bantu abatwele mu kano kalasa abitungu bakumine kufuba mu mbalo yoso yabebatumu. We kukumina kufubila Yehowa ngofu mu uno mushindo su?—1 Beena-Kodinda 9:23.

18. Mmyabi kinyi yatupetela mu kufuba pamune na Yehowa efuku dyoso?

¹⁸ Bu byatudi bantu ba Yehowa, twi na kalolo, twi bantu bebuwa, be na mwikelo wibuwa, be na kifulo. Tukwete kupasukila bantu boso efuku dyoso. Bino abitupetesha muloo, butaale, na disanka. (Beena-Ngalatea 5:22, 23) Sunga wekala mu nshalelo e naminyi, okekala na muloo mu mafuku oso okakumina kwambula kalolo ka Yehowa na kwikala umune a ku bantu bakwete kufuba pamune naye!—Nkindji 3:9, 10.