MWISAMBO WA KULONGA 41
Ikala nka na lulamato mpa na mu “mpombo ikata”
“Fulaayi Yehowa, anwe booso bamulamate! Yehowa alama baa-sha-lukumiino.”—MIS. 31:24.
LOONO 129 Tushaleyi banyingye
KYABAKWILA MWANKA *
1-2. (a) Mu mafuku apeela’mu, nkinyi kyabakakula kwi bakunkushi ba pa nsenga? (b) Nkonko kinyi ayitungu kwaluula?
BANDA kunangushena’shi bakunkushi ba pa nsenga abele musase wabatengyelanga ngofu wa “butaale na kwiyikeela.” Abakapwandikisha’shi mu nsenga mubatwele butaale bush’ekele kwanka. Maumbo aakakitshi byashi tunangushene’shi be na ngobesha ya kupudisha myanda ya bantu. Aku namu tabe na ngobesha ya kupudisha kyakya akikyebe kukitshika! Bwakinyi? Muyile butemuki bwa mu Bible, ‘kabutu akebapulukila musuusa umune, . . . dingi taabeekala naa kwa kusuukila.’—1 Tes. 5:3.
2 Kwi nkonko i na muulo ayitungu kwaluula: Nkinyi akikakitshika mu “mpombo ikata”? Yehowa aketutekye bwa kukita kinyi aa mafuku? Na mbikunyi byatudya kwilumbuula binobino bwa kushala na lulamato mu mpombo ikata?—Mat. 24:21.
NKINYI AKIKAKITSHIKA MU “MPOMBO IKATA”?
3. Muyiile mukanda wa Kibafumbwilwe 17:5, 15-18, Efile Mukulu akabutula “Babilone Mukata” naminyi?
3 Badika Kibafumbwilwe 17:5, 15-18. “Babilone Mukata” akabutudibwa! Nka bu bibatukatuka mu kwibimona, bantu tabakekala na ngobesha ya kupudisha kyakya akikakitshika mu aa mafuku nya. Bwakinyi? Mwanda “Efile Mukulu [akatuulu] mu mashimba aabo bwa kutimikila kinangu kiaye.” Kyakya kinangu akilesha kinyi? Akilesha kabutu ka bipwilo bya madimi. Efile Mukulu akatuulu kinangu kyaye mu mashimba a “nsengwa ekumi” ya “nyema moonga.” Nsengwa ekumi ayilesha mbulamatadi yoso ikwete kukwatshishena “nyema”—kwamba’shi Nations Unies. (Kibaf. 17:3, 11-13; 18:8) Nsaa yabakaluulukila bipwilo bya madimi kwi mbulamatadi, nyi kitundwilo kya’shi mpombo ikata ibabanga. Abikekala kabasamushi na mmwanda aukakwatshisha bantu boso ba pa nsenga moo.
4. (a) Ntubigilo kinyi atukatuusha bena maumbo bwa kulwa na bena bipwilo? (b) Nkinyi kilombene bena bipwilo nkakita?
4 Tatuuku akikatakula bena nsenga bwa kulwa na Babilone Mukata nya. Be nkamba’shi bipwilo tabikwete kwikasha butaale pa nsenga na’shi bikwete kutwelakana mu myanda ya politique. Sunga’shi bipwilo bikwete kukongola mapeta na bintu bibugi. (Kibaf. 18:3, 7) Abimweneka’shi nsaa yabakalu na bipwilo ta bakabutula bantu boso ba mu bino bipwilo. Byabya, abimweneka’shi abakakatusha ndubulwilo ya bipwilo. Anka ino ndubulwilo nyi ayikabutudibwa, byabya apakamono bene bipwilo’shi bakata baabo ntabalombashe milayilo yabo, abakabanga kwilamuna ku bino bipwilo.
5. Yehowa mulee kinyi pabitale mpombo ikata na mbwakinyi?
5 Bible takula mafuku aakakitshi kabutu ka Babilone Mukata nya, anka atuuku’shi abikakitshika munda mwa kapindji kapeela. (Kibaf. 18:10, 21) Yehowa mulee’shi ‘akapeelesha aa mafuku’ a mpombo, anka “basangulwe” baye na kipwilo kya binyibinyi akikapanda. (Mak. 13:19, 20) Yehowa akyebe’shi tukite kinyi pankatshi pa mpombo ikata na ngoshi ya Armagedone?
TUNGUNUKA NA KUKWATSHISHENA LULANGWILO LWI SELELE LWA YEHOWA
6. Bwakinyi tabitungu penda kutshiba kipwano na kipwilo kya madimi?
6 Anka bu byatwibimwene mu mwisambo ushale, Yehowa akyebe’shi balangwidi baye belamune ku Babilone Mukata. Byabya bino abitekye kutshiba kipwano kyoso na kipwilo kya madimi. Abitungu twate kitshibilo kya kukwatshishena lulangwilo lwa binyibinyi—lulangwilo lwi selele lwa Yehowa. Tutaluleyi mishindo ibidi yatudi balombeene kwibikita.
Tatulekanga kutwela bisangilo byetu sunga twekala mu nkalakashi (Tala kikoso 7) *
7. (a) Mbikunyi byatudya kukookyela miiya ilulame ya Yehowa? (b) Bwakinyi Beena-Ebelu 10:24, 25 ashimika kasele pabitale muulo wa kutwela mu bisangilo, na bwakinyi bi na muulo lelo uno?
7 Wa kumpala, abitungu tuyididiile na kulonda miiya ya Yehowa ya bululame. Tabitungu tukumiine nshalelo e butete a bantu ba mu ino nsenga. Bu kileshesho, tatukumiinaa nshalelo a lusandji a muntu su ngumune, mpa na eyibakishi dya balume na balume sunga bakashi na bakashi, sunga nshalelo kapanda a butesha. (Mat. 19:4, 5; Lom. 1:26, 27) Wa kabidi, abitungu tutungunukye na kulangwila pamune na bena Kidishitu netu. Atukitaa byabya mbalo yoso yatudi, byabikala mu Nshibo ya Bufumu, sunga mu nshibo ya muntu sunga mu ingi mbalo ifwame. Sunga kwakitshika kinyi, tatwibalombeene kuleka kyubishi kyetu kya kwibunga bwa kulangwila. Byabya, abitungu twikale atwibungu “nkibinkibi pano [paatumono’shi] efuku dya Mwanana dibeeseesela peepi.”—Badika Beena-Ebelu 10:24, 25.
8. Mukandu wetu aukekala bu kinyi mu mafuku aafiki?
8 Mu mpombo ikata, mukandu watukalambukisha aukamweneka bu ubashintuluka. Bwa binobino, tukwete kulungula mukandu wibuwa wa Bufumu na tukwete kukita mwetu moso bwa kwikasha bantu bu balongi. Kadi mu yaya nsaa, mukandu watukalambukisha aukekala bukopo bukile. Bible eupwadjikisha bu mabwe a kasangu. (Kibaf. 16:21) Atukalambukisha pangi’shi ndumbulwilo a Satana abutudibwa binobino. Mu aa mafuku, atukauku mukandu watukalambukisha na mushindo wa kwiulambukisha. Atukafubisha mayele amune abatufubisha munda mwa bipwa nkama bwa kulombasha mudimo wetu su? Su’shi atukafubisha angi mayele? Tatwiuku nya. Sunga twakalambukisha mushindo kinyi, atukekala na kineemo kya kulambukisha mukandu wa kiimu wa Yehowa!—Es. 2:3-5.
9. Bena maumbo be nkakita kinyi pabitale mukandu wetu, na nkinyi kyatudya kushinkamisha?
9 Mwanda wi na muulo, mukandu wetu aukatakula be na maumbo bwabadya kwimika mudimo wetu wa bulungudi. Nka bu byatukwete kukulupila mwi Yehowa lelo uno, twi na lukalo lwa nka mukulupila. Abitungu tushinkamishe’shi Efile Mukulu aketupa bukome bwatudya kulombasha kikyebe ky’eshimba dyaye.—Mik. 3:8.
IKALA MWILUUMBULE KU NGOSHI YABAKALU NA MWILO WA YEHOWA
10. Bu byabadi bebileshe mu Luuka 21:25-28, bantu bebungi abakakitshi naminyi pabitale myanda ayikakitshika mu mpombo ikata?
10 Badika Luka 21:25-28. Mu mpombo ikata, abakakalakashwa ngofu pa kumona abilwila bintu byoso byabakulupilanga’shi abikala kwanka bwa looso. Abekala mu “mpombo ikata,” na abakedidi bwa myuwa yabo mu kyakya kipungo ki bukopo. (Sef. 1:14, 15) Mu aa mafuku, nshalelo akekala bukopo bukile mpa na bwa bafubi ba Yehowa. Bu byatushii ba pa nsenga, atukapete nkalakashi kampanda. Pangi atukakutwa bingi bintu byatudi nabyo lukalo.
11. (a) Bwakinyi bantu abakatuulu binangu byabo nka kwi ba Temwe ba Yehowa? (b) Bwakinyi tabitungu tutshine mpombo ikata?
11 Yaya nsaa, pabakabutula bingi bipwilo, bantu abakapusha nsungu pa kumona’shi nka penda ba Temwe ba Yehowa nyi abashala. Eyendo, abakakimbi kulesha bangi bi bukopo bwa nsungu yabo, mpa na ku Internete. Maumbo na mukunkushi aao, Satana, abaketushikwa pa kumona’shi nka penda lulangwilo lwetu nyi lwabashii babutule. Tabakalombasha mpàngo yabo ya kubutula bipwilo byoso bya pa nsenga nya. Abakatulu binangu byabo kwatudi. Paapa, bena maumbo aabafiki Goge a ku Magoge. * Abakebungu bwa kulwa na mwilo wa Yehowa. (Es. 38:2, 14-16) Twi kubanga kwikalakasha pabitale akikatshika mu mpombo ikata, bikishekishe mwanda tatwiuku myanda yoso kalolo. Anka tushishinkamishe’shi: Tabitungu tutshine mpombo ikata nya. Yehowa aketupa mayi a kulonda aaketupaasha. (Mis. 34:20) Atwikala na ngobesha ya ‘kubanduluka na kubusha mitwe [yetu]’ mwanda atukamono’shi ‘kukuudibwa kwetu kwi peepi.’ *
12. “Mpika a kishima na mupatulukye” mmwitulumbuule bwa myanda ayifiki kumpala naminyi?
12 “Mpika a kishima na mupatulukye” mmwitulumbuule bwatudya kushala na lulamato mu mpombo ikata. (Mat. 24:45) Mmukite bino mu mishindo ibungi, kadi tubande kutaluula mushindo umune: Bikongeno byetu bya kubanga mu 2016-2018. Mu bino bikongeno, abaadi betunyingishe bwa kutamisha ngikashi yatudi nayo lukalo bu byatukwete kwifubwila kwifuku dya Yehowa. Tubandeyi kutaluula yaya ngikashi.
TUNGUNUKA NA KUNYIGISHA LULAMATO LOOBE, KUNYIGIILA, NA KWIKALA N’ESHIMBA DINYINGYE
Banga kwilumbuula kubanga binobino bwa kupanda ku “mpombo ikata” (Tala kikoso 13-16) *
13. Mbikunyi byatudya kunyingisha lulamato lwetu kwi Yehowa, na bwakinyi abitungu twibikite kubanga binobino?
13 Lulamato: Mutwe wa mwanda wa kikongeno kya mu 2016 ubaadi awamba’shi: “Shala na lulamato kwi Yehowa!” kino kikongeno kibaadi kitulongyeshe’shi su twekala na kipwano kibuwa na Yehowa, atwikala na lulamato kwadi. Kibaadi kitutentekyeshe’shi ku bukwashi bwa luteko lwatwele n’eshimba dyetu dyoso na kwilongyela Kweyi dya Yehowa, twibalombeene kwifubwila peepi naye. Kukita bino akwitukwasha bwa kukambila nkalakashi ibukopo. Bu bi ndubulwilo a Satana taadi peepi na kufudila, atufumakana na nkalakashi ikile bukopo ilombeene kutompa lulamato lwetu kwi Yehowa na Bufumu bwaye. Bantu be kutungunuka na kwitusepa. (2 Mp. 3:3, 4) Kangi kabigilo kakata nka’shi tatukwete kukwatshishena kipindji su nkimune kya ndubulwilo a Satana. Abitungu tunyingishe lulamato lwetu kubanga binobino, paapa atukashaala nalo mu mpombo ikata.
14. (a) Nkushintuuluka kinyi akukamweneka pabitale bakwetu abakakunkusha pano pa nsenga? (b) Bwakinyi abitungu tukaleshe lulamato mu yaya nsaa?
14 Mu mpombo ikata, akukamwenaka kushintuluka pabitale bakwetu abakakunkusha pa nsenga. Mu yaya nsaa, boso bedibwe mwimu be pa nsenga abakabungibwa mwiyilu bwa kulwa ngoshi ya Armagedone. (Mat. 24:31; Kibaf. 2:26, 27) Kasaka ka Bakunkushi-Bakulu takakekala netu dingi pano pa nsenga nya. Anka, kibumbu kikata akikala nka kilumbuulwe. Bakwetu balume be na ngobesha ba mu ingi mikooko abakakunkusha. Abitungu tukaleshe lulamto lwetu kwi Yehowa pa kulonda buludiki bwabo abufuki kwadi. Abitungu tulonde bukunkushi bwabo su atukumiina kupanda.
15. Bwakinyi abitungu twikale banyingye, na bwankinyi abitungu twibikale kubanga binobino?
15 Kunyigiila: Mutwe wa mwanda wa kikongeno kya mu 2017 ubaadi awamba’shi: “Tokookanga!” Kino kikongeno kibaadi kitukwashe bwa kunyingisha ngobesha ya kunyigiila nkalakashi. Tubaadi balongye’shi kunyingiila kwetu ta nka penda nsaa yatudi mu nshalelo ebuwa nya. Twi kunyingiila pa kukulupila Yehowa. (Lom. 12:12) Tatwilwankanaga bibaadi Yesu mulee’shi: “Akashaala munyingile nyaa na ku nfudiilo, yaawa apanda.” (Mat. 24:13) Uno mulayilo aupushisha’shi abitungu twikala na lulamato sunga twapeta nkalakashi inaminyi. Su atunyingiila nkalakashi kubanga binobino, lukumiino lwetu alunyingi ngofu kumpala kwa’shi mpombo ikata ibangye.
16. Nkinyi ki kwitwikasha n’eshimba dinyingye, na mushindo kinyi watudya kunyisha kunyingisha eshimba dyetu kubanga binobino?
16 Eshimba dinyingye: Mutwe wa mwanda wa kikongeno kya mu 2018 ubaadi awamba’shi: “Nying’eshimba!” Miisambo ya kino kikongeno ibaadi itukwashe bwa kutentekyesha’shi, ta ngobesha yetu itwikashe n’eshimba dinyingye nya. Nka bu kunyingiila, bwa kwikala n’eshimba dinyingye abitungu tukulupile mwi Yehowa. Mushindo kinyi watudi balombeene kukulupila mwi Yehowa? Pa kubadika Eyi dyaye efuku dyoso na kunangushena mushindo ubaadi Yehowa mupashe mwilo waye kala. (Mis. 68:21: 2 Mp. 2:9) Nsaa yabakalu netu kwi bena maumbo mu mpombo ikata, abiketutungu eshimba dinyingye na kunyisha kukulupila mwi Yehowa kukila kumpala. (Mis. 112:7, 8; Eb. 13:6) Su twekala bakulupile mwi Yehowa kubanga binobino, atukekala banyigy’eshimba nsaa yabakalu netu kwi Goge. *
IKALA OTENGYELA KIPANDJILO KYOBE N’ESHIMBA KWIYILU
Binobino’bi, Yesu na bilwilo byaye bya mwiyilu, abakyebe kubanga ngoshi ya Armagedone bwa kubutula beshikwanyi b’Efile Mukulu! (Tala kikoso 17)
17. Bwakinyi tatwina kya kupusha moo pabitale Armagedone? (Tala kifwatulo ki ku kipusu.)
17 Nka bu byatwikele bebimone mu mwisambo ushaale, bebungi bakwatudi mbakishe muwa wabo mu mafuku a nfudiilo. Kadi twi na dingi lukulupilo lwa ku panda ku mpombo ikata. Ngoshi ya Armagedone ayifudisha uno ndubulwilo. Byabya, tatwina kya kupusha moo. Bwakinyi? Mwanda nyi ngoshi ya Yehowa, tatukalu nya. (Nki. 1:33; Es. 38:18-20; Za. 14:3) Nsaa ayikatuusha Yehowa matalwa, Yesu Kidishitu akakunkusha kilwilo ky’Efile Mukulu ku ngoshi. Akekala na bena Kidishitu bedibwe mwimu baasangukye na midiyala ya ba mikeyilu. Abakalu na Satana, ba demo baye na makome aye a pa nsenga.—Nda. 12:1; Kibaf. 6:2; 17:14.
18. (a) Yehowa etushinkamiisha kinyi? (b) Mukanda wa Kibafumbwilwe 7:9, 13-17, awitukwasha bwashi tatwikalanga na mpaka pabitale lukulupilo lwetu lwa mafuku aafiki naminyi?
18 Yehowa etushinkamisha’shi: “Kilonda kyooso kifushiibwe bwa kulwa noobe ngoshi taakikitshi kintu’kyo.” (Yesh. 54:17) “Kibumbu kikata” kya balangwidi ba Yehowa basha lulamato “abafiki ku mpombo ikata.” Abakatungunuka na kufubila Yehowa. (Badika Kibafumbwilwe 7:9, 13-17.) Bible etupa tubingilo twibungi twa kwikala bashinkamishe’shi atukapanda mu mafuku aafiki! Atuuku’shi “Yehowa alama baa sha lukumiino.” (Mis. 31:24) Boso bafule Yehowa na abamutumbisha abakamono kwatoosha eshina dyaye dya kishila.—Es. 38:23
19. Mmyanda kinyi yatudi bakulupile ayikyebe kulombana mu mafuku apeela’mu?
19 Banda kunangushena bibadya kwikala mayi a mu 2 Timotee 3:2-5 su abaadya kwikala awakula bwa bantu be mu ndumbulwilo mupya bashii ku bukitshishi bwa Satana. (Tala kashibo akamba’shi “ Abikekala bantu.”) Mukwetu George Gangas, * baadi mu Kasaka ka bakunkushi-Bakulu, baadi mwambe’shi: “Yawa ndumbulwilo akekala mbalo i buwa bwi kashaa amukekala bantu boso abalangwila Yehowa! Mu mafuku apeela’mu okekala na mwabi wa kushala mu nsenga ipya. Okekala na muwa nka bu bi nao Yehowa. Atukekala na muwa wa looso.” Luno nyi lukulupilo lwi buwa bwi kashaa!
LOONO 122 Tushimateyi pepoo kushii kusanyishwa!
^ par. 5 Atuuku’shi “mpombo ikata” ayifwila bantu binobino. Nkinyi akikakitshikila bafubi ba Yehowa aa mafuku? Yehowa aketutekye bwa kukita kinyi? Ngikashi kinyi ayitungu’shi tutamishe binobino bwatudya nkalama lulamato lwetu mu aa mafuku? Atwibimono mu uno mwisambo.
^ par. 11 KISHIMA KYABADI BAPATUULE: Kishima Goge a ku Magoge (sunga goge mu kikoso) akilesha nsangilo a maumbo aebungu bwa kulwa ngoshi na lulangwilo lwi selele mu mpombo ikata.
^ par. 11 Bwa kuuka myanda ibungi pabitale myanda ayikakitshika kumpala kwa Armagedone, tala shapitre 21 a mukanda wa Bufumu abumunana! Bwa kuuka myanda ibungi pabitale Goge a ku Magoge na abikakalwila Yehowa mwilo waye mu Armagedone, tala shapitre 17 na 18 a mukanda wa Lulangwilo lwi selele lwa Yehowa—Lubalushuulwa! Mu Anglais.
^ par. 16 Mutwe wa mwanda wa kikongeno kya 2019 awambanga’shi: “Kifulo t’akishimina!” wikele witushinkamiishe’shi twibalombeene kushala looso mu kifulo kya kukalwilwa na Yehowa.—1 Kod. 13:8.
^ par. 19 Tala mwisambo awamba’shi “Ses œuvres l’accompagnent” mu Kitenta kya Mulami kya 1/12/1994 mu Fwalanse.
