KUBANGA kala, milambu ibadi na muulo ukata mu lulangwilo lwa binyibinyi. Bena Isaleele abadi abatusha milambu ya nyema, na bena Kidishtu namu abaukibwa ngofu bu bantu abatushaa “milambu ayisangasha Efile Mukulu.” Na dingi, kwi ingi milambu ayisangashaa Efile Mukulu ngofu. (Beena-Ebelu 13:15, 16) Ino milambu ayitupetesha muloo na myabi, nka bu byabebilesha mu kino kileshesho akilondo.

Aana, badi mufubi a Efile Mukulu sha lulamato a kala, badi adidi kupeta mwana n’eshimba dyaye dyoso anka, tabadi na mushindo wa kutanda mwana nya. Mu luteko lwaye, badi mutshipe kwi Yehowa’shi su batanda mwana mulume, badi mulombene ‘kumulambula kwi [Yehowa] bwa mafuku ooso a muuwa waye.’ (1 Samwele 1:10, 11) Kunyima kwa mafuku, Aana bapetele eyimi, na aye nkutanda mwana mulume nkumudika eshina bu Samwele. Kunyima kwa Samwele kuleka koomwa, Aana bamutwadile ku tabernakele, balombeshe mutshipo ubadi mukite. Yehowa badi mwelele Aana mwabi bwa binangu byaye bya kwisumina ingi miloo. Badi mupete mwabi wa kutanda bangi bana batano, na Samwele bafikile mutemuki na umune a ku bafundji ba Bible.​—1 Samwele 2:21.

Nka bu Aana na Samwele, bena Kidishitu lelo uno be na mwabi wa kulambula muwa wabo mu kufubila Mupangi aabo. Yesu balayile’shi milambu yooso yatutusha bwa kukwatshishena lulangwilo lwa Yehowa ayiketupetesha myabi ibungi.​—Maako 10:28-30.

Mu siekele a kumpala, ungi mwana mukashi mwina Kidishitu abetanyina bu Dorkase badi mwende nkumo bwa “myanda ibungi ibuwa na kupesheena bya pa lusa”​—badi mwipaane mu kukwasha bangi. Mwanda wa malwa, “bakumbile, aye nkufwa,” na uno mwanda ubadi winyongoshe bena kakongye booso. Balongi pababapushishe’shi Mpyeele e mu mbalo i pepi na kwabadi, abayile musango umune mu nkamwitanyina. Banda kunangushena muloo ubabapushishe nsaa ibafikile Mpyeele abuusha Dorkase ku lufu​—uno ngi musango wa kumpala wabadi babushe muntu mufwe kwi batumibwa! (Bikitshino 9:36-41) Efile Mukulu tamuyilwankane milambu na kwipaana kwa Dorkase nya. (Beena-Ebelu 6:10) Mwanda wa kalolo kaaye mbeufunde mpa na mu Eyi dy’Efile Mukulu bwatudya kwambula kileshesho kyaye.

Mu mushindo umune, Mpoolo mutumibwa mmwitulekyele kileshesho kibuwa kya bu muntu badi atusha na kalolo koso nsaa na binangu byaye. Pabadi mufundjile bakwabo ba mu Kodinda, Mpoolo bambile’shi: “Bwande’mi, na muloo ooso, natuusha byooso na kwipaana ami nabeene na bushima bwande pa mwanda wenu.” (2 Beena-Kodinda 12:15) Mpoolo badi mumone aye nabene’shi kwipaana bwa kukwasha bangi takutwala nka penda muloo kwi muntu nya​—kadi mwanda wi na muulo ukata​—akupetesha dingi muntu myabi ya kwi Yehowa na kukuminyibwa naye.—Bikitshino 20:24, 35.

Abimweneka kalolo’shi, Yehowa apushaa buwa ngofu nsaa yetumono atufubu na nsaa na bukome bwetu bwa kukwatshishena myanda ya Bufumu na kukwasha bakwetu bena kukumina. Kadi, kwi ingi mishindo yatudi balombene kukwatshishena mudimo wa bulungudi bwa mukandu wa Bufumu su? Oolo! Kukatusha kwa kufuba na nsaa na bukome bwetu, twi balombene kutumbisha Efile Mukulu ku bukwashi bwa bya buntu byetu byatwitushila. Bakwete kufuba nabyo bwa kufubisha mudimo wa kulungula mukandu wibuwa mu nsenga ishima, mwanka abakwasha nabyo ba misionere na bangi bafubi ba mudimo wa nsaa yooso wi pa bwao. Kunyima kwa byabya, bakwete kufuba na bya buntu byatutusha bwa kufubisha midimo bu kwalula mikanda na ma video, kukwasha bakwetu bapete masaku, na kwibakisha Mashibo a Bufumu apya. Twikaleyi bashinkamishe’shi: “Sha-kalolo asampiibwa.” Dingi, nsaa yatupa Yehowa bintu byetu bya muulo, atumutumbisha.​—Nkindji 3:9; 22:9.