PA MWANDA wa nkalakashi ikwete kwenda na kufiima mu ano “mafuku a ku nfudilo,” bafubi ba Yehowa be na lukalo lukata lwa lwishinko kukila byabekalanga kumpala. (2 Timote 3:1-5) Twi mu ndumbulwilo mwi bantu betwifunyishe befule nka penda abo banabene, bashi’abakumina kipwano, na bakutwe butontshi bwa mbidi. Bantu boso abalesha ino ngikashi mbakutwe lwishinko. Byabya abitungu’shi mwina Kidishitu oso eyipushe’shi: ‘Kukutwa kwa lwishinko kwi na bantu ba mu uno ndumbulwilo nkupwe kungambukila su? Kwikala na lwishinko akupushisha kinyi? Na ne kwikala na dino eyikashi dikata dya bena Kidishitu nsaa yoso mu nshalelo ande naminyi?’

Muyile mpushisho a kino kishima kya mu Bible, lwishinko ta mpenda kunyingiila mwanda wi bukopo nya. Muntu e na lwishinko alufiki kwi Efile Mukulu anyingilaa mwanda na kepatshila. Tatala nka penda nkalo yaye nya kadi amono dingi mpa na buwa bwa baba abamufwishila nkalakashi. Pa mwanda wa byabya, nsaa yabalwishisha muntu sha lwishinko sunga kumoolomona, apele kushimisha lukulupilo lwa kulongamisha kipwano. Banda kunangushena, Bible atemuna “lwishinko” pa mbalo ya kumpala mu mulongo wa ngikashi ibuwa ayitukila ku kifulo. * (1 Beena-Kodinda 13:4) Eyi dy’Efile Mukulu aditemuna dingi “lwishinko” bu kimune kya ku bipindji bya ‘kikuba kya kikudi.’ (Beena-Ngalatea 5:22, 23) Byabya abitungu tukite kinyi bwa kwikala na dino eyikashi dibuwa?

Bwatudya kupeta eyikashi dya lwishinko, abitungu tutekye bukwashi bwa kikudi kya Yehowa, kyapeyaa baba boso abakulupila mwadi. (Luka 11:13) Byabya sunga kikudi ky’Efile Mukulu kyekala na bukome, kwi myanda ayitungu’shi tukite ipushene na luteko lwetu. (Misambo 86:10, 11) Bino abilesha’shi abitungu twikitshishe na mwetu moso bwa kulesha lwishinko efuku dyoso bwa’shi dino eyikashi dimene mishi mu mashimba eetu. Sunga mbyabya, abitungu’shi tufube ngofu bwa’shi twikale atulesha lwishinko nsaa yoso mu nshalelo eetu. Nkingi kintu kinyi kilombene kwitukwasha?

Twi balombene kwikala na lwishinko pa kutaluula na kwambula kileshesho kipwidikye kya Yesu. Mu kwipushena na kino kileshesho, Mpoolo mutumibwa badi muyookyelwe bwadya kupatuula bi ngikashi ya “muntu mupya,” mu yanka mwi “lwishinko,” na kunyima badi mwitulangye bwatudya kuleka “butaale bwa Kidishito budye bufumu mu mashimba [eetu].” (Beena-Kolose 3:10, 12, 15) Twi kutadila bwa’shi buno butaale “budye bufumu” mu mashimba eetu p’atwe kwambula lukumino lwi bukopo lwa Yesu lwa’shi Efile Mukulu akalumbuula myanda yetu yoso pa nsaa ilombane. Nsaa yatwambula kileshesho kya Yesu, kintu su nkimune takiketutakula mu kushimisha lwishinko lwetu, sunga twamona myanda i bukopo bwi naminyi.—Yowano 14:27; 16:33.

Sunga twekala na kisukusuku kya kumona ndumbulwilo mupya abadi betulee kwi Efile Mukulu, atulongo bya kunyisha kwikala na lwishinko nsaa yatunangushena ku lwishinko lwabadi betuleshe kwi Yehowa. Bifundwe abitushinkamisha’shi: “Yehowa taanyengakana bwa kukumbasha  mulayilo waye; kutala bangi abanangushena’shi ee na kanyengakanyi. Anka aye eeleesha kwanudi na lwishinko, apele’shi bamo tabashiminanga nya, anka booso bakafikiile mu kwilanga.” (2 Mpyeele 3:9) Nsaa yatutala lwishinko lwabadi betuleshe kwi Yehowa, bino tabitutakula bwatudya kunyisha kwikala na lwishinko kwi bangi bantu su? (Beena-Looma 2:4) Patudi na uno mwanda mu binangu, twi kwiyipusha’shi mmu myanda kinyi ayitungu’shi tuleshe lwishinko?

Myanda ibungi yatufumankana nayo mafuku oso ikwete kutula lwishinko lwetu mu kutompibwa. Bu kileshesho, su opusha’shi we na mwanda wi na muulo wa kwisamba, abitungu oleshe lwishinko bwa kupela kutshiba bangi bantu mwisambo. (Shake 1:19) We kwikala dingi na lukalo lwa kulesha lwishinko nsaa yanwibungu pamune na bakwetu abakitshi myanda ayikufitshisha munda. Pamutwe pa kwaluula ku mwanda oso wabakitshi, we kukita bibuwa pa kutala mushindo wabakitaa myanda kwi Yehowa na Yesu pabitale kubofula kwetu. Tabemenaa pa tu bilema twetu tupeela nya. Anka, abamonaa ngikashi ibuwa i mwatudi na kutala na lwishinko loso mushindo watwikitshisha bwa kulumbuula ngikashi yetu.—1 Timote 1:16; 1 Mpyeele 3:12.

Ungi mwanda ulombene kutula lwishinko lwetu mu kutompibwa nsaa yabetwamba kwi muntu’shi twi bakule sunga kukita mwanda wi bubi. Misusa ibungi, twi kwikala na bukidi bwa kubanga kwikalwila na kulesha’shi babetudimbiila. Anka, Eyi dy’Efile Mukulu aditulungula’shi tatwikalanga atukitshi byabya. Adyamba’shi: “Mbikile buwa kwikala na lwishinko pe kwinêmeka. Tokwatanga nsungu bukidi, nsungu aibombêlâ mu mashimba a batshikame.” (Mulungudi 7:8, 9, EEM) Byabya, sunga byekala’shi mwanda wabetwamba ngwa madimi, abitungu twikale na lwishinko bwa kutalula myanda yatwakula. Yesu badi mutumikile dino eyi dya kulonda nsaa ibabadi bamudimbile myanda.—Mateo 11:19.

Ba nambutwile be na lukalo lwa kulesha lwishinko bikishekishe nsaa yabamono’shi abitungu kukatusha binangu bibubi, malaka e bubi, sunga pabapusha’shi bana babo be na ino myanda ibubi. Tubande kwata kileshesho kya Mattias, kwete kufuba bu mwina kifuko kya Betele kya mu Scandinavie. Pabadi ki mwana mukinga, Mattias badi munyingiile myanda ibabadi abamoolomona nsaa yoso kwi bena kalasa naye pa mwanda wa lukumino lwaye. Kya kumpala, bamutande tababadi abauku bino nya. Sunga mbyabya, bibadi abitungu’shi bakambile bukitshishi bwi bubi bubadi na kuno kubingwabingwa kubadi akupete mwan’abo, na mwana babangile kwela mpaka pabitale bya binyibinyi. Gillis, nshaye na Mattias atentekyesha’shi: “Bibadi abitungu’shi twikale na lwishinko lwibungi mu uno mwanda. Mwanda Mattias babangile kwitwipusha’shi: ‘Efile Mukulu nnanyi? Bi kwikala’shi Bible ta Eyi dy’Efile Mukulu su? Atuuku naminyi’shi Efile Mukulu etutekye’shi tukite uno mwanda?’” Ingi nsaa badi ayipusha nshaye’shi: “Bwakinyi ne kwikala bu muntu e bubi su napela kupusha sunga kukumina myanda yanudi bakumine?”

Gillis apatuula’shi: “Ingi nsaa mwan’etu badi etwipusha nkonko mufiite munda, kushi kwitufitshila ami na nyin’aye munda, kadi badi mufitshile bya binyibinyi munda, mwanda badi apusha’shi abimwelesha nshalelo bukopo.” Gillis badi mupudishe uno mwanda naminyi? Amba’shi: “Ingi misusa, ami na mwan’ande tubadi atushala na kwisamba munda mwa nsaa ibungi. Kebungi nadi namuteemesha na kumwela nkonko bwa kupusha kalolo bi binangu byaye na bi mweneno aaye. Ingi misusa nadi  namulungula myanda yadi mulombene kunangushena munda mw’efuku dishima kumpala kwatudya kufudisha mwisambo wetu. Ingi misusa, nadi namulungula’shi ne na lukalo lwa’shi andekyele mafuku apeela bwandya kunangushena pabitale mweneno aaye sunga mwanda wekalanga mundungule. Ku bukwashi bwa ino miisabo ibatudi atwisamba kushii kukooka, Mattias babangile kukaamisha mpushisho aaye na kukumina malongyesha bu a mulambu wa nkuulo, matalwa a Efile Mukulu a kumunana, na kifulo kya Yehowa. Bibadi byate mafuku ebungi, na ingi nsaa bibadi bukopo, anka ku kapelakapela, kifulo kyaye bwa Yehowa kibayile na kutama mwishimba dyaye. Ami na mukashi’ande twi na muloo mwanda kwitatshisha na lwishinko lwetu bwa kukwasha mwan’etu mu bipwa byaye bya bukinga nkutushe bipeta bibuwa na bino mbimukume kwishimba.”

Gillis na mukash’aye babadi bakulupile’shi Yehowa ebakwasha mu kwitatshisha kwabo bwa kukwasha mwan’abo na lwishinko. Patala kunyima, Gillis amba’shi: “Misusa ibungi nadi nalungula Mattias’shi kifulo kyetu ki bukopo bwaye ngi akintakula ami na nyin’aye bwa kumutekyela ngofu bwa’shi Yehowa amukwashe bwadya kupusha malongyesha aaye.” Bano ba nambutwile be na lutumbu lukata p’abo kufubisha dino eyikashi dya lwishinko di na muulo ukata!

Kukasha kwibakwasha mu kikudi, abitungu bena Kidishitu ba binyibinyi bekale na kifulo na lwishinko nsaa yabakwasha bantu ba mu bifuko byabo sunga ba kuuku babo be na mikumbo ishi’ayipu. Tubande kwata kileshesho kya Ellen, * mushale naye namu mu Scandinavie.

Munda mwa bipwa mwanda, mulume a Ellen badi mukwatshibwe na mikumbo ibidi ibadi ayilwisha nfubilo a bongo bwaye. Ngi bwakinyi, te na ngobesha ya kupusha lusa, kwikala na muloo, sunga kupusha kinyongwa nya. Uno mwanda ukwete kukalakasha Ellen ngofu. Akula’shi: “Bibadi abitungu’shi ngikale na lwishinko na kwela nteko ibungi.” Alombasha’shi: “Verse andi mukumine kwete kunsamba ngofu nyi Beena-Fidipe 4:13, amba’shi: ‘Ne mulombeene kukita byooso munda mwa uno anyingisha.’” Ku bukwashi bwa buno bukome, Ellen kwete kunyingiila na lwishinko loso mushinkamishe’shi Yehowa amukwasha.—Misambo 62:5, 6.

Byabya, nsaa yoso ayitungu’shi tuleshe lwishinko, Yehowa ngi kileshesho kikile buwa kyatudi balombene kulonda. (2 Mpyeele 3:15) Mu Eyi dy’Efile Mukulu atwimusangana myanda ibungi ayilesha mafuku ababadi baleshe lwishinko kwi Yehowa. (Neemiya 9:30; Yeeshaya 30:18) Bu kileshesho, Yehowa bakitshine naminyi nsaa ibadi Abrahame mumwele nkonko pabitale kitshibilo kyaye kya kubutula Sodome? Kya kumpala, Yehowa ta mumutunyishe bwa’shi alekye kumwela nkonko nya. Anka Yehowa batemeshe na lwishinko ku lukonko loso lubabadi bamwipusha kwi Abrahame. Kunyima, Yehowa balesheshe’shi kwete kutemesha p’aye kwambuula mayi a Abrahame na kumushinkamisha’shi ta mulombene kubutula Sodome sunga mwekala nka penda bantu ekumi balulame mu kyakya kibundji. (Kibangilo 18:22-33) Kino nyi nkileshesho kibuwa bukile kya kuteemesha na lwishinko na kupela kwaluula bukidibukidi!

Lwishinko alufiki kwi Efile Mukulu nyi eyikashi di na muulo ngofu mu mwikelo wa muntu mupya aditungu’shi bena Kidishitu boso bekale nadyo. Su tubekitshisha ngofu bwa kwikala na dino eyikashi di na muulo na kunyingiila, atupa Nshetu e mwiyilu kinemo aye kwete kwitupasukila na lwishinko loso. Na dingi atukekala munkatshi mwa baba “abakapete muyile lukumiino na [lwishinko] lwabo, bupyaanyi bwa bibaalayile Efile Mukulu.”—Beena-Ebelu 6:10-12.