MU KIPWA kya 1910, baledi bande abafilukile benda mu Tbilisi, mu Georgie, abo nkwata kitshibilo kya nkashaala mwiumbo dya Canada mu ka ntshamba ke peepi na musoko wa Pelly, Saskatchewan, wi kupona nguba kwa eumbo dya Canada. Ne mutandjikwe mu kipwa kya 1928, ne ka mukala mu bana basamombo. Nshami bafwile myeshi isamombo kunyima kwa’mi kutandjikwa, na nyinami bafwile panadi nki mwana mukinga. Lucy, tata eetu a kumpala, bafwile mafuku apela kunyima kwa lufu lwa mama pabadi na bipwa 17. Kunyima kwa paapa, masaba ande Nick baketwatshile na bena bande enda netu kwaye.

Dingi efuku panadi nki mukinga, bangi bakwetu ba mu kifuko abamwene nkwete kupuula ku mikila ya tubalo, na nfwalasa. Bu bibabadi abapusha moo wa’shi tala bangashina kwi kabalo, abangyelele musaase bwa’shi ndekye—anka ntshinadi mwibapushishe nya. Nadi mwibatape mongo, na ntshinadi napusha misaase yabo nya. Biya byoso, tubalo ta ntungashine nya, anka dyadya efuku ngi dibabaukile kwi bakwetu’shi ne kamaama.

Ungi mukwetu a mu kifuko balungwile bangi’shi bantume mu kalasa ka tumaama, ngi bwakinyi masaba Nick banfundishe mu kalasa ka tumaama kabadi mu kibundji kya Saskatoon, mu provinse a Saskatchewan. Abantumine bwandya nkashala ku mbalo ibadi ayitungu kutambuka munda mwa nsaa ibungi bwa kufika pe bakwetu, bu binadi na penda bipwa bitano nadi mupushe moo . Nadi nende mu kutembela bakwetu nka penda mu mafuku a kwikisha. Ku nfudiilo a byoso, nalongyele ludimi lwa tumaama na tubadi atwasha maasha ebuwa na bangi bana.

Mu kipwa kya 1939, Marion tata ande badi mukulu ku boso, abadi bamwibakile kwi Bill Danylchuck, abo nkwitwata ami na mukwetu mukashi Frances bwatudya nkashala kwabo. Abo ngi bantu ba kumpala ba mu kifuko kyetu abafumankene na ba Temwe ba Yehowa. Mu mafuku a kwikisha, abadi abandongyesha muyiile ngobesha yabo myanda ibabadi abalongo mu Bible. Bwa  kwakula bya binyibinyi, bwa kwisamba nabo tabibadi bibofule nya, mwanda tababadi abauku ludimi lwa tumaama. Anka abadi abamono’shi ne na kifulo kibungi bwa myanda ya mu kikudi. Napushishe’shi kwi kwipushena pankatshi pa myanda ibabadi abakitshi na abyakula Bible, ngi bwakinyi nabangile kwenda nabo mu bulungudi. Nadi na lukalo lwa kubatshishibwa munda mwa mafuku ebungi, na mu 5/9/1941, Bill badi mumbatshishe mu ngungulu mukata muule meema. Meema abadi mashika ngofu!

Mu kipwa kya 1946 panadi mwalukile kwetu mu mafuku a eshipo, tubatwelele mu kikongeno mu Cleveland, Ohio, mu États-Unis. Efuku dya kumpala dya kino kikongeno, bakwetu bakashi abadi abafundu myanda yabakula ku masaki bwa’shi mmone bya kwiyipusha. Anka, mwifuku dya kabidi, napushishe muloo wibungi pa kumona’shi ku kikongeno kubadi kisaka kya tumaama kibabadi abalulwila myanda yabesamba mu ludimi lwa tumaama. Bwa uno mususa napushishe muloo wa kulonda myanda ya ku kikongeno, na nadi na muloo wibungi wa kupusha bya binyibnyi kalolo!

Mu aa mafuku, ngoshi ya kabidi ya nsenga ishima ibadi iki’ayikatuka mu kupwa na bantu bebungi abadi bashikwe bantu ba mu angi maumbo ngofu. Panakatukile ku kikongeno, nalukiile na kitshibilo kya kunyingisha lukumino lwande mu kalasa. Byabya nabangile kupela kutshibila ebendela dy’eumbo mpala na kupela kwimba loono lw’eumbo. Na dingi nabangile kupela kutwelakana mu ma feete a bipwilo na kupela kukwatshishena myanda ya bipwilo ibabadi abetukitshisha ku kalasa. Balongyeshi tababadi abasangala nya ngi bwakinyi abakimbile bya kuntshinyisha na kundimba bwa’shi nshintuule binangu byande. Bino byoso bibadi abikemesha bena kalasa nami ngofu, anka bibadi abimpa mushindo wa kwibalungula mukandu wibuwa. Bangi bena kalasa nami bu Larry Androsoff, Norman Dittrick, na Emil Schneider abakuminyine bya binyibinyi, na mpa na lelo uno mbekale bafubi ba Yehowa basha lulamato.

Pabatudi atwende mu kutemba mu bingi bibundji, nadi neatshila kitshibilo kya kulungula mukandu wibuwa kwi ba nshikwe na tumaama. Bu kileshesho, pabatufikile mu kibundji kya Montreal mwi kisaka kya tumaama, nalungwile mukandu wibuwa kwi Eddie Tager, ungi nsongwalume badi mu kisaka kya ba ntomboshi. Mpa na ku lufu lwaye, badi nka mu kakongye ka ludimi lwa tumaama ke mu kibundji kya Laval, mu Quebec. Na dingi, nafumankene na ungi nsongwalume abetanyina bu Juan Ardanez badi akumina kukimbuula na kushinkamisha myanda ya mu Bible bwa kuuka su ngya binyibinyi nka bibadi abikitshi bena Beloyi. (Bikitshino 17:10, 11) N’aye namu batwelele mu bya binyibinyi na mmufubile Yehowa bu mukulu mu kakongye ka mu kibundji kya Ottawa, mu Ontario, mpa na ku lufu lwaye.

Mu kipwa kya 1950, nakatukile nenda ku Vancouver. Sunga mbyandi mukumine kulungula ba nshikwe na tumaama mukandu wibuwa, ntshi bya kuluba uno mwanda ubadi ukitshikye panadi mwisambe na ungi mwana mukashi apushaa abetanyina bu Chris Spicer anadi mulungule mukandu wibuwa mu museese. Badi mukumine jurnale anamupeele aye nkukumina bwa’shi nfikye  nemonene na Gary mulum’aye. Nadi mwalukile mu kwibatala ku nshibo yabo, na tubadi besambe myanda ibungi ku bukwashi bwa myanda ibatudi atufundu ku masaki. Tubadi bemonene nka penda uno musango umune, kunyima kwa mafuku, abadi bangitanyine panadi mu kisaka kya bantu ku kikongeno kibakitshikile ku Toronto, mu Ontario. Gary badi akyebe kubatshishibwa dyadya efuku. Uno mwanda wa kukaanya ubadi untentekyeshe muulo wa kutungunuka na kulungula mukandu wibuwa mwanda tatuuku mbalo sunga nsaa ilombene bya binyibinyi kumena mishi mwi muntu.

Kunyima kwa paapa, nalukiile ku Saskatoon. Panafikile kwanka, nafumankeene na ungi nyina bana bantekyele bwa’shi ndongye Bible na bana baye bakashi ba mpasa ba tumaama. Mashina aabo mbu Jean na Joan Rothenberger, abadi abalongo mu kalasa ka tumaama kanadi mutwele ungi musuusa. Munda mwa mafuku ebungi, bano bana babidi abadi abalungula bena kalasa nabo myanda ya mu Bible ibabadi abalongo. Kunyima kwa mafuku, bena kalasa nabo batano abafikile ba Temwe ba Yehowa. Umune a kwabadi nyi Eunice Colin. Nafumankene na Eunice bwa musango wa kumpala ku kano kalasa ka tumaama panadi mu kipwa kyande kya nfudiilo. Wawa mususa, bampeele bonbon na kundungula’shi akumina ngikale kuuku’aye. Kunyima kwa mafuku bafikile muntu e na muulo ukata mu muwa wande mwanda bafikile mukashi’ande!

Nsaa ibashingulwile nyin’aye na Eunice’shi kwete kulonga Bible, balungwile mulongyeshi bwadya kumutunyisha. Mulongyeshi bamunyengyele mpa na mikanda yaye ya mu kalasa. Anka, Eunice badi nka mulame kitshibilo kya kutuula Yehowa pa mbalo ya kumpala. Pabadi akyebe kubatshishibwa, nshaye na nyinaye abamulungwile’shi, “Su bofiki Temwe a Yehowa, atukubingi okatukye pano pa kibundji!” Eunice pabalombeshe bipwa 17, abamubingile kwabo, abo nkumwata mu kifuko kya ba Temwe ba mu kibundji kyabo. Batungunukile na kulonga Bible kunyima bapetele lubatshisho. Pabatudi beyibakishene mu kipwa kya 1960, nshaye na nyin’aye ta mbafikye ku musangeelo w’eyibakishi dyetu nya. Anka, kunyima kwa mafuku, ababangile kwitunemeka pa mwanda wa malongyesha eetu na pa mwanda wa kipaso kibatudi bakushe bana beetu.

Sunga mbyatudi tumaama, ami na mukashi’ande twi bakushe bana musambo abapusha na abakula. Bino bibadi bu lukalakashi kwatudi, anka tubakitshine bukopo bwa kwibalongyesha ludimi lwa tumaama bwatudya kumona bya kwisamba nabo na kwibalongyesha bya binyibinyi. Bakwetu mu kakongye abetukwashishe ngofu. Bu kileshesho, ungi mukwetu badi mwitufundile mayi ku kasaki etulungula’shi ungi mwan’etu mulume kwete kwakula myanda ibubi ku Nshibo ya Bufumu. Bino bibetupeele mushindo wa kumukwasha pa uno mwanda misusa ibungi. Bana betu balume bananka​—James, Jerry, Nicholas, na Steven, bakwete kufubila Yehowa na lulamato pamune na bifuko byabo. Bano bana betu boso bananka bakwete kufuba bu bakulu mu kakongye. Na dingi, Nicholas na mukashi’aye Deborah, bakwete kukwasha mu kwaluula mikanda mu ludimi lwa tumaama ku biro bya filiale bya mu Grande-Bretagne, Steven na mukashi’aye Shannan, namu bakwete kufuba mu kwalula kwa mikanda mu ludimi lwa tumaama ku biro bya filiale bya mu États-Unis.

Mweshi umune kumpala kwa’twe kukita musangeelo wa kipwa kya 40 mu eyibakishi dyetu, Eunice badi mukumbe mukumbo wa cancer. Badi munyingiile ngofu na luno lukalakashi. Lukulupilo lwaye lwa lusangukilo lubadi alumunyingisha ngofu. Nkwete kutengyela efuku dyankemonena naye na lukulupilo looso.

Mu mweshi wa Kabidi mu kipwa kya 2012, naponene nantshokoka kifuka, na pa mwanda wa bino nadi na lukalo lwa muntu a kunkwasha. Ngi bwakinyi nayiile nakashala mu kifuko kya umune a ku bana bande balume. Binobino, twi mu kakongye ka ludimi lwa tumaama ka mu Calgary, na nkwete nka kufuba bu mukulu mu kakongye. Uno ngi musango wa kumpala unatwele mu kakongye ka ludimi lwa tumaama. Banda kunangushena namu uno mwanda! Nadi mushale mu kakongye ka ludimi lwa Anglais munda mwa byabya bipwa byooso—kubanga mu kipwa kya 1946—nadi nakitshi naminyi bwa kudya bya kudya bya mu kikudi? Yehowa mmulombashe mulayilo waye wa kudisha bana ba nshiye. (Misambo 10:14) Ne na lutumbu lwibungi kwi bantu boso abadi balongye ludimi lwa tumaama, abadi abakumina kunfundjila myanda mu masaki, na bankwashe bwa kumpatulwila myanda muyiile ngobesha yabo.

Bwa kwakula kalolo, ingi nsaa nadi napusha moo na kukyeba kubofula mwanda ntshinadi na ngobesha ya kupusha myanda ibabadi abakula sunga pa mwanda wa’shi bibadi abimweneka nka bu’shi ndumbulwilo a Yehowa tabadi mubande kutala nkalo ya tumaama nya. Anka mu aa mafuku, nadi nele binangu ku mayi ababalungwile Yesu kwi Mpyeele amba’shi: “Mwanana, nkwinyi kwatudya kwenda? We na bishima bya muwa wa looso.” (Yowano 6:66-68) Nka bu bangi bakwetu balume na bakashi bebungi tumaama, nalongyele bya kwikala na lwishinko, na bya kutengyela Yehowa na ndumbulwilo aaye. Kukita bino nkumpeteshe myabi ibungi! Binobino ne na bya kudya bya mu kikudi bibungi bya mu ludimi lwa tumaama, na dingi ne na mushindo wa kwibunga na muloo pamune na bakwetu mu bisangilo na mu bikongeno mu ludimi lwa tumaama lwa mu Amérique. Kushii mpaka, ne mupete nshalelo a muloo na ebuwa bukile mu mudimo wa Yehowa Efile Mukulu eetu.