1, 2. (a) Mbutaale kinyi bwatudi balombene kwikala nabo binobino? (b) Bwakinyi ta mbibofule bwatudya kwikala na butaale bwa loso binobino? (Tala kifwatulo ki kumbangilo.)

BOSO bwetu atukuminaa kwikala na butaale mu muwa wetu, na tatukuminaa kenyongoshi. Nyi bwakinyi atutumbula Yehowa mwitupe “butaale bw’Efile Mukulu.” Buno butaale nyi nkufukama akwitukalwila ku binangu na mweneno ebubi. (Beena-Fidipe 4:6, 7) Bu byatudi belambule kwi Yehowa, twi mu “kufukama n’Efile Mukulu.” Bino abilesha shi, twi mu kipwano kibuwa naye.​—Beena-Looma 5:1, Kilombeno kipya 2014.

² Anka, kipindji takyalombene kyashi Efile Mukulu afwishe butaale bwa loso pa nsenga nya. Twi mu mafuku a nfudilo, byabya kwi myanda ibungi ayitufwishila twinyongoshi. Twibefunyishwe na bantomboshi. (2 Timote 3:1-4) Abitungu tulwe dingi na Satana na malongyesha a madimi akwete kutusha. (2 Beena-Kodinda 10:4, 5) Kadi kikumbene kwitufwishila kenyongoshi kakata nyi mbena kifuko netu bashii bafubi ba Yehowa. Bangi ba kwabadi mbalombene kwitusenga mwanda wa lukumino lwetu sunga kwitudimbila shi atutwesha kwitshibuula mu kifuko. Mbalombene mpa na kwamba shi tatwi balombene kwikala nabo mu kifuko su tatwi balekye kufubila  Yehowa. Byabya, we kumona mushikwa autukila mu kifuko naminyi? Na twi kulama butaale bwetu apakitshika ino myanda naminyi?

3, 4. (a) Malongyesha a Yesu e na bukitshishi kinyi? (b) Nsaa kinyi yabidi bilombene kwikala bukopo ngofu bwa kulonda Yesu?

³ Yesu badi auku shi ta mbantu boso abakakumina malongyesha aye nya. Badi auku dingi shi balondji baye abekala na lukalo lwa kunyingishibwa mwanda bangi bantu abakebashikwa. Uno mushikwa ngulombene kulwisha butaale bwa mu kifuko kyabo. Yesu bambile shi: “Tanwelanga kinangu’shi, ne mufikye mu kutwala butaale pa nsenga; ntshii mufikye mukutwala butaale; eyendo, anka nkimpulu oolo ne mufikye mukwabuula mwana mulume na nshaaye, mwana mukashi na nyinaaye, mukash’a mwana na nyina mweno: Muntu ayikala mu ngo na bantu ba mu kifuko kyaaye.”​—Mateo 10:34-36.

⁴ Yesu badi akyebe kwamba kinyi pabakwile shi, “tanwelanga kinangu’shi, ne mufikye mu kutwala butaale”? Badi akumina kuukisha bantu shi, su abakumina kwikala balondji baye abakafumankana na nkalakashi. Eyendo shi, lukalo lwa Yesu lubadi lwa kulongyesha bantu bya binyibinyi pabitale Efile Mukulu, ta nkutshiba bifuko nya. (Yowano 18:37) Kadi bibadi abitungu shi balondji baye baukye shi, kumulonda takwikala kubofule nya, bikishekishe su bena kifuko nabo tabakumina bya binyibinyi.

5. Balondji ba Yesu abafumankene na myanda kinyi?

⁵ Yesu badi mwambe shi balondji baye abitungu bakumine kunyingiila mushikwa aufiki kwi bena kifuko nabo. (Mateo 10:38) Bwa kumusangasha, balondji ba Yesu abadi banyingile nsaa ibabadi abebasengye kwi bifuko byabo sunga kwibasumbushena. Kadi mbapete bibungi kukila byabadi bashimishe.​—Badika Maako 10:29, 30.

6. Abitungu tutentekyeshe kinyi su kifuko kyetu kyetushikwa?

⁶ Sunga bena kifuko netu betushikwa mwanda atulangwila Yehowa, atutungunuka na kwibafula. Abitungu tutentekyeshe shi, kifulo kyetu bw’Efile Mukulu na bwa Kidishitu kikale bukopo kukila kyatudi nakyo bwa mungi muntu. (Mateo 10:37) Twi na kya kulamina shi Satana mukumbene kufuba na kifulo kyetu bwa kifuko kyetu bwashi tukutwe kululama ku meso kwa Yehowa. Tubandeyi kutala ingi nkalakashi na mushindo watudya kwiyinyingiila.

7. We kumona nshalelo obe naminyi su wemwiyibakishene na muntu shii mufubi a Yehowa?

⁷ Bible etudimusha’shi muntu ooso atwele mwiyibakishi apete “nkalakashi ibungi” sunga myanda. (1 Beena-Kodinda 7:28) Su we mwiyibakishene na muntu shi mufubi a Yehowa, bino mbilombene kufwisha nkalakashi ibungi na kenyengoshi mu dibaka dyobe. Anka, bibuwa wekale na mweneno e naye Yehowa pabitale mwanda odi nao. Mmwambe shi tatwi balombene kwilekena na mwina dibaka netu sunga kutshiba dibaka naye mwanda ta mmufubi a Yehowa nya. (1 Beena-Kodinda 7:12-16) Su mulume obe ta mmufubi a Yehowa na takunkusha lulangwilo lwa binyibinyi, we nka na kya kumunemeka bu mutwe wa kifuko. Na su mukashi obe ta mmufubi a Yehowa, we nka na kya kutungunuka na kumufula na kumupasukula.​—Beena-Efeso 5:22, 23, 28, 29.

8. Nkonko kinyi yodi mulombene kwiyipusha su mwina dibaka nobe antompa nkupeleesha nsaa ya lulangwilo lobe?

⁸ Nkinyi kyodya kukita su muntu odi mwiyibakishene naye akyebe kupeleesha nsaa ya lulangwilo lobe? Mulume a ungi mukwetu mukashi bamulungwile shi abitungu ekale ata penda mafuku apela ku lubingo bwa kwenda mu bulungudi. Su ofumankana na mwanda wi bino eyipushe shi: ‘Muntu andi mwiyibakishene naaye antekye bwa kuleka kulangwila Yehowa su? Su ta mbyabya, ne kukita kyantekye su?’ We kwikala na myanda  ipela mu dibaka dyobe su wena binangu bibuwa.​—Beena-Fidipe 4:5.

9. Mwina Kidishitu e kulongyesha bana bwa kunemeka nshabo sunga nyinabo shii Temwe naminyi?

⁹ Mbilombene nkwelela bukopo bwa kulongyesha bana bobe su mulume obe tafubilaa Yehowa. Kileshesho, we na lukalo lwa kulongyesha bana bobe bwabadya kukokyela mwiya wa mu Bible awamba shi: “Nemeka nshobe na nyinobe.” (Beena-Efeso 6:1-3) We kukita naminyi su mulume sunga mukashi obe talondaa miya ya mu Bible? We kulekyela bana bobe kileshesho kibuwa nsaa yonemeka mulume obe. Nangushena ku ngikashi yaye ibuwa, lungula mwina dibaka nobe shi osangelaa ngikashi yaye ibuwa. Twakulanga bubi bwa mwina dibaka nobe kumpala kwa bana. Pamutwe pa byabya, ebapatulwile shi muntu oso e na matalwa a kwisangwila su akumina kufubila Yehowa. Su olongyesha bana bwabadya kunemeka muledi abo shii mwina kukumina, kileshesho kyabo kibuwa nkilombene kutakula mwina dibaka nobe bwashi akumine kulonga myanda itale Yehowa.

10. Baledi bena Kidishitu be kulongyesha bana babo bwa kufula Yehowa naminyi?

¹⁰ Bangi balume sunga bakashi bashii balangwidi mbalombene kukumina shi, bana babo bakite ma feete a ba mpangano sunga kwibalambukisha malongyesha a bipwilo bya madimi. Bangi balume namu be kutunyisha bakashi babo bena Kidishitu bwa kulongyesha bana babo myanda ya mu Bible. Anka, sunga kwekala ino nkalakashi, bakashi bena Kidishitu abakitshi nka mwabo moso bwa kulongyesha bana babo bya binyibinyi. (Bikitshino 16:1; 2 Timote 3:14, 15) Kileshesho, mulume shii mwina kukumina mukumbene kupela shi mukashi talonganga Bible na bana sunga kwenda nabo mu bisangilo. Sunga anemeka kitshibilo kya  mulume aye, atungunuka nka na kwisamba nabo bi lukumino lwaye pakudi mushindo. Su bakitshi byabya bana abalongo miya ya Yehowa itale kibuwa na kibubi. (Bikitshino 4:19, 20) Ku nfudilo bana abakeatshila kitshibilo kya kusangula su be kufubila Yehowa. *​—Miiya Ikituulwe 30:19, 20.

11. Nkinyi kilombene kufwisha nkalakashi na bena kifuko netu bashii bafubi ba Yehowa?

¹¹ Patubabangile kulonga Bible na ba Temwe ba Yehowa takubadi lukalo lwa kulungula kifuko kyetu nya. Pababangile kutama lukumino lwetu tubamwene shi abitungu twibalungule shi atukumina kufubila Yehowa. (Maako 8:38) Lulamato lobe kwi Efile Mukulu pangi ndufwishe nkalakashi munkatshi mobe na kifuko kyobe. Tubande kutalula kingi kintu kyodya kukita bwa kulama butaale na kulama lukumino lobe mwi Yehowa.

12. Bwakinyi bena kifuko mbalombene kwitushikwa, twi kwibalesha naminyi’shi tukwete kwikalasha bwabo?

¹² Ekitshishe bwa kuuka abipusha bakwenu bashi bena kukumina. Twi na muloo wa kuuka bya binyibinyi bi mu Bible. Anka, bena kifuko netu be kumona shi mbetudimbe sunga shi twi mu kisaka kya kipwilo ki bubi. Be kupwandikisha shi tatwi bebafule dingi mwanda tatukitshi nabo misangeelo yabamona bu iselele. Mbalombene dingi kupwandikisha shi kwi kukitshika kintu kampanda kunyima kwa lufu lwetu. Abitungu twitatshishe bwa kupusha byabapusha na kwibatemesha kalolo bwa kuka bwakinyi bakwete kwikalakasha ngofu bwetu. (Nkindji 20:5) Mpoolo mutumibwa badi atemesha “bantu ba bipaso byoso” bwashi amone bya kwibalongyesha mukandu wibuwa. Su tubatompo kutemesha bena kifuko netu, bino bi kwibatukwasha bwa kuuka mushindo wa kwibalongyesha bya binyibinyi.​—1 Beena-Kodinda 9:19-23.

13. Twi kwikala na ngakwilo e naminyi kwi bena kifuko netu bashi bena kukumina?

¹³ Ikala wakula na kupopeela. Bible akula’shi: abitungu “bishima byenu bikale nguba ooso bibuwa.” (Beena-Kolose 4:6) Bino ta mbilombene kwikala bibofule. Twi bakumbene kuteka Yehowa bwashi etupe kikudi kyaye kiselele bwashi kitukwasha twikale na lwishinko na kalolo kwi bena kifuko netu. T’abitungu shi twikale atwikakena nabo pabitale lukumino lwabo lwa madimi nya. Su tubatapika kwishimba bwa mwanda kampanda ubabakitshi, twi bakumbene kwambula batumibwa. Mpoolo bambile shi: “Abeetukaa, ak’atwe atwibaabikiisha mwabi; abeebingeena neetu, atwe twi balame lwishinko; abeetudimbiila myanda, atwibaaluula na kalolo.”​—1 Beena-Kodinda 4:12, 13.

14. Mwikelo wibuwa wina bukwashi kinyi?

¹⁴ Lama mwikelo wibuwa. Bwakinyi bina muulo? Sunga kwakula na kalolo nkulombene kwitukwasha bwa kulama butaale na bena kifuko netu, mwikelo wetu wibuwa ngulombene kwikala na bukome bwibungi. (Badika 1 Mpyeele 3:1, 2, 16.) Leka bena kifuko nobe bemwene ku kileshesho kyobe shi ba Temwe ba Yehowa be na eyibakishi dibuwa, abapasukilaa bana babo, be na nshalelo alondo miiya ya mu Bible na be biya mu nshalelo abo. Sunga bena kifuko netu t’abakumina bya binyibinyi, twi bakumbene kusangala patuuku shi, mwikelo wetu wibuwa ausangasha Yehowa.

15. Twi kwilumbula kumpala naminyi bwa kupela kwikutwena na bena kifuko netu?

¹⁵ Elumbuule kumpala. Nangushena ku kilombene kupa bena kifuko nobe mushindo wa kwakula. Na, wate kitshibilo pabitale kya kukita. (Nkindji 12:16, 23) Nyi bibakitshine ungi mukwetu mukashi a mu Australie. Muko aye mulume badi mushikwe bya binyibinyi ngofu na ingi nsaa badi afitshi munda. Kumpala kwa kumwitamina, aye na mulume aye abadi abatekye bukwashi bwa Yehowa bwabadya kuka lwalulo lwa kumupa nsaa yadi mufite munda. Abadi abanangushena ku myanda ibuwa yabadya kwisamba naye. Na  kupela miisambo ila ilombene kwibafwisha mu kwisamba myanda ya kipwilo, abadi abatshibi nsaa ya kwimika mwisambo.

16. We kukambila kwitopeka naminyi pabitale kwinyongosha bena kifuko nobe?

¹⁶ Eyendo shi, twe kusuka nkalakashi yoso yakutuka pankatshi pobe na bena kifuko nobe. Byabya, pakudi mwanda, we kwitopeka mwanda we mufule bena kifuko nobe na okumina kwibasangasha. Anka tolubanga shi, kululama kobe kwi Yehowa abitungu kwikale kwi bukopo kukila kifulo kyobe bwa bena kifuko nobe. Bena kifuko nobe pabamono bino abatundula muulo winao kufubila Yehowa. Twe kukuminyisha muntu bya binyibinyi pa bukopo nya. Anka, we mukumbene kupa bangi mushindo wabadya kumona bikukwasha kulonda kwa mashinda a Yehowa. Na mbinyibinyi shi, Yehowa ebapa mushindo wi mumune na ubakupele bwa kumfubila.​—Yeeshaya 48:17, 18.

17, 18. Nkinyi kilombene nkukwasha su mwina kifuko nobe atombokyela Yehowa?

¹⁷ Mbilombene kwikala bukopo ngofu nsaa yabatusha mwina kifuko netu mu kakongye sunga shi bapele’ye nabene kwikala ebungu netu. Bi nkutapa kwishimba nka abikala muntu abatungu lupete. We kunyingiila luno lukalakashi naminyi?

¹⁸ Tuula binangu byobe ku mudimo wa Yehowa. P’odi na lukalakashi lwi byabya, abitungu onyingishe lukumino lobe. Ikala obadika Bible nsaa yoso, olumbula na kwenda mu bisangilo, tungunuka na kulungula mukandu wibuwa, mpa na kwela nteko kwi Yehowa bwashi akupe bukome bwa kunyingiila. (Yunda 20, 21) We kukita naminyi su byekala’shi okwete kukita bino byoso, kadi luno lukalakashi talupu? Tokookanga! Tula binangu byobe ku mudimo okitshina Yehowa. Byabya abikukwasha omone bya kukunkusha binangu byobe na byopusha mwishimba. Bino nyi bibadi bifwile mufundi a Musambo wa 73. Kwi mafuku abadi na nkalakashi mu muwa waye bibadi bukopo bwadya kukunkusha binangu byaye na byapusha mwishimba dyaye. Anka kulangwila Yehowa kubadi kumukwashe bwa kwikala na mweneno a myanda ebuwa. (Misambo 73:16, 17) Mbikumbene kwikala nka byabya bobe namu.

19. We kulesha kanemo ku mushindo wi Yehowa anyoko mwilo waye naminyi?

¹⁹ Nemeka dinyoka dya Yehowa. Efile Mukulu auku shi dinyoka dyaye mbwa buwa bwa muntu banyokibwa, mpa na yawa batushibwa mu kakongye. Sunga abitapaa kwishimba nsaa ayitushibwa muntu atudi bafule mu kakongye, mbikumbene kumukwasha bwadya kwalukila kwi Yehowa mu mafuku e kumpala. (Beena-Ebelu 12:11.) Sunga mbyabya, abitungu tunemekye mwiya wa Yehowa wa “kuleka kwipushena na muntu” abadi batushe mu kakongye. (1 Beena-Kodinda 5:11-13) Bino ta mbibofule nya. Anka abitungu tulekye kwisambanga nabo ku telefone, kwifundjishena ma mesaje, kwitumishena mikanda, ma mesaje ku Internete, sunga ku ma site a kwisamba na bantu bebungi.

20. Abitungu tutungunukye na kukulupila kinyi?

²⁰ Toshimishanga lukulupilo! Kifulo “akikulupilaa byoso,” atutungunuka na kukulupila shi bakwetu abalukila kwi Yehowa. (1 Beena-Kodinda 13:7) Su bomono shi mwina kifuko nobe kwete kwenda na kulumbula mweneno aye, we mukumbene kwela luteko bwashi apete bukome bwa kukumina lwitamino lwa Yehowa lwi mu Bible alwamba shi: “Aelushe kwandi.”​—Yeeshaya 44:22.

21. We kukita kinyi su bena kifuko nobe abakushikwa mwanda okwete kulonda Yesu?

²¹ Yesu bambile shi abitungu tumufule kukila byatudya kufula ungi muntu. Na Yesu badi mushinkamishe shi balondji baye abekala na mashimba anyingye bwa kulama kululama kwabo kwadi sunga bena kifuko nabo bebashikwa. Su bena kifuko nobe abakushikwa mwanda okwete kulonda Yesu, kulupila mwi Yehowa. Mutekye akukwasha obeshe kunyingiila. (Yeeshaya 41:10, 13) Peta muloo mu kuka shi Yehowa na Yesu bakwete kusangala nobe na abakupa bwedi bwa kululama kobe.