1. Binangu bya kwifula bya uno ndumbulwilo bi kwikala na bukitshishi ku kwiyisha kwetu naminyi?

BWAKINYI bi bukopo bwatudya kutumikila myanda yatulongo mu Eyi dy’Efile Mukulu? Mpa mwanda wa’shi bwa kukita bi buwa, abitungu twikale beyishe. Mu ano “mafuku a kunfudiilo” bi bukopo bwa kushala beyishe mwanda bantu bebungi “mbekumine’bo banabene, baasha lwabi lwa fwalanga, baasha kwimona, baasha kwinemeka,” na “bashii na kwikanda.” (2 Timote 3:1-3, Kilombeeno kipya 2014) Bu byatudi bafubi b’Efile Mukulu atuuku’shi kukita bino kwibubi, anka ingi nsaa bi kumweneka’shi bantu be na ino ngikashi ngi bebiya na baasha muloo mu nshaleelo abo. (Misambo 37:1; 73:3) Twi balombene kubanga kwiyipusha’shi: ‘Bi na muulo bwa’shi nkite bukopo bwande boso bwa kutula nkalo ya bangi kumpala kwa yande su? Su nekala mwiyishe bwa kukita bino, bangi bantu abatunguka na kunnemeka su?’ (Luka 9:48) Su tubalekyela’shi binangu bya uno ndumbulwilo bya kwifula bikale na bukitshishi kwatudi, atulwisha kipwano kyetu kibuwa na bakwetu na bi kwikala bukopo bwa bangi kutundula’shi twi bena Kidishitu. Byabya nsaa yatulongo bileshesho bya bafubi b’Efile Mukulu basha  kwiyisha na kwibambula, atukapete bipeta bi buwa.

2. Twi kupeta dilongyesha kinyi ku bafubi b’Efile Mukulu basha lulamato ba kala?

² Nkinyi kibadi kikwashe bafubi b’Efile Mukulu basha lulamato ba kala bwabadya kwikala bakuuku baye? Abadi bamusankishe naminyi? Bukome bubabadi bapete bwa kukita bi buwa bubadi bufikye kunyi? Patubadika bileshesho byabo mu Bible na kunangushe ku byanka, atwikala na lukumino lunyingye.

3, 4. (a) Yehowa kwete kwitulongyesha naminyi? (b) Bwakinyi twi na lukalo lwa kingi kintu panundu pa kiukilo bwatudya kulama lukumino lwetu lunyingye?

³ Yehowa kwete kwitupa byoso byatudi nabyo lukalo bwa kulama lukumino lwetu lunyingye. Tukwete kupeta malango e buwa na kulongyeshibwa na Bible, mikanda yetu ya bena Kidishitu, site eetu a Internete, na televizion a JW, bisangilo byetu mpa na bikongeno. Kadi Yesu badi mupatule’shi twi na lukalo lwa kingi kintu panundu pa kiukilo. Bakwile’shi: “Kyakudya kyande nkukita akikyebe muntume, na kukumbasha mufubo waye.”—Yowano 4:34.

⁴ Kukita kikyebe ky’eshimba dy’Efile Mukulu kubadi bu kya kudya kya Yesu. Kudya bidibwa bya ku mbidi akudisha mbidi yetu na kwitupa muloo. Mu mushindo umune, kukita kikyebe ky’eshimba dy’Efile Mukulu namu akwitukwasha bwa kupusha muloo na kudisha lukumino lwetu. Bu kileshesho, toyile mu kisangilo kya mudimo wa bulungudi mukokye kadi waluka na muloo na munyingishibwe kunyima kwa bulungudi su?

5. Su twi na binangu twi balombene kupeta myabi naminyi?

⁵ Nsaa yatukitshi kyakya akitutekye Yehowa, atwikala na binangu. (Misambo 107:43) Na bantu basha binangu abapetaa myanda ibuwa ibungi. “Takwi kintu kilombane nabyo. . . . Binangu nyi mutshi wa muuwa bwa booso abeebipete, dingi baasha [muloo] mbano be nabyo.” (Nkindji 3:13-18) Yesu bakwile’shi: “Su anuwuku ino myanda, nwi baasha muloo su anwiyikitshi.” (Yowano 13:17, Kilombeeno kipya 2014) Balongi ba Yesu abadi na kya kwikala na muloo su batungunguka na kutumikila na myanda ibadi mwibalongyeshe. Kulonda kileshesho na malongyesha aye, kubafikile bu mwanda wi na muulo mu nshalelo abo.

6. Bwakinyi abitungu tutungunukye na kufubila byabya byatulongo?

⁶ Lelo uno, natwe namu twi na lukalo lwa kutungunuka na kufubila myanda yatulongo. Banda kunangushena bwa muntu alumbulaa bintu, e na bintu byaye bya mufubo, na kinangu. Bino bintu byoso abimukwasha bwa kwikala muntu alumbuulaa bintu kalolo nka su ebifubisha. E na kya kukita bipwa bibungi mu wawa mufubo, dingi e na kya kufubila byabya bibalongyele bwa’shi ekala nka alumbuulaa bintu kalolo. Mu kipaso kimune, pabatulongyele bya binyibinyi bwa musango wa kumpala, tubadi na muloo mwanda tu bafubishe byabya bibatudi atubadika mu Bible. Byabya bwatudya kwikala na muloo wa ikalaika, abitungu tutungunukye na kufubila byabetulongyesha kwi Yehowa efuku dyoso.

7. Nkinyi kyatudi balombene kukita bwa kulongyela ku bileshesho bya mu Bible?

⁷ Mu uno mwisambo, atukesambila ingi myanda ilombene kwitukutshishwa kushaala beyishe. Atukalongo bibadi bantu basha lulamato ba kala bashale beyishe mu nkalakashi. Kadi abitungu tukite kingi kintu kukasha penda kubadika myanda yabo. Abitungu tunangushene ku yanka na kwiyifubila mu nshalelo etu.

8, 9. Nkinyi kibatulongo pabitale kwiyisha kwa Mpoolo mutumibwa kwi mu Bikitshino 14:8-15? (Tala kifwatulo ki ku mbangilo.)

⁸ Efile Mukulu akyebe’shi bantu ba bipaso  byoso “bapande, na bafikye ku kyuukilo kya biinyibiinyi.” (1 Timote 2:4) Mweneno obe e naminyi pabitale bantu booso bashi balongye bya binyibinyi? Mpoolo mutumibwa badi mulongyeshe bena Yuuda abadi bapwe kwikala na ndambo a kiukilo pabitale Yehowa. Kadi badi dingi mulongyeshe baba abadi abalangwila b’efile ba madimi. Kwibalambukisha kwaye kubadi kutule kwiyisha kwaye mu kutompibwa. Mu mushindo kinyi?

⁹ Mu lwendo lwa kumpala lwa Mpoolo mutumibwa lwa bu misionere, aye na Barnabase babayile mu kibalo kya Listre. Bantu ba mu kyakya kibundji kya Likaonii abadi bape Mpoolo na Barnabase kineemo kikilekile, bebetanyina mu mashina a b’efile babo ba madimi Zeuse na Hermese. Mpoolo na Barnabase babadi bakumine uno mwanda su? Abamwene bino bu mwanda wa muloo ubabapete kunyima kwa kupeta bitompwanga mu bibundji bibabadi bakile kumpala su? Abadi banangushene shi bino bibabadi bebakitshine bibadi abilesha shi bi kukwasha bantu bwa kutemesha mukandu wibuwa su? Nya! Abadi benyongole ngofu na bebalungula n’eyi di bukopo’shi: “Ankinyi kyanukitshi byaabya? Atwe naamu, twi bantu [be na kubofula] anka bu’nwe!”—Bikitshino 14:8-15.

10. Bwakinyi Mpoolo na Barnabase tababadi abemono bu bakile bena Likaonii?

¹⁰ Pabadi Mpoolo na Barnabase bakule’shi babadi bantu, babadi abakyebe kwamba’shi nabo namu mbantu bakutwe kupwidika. Tababadi baleshe’shi kipaso kyabo kya kulangwila kibadi mumune na kya bena Likaonii nya. Mpoolo na Barnabase abadi bebatume kwi Efile Mukulu bu ba misionere. (Bikitshino 13:2) Babadi bedibwe mwimu na kikudi kiselele na babadi na lukupilo lw’eyondo. Kadi tababadi na kabingilo ka kwimona bu bakile bangi nya. Babadi baukye’shi bantu boso mbalombene kupeta lukupilo lwa kwenda mwiyilu su bakumina mukandu wibuwa.

11. Twi kwikala beyishe bu Mpoolo nsaa y’atulungula mukandu wi buwa naminyi?

¹¹ Uno ngi mushindo wa kumpala watudi balombene kulesha’shi twi na kwiyisha nka bu bibalesheshe Mpoolo. Ta twi balombene kumona’shi mudimo wa kulungula mukandu wibuwa sunga bintu byabetukwasha bwatudya kukita kwi Yehowa abitwikasha bu bantu bakile bangi nya. Twi balombene kwiyipusha’shi: ‘Namonaa bantu ba mu teritware eetu naminyi? Ne na ntondo pabitale kisaka kya bangi bantu su?’ Mu nsenga ishima, ba Temwe ba Yehowa bakwete kukimba bwa kupeta bantu boso be na lukalo lwa kupusha mukandu wibuwa. Bangi bakwete kwitatshisha ngofu bwa kulonga ludimi sunga bipikwa bya bantu boso babamono kwi bangi bu bashadile. Kadi tabemonaa bu’bo bakile bantu babalungula mukandu wibuwa nya. Anka, abekitshisha bwa kutemesha bantu bebungi muyile ngobesha yabo bwabadya kukumina mukandu wa Bufumu.

12. Epafrase badi muleshe naminyi’shi badi apasukila bangi?

¹² Ungi mushindo watulesha’shi twi beyishe, nsaa yatutekyela bakwetu bakashi na balume bapwe kupeta “lukumiino lwi na muulo wa-mumune bu lwetu.” (2 Mpyeele 1:1) Bino ngi bibakitshine Epafrase. Bible mumutemune nka penda musango isatu. Nsaa ibabadi bakwate Mpoolo mu lukano ku Looma, baadi mufundile bena Kidishitu ba mu Kolose mukanda, ebalungula pabitale Epafrase’shi: “Takoko kwinutekyela na kukankamana.” (Beena-Kolose 4:12, Kilombeeno kipya 2014) Epafrase badi auku bakwetu kalolo, na badi ebapasukila ngofu. Mpoolo bamwitanyine bu “mwina lukano n’ami,” bino abilesha’shi Epafrase bapetele nkalakashi mu nshalelo aaye. (Filemone 23) Anka badi mutungunukye na kutula nkalo ya bangi kumpala kwa yaye, na  badi ebakwasha. Epafrase badi atekyela bakwabo, sunga kutemuna mashina aabo, natwe namu twi balombene kumwambula, nsaa yatutemuna mashina a bangi mu nteko yetu. Yaya nteko i na bukome bwibungi.—2 Beena-Kodinda 1:11; Shake 5:16.

13. We kwambula Epafrase naminyi nsaa ywele nteko?

¹³ Nangushena bwa muntu okyebe kutekyela pa kutemuna eshina dyaye. We mulombene kuuka bantu ba mu kakongye kenu sunga ba mu kifuko kampanda bakwete kufumankana na nkalakashi. Pangi be na lukalo lwa kwata bitshibilo bibukopo sunga’shi be na nkalakashi ayitungu’shi banyingiile. We kutekyela dingi bakwetu be na mashina aabo mu mbalo i mu jw.org yabadi bafunde’shi: “Témoins de Jéhovah emprisonnés en raison de leur foi.” (Tala pa mbalo ifunde’shi: SALLE DE PRESSE > VEILLE JURIDIQUE.) We mulombene kutekyela dingi bantu boso bafwishe bakwabo babadi bafule, baba boso bapande ku masaku aatuukila ku bintu bipangibwe sunga ku ngoshi, na bantu be na lukalakashi lwa makuta. Kwi bakwetu be bungi be na lukalo na nteko yetu! Nsaa yatutekye pa mwanda wabo, atulesha’shi tatukwete kunangushena nka penda ku nkalo yetu’twe banabene nya, anka tukwete kunangushena namu pabitale nkalo ya bangi. (Beena-Fidipe 2:4) Yehowa atemeshaa nteko i byabya.

14. Yehowa mmwikale muntu ateemeshaa kalolo kukila bangi bantu boso naminyi?

¹⁴ Ungi mushindo watudi balombene kulesha’shi twi na kwiyisha, nkwikala muntu ateemesha kalolo. Mukanda wa Shake 1:19 awitulungula bwatudya kwikala na “kupusha kwa bukidi.” Yehowa ateemeshaa kalolo. (Kibangilo 18:32; Yooshwa 10:14) Bu kileshesho, banda kubadika mwisambo watupete mu mukanda mu wa Efilu 32:11-14. (Badika.) Sunga mbibadi te na lukalo lwa’shi Moyiise amulungule bi mweneno aaye, Yehowa badi mutadile bwa’shi Moyiise amulungule bi mwishimba dyaye. We kukumina kuteemesha na lwishinko loso na kulonda elango dya muntu badi mwakule bibubi mu mafuku ashale su? Na dingi, Yehowa ateemeshaa na lwishinko bantu boso abamutekye na lukumino.

15. Twi kwambula Yehowa p’atwe kwikala atupa bangi kinemo naminyi?

¹⁵ Eyipushe’shi: ‘Su Yehowa badi muleshe kwiyisha kukata mu kipaso kibadi muteemeshe bantu bu Abrahame, Rashele, Moyiise, Yooshwa, Manowa, Eliya, na Esekiya, ami namu ntshi mulombene kwikitshisha bwa kumwambula su? Ne mulombene kunyisha kunemeka bakwetu boso pa kwikala nebatemesha nsaa yabakula na kulonda malango aabo su kwi mushindo su? Mu kakongye ketu sunga mu kifuko kyetu mwi muntu atungu’shi ngikale namuteemesha su? Abikyebe nkite kinyi bwa kunyisha kwikala namuteemesha?’—Kibangilo 30:6; Bansushi 13:9; 1 Banfumu 17:22; 2 Myanda 30:20.

16. Nfumu Daavide badi mukite naminyi nsaa ibadi Shimeeyi mumukitshine myanda ibubi?

¹⁶ Kwiyisha akwitukwasha bwa kwikala na butontshi bwa mbidi nsaa yabetukitshina myanda ibubi. (Beena-Efeso 4:2) Atupete kileshesho kibuwa pa uno mwanda mu mukanda wa 2 Samwele 16:5-13. (Badika.) Shimeeyi, mukwabo na Nfumu Saule, bakayile Daavide na bafubi baye. Daavide badi mulombene kwimika Shimeeyi bwa’shi alekye kumukaa, kadi badi mumutadile na lwishinko loso. Daavide badi mukite naminyi bwadya kupeta buno butontshi bwa mbidi? Twi kuuka bibadi mukite nsaa yatutaluula mukanda wa Misambo mu shapitre a kasatu.

17. Nkinyi kibakwashishe Daavide bwadya kwikala na butontshi bwa mbidi, na twi kumwambula naminyi?

¹⁷ Daavide badi muyimbe Musambo wa kasatu  nsaa ibadi mwan’aye Absalome akimbi bya kumwipaa. Mu ano mafuku ngi mubadi Shimeeyi mubangye kukaa Daavide, anka Daavide bapetele bukome bwa kushala muumine. Mu mushindo kinyi? Atubadika ano mayi a Daavide mu mukanda wa Misambo 3:4: “N’eyi dii bukopo neele Yehowa musaase: bangaluula dya ku mwengye waye wa kishila.” Nsaa yabetukitshina myanda i bubi, abitungu twele luteko nka bu bibakitshine Daavide. Su tubakitshi byabya, Yehowa aketupa kikudi kyaye ki selele bwatudya kumona bya kunyingiila. We mulombene kunyisha kwikala na butontshi bwa mbidi sunga kunyisha kwikala ofwila bangi lusa nsaa yabakutshina mwanda wibubi kwi muntu su? We mukulupile’shi Yehowa kwete kumona makyenga oobe na’shi akakukwasha na nkwelela myabi su?

18. Mushindo kinyi watukapetela myabi pa kufubisha mayi a kulonda a Yehowa?

¹⁸ Su tubekala atukitshi myanda yatuuku’shi ibuwa, atukekala na binangu na Yehowa aketwelela myabi. Bible akula mu mukanda wa Nkindji 4:7’shi: “Binangu ngi kintu ki na muulo ngofu.” Sunga byekala’shi binangu abikalaa bimeene pa myanda yatuuku, binangu ta mpenda kushinguula myanda nya. Binangu atwibilesha mpa na mu bitshibilo byatwata. Mpa na tunyeenyeene atuleshaa binangu pa kulumbuula byakudya byato mu mafuku a eshipo. (Nkindji 30:24, 25) Kidishitu, abayitanyina dingi bu “binangu by’Efile Mukulu,” akitaa myanda ayisankisha Nshaye nsaa yoso. (1 Beena-Kodinda 1: 24; Yowano 8:29) Efile Mukulu aketufutu mpa n’atwe namu su tubalesha binangu pa kusangula bwa kukita myanda yatuuku’shi ibuwa na kwikala beyishe. (Badika Mateo 7:21-23.) Byabya tungunuka na kwikitshisha bwa kwikasha kakongye bu mbalo ibuwa yatudi balombene kufubila Yehowa na kwiyisha. Bwa kutumikila myanda yatuuku’shi ibuwa abyataa nsaa ibungi na abitungu twikale na lwishinko. Anka su tubakitshi bino atulesha’shi twi na kwiyisha, na kwiyisha akuketwikasha na muloo kubanga binobino mpa na bwa ikalaika.