1. Kifulo kikile bukata nkinyi, na we kwikipatula naminyi? (Tala kifwatulo ki ku mbangilo)

YEHOWA ngi nsulo ya kifulo. (1 Yowano 4:7) Kifulo kikile bukata nkimene mu miiya ilulame. Kino kifulo abekitamina mu Bible mu mwaku wa mu kina Greke shi a·gaʹpe. Kino kifulo nkitale kwifulena na muntu na kwikwatena naye ngofu, anka ta nkimene pa byopusha nya. Akimwenekyela ku bikitshino bya kupela kukimba penda buwa bobe. Nyi nkifulo akitutakula mu kukitshina bantu myanda ibuwa. Kino kifulo akitupa muloo na nshalelo ebuwa.

2, 3. Yehowa muleshe kifulo kikata bwa bantu naminyi?

² Yehowa badi muleshe bantu kifulo mpa na kumpala kwa kupanga Adame na Eeva. Bapangile nsenga bwashi ikale na bintu byoso byatudi nabyo lukalo bwa kwikala na muwa. Kukaasha byabya, mwiyilumbule bwashi tushale na tusangele muwa. Yehowa tabadi mukite bino bwaye’ye nabene nya. Mukite byoso nka bwetu. Kunyima kwa kulumbula mbalo yatudya kushala, bapangile bantu aye nkwibapa lukulupilo lwa kwikala loso mu mpaladiso pa nsenga.

³ Kunyima, Yehowa balesheshe kifulo kyaye kikata bwa bantu mu ungi mushindo. Sunga Adame na Eeva abadi batombokye,  Yehowa badi auku shi bangi ba ku bana babo abakamufulu, aye nkulumbula bwashi kwikale mulambu wa kuulo wa mwanaye bwa kwitupasha. (Kibangilo 3:15; 1 Yowano 4:10) Kubanga nka nsaa ibadi Yehowa mulee nkuulo, bibadi nka bu’ye mupwe kwiyitusha. Na bipwa 4 000 kunyima, Yehowa batushishe mwanaye umune eleka bwa bantu. (Yowano 3:16) Twi na lutumbu lukata bwa kifulo kya Yehowa!

4. Atuku naminyi shi bantu bakutwe kupwidika be kwikala na kifulo kishii kya kukimba penda buwa bwabo

⁴ Twi kulesha kifulo kishii kya kukimba penda buwa bwetu, sunga twekala bakutwe kupwidika su? Oolo twi kulesha. Yehowa betupangile kwifwanyiko dyaye, nyi nkwamba shi na mushindo wa kumwambula. T’abikalaa bibofule bwashi tuleshe kifulo kishii kya kukimba penda buwa bwetu nya, anka twi kwikilesha. Abele badi muleshe kifulo bw’Efile Mukulu kushi kutala penda buwa bwaye, badi mutushe kintu kikile buwa kibadi nakyo. (Kibangilo 4:3, 4) Nowa balesheshe kyakya kifulo pabadi mutungunukye na kulungula mukandu w’Efile Mukulu munda mwa bipwa bibungi sunga bantu tababadi abakumina kumutemesha. (2 Mpyeele 2:5) Abrahame badi muleshe shi kifulo kyaye bw’Efile Mukulu kibadi kinyingye kukila kingi kintu kyoso pa kukumina kulambula Isaake mwana aye umune eleka. (Shake 2:21) Anka bibadi bano balume basha lukumino, atwe namu atukumina kulesha kifulo sunga nsaa yabidi bukopo bwa kwikilesha.

5. Twi kulesha kifulo kya binyibinyi mu mishindo kinyi?

⁵ Bible etulungula shi tuleshe kifulo kya binyibinyi kushii “kya penda miisambo na mu bishima, anka kiileshe mu bikitshino na mu binyibinyi.” (1 Yowano 3:18) Bino abikyebe kwamba shi, tatwi balombene kulesha kifulo mu byatwakula su? Nya. (1 Beena-Tesalonika 4:18) Abikyebe kwamba shi, tatwi balombene kwimena pa kwakula shi “ne mukufule.” Abitungu tuleshe byanka. Kileshesho, su mukwetu mulume sunga mukashi te na bidibwa bibungi sunga bilamba, te na lukalo penda lwa bishima bibungi bya kalolo nya. (Shake 2:15, 16) Mu kipaso kimune, mwanda twi bafule Yehowa na bantu netu, tetutekaa penda bwa kupeta bantu bebungi ba kulungula nabo nya, kadi atukitaa mwetu moso bwa kufuba ngofu mu bulungudi.​—Mateo 9:38.

6, 7. (a) “Kifulo kishii na bulamalama” ki naminyi? (b) Temuna bingi bileshesho bya kifulo kya madimi.

⁶ Yowano mutumibwa bambile shi, abitungu tufule “mu bikitshino na mu binyibinyi.” Nyi nkwamba shi, twikale na kifulo “kishii na bulamalama.” (Beena-Looma 12:9; 2 Beena-Kodinda 6:6) Ingi nsaa muntu e kwilesha bu e na kifulo. Anka, kifulo kyaye nkya binyibinyi su? Nkinyi akimutakula? Tabibuwa kwikala na kifulo kina bulamalama. Kifulo kya madimi ta kina muulo.

⁷ Tubande kutala bingi bileshesho bya kifulo kya madimi. Satana pabadi esamba na Eeva mu lupango lwa Edene, bibakwile bibadi abimweneka bu akimbi buwa bwa Eeva. Anka bikitshino byaye bibalesheshe shi tabadi akimbi buwa bwa Eeva nya. (Kibangilo 3:4, 5) Daavide pabadi nfumu badi na kuku abetamina bu Ayitofele. Anka Ayitofele badi mutukye Daavide mu lukuku bwa kukimba buwa bwaye. Bikitshino byaye bibalesheshe shi tabadi kuku a binyibinyi nya. (2 Samwele 15:31) Lelo uno bantu basumbule lukumino, na bangi abatwesha kwitshibula mu kakongye abafubaa na “bishima bya-kalolo na miisambo ya bu nsesa.” (Beena-Looma 16:17, 18) Be kwilesha bu abetatshisha bwa bangi, aku namu, abakimbi penda buwa bwabo.

8. Abitungu twiyele nkonko kinyi?

 ⁸ Kifulo kya madimi ki buufu, mwanda ki kwanka bwa kulwishisha bantu. Twi balombene kudimba bantu, anka tatwi kudimba Yehowa. Yesu bambile shi baba abakitshi myanda bu balamalama, abakanyokibwa “na nsungu ikile.” (Mateo 24:51, NWT) Bu byatudi bafubi ba Yehowa, tatwi balombene kwikala balamalama nya. Abitungu twiyipushe shi: ‘Ne na kifulo kya binyibinyi, su nakimbaa penda buwa bwande na, ne nsesa?’ Tutaleyi mishindo kitema yatudya kulesha kifulo “kishii na bulamalama.”

9. Kifulo kya binyibinyi akitutakula mu kukita kinyi?

⁹ Ikala na muloo wa kufubila bangi sunga tabakumono kwi ungi muntu. Abitungu tukumine kukitshina bangi myanda ayilesha kifulo na kalolo, myanda yabashi balombene kuuka kwi mungi muntu. (Badika Mateo 6:1-4.) Anania na Safira abadi na ungi mweneno. Pababadi batushe mulambu abadi abakumina shi bangi baukye kyabakitshi, abo nkudimba bungi bwa mulambu ubabadi batushe, abebanyokyele mwanda wa bulamalama bwabo. (Bikitshino 5:1-10) Kadi su twi bafule bakwetu binyibinyi, atwikala na muloo wa kwibakitshina myanda ayilesha kifulo na kalolo kushii kukimba shi, bangi baukye kyatwibakitshina. Kileshesho kya bakwetu abakwasha Kasaka ka Bakunkushi-Bakulu mu kulumbula kwa bidibwa bya mu kikudi, nkilombene kwitukwasha. T’abakakaa binangu bya bantu kwabadi, na tabaukishaa bangi mudimo wabakwete kukita na wabadi bakite nya.

10. Twi kulesha kanemo kwi bangi naminyi?

¹⁰ Nemeka namu bangi. (Badika Beena-Looma 12:10.) Yesu badi munemekye batumibwa baye nsaa ibadi mwibatumpe mema ku mikoolo. (Yowano 13:3-5, 12-15) Abitungu tukite mwetu moso bwa kwikala na kwiyisha na kufubila bangi nka bibadi Yesu. Batumibwa tababadi bapushe kalolo kibadi Yesu mukite, mpa na nsaa ibabapetele kikudi kiselele. (Yowano 13:7) Atunemeka bangi pa kupela kwimona bu’twe bebakile mwanda wa byabadi betukushe kalolo, bupeta bwetu, sunga bwa mudimo watudi nao. (Beena-Looma 12:3) Tatukwatshila bangi kyutu nsaa yabebapa mudimo kampanda nya, anka atusangala nabo sunga twekala atupusha shi atwe nyi babadya kupeta wawa mudimo.

11. Bwakinyi abitungu lutumbu lwetu lutukile mwishimba?

¹¹ Tumbula bantu n’eshimba dimune. Kimba mushindo wa kutumbula bangi. Atuku shi lutumbu lwibuwa bwa “kwibaka” bangi. (Beena-Efeso 4:29) Anka abitungu tukite bya’shi myanda yatwakula itukile mwishimba kushi bwa penda kusangasha bantu. T’abitungu shi twakule kintu kampanda penda bwa kusangasha bangi sunga kusuka bushito bwetu bwa kupa bangi malango. (Nkindji 29:5) Twi kwikala balamalama su atutumbula bangi, kunyima atubanga kwibepula. Kifulo kya Mpoolo mutumibwa kibadi kya binyibinyi. Pabadi mufundjile beena Kidishitu ba mu Kodinda, bebatumbwile bwa bibabadi abakitshi. (1 Beena-Kodinda 11:2) Anka nsaa ibadi ayitungu shi ebalangye, badi mwibapatulwile byanka patoka na kalolo koso.​—1 Beena-Kodinda 11:20-22.

12. Twi kulesha kifulo kya binyibinyi naminyi nsaa yatukukila benyi?

¹² Ikala okukila benyi. Yehowa mwitwelele mwiya wa kwikala na kalolo kwi bakwetu balume na bakashi. (Badika 1 Yowano 3:17.) Anka abitungu twikale na binangu bibuwa nsaa yatukukila benyi. Twiyipushe shi: ‘Banyitaminaa kwande mpenda bakuku bande sunga baba bamonaa bu be na kinemo mu kakongye? Nayitaminaa penda bano bamono bu balombene kungalwisha kintu? Su naleshaa kalolo kwi bakwetu balume  na bakashi banshanguku sunga bashi balombene kungalwisha kintu?’ (Luka 14:12-14) Banda kutala uno mwanda: We kukita naminyi su mukwetu ekala na lukalo lwa bukwashi mwanda wa kitshibilo kibubi kyayikalanga mwate? Kadi su muntu atwikele betamine ku nshibo tamwitutumbule? Yehowa etulungula shi: “Ekuukisheeneeyi mu mashibo eenu, kushii kuunauna.” (1 Mpyeele 4:9) Atupete muloo nsaa yatupana na binangu bibuwa.​—Bikitshino 20:35.

13. (a) Nsaa kinyi ayitungu shi twikale na lwishinko lwibungi? (b) Twi kukita naminyi bwa kukwasha babofule?

¹³ Kwasha babofule. Mwiya wa mu Bible awamba shi: “Nyingishaayi babofule, ikalayi na lwishinko kwi booso” bino abilesha su twi na kifulo kya binyibinyi. (1 Beena-Tesalonika 5:14) Bakwetu bebungi abadi babofule, kunyima mbanyingye mu lukumino. Anka bangi be nka na lukalo lwa kwibalesha lwishinko na kwibakwasha na kifulo kyoso. Twi kwibakwasha naminyi? Twi kufuba na Bible bwa kwibanyingisha, twi kwibata bwa kwenda nabo mu bulungudi, sunga kwibatemesha. Dingi tatwi balombene kupwandikisha shi bakwetu balume na bakashi “mbanyingye” sunga shi “mbabofule.” Anka, abitungu tushingule shi oso a kwatudi e na padi munyingiile na padi mubofwile. Mpa na Mpoolo mutumbwa badi mukumine shi e na kwaye kubofula. (2 Beena-Kodinda 12:9, 10) Boso bwetu twi na lukalo lwashi betunyingishe kwi bangi.

14. Nkinyi akitungu shi tukite bwa kulama butaale munkatshi mwetu na bakwetu?

¹⁴ Kimba butaale. Kwikala mu butaale na bakwetu nkintu ki na muulo ukata. Sunga bakutwa kwitupushisha sunga abetukitshina myanda ya kukutwa kululama, abitungu tukite mwetu moso bwa kukimba butaale. (Beena-Looma 12:17, 18.) Su tubalwishisha muntu, abitungu tumutekye lusa mususa umune. Kadi abitungu bitukile mwishimba. Kileshesho, pamutwe pa kwamba shi, “nenyongola bu bibopusha byabya,” bibuwa tukumine kilubilo kyetu na kwakula shi, “nfwile namu lusa mwanda nayikalanga mukulwishishe mu bya ngakwile.” Butaale bwi na muulo bikishekishe mwiyibakishi. Mbilombene kwikala bubi ngofu su mulume na mukashi abakitshi myanda ayilesha shi mbefulene munkatshi mwa bantu, aku namu tabeakushena bubidi bwabo, abeambena bishima bibubi, sunga kwikala n’etombo.

15. Twi kulesha naminyi shi tubafwila muntu lusa binyibinyi?

¹⁵ Fwila bangi lusa. Su muntu betulwishisha, atumufwila lusa kushii kulama nsungu. Abitungu tukite bino sunga byekala shi ta mmutundule shi betulwishisha. Atufwila bangi lusa pa ‘kwilekyeshena ku muntu na muntu mu kifulo, kukita mwetu moso na kufukama akwitulungu pamune, bwa kulama buumune bwitupe kikudi.’ (Beena-Efeso 4:2, 3) Bwa kufwila bantu lusa binyibinyi, abitungu tulekye kunangushena ku byakwile muntu. Kifulo “t’akilamaa ngo.” (1 Beena-Kodinda 13:4, 5) Byabya, su tubalama ngo, atulwisha kwipwano kyetu na mukwetu mulume sunga mukashi mpaa na kifulo kyetu  na Yehowa. (Mateo 6:14, 15) Atulesha shi, tubafwila muntu lusa binyinyi nsaa yatutekye bwa yawa muntu mwitulwishishe.​—Luka 6:27, 28.

16. Twi kupusha naminyi pabitale mudimo wi pabwao wabetupa mu mufubo wa Yehowa?

¹⁶ Ikala wesumina ingi miloo. Nsaa y’abetupa mudimo wi pabwao mu mufubo wa Yehowa, twi kulesha shi kifulo kyetu nkya binyibinyi pa kupela ‘kukimba akitulongamina nka’twe banabene, anka akilongamina mungi.’ (1 Beena-Kodinda 10:24) Kileshesho, ku bikongeno byetu bya kifunda sunga bya mafuku asatu, bantu abakuukila benyi abafikaa kumpala kwa nsaa, na mbalombene kwikala na lukalo lwa kukwatshila mbalo ibuwa bwabo na bwa bifuko byabo. Pamutwe pa byabya, bebungi bakwete kusangula ma mbalo abamono kwi bangi shi, taebuwa bwabadya kushaala. Nsaa yabakitshi byabya, abalesha shi, kifulo kyabo ta nkya kukimba penda buwa bwabo nya. We kwambula kileshesho kyabo kibuwa naminyi?

17. Su mwina Kidishitu bakitshi mulwisho, kifulo kya binyibinyi akimutakula mu kukita kinyi?

¹⁷ Tonda na olekye kukita milwisho mu bufyefye. Bangi bena Kidishitu abadi bakite milwisho ikata mbeyifye. Pangi bakwete kupusha bufu sunga shi, tabakumina kutapa bangi ku mashimba. (Nkindji 28:13) Byabya, kufwamisha mulwisho nkukutwa kwa kifulo mwanda akulwishisha baakitshi mulwisho mpa na bangi bantu. Naminyi? Yehowa e kuleka kwelela kakongye myabi na kikudi kyaaye na, kakongye ke kukutwa butaale. (Beena-Efeso 4:30) Byabya su mwina Kidishitu bakitshi mulwisho ukata, kifulo kya binyibinyi akimutakula mu kwiulungula bakulu na kupeta bukwashi abutungu.​—Shake 5:14, 15.

18. Kifulo kya binyibinyi kina muulo kinyi?

¹⁸ Kifulo nyi eyikashi dikata kukila ingi yoso. (1 Beena-Kodinda 13:13) Akikwasha bantu bwashi baukye balondji ba Yesu ba binyibinyi mpa na bantu abambula Yehowa, Nsulo ya kifulo. (Beena-Efeso 5:1, 2) Mpoolo bambile shi su tamuleshe kifulo, te na muulo. (1 Beena-Kodinda 13:2) Oso a kwatudi atungunukye na kulesha kifulo kushi penda “mu bishima” kadi dingi “mu bikitshino na mu binyibinyi.”