1-2. Nkinyi kyatutaluula mu uno mwisambo?

INGI nsaa twi kunangushena pabitale bwipi bwa muwa wetu na’shi mafuku etu “[ngaule] na nkalakashi ingi.” (Yob. 14:1) Nyi bwakinyi atubofulaa ku mashimba. Kala, bafubi ba Yehowa be bungi abadi abepusha nka bino. Bangi abadi abatekye mpa na lufu. (1 Bf. 19:2-4; Yob. 3:1-3, 11; 7:15, 16) Anka misuusa yoso, Yehowa​—Efile Mukulu ababadi bakulupile, badi nk’ebasamba na kwibanyingisha. Miisambo yabo mbeyifunde bwa kwitusamba na kwitunyingisha.​—Lom. 15:4.

² Mu uno mwisambo, atukyebe kumona bingi bileshesho bya bafubi ba Yehowa, abadi banyingile nkalakashi ibadi ibabofushe ku mashimba bu: Yosefe mwana a Yakobo, mukashi kilele Noemi, Luta mukashi a mwan’aye, mwina Levi bafundjile Misambo 73, na Mpyele mutumiibwa. Mushindo kinyi ubadi Yehowa mwibanyingishe? Myanda kinyi yodya kulongyela ku bileshesho byabo? Ngaluulo ayitushinkamisha’shi: ‘Yehowa e pepi na basha mashimba asâsukye’ na ‘apashaa babofule ku mashimba.’​—Mis. 34:18, EEM.

3-4. Nkinyi kibadi kikitshikile Yosefe pabadi ki nsongwalume?

³ Pabadi Yosefe mulote bilotwa bibidi abikatukile kwi Efile Mukulu, badi pangi na bipwa 17. Bino byoso bilotwa bibadi abilesha’shi, dingi efuku Yosefe akekala muntu mukata na abanemeka mu kifuko kyabo. (Kib. 37:5-10) Mafuku apeela kunyima kwa Yosefe kupeta bino bilotwa, nshalelo aye bashintulukile mu mushindo wa kukanya. Pamutwe pa kumunemeka, bakwabo balume abamuudishe mu bupika. Kunyima kwa mafuku, bekele mpika  a mukata mwina Ejiipitu ababadi abetamina bu Potifare. (Kib. 37:21-28) Mu kapindji kapeela, Yosefe ababadi bafule kwi nshaye, bafikile mpika, shi na muulo mu Ejiipitu, afubila muntu shauku Yehowa.​—Kib. 39:1.

⁴ Akupu, nshalelo aye banyishishe kwela bukopo bukile. Mukashi a Potifare badi mumudimbile’shi, bakyebe kutambuka naye pa bukopo. Potifare kwashabandile kukimba bwa kuuka su mbya binyi, badi mumweleshe mu lukano, na abo nkumwanya myoshi ya byamo. (Kib. 39:14-20; Mis. 105:17, 18) Banda kunangushena mushindo ubadi wipushe uno nsongwalume Yosefe, pabo kumudimbila’shi bakyebe kutambuka na mukashi a muntu pa bukopo. Banda kunangushena bibadi bantu baakule myanda i bubi pabitale Yehowa Efile Mukulu a Yosefe, p’abo kupusha uno mwanda. Binyibinyi’shi Yosefe badi na kabingilo ka kubofula kwishimba!

5. Mushindo kinyi ubadi Yosefe mukambile kubofula kwa kwishimba?

⁵ Pabadi Yosefe bu mpika na pabadi ki mu lukano, tabadi na kya kukita bwa kushintula nshalelo aye nya. Nkinyi kibadi kimukwashe bwa’shi alame mweneno e buwa? Pamutwe pa kutula binangu byaye ku kyakya kya’shi bya kukita, badi mukite mwaye moso bwa kukita mudimo ubabamupele. Mwanda wi na muulo, Yosefe badi akimbi bya kusankisha Yehowa efuku dyoso. Pa mwanda wa byabya, Yehowa badi mumwelele myabi ku kyoso kibadi akitshi.​—Kib. 39:21-23.

6. Mushindo kinyi ubadi Yosefe munyingishibwe ku bilotwa byaye?

⁶ Pangi Yosefe badi apete dingi kunyingishibwa, pabadi anangushena ku bilotwa bibadi Yehowa mumuloteshe kala. Bibadi abilesha’shi akamono kifuko kyaye dingi, na’shi nshalelo aye akashintuluka. Na bino mbibakitshikile. Nsaa ibadi Yosefe mulombashe pangi bipwa 37, bilotwa byabye bibalombene mu mushindo wa kukanya!​—Kib. 37:7, 9, 10; 42:6, 9.

7. Muyile 1 Mpyeele 5:10, nkinyi kilombene kwitukwasha bwa kunyingiila nkalakashi?

⁷ Kyabitulongyesha. Mwanda wa Yosefe  awituntekyesha’shi, mu ino nsenga mwi bu ntomboshi na bantu abetukitshina myanda na kukutwa kululama. Sunga bena Kidishitu netu be kwitulwishisha. Kadi su atutulu Yehowa bu Lubwebwe, sunga bu Kifwamino kyetu, t’atubofula ku mashimba na t’atulekye kumufubila nya. (Mis. 62:6, 7; badika 1 Mpyeele 5:10.) Tentekyesha’shi, Yosefe badi pangi na bipwa 17 nsaa ibadi Yehowa mumuloteshe. Yehowa mmukulupile bafubi baye ba nsongwa. Lelo uno, ba nsongwa be bungi be nka bu Yosefe. N’abo namu, be na lukumiino mwi Yehowa. Be bungi bakwabadi mbedibwe mu nkano kushii mwanda, nka penda bwa kukookyela kwabo kwa Yehowa.​—Mis. 110:3, EEM.

8. Nkinyi kibadi kifikile Noemi na Luta?

⁸ Mwanda wa sala ibadi bukopo, kifuko kya Noemi kibadi kifilukye mwiumbo dyabo dya Yuuda na abo nkukashala bu benyi mu Moabe. Kwakwa, Abimeleke mulume a Noemi bafwile, aye nkumuleka na bana babo babidi. Kunyima, boso abadi bebakile bana bakashi ba mu Moabe, Luta na Opa. Kunyima kwa bipwa ekumi, bana ba Noemi’nyi abafwile kushi kuleka bana. (Lut. 1:1-5) Banda kunangushena bukata bwa kinyongwa kibadi nakyo bano bana bakashi basatu! Luta na Opa abadi balombene kutwela dimo. Kadi nnanyi badya kupasukila Noemi? Noemi badi mubofule kwishimba ngofu mukipaso kibambile’shi: “Tanungitaanyinanga buu Noemi! Ngitaayineeyi buu Mara! Mwanda Sha-bukome mmumweshe mpombo ikata.” Kunyima kwa ano oso malwa kumufikila, Noemi batshile kitshibilo kya kwaluka ku Beteleeme na Luta badi mwalukye naye.​—Lut. 1:7, 18-20.

9. Muyile Luuta 1:16, 17, 22, mushindo kinyi ubadi Luta anyingisha Noemi?

⁹ Kifulo ki na lulamato kibadi kikwashe Noemi. Bu kileshesho, Luta badi mumuleshe kifulo ki na lulamato pa kushala mumulamate. (Badika Luuta 1:16, 17, 22.) Mu Beteleeme, Luta badi na mudimo wa kukomboola mmafuba bwaye na bwa Noemi. Nyi bwakinyi mu mafuku apeela, badi mupete nkumo i buwa.​—Lut. 3:11; 4:15.

10. Mu mishindo kinyi mubadi Yehowa muleshe balanda kifulo bu Noemi na Luta?

¹⁰ Yehowa badi mupe bena Isaleele mwiya aulesha’shi apasukilaa balanda bu Noemi na Luta. Bebalungwile bwa’shi bekalanga abalekye bingi bidibwa mu mafuba bwa’shi balanda bekale abebyata ku mongo. (Lv. 19:9, 10) Byabya, Noemi na Luta abadi na kya kupeta bidibwa kushi kwibiteka. Abadi abebipete mu mushindo wibuwa.

11-12. Mushindo kinyi ubadi Boaze mwikashe Noemi na Luta na muloo?

¹¹ Efuba dibadi Luta apumbuula, dibadi dya muntu mpeta ababadi abetamina bu Boaze. Badi mukanye ngofu pakumona kifulo na lulamato bibadi Luta alesha nyinaye mweno Noemi. Nyi bwakinyi Boaze badi muule bupyanyi bwa kifuko kya Noemi na aye nkwibakila Luta. (Lut. 4:9-13) Abatandile mwana ababadi baudikye bu Obede, badi mufikye shaye-kulu na Mfumu Daavide.​—Lut. 4:17.

¹² Banda kupwandikisha muloo ubadi nao Noemi nsaa ibadi mutwale Obede, na bibadi asambila Yehowa bwa kumutumbula! Anka kuki ingi myabi ayitengyela Noemi na Luta. Pabakasanguka, abakekala na muloo wa kuwuka’shi Obede bekele nkabw’aye na Yesu Kidishitu, Mesiya mulayibwe!

13. Malongyesha kinyi e na muulo atulongyela ku mwanda wa Noemi na Luta?

¹³ Kyabitulongyesha. Nsaa yatudi mu nkalakashi, twi kubofula kwishimba sunga kwipusha’shi eshimba nditapikye. Pangi twi kwipusha’shi lukalakashi lwetu ta ndulombene  kupwa. Mu yaya nsaa, abitungu tukulupile ngofu Nshetu e mwiyilu na kushala peepi na bakwetu bena Kidishitu. Eyendo’shi, pangi Yehowa t’akatusha lukalakashi lwetu nya. Bu kileshesho, tabadi musangule mulum’a Noemi na bana baye nya. Anka mmulombene kwitukwasha bwa kunyingiila, pangi kubukwashi bwa kantu ke buwa kabetukishina kwi bakwetu bena Kidishitu.​—Nki. 17:17.

14. Bwakinyi ungi mwina Levi badi mubofule kwishimba?

¹⁴ Mufundji a Misambo 73 badi mwina Levi. Byabya badi na kinemo kikata kya kufubila Yehowa ku mbalo ya lulangwilo. Anka ingi nsaa babangile kubofula kwishimba. Bwakinyi? Mwanda babangile kulakila bantu be bubi, na basha kwitatula; kushi mwanda wa’shi badi akyebe kukita myanda i bubi, anka badi ebamono bu be na nshalelo e buwa kukila aaye. (Mis. 73:2-9, 11-14) Abadi abamweneka bu be na bintu byoso​—bupeta, nshalelo e buwa na bu’shi ta be na nkalakashi. Nsaa ibadi mwina Levi mumone bino, babofwile kwishimba na nkwakula’shi: “Eyendo, mbisumanga byandi mulame eshimba dyande ditookye, naasuula maasa ande buu kitundwilo kya kupwidika kwande.” Abimweka patoka’shi, bino bibadya kumulekyesha kulangwila Yehowa.

15. Muyile Misambo 73:16-19, 22-25, Mushindo kinyi ubadi mwina Levi mufundji a ino misambo mukambile kubofula kwishimba?

¹⁵ Badika Misambo 73:16-19, 22-25. Mwina Levi “batwelele mu mbalo-iiselele y’Efile Mukulu.” Kwakwa, bu bibadi mukantshi mwa balangwidi naye, badi mulombene kunangushena pabitale lukalakashi lwaye na kuteka pabitale lwanka. Bu kipeta, babangile kutundula’shi binangu byaye bibadi abyende na kulwila na’shi bibadi abimutakula mwishinda di bubi dibadya kumuyisha kula na Yehowa. Batundwile dingi’shi bantu babi be pa “mbalo yabadya kuselemuka” na “abatûtshika ku lufu lwi mô!” Bwa kukambila malaka na kubofula kwishimba, mwina Levi badi na kya kumona myanda mu mushindo awiyimonaa Yehowa. Pakukita bino bapetele dingi butaale na bekele na muloo. Bakwile’shi: ‘Pandji nobe Yehowa, ta ndakila kintu su nkimune pa nsenga.’

16. Kinyi kyatulongyela kwi mwina Levi?

 ¹⁶ Kyabitulongyesha. Tatukumanga kulakila bantu babi abamweka bu be na nshalelo e buwa kwitukila. Muloo wabo ngwa kinundunundu na gwa kapindji kapeela; na ta be na lukulupilo bwa mafuku aafiki nya. (Mul. 8:12, 13) Su twebalakila, twi balombene kubofula kwishimba mpa na kushimisha kipwano kyetu na Yehowa. Byabya su bobanga kwipusha bu mwina Levi, kita nka byabya bibadi mukite. Kookyela Efile Mukulu na w’ebungye pamune na baba abakitshi kikyebe ky’eshimba dyaye. Nsaa y’ofulu Yehowa ngofu kukila kingi kintu kyoso, opete muloo wa binyibinyi. Na oshala mwishinda aditwala ku “muuwa wa biinyibiinyi.”​—1 Tim. 6:19.

17. Ntubingilo kinyi tubadi tubofushe Mpyele?

¹⁷ Mpyele badi muntu musangale; anka ingi nsaa badi akula na kukita myanda kushi kwela binangu, na kunyima badi etopeka. Bu kileshesho, nsaa ibadi Yesu mulungule batumiibwa’shi abitungu akyengye na kufwa, Mpyele badi mumwaluule’shi: “Kyaakya taakikukitshikila!” (Mat. 16:21-23) Yesu badi mulumbuule mweneno a Mpyele. Nsaa ibadi kibumbu kya bantu kifikye bwa kukwata Yesu, Mpyele badi mukite myanda kushi kwela binangu; pakutshiba etwi dya mwina mudimo a tshite-mwakwidi mukata. (Yo. 18:10, 11) Dingi, Yesu badi mulumbuule mweneno a Mpyele. Mpyele badi dingi mwitatule pa kwamba’shi sunga bangi batumiibwa baleka Kidishitu, aye t’ebikitshi! (Mat. 26:33) Kuno kwitatula kwa Mpyele, kubadi kumutakule bwa kutshina bantu, aye nkutuna Mfumw’aye misango isatu. Bu bibadi mwinyongole ngofu, Mpyele ‘batukile [pasha] aye nkudila ngofu.’ (Mat. 26:69-75) Badi eyipushe su Yesu badi mulombene kumufwila lusa.

18. Mushindo kinyi ubadi Yesu mukwashe Mpyele bwa kukambila kubofula kwishimba?

¹⁸ Anka Mpyele tabadi mubofule kwishimba mu mushindo wa kuleka kufubila Yehowa nya. Sunga kunyima kwaye kukita kino kilubilo,  badi mutungunukye na kufubila Yehowa pamune na bangi batumiibwa. (Yo. 21:1-3; Bik. 1:15, 16) Nkinyi kibadi ki mukwashe bwa kupusha na kunangushena dingi kalolo? Badi mutentekyeshe’shi Yesu badi mupwe kuteka bwa’shi lukumiino lwaye talubofulanga na badi mumunyingishe bwa’shi paluka anyingishe bakwabo. Yehowa badi mwaluule luno luteko lubadi Yesu mwele n’eshimba dyoso. Kunyima kwa Yesu kusanguka, bamwenekyele Mpyele na abimweka’shi mbwa kumunyingisha. (Luk. 22:32; 24:33, 34; 1 Kod. 15:5) Yesu badi mumwenekyele batumiibwa kunyima kwabo kuloba bufuku bushima kushi’bo kukwata kantu. Mu yaya nsaa, Mpyele badi mupete mushindo wakulesha’shi mmufule Yesu. Yesu badi mufwile kuuku’aye lusa na aye nkumupa angi mashito.​—Yo. 21:15-17.

19. Misambo 103:13, 14, ayitulongyesha kinyi pabitale mushindo aumonaa Yehowa milwisho yetu?

¹⁹ Kyabitulongyesha. Mushindo ubadi Yesu mukitshine Mpyele myanda ubadi aulesha’shi Yesu e na lusa lukata nka bu Nshaye. Byabya, nsaa y’atukitshi bilubilo tatupwandjikishanga’shi Yehowa ta n’etufwile lusa. Tutentekyeshe’shi Satana akumiina’shi twikale atunangushene bino. Kadi pamutwe pa byabya, abitungu tunangushene ngofu pabitale mushindo awituleshaa Yehowa kifulo na kuwuka mikalo yetu na’shi akumiina kwitufwila lusa. Na abitungu namu tumwambule nsaa i bangi abakitshi myanda ayitutapa ku mashimba.​—Badika Misambo 103:13, 14.

20. Nkinyi kyatukamo mu mwisambo aulondo?

²⁰ Kileshesho kya Yosefe, Noemi, Luta, mwina Levi na Mpyele akitushinkamisha’shi “Yehowa e pepi na basha mashimba asâsukye.” (Mis. 34:18, EEM) Ingi nsaa atadilaa’shi tukyengye na tubofule kwishimba. Anka, nsaa y’atunyingiila nkalakashi na bukwashi bwa Yehowa, lukumiino lwetu alunyingi. (1 Mp. 1:6, 7) Mu mwisambo aulondo, atukanyisha kumona mushindo aukwatshishenaa Yehowa bafubi baye nsaa yabadi babofule ku mashimba pangi mwanda wa kukutwa kupwidjika kwabo, sunga bwa nshalelo e bukopo.