1. Bwakinyi Yesu batekyele Yehowa bwa’shi akalwile balongi baye?

BUFUKU bwaye bwa nfudilo pano pa nsenga, Yesu badi anangushena pabitale nkalakashi ayikapete balongi baye. Bwa kifulo kibadi nakyo bwa ba kuuku baye, Yesu batekyele Nshaye bwa “kwibakalwila kwi mubi.” (Yo. 17:14, 15) Yesu badi muukye’shi kunyima kwaye kwenda mwiyilu, Satana Diabulu atungunuka na kulwisha boso abakumina kufubila Yehowa. Eyendo’shi, mwilo wa Yehowa wi na lukalo lwa kukalwilwa.

2. Twi kushinkamisha naminyi’shi Yehowa alula ku nteko yetu?

² Yehowa balulwile luteko lwa Yesu mwanda mmumufule. Su tubakitshi mwetu moso bwa kusankisha Yehowa, etufulu na atemesha nteko yetu p’atumutekye bwa’shi etukwashe na kwitukalwila. Bu byadi Mfumu a kifuko sha kifulo, Yehowa atungunuka na kupasukila bana baye na kifulo kyoso. Su ta mmukite byabya, mbilombene kulwisha nkumo y’Eshina dyaye.

3. Bwakinyi lelo uno twina lukalo lwa’shi Yehowa etukalwile?

³ Twina lukalo lwa’shi Yehowa etukalwile kukila kumpala. Satana mbamubingye mwiyilu, nyi bwakinyi “mmukwate nsungu ikile.” (Kibaf. 12:12, EEM) Mmukite mwaye moso bwa kushinkamisha boso abetubingabinga’shi ‘bakwete kufubila Efile Mukulu.’ (Yo. 16:2, EEM) Bangi bashi balangwidi b’Efile Mukulu, bakwete kwitubingabinga mwanda twibelekene na uno ndumbulwilo. Sunga byekala naminyi, tatwi balombene kutshina nya. Bwakinyi? Mwanda Eyi dy’Efile Mukulu adyamba’shi: ‘Mwanana sha lulamato, aye enukankamika dingi enulama kwi mubi.’ (2 Tes. 3:3) Mushindo kinyi ukwete kwitukalwila Yehowa? Tubandeyi kutalula mishindo ibidi.

4. Muyile Bena-Efeso 6:13-17, Yehowa mwitupe kinyi bwa kwitukalwila?

⁴ Yehowa mwitupe bina ngoshi abitukalwila ku ngoshi ya Satana. (Badika Bena-Efeso 6:13-17.) Bino bina ngoshi bya mu kikudi, bi bukopo na bi buwa! Kadi, abitungu’shi twibifwale byoso bwa’shi bitukalwile. Nkinyi akipatuula kina ngoshi kyoso? Tubande kwisambila kimune ku kimune.

5. Mukaba wa bya binyibinyi nkinyi, na bwakinyi abitungu twiufwale?

⁵ Kufwala bya binyibinyi bu mukaba akulesha bya binyibinyi abisanganyibwa mu Bible, Eyi dy’Efile Mukulu. Bwakinyi abitungu tufwale uno mukaba? Mwanda Satana, “nshee madimi.” (Yo. 8:44) Bapu kudimba munda mwa bipwa binunu na kulendwisha “ba pa nsenga boso”! (Kibaf. 12:9, EEM) Anka, bya binyibinyi bya mu Bible abitukalwila ku kudimbibwa. Mmushindo kinyi watufwalaa uno mukaba wa mu kifwanyi? Atukitshi bino p’atulongo bya binyibinyi pabitale Yehowa, p’atumulangwila “mu kikudi na mu binyibinyi,” na p’atwikala na kululama mu myanda yoso.​—Yo. 4:24; Ef. 4:25; Eb. 13:18.

6. Kufwala kululama bu ngabo akupatula kinyi, na bwakinyi abitungu tufwale uno ngabo?

⁶ Kufwala kululama bu ngabo akulesha miya ya kululama ya Yehowa. Bwakinyi abitungu’shi tufwale uno ngabo? Anka abikalaa ngabo ayikalwila eshimba dya musalayi ku mikyetwe, ngabo ya kululama ayikalwila eshimba dyetu dya mu kifwanyi bwa’shi tatwikalanga ku bukitshishi bwa uno ndumbulwilo e bubi. (Nki. 4:23) Yehowa etutekye’shi tumufule na tumufubile n’eshimba dyetu dyoso. (Mat. 22:36, 37) Anka Satana atompo kwabuula eshimba dyetu, bwa’shi tufule bintu abitulesha uno ndumbulwilo​—bintu byabadi bashikwe kwi Yehowa. (Shak. 4:4; 1 Yo. 2:15, 16) Na su tatwi bebikite, etubingabinga bwa’shi tutupilwe miya ya Yehowa.

7. Mmushindo kinyi watufwalaa kululama bu ngabo?

⁷ Atufwala kululama bu ngabo nsaa y’atukumina miya ilulame ya Yehowa pabitale ki buwa na ki bubi, na patudi na nshalelo mwipushene na yaya miya. (Mis. 97:10) Bangi mbalombe kupwandjikisha’shi, miya ya Yehowa ayibakutshishwa bulungantu bwabo. Anka, su twaleka kutumikila mayi a kulonda e mu Bible mu nshalelo etu, atwikala nka bi musalayi bakatusha ngabo munkatshi mwa ngoshi mwanda apwandjikisha’shi ibakidi bushito. Kukita bino nkukutwa kwa binangu! Bwa boso bafule Yehowa, miya yaye, ‘ta mbushito bwibatentekwe,’ kadi ayipasha muwa.​—1 Yo. 5:3.

8. Kwikala belumbule bwa kulungula mukandu wibuwa wa kufukama na kwiufwala bu bilato ku ngwa yetu akulesha kinyi?

⁸ Mpoolo etunyingisha bwatudya kwikala belumbule bwa kulungula mukandu wibuwa wa kufukama, na kwiwufwala bu bilato ku ngwa yetu. Bino abipatula’shi abitungu twikale belumbule nsaa yoso bwa kulungula mukandu wibuwa wa Bufumu. Nsaa y’atulungula bangi mukandu wi mu Bible, lukumino lwetu alunyingi. Abitunyingisha ngofu pa kumona bi mwilo wa Yehowa pa nsenga ishima, aukimbi mishindo ya kulungula mukandu wibuwa ku mudimo, mu kalasa, mu kisalwe, ku nshibo na nshibo, p’abende mu kutala bena kifuko nabo sunga p’abesamba na bantu babeukena nabo mpa na nsaa yabadi ku mashibo kwabo tabatuku. Su twapusha moo twaleka kukita mudimo wa bulungudi, atwikala nka bi musalayi afulu bilato byaye nsaa yadi mu ngoshi, yaya nsaa atapika ku mikolo. Abimwelela bukopo bwa kulwa ngoshi na kukutwa mushindo wadya kulonda mayi abamutumina kwi mukata aye.

9. Bwakinyi abitungu’shi tutwale ngabo mukata a lukumino?

 ⁹ Ngabo mukata a lukumino alesha lukumino lwatudi nalo kwi Yehowa. Twina lukumino’shi akalombasha milayilo yaye. Lukumino alwitukwasha bwa ‘kushima kaalo ka mikyetwe ya mubi.’ Bwakinyi abitungu tutwale uno ngabo mukata? Mwanda etukalwila ku malongyesha a madimi a bantu basumbule lukumino, sunga kukutwa kubofula p’abetusengye bwa lukumino lwetu. Su ta twi na lukumino, t’atwikala na bukome bwa kukambila bangi nsaa y’abetutakula mu kutupilwa miya ya Yehowa. Nsaa yoso y’atupele kukita kintu kyabadi bashikwe kwi Yehowa, patudi ku mudimo sunga ku kalasa, abilesha’shi twi batwale ngabo etu mukata. (1 Mp. 3:15) Nsaa yoso y’atupele kukita mudimo ulombene kwitupa makuta e bungi, na wa kwitukutshishwa nsaa ya kufubila Yehowa, abilesha’shi twi batwale ngabo etu mukata. (Eb. 13:5, 6) Nsaa yoso yatukwete kufubila Yehowa sunga twekala mu kubingwabingwa, ngabo etu mukata kwete kwitukalwila.​—1 Tes. 2:2.

10. Kifulu kya kipandjilo akipatuula kinyi, na bwakinyi abitungu twikifwale?

¹⁰ Kifulu kya kipandjilo nyi ndukulupilo lwitupe Yehowa, lukulupilo lwa’shi etupasha ku  lufu na kupa boso abakitshi akikyebe eshimba dyaye bwedi. (1 Tes. 5:8; 1 Tim. 4:10; Tt. 1:1, 2) Nka bi kifulu akikalwila mutwe wa musalayi, lukulupilo lwa kipandjilo namu alukalwila ngyelelo etu a binangu. Mu mushindo kinyi? Lwalwa lukulupilo alwitukwasha bwa kutula binangu byetu ku milayilo y’Efile Mukulu, na kwikala na mweneno e buwa pabitale nkalakashi yatudi nayo. Mmushindo kinyi watufwala kino kifulu? Atukitshi bino pa kumona myanda mu mushindo awiyimonaa Efile Mukulu. Bu kileshesho, t’atutulu lukulupilo lwetu ku bupeta bwa bisumanga nya, anka atwilutulu mwi Efile Mukulu.​—Mis. 26:2; 104:34; 1 Tim. 6:17.

11. Kimpulu kya kikudi akipatula kinyi, na bwakinyi abitungu twikifubishe?

¹¹ Kimpulu kya kikudi nyi Eyi dy’Efile Mukulu, Bible. Kino kimpulu ki na bukome bwa kutshiba madimi a mishindo yoso na kukatusha bantu ku bupika bwa malongyesha a madimi na byubishi bi bubi. (2 Kod. 10:4, 5; 2 Tim. 3:16, 17; Eb. 4:12) Atulongo bya kufuba na kino kimpulu, nsaa y’atwilongyela na p’atupete malongyesha aafiki kwi ndumbulwilo a Efile Mukulu. (2 Tim. 2:15) Kukatusha bino bina ngoshi, Yehowa etupa ungi mushindo wi buwa awitukalwila. Mmushindo kinyi?

12. Nkinyi dingi kyatudi nakyo lukalo, na bwakinyi?

¹² Musalayi auku bya kulwa ngoshi kalolo, ashingula’shi ta mulombene kutshokola kilwilo kya basalayi kikata bupenka bwaye nya; e na lukalo lwa bukwashi bwa benaye. Bi mumune, tatwi balombene kutshokola Satana na bantu baye bupenka bwetu nya; twi na lukalo lwa bukwashi bwa bakwetu balume na bakashi. Yehowa mwitupe “bakwetu booso” be mu nsenga ishima, be kwanka bwa kwitukwasha.​—1 Mp. 2:17.

13. Muyile Bena-Ebelu 10:24, 25, mbukwashi kinyi bwatupetaa p’atutwele mu bisangilo byetu?

¹³ Umune wa ku mishindo y’atupetaa bukwashi, nyi mpa kutwela mu bisangilo. (Badika Bena-Ebelu 10:24, 25.) Atwe boso, atubofulaa ku mashimba ingi nsaa, anka bisangilo abitunyingishaa. Myalulo ayitushaa bakwetu balume na bakashi mu bisangilo, ayitunyingishaa. Miisambo na maasha a bileshesho abakitshi mwanka, abinyingisha kitshibilo kyetu kya kufubila Yehowa. Na, miisambo y’atwisamba kumpala na kunyima kwa bisangilo, ayitunyingishaa. (1 Tes. 5:14) Na dingi bisangilo byetu abitupaa mushindo wa kupeta muloo autukila mu kukwasha bangi. (Bik. 20:35; Lom. 1:11, 12) Bisangilo byetu abitukwasha dingi mu ingi mishindo. Abilongamisha mayele etu, twi kwamba’shi abitukwasha bwa kwikala balungudi na balongyeshi be buwa. Bu kileshesho, atulongo bya kufubisha bina mudimo bi mu kashete ketu kalolo. Byabya, lumbula bisangilo kalolo. P’odi mu bisangilo, temesha kalolo. Kunyima kwa bisangilo, tumikila myanda ibolongo. Su bokitshi byabya, wekala “musalaayi ebuwa a Kidishitu Yesu.”​—2 Tim. 2:3.

14. Bungi bukwashi kinyi bwatudi nabo?

¹⁴ Atupete dingi bukwashi bwa midiyala ya ba mikeyilu be bukome. Banda kunangushena ku kilombene kukita penda mwikeyilu umune! (Yesh. 37:36) Binobino banda kunangushena kilombene kukita kilwilo kya ba mikeyilu. Ta kwi muntu sunga demo mulombene kutshokola kilwilo kya Yehowa ki bukome. Yehowa sha bukome boso padi ku lupese lwetu, atwikala na bukome bwi bungi kukila beshikwanyi netu sunga bekala bungi bwi naminyi. (Bans. 6:16) Eyendo’shi bino mbya binyibinyi! Tentekyesha ino myanda nsaa y’obofula kwishimba, pa mwanda wa byabakwamba sunga  nkukitshina kwi mwina mudimo nobe, mwina kalasa nobe sunga mwina kifuko nobe. Tentekyesha’shi twe bupenka mu ino ngoshi nya. Okwete kulonda bukunkushi bwa Yehowa, na kwete nkukwasha.

15. Muyile Yeeshaya 54:15, 17, bwakinyi ta kwi kintu kilombene kwimika mwilo w’Efile Mukulu bwa kulungula mukandu wibuwa?

¹⁵ Uno ndumbulwilo akunkushibwa na Satana, e na tubingilo twi bungi twa kwitushikwa. T’atutwelakanaa mu myanda ya politike na kulwa ngoshi nya. Atuukisha Bufumu bw’Efile Mukulu na kulungula bantu’shi, nka penda Bufumu bwaye nyi abutwadila bantu butaale, na atukokyela miya yaye ilulame. Atulungula bantu’shi mfumu a uno ndumbulwilo nsha madimi, na ayipayishenaa. (Yo. 8:44) Na atulungula bantu’shi kabutu ka uno ndumbulwilo a Satana takadi pepi. Sunga naminyi, Satana na bantu baye, ta mbalombene kwitwimika bwa kulungula mukandu wibuwa nya. Anka, atukitshi mwetu moso bwa kutungunuka na kutumbisha Yehowa. Sunga Satana ekala na bukome bwi naminyi, ta mulombene kwimika mukandu watukwete kulungula bantu mu nsenga ishima. Atwibikitshi mwanda Yehowa kwete kwitukalwila.​—Badika Yeeshaya 54:15, 17.

16. Yehowa akapasha mwilo waye mu mpombo ikata naminyi?

¹⁶ Nkinyi akikakitshika mu mafuku e kumpala? Mu mpombo ikata, Yehowa aketupasha mu mishindo ibidi ya kukanya. Wa kumpala, akapasha bafubi baye basha lulamato nsaa y’akatakula ba mfumu ba pa nsenga bwa kubutula Babilone Mukata, nsangilo a bipwilo bya madimi. (Kibaf. 17:16-18; 18:2, 4) Wa kabidi, akapasha mwilo waye nsaa y’akabutula bingi bipindji bya ndumbulwilo a Satana ku Armagedone.​—Kibaf. 7:9, 10; 16:14, 16.

17. Su twashaala ku lupese lwa Yehowa atupete bukwashi kinyi?

¹⁷ Su twashaala nka ku lupese lwa Yehowa, Satana ta mukumbene kwitukyengyesha bwa loso nya. Anka, aye nyi abakabutula bwa loso. (Lom. 16:20) Byabya, fwala bina ngoshi byoso​—kushi kwibifuula! Tokumanga kulwa ngoshi na Satana na ndumbulwilo aye bupenka bobe nya. Kwatshishena bakwenu balume na bakashi. Na olonde bukunkushi bwa Yehowa. Su bokitshi byabya, shinkamisha’shi Nshobe a kifulo e mwiyilu, akunyingisha na nkukalwila.​—Yesh. 41:10.