1. Adame na Eeva abaadi bashimishe kinyi, na mbipeta kinyi bibaadi bituukye?

NNANYI omono shi e na matalwa a kwela miiya pabitale kibuwa na kibubi? Pabaadi Adame na Eeva badye kikuba kya mutshi wa kuuka buwa na bubi, babaadi baleshe patoka shi: Tababaadi abakulupila Yehowa na miiya yaye. Abasangwile bwa kwielela miiya pabitale kibuwa na kibubi. (Kib. 3:22) Kadi banda kunangushena bintu byabadi bashimishe. Abashimishe kipwano kyabo na Yehowa. Abashimishe dingi muwa wa loso, na abaadi bambukiishe bana babo mulwisho na lufu. (Lom. 5:12) Kitshibilo kya Adame na Eeva kibafwishishe makyenga.

2-3. (a) Mwina Etshyopii bakitshine kinyi kunyima kwa’bo kumulungula mukandu wi buwa kwi Fidipe? (b) Mmyabi kinyi yatupete nsaa yatubatshishibwa, na nkonko kinyi yatukyebe kutaluula?

² Pwandikisha bibaakitshine Adame na Eeva na bibaadi bikite mutungulwe mwina Etshyopii nsaa ibabadi bamulambukishe. Mwina Etshyopii balesheshe lutumbu lukata bwa bibaadi bimukitshine Yehowa na Yesu, aye nkukumiina kubatshishibwa mususa umune. (Bik. 8:34-38) Nsaa yatwilambula kwi Efile Mukulu, na kubatshishibwa bu bibakitshine mwina Etshyopii, atulesha patoka shi, twi na lutumbu bwa byabadi betukitshine kwi Yehowa na Yesu. Atulesha dingi’shi, twibakulupile Yehowa, na shi nka penda aye nyi mulombene kwitwelela miiya pabitale kibuwa na kibubi.

³ Tubande kunangushena ku myabi yatukwete kupeta nsaa yatufubila Yehowa! Mwabi umune ngwa shi, Yehowa aketupa byoso bibaadi Adame na Eeva bashimishe, mpa na mushindo wa kupeta muwa wa loso. Yehowa mmwitufwile  lusa, na mmwitupe kondo k’eshimba ke selele, mwanda tubaadi baleshe lukumiino mwi Yesu Kidishitu. (Mat. 20:28; Bik. 10:43) Twi bekale mu kifuko kya bafubi ba Yehowa baadi mukumiine, be na lukulupilo lwa myanda ibuwa ayifiki mu mafuku e kumpala. (Yo. 10:14-16; Lom. 8:20, 21) Sunga mbyakudi ino myabi yoso, bangi bantu bapwe kuuka Yehowa bakwete kwikaka bwa kulonda kileshesho kya mwina Etshyopii. Nkinyi kikumbene kwibakutshishwa kubatshishibwa? Na mbikunyi byabadi balombene kukambila ino nkalakashi?

4-5. Nkalakashi kinyi ibaadi ifumankane nayo nsongwalume abetamina bu Avery na nsongwakashi abetamina bu Hannah?

⁴ Kwimona bu bashi balombane. Baledi ba Avery mba Temwe ba Yehowa. Nshaye e na nkumo ibuwa apasukilaa ba kwaye na mmukulu ebuwa. Kadi, Avery badi atshinyi kubatshishibwa. Bwakinyi? Amba’shi: “Naadi nanangushena shi, ntangobesha kwikala na nkumo bu ya Papa.” Avery baadi anangushena dingi shi takekala na ngobesha ya kulombasha mashito abadi balombene kumupa mu mafuku aafiki. Amba dingi’shi: “Naadi natshinyi kwela luteko mbalo i bantu bebungi, kukita mwisambo sunga kukunkusha kasaka ka mudimo wa bulungudi.”

⁵ Hannah, e na bipwa 18, tabaadi emono bu mulombane nya. Abaadi bamukushe kwi baledi bafubi ba Yehowa. Sunga mbyabya, badi amono’shi te bya kwikala na nshalelo mwipushene na miiya ya Yehowa. Bwakinyi? Hannah tabaadi eata dingi na muulo nya. Ingi nsaa, baadi apusha bibubi mu kipaso kibadi mubangye kwikengyesha aye nabene, byabya bibadi abinyisha kulwisha myanda. Amba’shi: “Ntshinadi mulungule muntu su ngumune, binakitshine, sunga baledi bande, na dingi, nadi napwandikisha’shi Yehowa te bya kukumina’shi ngikale mufubi aaye mwanda wa byabya binadi nekitshi.”

6. Nkinyi kibaadi akyalusha Vanessa kumongo bwa kubatshishibwa?

⁶ Bukitshishi bwa ba kuuku. Vanessa, e na bipwa 22, Amba’shi: “Naadi na loole ande e buwa atubadi beukene naye munda mwa bipwa bibungi.” Anka, loole a Vanessa shibaadi Temwe, tabaadi amukwasha bwa kulombasha mpàngo yaye ya kubatshishibwa. Byabya bibadi abikalakasha Vanessa, amba’shi: “Ntshinadi na mushindo wa kupeta ba loole, na naadi namono shi su natshiba naye bu loole tampete ungi loole nya.”

7. Nsongwakashi abetamina bu Makayla baadi apusha moo wa kinyi, na mbwakinyi?

⁷ Moo wa kukita milwisho ikata. Makayla baadi na bipwa bitano pababatushile  tutw’aye mu kakongye. Pabaadi ende na kukula, bamwene shi bikitshino bya tutw’aye bibaadi binyongoshe baledi baye ngofu. Amba’shi: “Naadi natshinyi shi, su nabatshishibwa ne kukita mulwisho bantusha mu kakongye, na byabya bi kwinyongosha baledi bande bikata.”

8. Nsongwalume abetamina bu Miles baadi atshinyi kinyi?

⁸ Moo wa bulwishi. Nshaye na Miles na mukashi a nshaye mba Temwe ba Yehowa, kadi nyinaye ta Temwe a Yehowa nya. Miles Amba’shi: “Naadi mushaale na mama munda mwa bipwa 18, na naadi na moo wa kumulungula shi nakyebe kubatshishibwa. Mwanda nauku bibakitshine pabaadi Papa mufikye bu Temwe. Naadi natshinyi tulee tubaadi mulombene kungyela.”

9. Nkinyi akikitshika nsaa yolongo bi kifulo na lwishinko lwa Yehowa?

⁹ Adame na Eeva abapelele kufubila Yehowa mwanda tababaadi bamufule bikata. Sunga mbyabya, Yehowa bebalekyele na muwa bipwa bibungi bwabadya kutanda bana na kusangula abo banabene kipaso kyabadya kwibakusha. Bipeta bya kitshibilo kya Adame na Eeva kya kupela kukokyela Yehowa bibalesheshe patoka shi, abaadi bakutwe binangu. Mwan’abo a kumpala bayipayile mwin’aye, na bipwa kunyima, buntomboshi na kwifula bibaudile mwi bantu. (Kib. 4:8; 6:11-13) Anka, Yehowa baadi na mushindo wa kupasha bana ba Adame na Eeva be na lukalo lwa kumufubila. (Yo. 6:38-40, 57, 58) Nsaa yolongo bi kifulo na lwishinko lwa Yehowa, kifulo kyobe bwaye akitama. Opele kulonda eshinda dya Adame na Eeva na welambula kwi Yehowa.

10. Bwakinyi kunangushena ku mukanda wa Misambo 19:8 kwi nkukwasha bwa kufubila Yehowa?

¹⁰ Tungunuka na kulonga pabitale Yehowa. Nsaa ywende na kulonga pabitale Yehowa, wekala mushinkamishe shi oobesha kumufubila. Avery, atutemunanga kunundu, amba’shi: “P’ami kubadika na kunangushena ku mulayilo wi mu Misambo 19:8, (Badika.) namwene’shi ne mulombane.” Pabaadi Avery mumone bibaadi Yehowa mwibilombashe, kifulo kyaye bw’Efile Mukulu kibatamine. Kifulo akitukwasha  bwa kuuka shi twi balombane bwa kufubila Efile Mukulu na bwa kukita myanda ayimusankisha. Hannah, atutemunanga kunundu, amba’shi: “Mu kubadika na kwilongyela kwande kwa Bible, nafikile mu kumona shi, nsaa yanekitshina ami nabene bibubi, nkwete nakitshina Yehowa bibubi.” (1 Mp. 5:7) Hannah babangile ‘kutumikila Eyi d’y’Efile Mukulu.’ (Shak. 1:22, Kilombeeno kipya 2014) Mbipeta kinyi bibatukile? Amba’shi: “Panamwene muulo winao kukokyela Yehowa, kifulo kyande bwaye kibatamine ngofu. Binobino nemushinkamishe shi Yehowa ekala ankunkusha nsaa yoso yandi na lukalo lwa bukwashi.” Hannah baadi mupete ngobesha ya kukambila binangu bya kwikitshina bibubi. Belambwile kwi Yehowa na aye nkubatshishibwa.

11. Nkinyi kibakitshine Vanessa bwa kupeta ba loole bebuwa, na nkinyi kyatulongyela kwanka?

¹¹ Sangula ba kuuku bobe kalolo. Vanessa atutemunanga kunundu, bamwene’shi loole aaye baadi amukutshishwa kufubila Yehowa. Batshibile bu loole bwabo. Kadi Vanessa bakitshine bibungi. Baadi mwitatshishe bwa kupeta ba loole bapya mu kakongye. Bambile’shi kileshesho kya Nowa na kifuko kyaye kibamukwashishe bikata. Amba’shi: “Abaadi munkatshi mwa bantu bashibaadi bafule Yehowa, kadi abaadi mu bu kuuku bwibuwa.” Kunyima, Vanessa baadi mubatshishibwe, aye nkufika mbala-mashinda. Amba binobino’shi: “Bino mbinkwashe bwa kupeta ba loole bebuwa kushi penda mu kakongye ketu, kadi mpa na mu tungi tukongye.” Obe namu we kupeta ba loole sunga bakuku bebuwa nsaa yofubu mudimo wabadi bakupe kwi Yehowa ngofu.—Mat. 24:14.

12. Adame na Eeva abakutshilwe moo wa kinyi, na nkinyi kibadi kibafikile?

¹² Ikala na nkatshinkatshi pabitale moo. Ungi moo wi buwa kwatudi. Bu kileshesho, abitungu twikale na moo wa kukita myanda ayinyongosha Yehowa. (Mis. 111:10) Su Adame na Eeva abadya kwikala na wawa moo, tababadya kutombokyela Yehowa nya. Kadi abaadi bamutombokyele. Kunyima kw’abo kumutombokyela, meso aabo ababulukile abo nkushinguula’shi abafiki bena milwisho. Abadi balekyele bana babo mulwisho na lufu. Bu bibabadi bashinguule shi abatupilwa mwiya w’Efile  Mukulu, ababangile kupusha bufu.—Kib. 3:7, 21.

13-14. (a) Muyile mukanda wa 1 Mpyeele 3:21, bwakinyi tabitungu’shi twikale na moo ukilekile wa lufu? (b) Nkabingilo kinyi katudi nako ka kufula Yehowa?

¹³ Bu byatudi na moo wa kupela kwinyongosha Yehowa, t’abitungu twikale na moo ukilekile wa lufu nya. Yehowa mmwitupe mushindo wa kupeta muwa wa loso. Su twakita mulwisho na twelanga kwishimba mu binyibinyi, Yehowa etufwila lusa. Etufwila lusa mwanda wa lukumiino lwetu mu mulambu wa nkulo wa Mwan’aye. Mushindo umune ukata watulesha lukumiino mpa kulambula muwa wetu kwi Efile Mukulu na kubatshishibwa.—Badika 1 Mpyeele 3:21.

¹⁴ Twi na tubingilo twibungi twa kufula Yehowa. Tetupeya penda bintu abitukwashaa efuku dyoso nya, kadi etulongyesha dingi bya binyibinyi pabimutale na pabitale mpàngo yaaye. (Yo. 8:31, 32) Mmwitupe kakongye ka bena Kidishitu bwa kwituludika na kwitukwasha. Kwete kwitukwasha bwatudya kunyingiila nkalakashi yetu, na mmwitupe lukulupilo lwa kwikala na muwa wa loso na nshalelo e buwa mu mafuku aafiki. (Mis. 68:19; Kibaf. 21:3, 4) Nsaa yatunangushena pabitale myanda itukitshine Yehowa bwa kwitulesha shi mmwitufule, byabya abitutakula mu kumufula. Dingi, nsaa yatufulu Yehowa, atwikala na nkatshinkatshi pabitale moo watudi nao. Tatukumiina kulwishisha Yawa atudi bafule bikata nya.

15. Mbikunyi bibaadi Makayla mukambile moo wa kukita milwisho?

¹⁵ Makayla, atutemunanga kunundu, baadi mukambile moo wa kukita mulwisho nsaa ibaadi mushingule kipaso akifwilaa Yehowa bantu lusa. Amba’shi: “Namwene shi atwe boso twi bakutwe kupwidika na atukitaa milwisho. Naadi mushinguule dingi shi Yehowa mmwitufule na etufwilaa lusa ku bukwashi bwa nkuulo.” Kifulo kyaye bwa Yehowa kibaadi kimutakule mu kwilambula kwadi na kubatshishibwa.

16. Mbikunyi bibaabadi bakwashe Miles bwa kukambila moo wa kubingwabingwa?

¹⁶ Bu bibaadi Miles atshinyi shi nyinaye amwele tulee pa mwanda wa kitshibilo kyaye kya kubatshishibwa, batekyele bukwashi kwi mukunkushi a kifunda. Amba’shi: “Aye namu mmukule mu kifuko kibaadi penda na muledi umune Temwe. Baadi munkwashe bwa kunangushena pabitale kyandi mulombene kwakula bwa kupushisha mama shi kitshibilo kya kubatshishibwa nkitshibilo kyande, Papa takwete kuntakula pa bukopo bwa kubatshishibwa nya.” Nyinaye na Miles tabadi musankye na kyakya kitshibilo nya. Miles baadi mukatukye ku nshibo ya nyinaye, kadi bashele mulame nka kitshibilo kyaye. Amba’shi: “Kulonga pabitale myanda ibuwa yabadi bankitshine kwi Yehowa kubankumine kwishimba. Pa naadi na nangushena ngofu pabitale mulambu wa nkuulo wa Yesu, namwene’shi Yehowa  mmunfule bikata. Kyakya kinangu kibantakwile mu kwilambula kwi Yehowa na kubatshishibwa.”

17. Atwe boso twi na mushindo wa kulesha kinyi?

¹⁷ Pabaadi Eeva mudye kikuba kya ku mutshi wa mu Edene, baadi mupele kukokyela Nshaye. Pabaadi Adame mumulonde, bakutshilwe kulesha lutumbu bwa bintu byoso bibuwa bibaadi Yehowa mumukitshine. Atwe boso twi na mushindo wa kulesha’shi, ta twi bakumiine kitshibilo kibabadi baate kwi Adame na Eeva. Patubatshishibwa, atulesha Yehowa shi twi bakumiine’shi e na matalwa a kwitwelela miiya pabitale ki buwa na ki bubi. Atulesha shi twi bafule Nshetu na twi bamukulupile.

18. Mbikunyi byodi mulombene koobesha mudimo okitshina Yehowa?

¹⁸ Lukalakashi lwatupete kunyima kwa kubatshishibwa, ndwa kutungunuka na kukita akikyebe Yehowa, kushi kyatukyebe’twe banabene. Midiyo ya bafubi b’Efile Mukulu be na nshalelo e byabya. We mulombene kwikala na nshalelo e byabya nka su, otungunuka na kutamisha mpushisho oobe a Bible, Eyi dy’Efile Mukulu; kutwela mu bisangilo; na kulungula bangi na kisumi kyoso pabitale myanda yodi mulongye kwi Nshobe. (Eb. 10:24, 25) Nsaa yokyebe kwata bitshibilo, temesha malango aakupa Yehowa mu Eyi dyaye, na ku bukwashi bwa ndumbulwilo aaye. (Yesh. 30:21) Ku nfudiilo a byoso, oobesha nshalelo obe.—Nki. 16:3, 20.

19. Abitungu otungunukye na kutentekyesha kinyi, na bwakinyi?

¹⁹ Nsaa yotungunuka na kutentekyesha bukwashi bopetela ku bukunkushi bwa Yehowa, kifulo kyobe bwaye na bwa miiya yaye akitama. Dingi, takwi kintu su nkimune kilombene nkupa Satana, kikumbene nkwimika bwa kufubila Yehowa. Banda kunangushene mu bipwa kinunu. Okatentekyesha’shi kitshibilo kyobe kya kubatshishibwa kibadi kitshibilo ki buwa bwi kashaa!