1. Mbikunyi byatudi balombene kwambula Nshetu sha kifulo Yehowa?

YEHOWA mmwitufule bikata. (Yo. 3:16) Atukumiina kwambula Nshetu sha kifulo. Byabya, atwitatshisha bwa kulesha binangu bya ‘kwikwasheena, bu baana na baana, abesambeena’ na bantu boso, kadi bikishekishe na “bakwetu mu lukumiino.” (1 Mp. 3:8, Kilombeeno kipya 2014; Nga. 6:10) Nsaa i bakwetu bena Kidishitu na nkalakashi ayibenyongosha, atukumiina kwibakwasha.

2. Nkinyi kyatukyebe kutaluula mu uno mwisambo?

² Boso abakumiina kwikala bafubi ba Yehowa abafumankana na myanda ayibenyongosha. (Mak. 10:29, 30) Atufumankanaa dingi na nkalakashi ibungi mwanda nfudiilo a uno ndumbulwilo taadi peepi. Mbikunyi byatudi balombene kwikwashena? Tubandeyi kutaluula kyatudi balombene kulongyela ku bileshesho bya mu Bible pabitale Loota, Yoobo na Naomi. Atutaluula dingi nkalakashi yabakwete kufumankana nayo lelo uno kwi bakwetu bena Kidishitu na kumona byatudya kwibakwasha bwabadya kwiyinyingiila.

3. Bu byabadi bebileshe mu 2 Mpyeele 2:7, 8, nkitshibilo kinyi kibubi kibaadi Loota mwate, na mbipeta kinyi bibatukile?

³ Loota batshile kitshibilo kibubi p’aye kukumiina kushala munkatshi mwa bena Sodome, abaadi abakitshi myanda i butete bukile. (Badika 2 Mpyeele 2:7, 8.) Nsenga ibaadi bufukye bwibungi, kadi Loota bapetele nkalakashi ikile bungi p’aye kwenda mu kushala mu Sodome. (Kib. 13:8-13; 14:12) Abimweka’shi mukashi aaye baadi mufule dyadya eumbo bikata  sunga bantu ba mwanka, mu kipaso kibaadi mukutwe kukokyela Yehowa. Bashimiishe muwa nsaa ibaadi Yehowa munokyeshe kaalo na sufule mu kyakya kibalo. Banda kunangushena bwa bansongwakashi babidi ba Loota. Abaadi abebayila kwi ba nsongwalume abafwile mu Sodome. Loota bashimiishe nshibo yaye, bintu byaye, na lukalakashi lukile yoso, bashimiishe mukashi aaye. (Kib. 19:12-14, 17, 26) Yehowa baadi mukutwe lwishinko mu kino kipungo kibaadi Loota na ino nkalakashi su? Nya.

4. Mbikunyi bibaadi Yehowa muleshe lwishinko kwi Loota? (Tala kifwatulo ki ku kipusu.)

⁴ Sunga mbibaadi Loota musangule bwa nkashala mu Sodome, Yehowa bamupushishe lusa, atuma ba mikeyilu bwabadya kumupasha na kifuko kyaye. Kadi, pamutwe pa kukokyela musango umune abimulungula mikeyilu bwa kukatuka mu Sodome, Loota “banyengakananga.” Mikeyilu nkumukwata ku mboko bwa kumukwasha na kifuko kyaye bwa’shi basuukye mu dyadya eumbo. (Kib. 19:15, 16) Mikeyilu nkumulungula bwadya kusuukila ku myengye. Kadi pamutwe pa kukokyela akyamba Yehowa, Loota batekyele bwa kusuukila ku kibalo ki peepi. (Kib. 19:17-20) Na lwishinko looso, Yehowa baadi mutemeshe Loota na kumutadiila bwa kusuukila ku kyakya kibalo. Mafuku kunyima, Loota bapushishe moo wa kushala mu kyakya kibalo, aye nkwenda ku myengye, mbalo ibaadi Yehowa mumulungule kumpala bwadya kwikusuukila. (Kib. 19:30) Yehowa bamulesheshe lwishinko lukata! Mbikunyi byatudya kumwambula?

5-6. Mbikunyi byatudya kutumikila mayi e mu 1 Beena-Tesalonika 5:14 nsaa yatwambula Efile Mukulu?

⁵ Nka bu Loota, mukwetu mwina Kidishitu mmulombene kwata kitshibilo ki bubi na kyamutwadila nkalakashi ibungi. Su byabya byakitshika, twi kukita kinyi? Pangi twi kubanga kwakula’shi kwete kuumbula bibaadi mukune, na nkya binyi. (Nga. 6:7) Kadi, bi kwikala bikile buwa su twamukwasha mu kipaso kibaadi Yehowa mukwashe Loota. Kipaso kinyi?

⁶ Yehowa batumine mikeyilu kushi penda bwa kudimusha Loota, kadi, mpa na bwa kumukwasha bwadya kusuuka masaku abaadi na kya kufika mu Sodome. Mu mushindo umune, twibalombene kudimusha mukwetu su tubamono shi kwete kukita kintu kampanda kilombene kumufwishila masaku. Twibalombene dingi kumukwasha. Sunga akutwa kutumikila malango a mu Bible atumupa mususa umune, abitungu twikale na lwishinko. Twikaleyi nka bu baaba ba mikeyilu babidi. Pamutwe pa kubofula na kuleka yawa mukwetu, abitungu tukite kintu kampanda bwa kumukwasha. (1 Yo. 3:18) Abitungu tumukwate ku mboko mu kifwanyi, na kumukwasha bwadya kutumikila malango atubamupa.—Badika 1 Beena-Tesalonika 5:14.

7. Mbikunyi byatudi balombene kwambula kipaso kibaadi Yehowa amono Loota?

⁷ Yehowa badya kwimena nka pa bilubilo bya Loota. Kadi, bipwa kunyima, ku bukwashi bwa kikudi kyaye, batakwile Mpyeele mutumibwa bwadya kulesha Loota bu muntu mululame. Twi na muloo ukata mwanda Yehowa etulekyelaa bilubilo byetu! (Mis. 130:3) Twi balombene kwambula kipaso kibaadi Yehowa amono Loota su? Su twatuula binangu byetu penda ku ngikishi ibuwa ya bakwetu, atwikala na lwishinko bwabo. N’abo namu, abakumiina bukwashi bwatwibapa.

8. Lusa alwitutakula bwa kukita kinyi?

⁸ Mu kwilekena na Loota, Yoobo tabaadi mukengye mwanda wa kitshibilo kibubi nya. Kadi bapetele nkalakashi ikile bungi. Bashimiishe bintu byaye, kinemo kyaye, na baadi mukumbe ngofu. Kukila byabya, aye na mukashi aaye abaadi bafwishe bana babo booso. Yoobo  abaadi bamutopekye kwi ba kuuku baye be bubi basatu. Bwakinyi ba kuuku basatu be bubi ba Yoobo abakutshilwe kumupusha lusa? Mwanda abaadi abamono penda bi paasha, kushi bi munda. Bu kipeta, abedimbile abo nkutopeka Yoobo. Mbikunyi byatudi balombene kupela kukita kilubilo ki byabya? Abitungu tuukye’shi, nka penda Yehowa nyi auku byoso pabitale nshalelo a muntu. Teemesha abikulungula muntu akengye. Tompa kupusha bi kinyongwa kyaye na okite kintu kampanda p’amutwe akutemesha bisumanga. Paapa wekala na mushindo wa kwituula pa mbalo ya bakwenu bena Kidishitu.

9. Lusa alwitukwasha bwa kupela kukita kinyi, na bwakinyi?

⁹ Lusa alwitutakula bwa kupela kwipula bangi pabitale myanda yabakwete kufumankana nayo. Muntu ayipula bangi takwete kwibaka kakongye nya; kwete kwikalwisha. (Nki. 20:19; Lom. 14:19) Ta muntu ebuwa na te na binangu, dingi bishima byaye mbilombene kukengyesha yawa winyi kwete kukyenga. (Nki. 12:18; Ef. 4:31, 32) Nsaa yatutala penda ngikashi ibuwa ya muntu na kukimba bya kumukwasha bwadya kunyingiila nkalakashi yaye, atukitshi mwanda ukile buwa!

10. Mwanda wabadi baleshe mu mukanda wa Yoobo 6:2, 3 awitulongyesha kinyi?

¹⁰ Badika Yoobo 6:2, 3. Ingi nsaa Yoobo baadi ‘akula mufudiile.’ Anka, kunyima bakuminyine’shi myanda ibakwile ibubi. (Yob. 42:6) Nka bu Yoobo, muntu e na nkalakashi mmulombene kwakula myanda ibubi mwanda wa kufudiila, na kunyima abanga kwitopeka. Twi kukita kinyi? Pamutwe pa komutopeka, abitungu tumupushiishe lusa. Tutentekyesheyi’shi, Yehowa takumiina’shi muntu sunga ngumune a kwatudi apete nkalakashi sunga twinyongoshi twatudi nato lelo uno. Byabya,  su mufubi sha lulamato a Yehowa akula myanda ibubi nsaa yadi na kenyongoshi kakata, abitungu kumupusha. Sunga akula myanda ibubi pabitale Yehowa sunga pabitutale, tabitungu tumufitshile munda mususa umune, sunga kumutopeka bwa yaya myanda.—Nki. 19:11.

11. Mbikunyi bilombene bakulu kulonda kileshesho kya Eliwu nsaa yabatusha malango?

¹¹ Ingi nsaa, muntu kwete kulwa na mwanda aumwinyongosha ekalaa na lukalo lwa malango sunga bukwashi kampanda. (Nga. 6:1) Bakulu mbalombene kukila na uno mwanda naminyi? Abitungu bambule Eliwu, baadi muteemeshe Yoobo na lwishinko loso. (Yob. 33:6, 7) Eliwu baadi mulangye Yoobo kunyima kw’aye kutemesha binangu byaye. Bakulu abalondo kileshesho kya Eliwu abatemeshaa kalolo na abatompaa kupusha bi lukalakashi lwa muntu. Paapa, nsaa yabatusha elango mbalombene kukuma eshimba dya muntu.

12. Lufu lwa mulume a Naomi na lwa bana baye babidi, lubaadi na bukitshishi kinyi kwadi?

¹² Naomi baadi mwana mukashi sha lulamato baadi mufule Yehowa. Kadi kunyima kwa lufu lwa mulume aaye na lwa bana baye babidi, baadi mushintule eshina dyaye dya bu Naomi, aata dya bu “Mara,” adipushisha “Buulo.” (Lut. 1:3, 5, 20, 21) Luuta, mukashi a mwan’aye bashele mumulamate mu nkalakashi yaye yoso. Luuta tabaadi penda mukite myanda kampanda bwa kukwasha Naomi nya, kadi baadi dingi amulungula mayi a kumusamba nao. Luuta balesheshe’shi mmufule Naomi na kumukwatshishena mu bishima bipelepele na bibuwa.—Lut. 1:16, 17.

13. Bwakinyi abitungu tukwatshishene baaba bafwishe mwina dibaka nabo?

¹³ Nsaa i mwina Kidishitu afwisha mwina dibaka naye, abitungu tumukwatshishene. Bena dibaka abekalaa nka bu mitshi ibidi ayikulu pamune ilamatshishene. Mwenda bipwa, mishi ya yaya mitshi ayitwelena. Su batukula mutshi umune na wafwa, ungi mutshi ngulombene kukyenga ngofu. Mu mushindo umune, nsaa i muntu afwisha mwina dibaka naye, mmulombene kwinyongola bikata munda mwa mafuku ebungi. Paula, * sha mulume bafwile lufu lwa kibatu, amba’shi: “Nshalelo ande bashintulukile bikata, na ntshinadi dingi na bukome. Nashimiishe kuuku ande a p’eshimba. Naadi nesamba na mulume aande myanda yoso. Tubaadi atusanka pamune na baadi ankwatshishena mu bipungo bibukopo. Baadi antemesha nsaa yandi mukalakashwe. Napushishe nka bu’shi abantshibi mu bipindji bibidi.”

14-15. Mbikunyi byatudya kusamba muntu mufwishe mwina dibaka naye?

¹⁴ Mbikunyi byatudya kusamba muntu mufwishe mwina dibaka naye? Mwanda wa kumpala wi na muulo, nkwisamba naye, sunga wekala mukutwe kya kwakula. Paula, abatukatuka mu kwisambila amba’shi: “Napusha’shi lufu alubofushaa bantu ku mashimba. Be kumona’shi pangi myanda yabadi balombene kwakula i kutapa muntu kwishimba. Aku namu bi bubi bukile su bantu bapela kwakula.” Pangi muntu e na kinyongwa, tatengyela’shi twakule nka kintu kampanda akikumu kwishimba nya. Paula amba’shi: “Bibaadi abinsankisha bikata nsaa ibaadi ba loole bande abamba penda shi, ‘nenyongola byabya b’obe.’”

¹⁵ William, sha mukashi bafwile takudi ndambo ya bipwa, amba’shi: “Pabaadi bangi abandungula myanda ibuwa ibakitshine mukashi ande, bibaadi abinsankisha; bibaadi abinshinkamiisha’shi abaadi bamufule na kumunemeka. Kunkwatshishena mu wawa mushindo kubaadi bukwashi bukata kwandi. Bishima byabo  bibaadi abinyingisha, mwanda mukashi ande baadi na muulo ukata kwandi na baadi na mbalo ikata mu nshalelo ande.” Ungi mukashi kilele abetamina bu Bianca amba’shi: “Nsaa ibaadi bangi abele nami luteko na kubadika kifundwe kimune sunga bibidi, bibaadi abinyingisha byabya. Abinkwashaa nsaa yabakula pabitale mulume ande na p’abanteemesha nsaa yanebalungula pabimutale.”

16. (a) Nkinyi kyatudi balombene kukitshina muntu mufwishe muntu aadi mufule? (b) Muyile Shake 1:27, mbushito kinyi bwatudi nabo?

¹⁶ Nka bu bibaadi Luuta mulamate Naomi mukashi kilele, abitungu tutungunukye na kukwatshishena baaba bafwishe bantu babadi bafule. Paula, atutemunanga kumpala amba’shi: “Nka mulume ande ky’afu, bantu bebungi abaadi bankwashe na kunkwatshishena bikata. Mwenda mafuku, ababangile kwipana ku mifubo yabo. Anka, nshalelo ande baadi mupwe kushintuluka ngofu. Nyi mbukwashi bukata nsaa i bangi abashinguula’shi, abitungu kukwatshishena muntu e na kinyongwa munda mwa myeshi—sunga mwa bipwa—mupunda muntu abadi bafwishe.” Eyendo, bantu belekene. Bangi abashintuulaa nshalelo aabo mususa umune muyile myanda ibabafumankana nayo. Bangi namu, nsaa yoso yabakitshi myanda ibabadi abakitshi pamune na muntu abadi bafwishe, abibapa kinyongwa. Bantu abenyongolaa mu bipaso bilekene. Tutentekyesheyi’shi, Yehowa mmwitupe kineemo na bushito bwa kupasukila baaba bafwishe mwina dibaka nabo.—Badika Shake 1:27.

17. Bwakinyi abitungu tukwatshishene baaba babadi bapele kwi bena dibaka nabo?

 ¹⁷ Bangi bena dibaka be kwikala abalu na twinyongoshi, mwanda bena dibaka nabo mbebapele. Joyce sha mulume baadi mumupele enda kwi ungi mukashi, amba’shi: “Kinyongwa kya kutshiba dibaka, nkikile kya kufwisha mulume. Su badya kwikala mufwe ku masaku sunga bwa mukumbo kampanda, tabibadya kwikala bu kitshibilo kibaata. Kadi, pano mulum’ande bata kitshibilo kya kumpela. Bibaadi bingishe milongo bikile.”

18. Nkinyi kyatudi balombene kukita bwa kukwasha baaba bashi dingi na bena dibaka nabo?

¹⁸ Nsaa yatukitshina baaba bashi dingi na bena dibaka nabo tu myanda twa kalolo, atwibalesha’shi twibebafule. Bu bitabadi bupenka, be na lukalo lwa ba kuuku na ba loole bebuwa. (Nki. 17:17) Mbikunyi byodya kulesha shi we kuuku sunga loole aabo ebuwa? We kwibetamina ku nshibo koobe bwa kudya nabo pamune. We kukisha nabo nsaa pamune, mu kukisha kapapi sunga kutuuka nabo mu bulungudi. We kwibetamina ingi misusa mu lulangwilo lwenu lwa mu kifuko. Su okita byabya, osankisha Yehowa, mwanda “ee peepi naa bee na mashimba eenyongole” na “àsàmbiilaa bakashi-kilele.”—Mis. 34:19; 68:6.

19. 1 Mpyeele 3:8, etulungula’shi tukite kinyi?

¹⁹ Mu mafuku apeela’mu, nsaa ayikamunana Bufumu bw’Efile Mukulu pa nsenga, “mpombo ya kala ailubiibwa.” Tukwete kutengyela na mashimba kwiyilu nsaa ayikekala “bantu taabakatentekyesha dimo myanda ya-kala, taayibafwila dimo ku mashimba nyaa.” (Yesh. 65:16, 17) Tutungunukyeyi na kwikwashena, na kulesha mu ngakwilo na mu bikitshino byetu’shi, twibafule bena Kidishitu netu boso, mpa na apakafiki dyady’efuku.—Badika 1 Mpyeele 3:8.