1-2. (a) Muyiile mayi a Yesu e mu Mateo 28:18-20, mudimo wa kumpala wa kakongye ka bena Kidishitu mmudimo kinyi? (b) Atukaluula ku nkonko kinyi mu uno mwisambo?

ABIMWENEKA shi batumibwa babaadi na muloo nsaa ibabadi bebungye ku mwengye. Kunyima kwa kusanguka kwaye, Yesu bebalungwile bwabadya nkafumankana kwakwa. (Mat. 28:16) Pangi wawa ndjo mususa ubadi ‘mumwekyele bakwetu bakile pa 500.’ (1 Kod. 15:6) Bwakinyi Yesu badi mwitamine balondji baaye ku kino kisangilo? Mbwa kwibapa mudimo ukile buwa. Bebatumine’shi: “Ndaayi mu miilo yooso nwibeekashe buu balondji bande.”​—Badika Mateo 28:18-20.

² Balondji babadi bapushe mayi a Yesu, babafikile bena kakongye ka bena Kidishitu ba mu siekele a kumpala. Mudimo wa kumpala wa kaka kakongye ubadi wa kwikasha bantu bu balondji ba Kidishitu. * Lelo uno, kwi tukongye twi bungi twa bena Kidishitu ba binyibinyi mu nsenga ishima, na twi nka na wawa mudimo umune. Mu uno mwisambo, atutaluula nkonko inanka: Bwakinyi kwikasha bantu bu balondji kwi na muulo ngofu? Akutekye kinyi? Bena Kidishitu boso mbalombene kwikasha bantu bu balondji su? Na bwakinyi abitungu twikale na lwishinko p’atukitshi uno mudimo?

3. Muyiile mukanda wa Yowano 14:6 na 17:3, bwakinyi mudimo wa kwikasha bantu bu balongi wi na muulo ukata?

³ Bwakinyi kwikasha bantu bu balongi kwi na muulo? Mwanda nka penda balongi ba Kidishitu nyi bakumbene kwikala ba kuuku b’Efile Mukulu. Dingi, baba abalondo Kidishitu abalongamisha nshalelo abo binobino na be na lukulupilo lwa kwikala na muwa wa looso mu mafuku e kumpala. (Badika Yowano 14:6; 17:3.) Kushi mpaka, Yesu mwitupe mudimo ukata, anka tatwiukitshi bupenka bwetu nya. Mpoolo mutumibwa badi mwakule bwa’ye na bwa bangi bakwabo’shi: “Tukwete kufuba pamune n’Efile Mukulu.” (1 Kod. 3:9) Nyi nkinemo kikata kyabadi betupe kwi Yehowa na Kidishitu atwe bantu bakutwe kupwidika!

4. Kileshesho kya Ivan na Matilde akitulongyesha kinyi?

⁴ Mudimo wa kwikasha bantu bu balongi awitupa muloo wibungi. Banda kutala kileshesho kya Ivan na mukashi aaye Matilde ba mu Colombie. Babadi balambukishe mungi nsongwalume abetamina bu Davier, ebalungula’shi: “Nakumiina kushintuula myanda mu muwa wande, kadi bi bukopo.” Davier badi asha boxe, baadi atomo bintu abikolanaa bu kabangi, maalwa ebungi, na badi mushaale na Erika nsongwakashi ashii mwibakile. Ivan amba’shi: “Tubabangile kwenda mu kumutala mu kibundji kyabo ki kula, bibadi abitungu kwenda na nkinga munda mwa saa ikile bungi mwishinda dilwile. Erika babangile kulonga Bible, pabamwene bibadi bishintulukye nshalelo a Davier na mweneno aaye.” Mu kwenda kwa mafuku, Davier balekyele kutoma bintu abikolwana bu kabangi, maalwa, mpa na kwasha boxe. Akupu, aye nkwibakila Erika. Matilde amba’shi: “Nsaa ibadi Davier na Erika babatshishibwe mu 2016, tubatentekyeshe’shi Davier badi amba’shi, ‘nakumina kushintuluka kadi bi bukopo.’ Tubadi na muloo, atwe nkunosha mpolo.” Kushi mpaka, atupete muloo wibungi nsaa y’atukwasha bantu bwabadya kufika balongi ba Kidishitu.

5. Nkintu kinyi kya kumpala akitungu kukita bwa kwikasha bantu bu balongi?

⁵ Kintu kya kumpala kya kukita bwa kwikasha bantu bu balongi ‘nkukimba’ baba abakumiina kulonga myanda ya Yehowa. (Mat. 10:11) Nsaa yatulungula bantu batufumankana nabo pabitale Yehowa, atushinkamisha’shi twi ba Temwe ba Yehowa. Atushinkamisha dingi’shi twi bena Kidishitu ba binyibinyi nsaa yatulondo eyi dya Kidishitu dya kulungula mukandu wibuwa.

6. Nkinyi kikumbene kwitukwasha bwa koobesha mudimo wetu wa bulungudi?

⁶ Bangi bantu abakuminaa kulonga bya binyibinyi bya mu Bible, anka bebungi batufumankana nabo bwa musango wa kumpala be kumweneka bu bash’abakumina. Abitungu twi banyingishe bwabadya kulonga bibungi. Bwa kukita mudimo wetu kalolo, abitungu twilumbuule. Sangula miisambo ikumbene kusangasha bantu bofumankana nabo. Akupu olumbuule byodya kubanga mwisambo.

7. Mushindo kinyi odya kubanga mwisambo na muntu, na bwakinyi opwandikisha’shi bi na muulo kuteemesha bantu na kwibanemeka?

⁷ Bu kileshesho, we kwisamba na sha nshibo bino: “Nakyebe nkwipusha namu kano ka lukonko. Myanda yatudi nayo lelo uno ikwete kukwata bantu ba mu nsenga ishima. Opwandikisha’shi mbulamatadi a pano pa nsenga e kwiyipudisha su?” Akupu, we mulombene kwisambila Ndanyele 2:44. Sunga’shi we mulombene kwipusha’shi: “Mushindo kinyi wibuwa wa kulongyesha bana bwabadya kwikala na ngikashi ibuwa?” Akupu nwisambile Miiya Ikituulwe 6:6, 7. Sunga osangula  kwisambila mwanda kinyi, tula binangu kwi bantu abakakuteemesha. Nangushena pabitale byabidi bikumbene kwibakwasha su abalongo akilongyesha Bible. Nsaa ywesamba nabo, bi na muulo bwashi webateemeshe na kunemeka mweneno aabo. Su bokitshi byabya okebapusha kalolo, na abakakumiina nkuteemesha.

8. Bwakinyi abitungu twikale atwalukiila mu kutala bantu?

⁸ Kumpala kwa’shi muntu ate kitshibilo kya kulonga Bible, we mulombene kukisha nsaa ibungi na kwitatshisha bwa kwalukiila mu kwibatala. Bwakinyi? Mwanda bantu mbalombene kukutwa kwikala kwanka nsaa yatwibalukiila. Dingi, we mulombene kwalukiila misusa ibungi mu kwibatala kumpala kwa’shi bakumiine kulonga Bible. Tentekyesha’shi mutshi aukulaa kalolo su bakwete kwiwela mema nsaa yooso. Bi mumune, kifulo kya muntu bwa Yehowa na Kidishitu, nkilombene kutama nsaa yatukwete kwisamba myanda ya Mwiyi dy’Efile Mukulu misango ibungi.

9-10. Bwakinyi atwamba’shi mulungudi ooso mwina Kidishitu mmwipane mu kukimba bantu abakumiina kufika bu balongi?

⁹ Mulungudi oso mwina Kidishitu etatshishaa bwa kukwasha bantu basha mashimba ebuwa boso bapete. Uno mudimo twi kwiupwandikisha na kukimba mwana mushimine. Naminyi? Banda kutala kibadi kikitshikile mungi mwana a bipwa bisatu badi mushimine. Peepi bantu 500 babadi bepaane mu kumukimba. Nsaa peepi 20 na mwana kushimina, mungi muntu bamusangwile mu kisuku. Yawa muntu bapelele bwa’shi bamutumbishe mwanda basangana kaka ka nsongwalume. Bambile’shi:  “Tubapete mwana mwanda tubafubu pamune.”

¹⁰ Bantu bebungi mbashimine nka bu kano kana. Tabe na lukulupilo nya, be na lukalo lwa bukwashi. (Ef. 2:12) Atwe boso bantu bakile pa midiyo mwanda, tukwete kufuba pamune bwa kupeta bano bantu. We kukutwa kupeta muntu odya kulonga naye Bible. Kadi, bangi balungudi banulungula nabo mu teritware umune, be kupeta muntu akumiina kulonga bya binyibinyi bya mu Eyi dy’Efile Mukulu. Nsaa i mukwetu ekasha muntu bu mulongi a Kidishitu, boso abakwasha mu kukimba be na kya kusanka.

11. Sunga tokwete kulonga na muntu Bible, we mulombene kukwasha mu ingi mishindo kinyi bwa kwikasha bantu bu balongi?

¹¹ Su twe na bantu ba kulonga nabo Bible binobino, we kukwasha mu kwikasha bantu bu balongi mu ingi mishindo. Kileshesho, we mukumbene kukuukila bantu bapya na kwikala nabo bu kuuku nsaa yabafiki ku Nshibo ya Bufumu. Su bokitshi byabya, okwasha mu kwibashinkamisha’shi kifulo nyi kitundwilo kikata kya bena Kidishitu ba binyibinyi. (Yo. 13:34, 35) Ngaluulo yotusha mu bisangilo sunga yekala iipi, ngilombene kulongyesha bantu bapya byabadya kulesha bi lukumiino lwabo na mashimba abo ooso mpa na kanemo. We mulombene dingi kwenda na mulungudi mupya mu bulungudi mpa na kumukwasha bwadya kuuka bya kufuba na Bifundwe bwa kunangushena na bantu. Nsaa y’okitshi byabya, omulongyesha byadya kwambula Kidishitu.​—Luk. 10:25-28.

12. Bwa kwikasha bantu bu balongi abitungu twikale na ngobesha ikile bukopo su? Patuula.

¹² Muntu su ngumune a kwatudi, takumanga kupwandikisha’shi twi na lukalo lwa ngobesha ikile bukopo bwa kulongyesha bangi bwabadya kufika balongi ba Yesu. Bwakinyi? Banda kutala kileshesho kya mukwetu mukashi Faustina mushalele mu Bolivie. Tabadi na mushindo wa kubadika Bible nsaa ibaadi mufumankane na ba Temwe ba Yehowa bwa musango wa kumpala nya. Kubanga paapa, balongyele bya kuuka kubadika kapeela. Binobino mmupwe kubatshishibwa, na mmufule kulongyesha bangi. Ku lubingo looso kwete kulonga Bible na bantu batano. Sunga Faustina te na mushindo wa kubadika abibadika bantu bebungi balongaa nabo Bible, mmukwashe bantu basamombo mpa na byabadi babatshishibwe.​—Luk. 10:21.

13. Sunga twekala na bibungi bya kukita, myabi kinyi yatudi bakumbene kupeta mu mudimo wa kwikasha bantu bu balongi?

¹³ Bena Kidishitu bebungi be na bibungi bya kukita mwanda be na mashito e na muulo a kulombasha. Anka bakwete kwata nsaa ya kulonga Bible na bantu, na abapete muloo wibungi. Tala kileshesho kya Melanie a mu Alaska badi akusha mwana aaye mukashi a bipwa mwanda bupenka. Badi afubu mudimo ubadi  aumwata nsaa ibungi na kukwasha dingi muledi aye badi akumbu cancer. Melanie badi mu kibundji ki kula na bingi bibundji bya mu Alaska na baadi Temwe bupenka bwaye. Badi nka atekye bwa kupeta bukome bwa kukita bulungudi sunga pakudi mashika, mwanda badi akumiina kupeta muntu adya kulonga naye Bible. Aye nkwimonena na Sara, badi musangeele kulonga’shi Efile Mukulu e na eshina. Kunyima kwa mafuku Sara bakuminyine kulonga Bible. Melanie amba’shi: “Dingi efuku mu dya Katano ku kyolwa, nadi mukookye, anka ami na nsongwakashi ande tubadi bapete bukwashi nsaa ibatuyile mu kulonga Bible na bantu. Tubadi basangeele kukimba ngaluulo ku nkonko ya Sara, tubadi na muloo wa kumona bibaadi afiki bu kuuku a Yehowa.” Sara banyingile eshimba bwa kukambila mushikwa, aye nkutuuka mu kipwilo kibaadi na abatshishibwa.

14. (a) Mudimo wa kwikasha bantu bu balongi wi bu mudimo wa kuloba naminyi? (b) Mayi a Mpoolo e mu 2 Timote 4:1, 2 e na bukitshishi kinyi koodi?

¹⁴ Sunga omona’shi mudimo obe taukwete kutusha bipeta bibuwa, tokutwanga lukulupilo lwa’shi opete muntu mukumbene kufika bu mulongi. Tentekyesha’shi Yesu badi mupwandikishe mudimo wa kufwisha bantu bu balongi na kuloba mishipa. Balobi ba mishipa mbalombene kukisha nsaa ibungi kumpala kwa kukwata mushipa. Misusa ibungi abalobaa mpa na bufuku sunga nakashika futuu, na ingi nsaa abendaa na bwato ku ma mbalo e kula. (Luk. 5:5) Bi mumune, bangi balungudi abakishaa nsaa ibungi na lwishinko looso bwa “kuloba” mu nsaa na mu ma mbalo elekene. Bwakinyi? Bwabadya kupeta bantu bebungi.  Baba abafubu ngofu mu uno mushindo abapetaa bwedi pa kupeta bantu bebungi abakumiina mukandu w’atwibatwadila. We mulombene kutompa kulungula mu nsaa sunga mbalo yodya kupeta bantu su?​—Badika 2 Timote 4:1, 2.

15. Bwakinyi kulonga Bible na bantu akutekye kwikala na lwishinko?

¹⁵ Bwakinyi kulonga Bible na bantu akutekye kwikala na lwishinko? Kabingilo ka kumpala nka kukwasha bantu batukwete kulonga nabo Bible bwabadya kuuka na kufula malongyesha a mu Bible. Bibuwa twibakwashe bwabadya kuuka na kufula Yehowa, Sha Bible. Na kukatusha kulongyesha muntu akitekye Yesu kwi balongi baaye, bibuwa twibakwashe baukye mushindo wabadya kwikala bena Kidishitu ba binyibinyi. Abitungu twibakwashe na lwishinko looso bwabadya kuuka bya kutumikila mayi a kulonda e mu Bible. Bangi balongi ba Bible mbalombene kushintuula binangu na byubishi byabo penda mu myeshi ipeela. Bangi abakishaa mafuku ebungi.

16. Mwanda wa Raúl ubakulongyesha kinyi?

¹⁶ Mungi misionere a mu Peru badi mupete bipeta bibuwa mwanda wa lwishinko. Amba’shi: “Nadi na mulongi a Bible abetamina bu Raúl anadi mulongye naaye mikanda ibidi. Kadi badi na lukalakashi lukata mu nshalelo aaye. Badi na lukalakashi lukata mu dibaka, akula bishima bibubi, na badi na bana bashibadi abamunemeka. Byabya badi nka afiki mu bisangilo, nyi’mi nkubanga kwendanga mu kumutala bwa kumukwasha na kifuko kyaaye. Ne mumukwashe munda mwa bipwa bisatu, aye nkulombasha myanda itekibwe bwa kubatshishibwa.”

17. Atukesambila kinyi mu mwisambo aulondo?

¹⁷ Yesu mwitulungule’shi “ndaayi mu miilo yooso nwibeekashe buu balondji bande.” Bwa kulombasha wawa mudimo, atwisambaa na bantu be na mweneno mwilekene na etu, mpa na bantu bashabatwelaa mu kipwilo sunga bashi abakumina’shi, Efile Mukulu e kwanka. Mwisambo aulondo aukalesha mushindo watudi bakumbene kulungula mukandu wibuwa kwi bantu batukile mu ma mbalo elekene.