Mu Anglais, kishima “aamene” akipushisha’shi “bikale nka byabya,” sunga’shi “nnabyo.” Akifiki ku kishima kya mu kina Ebelu akilesha “kwikala na lulamato,” sunga “kukulupila.” Ingi nsaa abaadi abekifubisha mu myanda ya mbulamatadi. Kunyima kwa kwela mutshipo, muntu baadi amba’shi, “aamene” bwa kushinkamisha’shi myanda ibakula ngyeyendo, na’shi bakumiina’shi mwanda oso aufiki aunsangana. (Mb. 5:22) Nsaa yakula patoka’shi “aamene,” baata kitshibilo kya kulombasha mulayilo waye.—Ne. 5:13.

Kileshesho kikata akilesha mushindo ubabadi abafubisha kishima “aamene” ki mu mukanda wa Miiya Ikituulwe shapitre 27. Kunyima kwa beena Isaleele kutwela mu Nsenga ya Mulayilo, abaadi bebungye pankatshi pa Mwengye wa Ebale na wa Gerizime bwa kutemesha Mwiya. Tababaadi kwanka penda bwa kuteemesha nya kadi abadi kwanka bwa kukumiina Mwiya. Abakitshine byabya p’abo kwamba’shi “aamene!” sunga nsaa ibabadi ababadika dinyooka dyabapete su bakutwa kukokyela. (Miy. 27:15-26) Banda kunangushena mayi a binunu na binunu bya bantu, balume, bakashi mpa na bana abatuusha ngaluulo yabo! (Yos. 8:30-35) Tababadi balombene kuluba mayi ababadi baluule dyadya efuku nya. Bena Isalele babalamine eyi dyabo, bu byabadi bebileshe’shi: “Beena Isalêle abakôkyêle Yehowa mu mafuku oso a mûwa wa Yooshwa na wa bakulu abafwile ku nyima kwa lwê lufu, baba abamwene byoso by’ababakitshinyîne bena Isalêle kwi Yehowa.”—Yos. 24:31, EEM.

Yesu baadi namu mufubishe kishima “aamene” bwa kushinkamisha’shi, mayi abaadi akula ng’eyendo, kadi bekyakwile mu mushindo wi pa bwao. Pamutwe pa kwakula “aamene”  kunyima kw’aye kuteemesha mwanda wabakula kwi ungi muntu, Yesu baadi akula “aamene” kumpala kw’aye kwakula mwanda kampanda, bwa kulesha’shi ngw’eyendo. Ingi nsaa, baadi ekyambuula’shi “aamene, aamene.” (Mat. 5:18; Yo. 1:51) Baadi ashinkamiisha bantu abaadi abamuteemesha’shi kwete kwakula penda bya binyibinyi. Yesu baadi akula na kwakwa kushinkamisha koso mwanda, aye nyi baadi na matalwa a kulombasha milayilo y’Efile Mukulu yoso.—2 Kod. 1:20; Kibaf. 3:14.

Beena Isaleele abaadi dingi abamba “aamene” nsaa ibabadi abatumbisha na kuteka Yehowa. (Ne. 8:6; Mis. 41:13) P’abo kwakula’shi “aamene” kunyima kwa luteko, abaadi abalesha’shi abakumiina bibabakula mu luteko. Bantu boso abadi na kya kulangwila Yehowa mu wawa mushindo. Nyi kibakitshikile pabaadi Nfumu Daavide mwende na Musheete wa Yehowa ku Yeelusaleme. Nsaa ibabakitshine musangelo, belele luteko n’eshimba dyoso, luteko lwabadi bafunde bu musambo mu mukanda wa 1 Myanda 16:8-36. Bishima byaye bibebakumine ngofu, “na mwilo ushima ubambile’shi “aamene!” tumbishayi Yehowa.” Oolo, abaadi na muloo wa kutumbisha Yehowa pamune.

Bena Kidishitu ba mu siekele a kumpala abaadi abafubisha kishima “aamene” nsaa ibaabadi abalangwila Yehowa. Bafundi ba Bible mbekifunde mu mikanda yabo. (Lom. 1:25; 16:27; 1 Mp. 4:11) Mukanda wa Kibafumbwilwe aulesha’shi bipangwa bya mu kikudi bya mwiyilu abitumbishaa Yehowa pa kwamba’shi: “Aamene! Aleluuya!” (Kibaf. 19:1, 4) Bena Kidishitu ba kumpala abaadi na kyubishi kya kwambashi, “aamene” mu luteko lwa ku nfudilo kwa bisangilo. (1 Kod. 14:16) Kadi, ta nkishima kibaabadi abamba bisumanga kushi kunangushena nya.

Kunyima kw’atwe kulonga bibaadi bafubi ba Yehowa bafubishe kishima “aamene,” twi kupusha  bwakinyi kwamba’shi “aamene” nyi mushindo wibuwa wa kufudiisha luteko. Nsaa yatwikyakula ku nfudilo kwa luteko lwetu, atulesha’shi byatubakula mbyeyendo. Nsaa yatwamba’shi “aamene” sunga mundamunda, ku luteko lwa bantu boso, atulesha’shi tubakumiina bibabamba. Tutaluleye bwakinyi “aamene” eetu e dingi na muulo.

Atutemeshaa kalolo nsaa yabakitshi luteko mwanda nkipindji kya lulangwilo lwetu. Atulangwilaa Yehowa mu luteko, kushi penda mu byatwakula, kadi mpa na mu bikitshino. Bu byatukumiina kwakula “aamene” a binyibinyi abitukwasha bwa kutee matwi na kutuula binangu byetu ku luteko.

Atwibungu pamune bu balangwidi. Luteko lwa bantu boso alukaka binangu byetu ku myanda ayipusha kakongye kashima. (Bik. 1:14; 12:5) Nsaa yatwakula “aamene” pamune na bakwetu bena Kidishitu, byabya abinyiisha kwitubunga. Nsaa yatwakula pamune “aamene” mundamunda sunga n’eyi di bukopo, byabya abitakula Yehowa bwadya kwitukitshina myanda yatumutekye.

Atutumbishaa Yehowa. Yehowa amonaa sunga tu myanda tupeela twatukitshi bwa kumulangwila. (Luk. 21:2, 3) Amonaa bi mu binangu byetu na bi mwishimba. Sunga nsaa yatuteemesha luteko lwa ku bisangilo ku telefone, tushikamishe shi “aamene” eetu atwamba na kwiyisha Yehowa kwete kumona. Nsaa ya twamba “aamene”, tukwete kutubisha Yehowa pamune na bakwetu be mu bisangilo.

“Aamene” etu e kumweneka bu shi na muulo, anka e na muulo ukata. Ungi mukanda wa encyclopédie biblique awamba’shi: “Ku bukwashi bwa kino kishima, bafubi b’Efile Mukulu mbalombene kulesha’shi be na lukulupilo alukatukila mwishimba.” Atwe boso, “aamene” eetu asankishe Yehowa.—Mis. 19:14.