1-2. (a) Bwakinyi kukandjika mudimo wetu takwitukanyisha? (b) Nkinyi kyatukyebe kutaluula mu uno mwisambo?

MU 2018, balungudi ba mukandu wibuwa bakile pa 223 000 abaadi bashale mu maumbo mwababadi bakandjikye ingi midimo yetu sunga kukandika yoso. Bino tabitukaanyisha nya. Nka bu byatwikele bamone mu mwisambo ushale, bena Kidishitu ba binyibinyi abauku’shi abebabingabinga. (2 Tim. 3:12) Sunga twekala bashalele mbalo kinyi, bakata ba mbulamatadi be kushintuluka mususa umune na kukandjika lulangwilo lwetu lwa Yehowa.

² Su mbulamatadi a mbalo yanudi bashale enukandjika kulangwila Yehowa, we kwiyipusha ino nkonko: ‘Kubingwabingwa akulesha’shi tubashimisha myabi y’Efile Mukulu su? Kukandjika mudimo wetu akwitukutshishwa kulangwila Yehowa su? Abitungu nfilukile mu dingi eumbo mwandi mulombene kulangwila Efile Mukulu kushi lukalakashi su?’ Mu uno mwisambo, atutaluula ino nkonko. Atutaluula dingi byatudi balombene kutungunuka na kulangwila Yehowa nsaa yabadi bakandjikye mudimo wetu na miteo yatudya kusuuka.

3. Muyile 2 Beena-Kodinda 11:23-27, nkubingwabingwa kinyi kubaadi Mpoolo mutumiibwa mufumankane nako, na kileshesho kya Mpoolo akitulongyesha kinyi?

³ Su mbulamatadi akandjika mudimo wetu, twi kupwandjikisha shi tatuki na myabi y’Efile Mukulu. Kadi, ukayi shi  kubingwabingwa takulesha shi tatukwete kusankisha Yehowa. Tubande kwata kileshesho kya Mpoolo mutumibwa. Efile Mukulu baadi mumukumiine. Baadi mupete mwabi wa kufunda mikanda 14 ya Bifundwe bya mu kina Greke bya bena Kidishitu, na mmutumibwa a bena maumbo. Anka, abaadi bamubingebinge ngofu. (Badika 2 Beena-Kodinda 11:23-27.) Myanda ibafumankene nayo Mpoolo mutumibwa ayitulesha’shi, Yehowa atadiilaa shi babingebinge bafubi baye.

4. Bwakinyi bantu ba pa nsenga mbetushikwe?

⁴ Yesu baadi muleshe bwakinyi abitungu twikale baukye shi abaketubingabinga. Bakwile shi abaketushikwa mwanda tatwi ba pa nsenga. (Yo. 15:18, 19) Kubingwabingwa takulesha’shi tubashimisha myabi ya Yehowa nya. Kadi akulesha’shi tukwete kukita myanda ilul ame!

5. Bantu be na ngobesha ya kwimika lulangwilo lwa Yehowa su? Patuula.

⁵ Bantu abetulwiisha tabe na ngobesha ya kwimika lulangwilo lwa Yehowa, Efile Mukulu sha bukome boso. Bebungi mbatompe kadi ta mbobeshe. Tutaluuleyi kibakitshikile pa Ngoshi ya kabidi ya nsenga ishima. Aa mafuku, mbulamatadi ya mu maumbo ebungi ibaadi ibingebinge mwilo w’Efile Mukulu. Tababadi bakandjikye mudimo wa ba Temwe ba Yehowa penda kwi bena Nazi, kisaka kya mu Allemagne nya, kadi abaadi beukandjikye dingi mu Australie, mu Canada na mu angi maubo. Nkinyi kibakitshikile? Pababangile ngoshi mu 1939 kubaadi balungudi 72 475 mu nsenga ishima. Rapore ayilesha’shi, ku nfudiilo kwa ngoshi mu 1945, ku bukwashi bwa Yehowa, balungudi abalombene 156 299. Bungi bwa balungudi bubaadi bukamine ngofu!

6. Myanda kinyi ibuwa ilombene kukitshika nsaa yatudi mu kubingwabingwa? Tusha kileshesho.

⁶ Pamutwe pa kwitutshinyisha, bulwishi mbulombene kwitukwasha bwa kufubila Yehowa bikata. Bu kileshesho, bangi ba mulume na mukashi, abaadi bashale na nsongwalume aabo mwiumbo dibabadi bakandjikye mudimo wetu. Pamutwe pa kutshina, ababangile mudimo wa bu mbala-mashinda ba myeshi yoso. Mukashi balekyele mudimo ubabadi abamufutu kalolo bwa kwikala bu mbala-mashinda a myeshi yoso. Mulume aaye bambile’shi, kukandjika mudimo wetu kubaadi kutakule bantu  bebungi bwa kwela nkonko pabitale ba Temwe ba Yehowa. Nyi bwa kinyi, babapetele bantu bakulonga nabo Bible kushi lukalakashi. Kukandjika mudimo wetu kwi na yako myanda ibuwa. Ungi mukulu a mudingi eumbo amba’shi boso abalekyele kufubila Yehowa, ababangile dingi kulungula mukandu wibuwa.

7. (a) Nkinyi akitulongyesha Beena-Levi 26:36, 37? (b) Nkinyi kyokakitshi nsaa ayikakandjikibwa mudimo wetu?

⁷ Nsaa i beshikwanyi netu abakandika lulangwilo lwetu, abapwandjikisha’shi be kwitutshinyisha bwa kufubila Yehowa. Kukatusha byabya, abapalakasha myanda ya madimi pabitutale, abatumu basalayi mu mashibo etu, kwitutwala ku tumiladi sunga kwela bangi bakwatudi mulukano. Abapwandikisa’shi atutshinyi mwanda wa’shi abaadi bele bangi bakwatudi mu lukano. Su twapusha moo bwa myanda yabakwete kwitukitshina, twibalombene kubofula sunga kwimika kufubila Yehowa. Tatukumiina kwikala bu baba bantu babadi bakwile mu mukanda wa Beena-Levi 26:36, 37. (Badika.) Tatulekanga moo bwaudya kwitubofusha sunga kwimika mudimo wetu bwa Yehowa. Atukulupila mwi Yehowa n’eshimba dyoso na kupela kutshina. (Yesh. 28:16) Tukimbe bukunkushi bwa Yehowa mu luteko. Atwiuku bino mwanda Efile Mukulu etukwasha, sunga mbulamatadi ya bantu yekala na bukome tangilombene kwitukutshishwa kulangwila Efile Mukulu etu na lulamato nya.​—Eb. 13:6.

8-9. (a) Nkitshibilo kinyi akitungu’shi muntu nabene sunga nfumu a kifuko aate? (b) Nkinyi akikakwasha muntu bwa kwata kitshibilo kibuwa?

⁸ Su mbulamatadi a mwiumbo dyenu akandjika mudimo wetu, we kwiyipusha su abitungu’shi ofilukile mu dingi eumbo modi mulombene kufubila Yehowa kushi lukalakashi. Kino kitshibilo kya muntu nabene, takwi muntu mulombene kumwatshila kyanka. Bangi be kupeta bukwashi pa kutaluula bibakitshine bena Kidishitu ba mu siekele a kumpala pababadi abebabingabinga. Kunyima kw’abo kwipaa Etshyene na mabwe, balongi abaadi basukye mu Yeelusaleme benda ku Yudeya, ku Samariya mpa na ku ma mbalo e kula bu ku Fenisii, Shiipre na ku Antyoshe. (Mat. 10:23; Bik. 8:1; 11:19) Byabya, bangi balombene kulonga kibakitshine Mpoolo nsaa ibaabadi babangye dingi kubingabinga bena Kidishitu ba mu siekele a kumpala. Batshile kitshibilo kya kushala ma mbalo ibadi bantu abapele mudimo wa bulungudi sunga bibaadi muwa waye mu masaku. Bakitshine bino mwanda badi akumiina kulungula mukandu wibuwa na kunyingisha bakwetu abaadi abakyengye mu ano ma mbalo abadi kubingwabingwa.​—Bik. 14:19-23.

⁹ Nkinyi kibatulongo ku ino myanda? Abintungu nfumu oso a kifuko ate kitshibilo pabitale kufiluka. Kumpala kwa kwata kitshibilo, abitungu ele nteko na kunangushena ngofu pabitale nshalelo a kifuko kyaye na bukitshishi abutukila ku kufiluka. Mu uno mwanda, mwina Kidishitu oso ‘esemwina bushito bwaye aye nabeene.’ (Nga. 6:5) Ta bitungu tutshibile bangi kiimu bwa bitshibilo kyabaata.

10. Mbuludiki kinyi abukatusha biro bya filiale na bakulu?

¹⁰ Mbikunyi byodi mulombene kutungunuka na kulangwila Yehowa nsaa ikakandikibwa mudimo wetu? Biro bya filiale abikapa bakulu ba kakongye kenu mayi a kulonda pabitale mushindo wa kupeta bidibwa bya mu kikudi, bya kutwela mu bisangilo, na bya kulungula mukandu wibuwa. Su filiale akutwa bya kwisamba na bakulu, paapa bakulu na bangi bena kakongye boso abakakukwasha bodya kutungunuka na kulangwila Yehowa. Abakakupa buludiki bwa mu Bible na bwi mu mikanda yetu.​—Mat. 28:19, 20; Bik. 5:29; Eb. 10:24, 25.

11. Bwakinyi abitungu oshinkamishe’shi okekala na byoso byodi nabyo lukalo, bwa kulama lukumiino lobe lunyingye na nkinyi kyodya kukita bwa kukalwila Bible obe na mikanda yobe?

 ¹¹ Yehowa mulee’shi bafumbi baye abakekala na byoso abitungu bwa kulama lukumiino lwabo lunyingye. (Yesh. 65:13, 14; Luk. 12:42-44) Ikala mushinkamishe’shi ndumbulwilo a Yehowa akakupa kyoso akitungu bwa’shi wekale nka na lukumiino lunyingye. Kinyi kyodi mulombene kukita? Nsaa yabadi bakandjikye mudimo wetu, kimba mbalo ibuwa yodya kufya Bible na ingi mikanda yodi mulombene kwikala nayo. Kita mobe moso bwa kupela kushimisha bino bina mudimo bi na muulo, byabikala mu telefone, mu tablette sunga ku masaki, ebitule mbalo yabasha kwibimona. Abitungu oso a kwatudi akite kyoso akitungu bwa’shi alame lukomiino lwaye lunyingye.

12. Mbikunyi bilombene bakulu kutwesha bisangilo mu bufyefye?

¹² Twi kwamba naminyi bwa bisangilo byetu? Bakulu abakata mpàngo ya’shi otwele mu bisangilo mu mushindo wabasha kumona kwi baaba abakubingabinga. Mbalombene nkulesha bwa’shi otwele mu bisangilo bya kasaka kapeela, mbakumbene mpa na kushintuula nsaa na mbalo ya kukitshina bisangilo. We mulombene kukalwila bakwenu nsaa yopele kwela tuleo pa kwenda na pa kwaluka ku bisangilo. We mukumbene dingi kufwala mu mushindo ushaukaka binangu bya bantu koodi.

13. Nkinyi kyatulongyela ku kileshesho kya bakwetu ba mu Union Soviétique a kala?

¹³ Pabitale mudimo wa bulungudi, myanda ngikumbene kushintuluka mupunda ma mbalo. Anka twi bafule Yehowa na atukumiina kulungula bangi pabitale Bufumu bwaye, byabya, atukapete mushindo wa kulungula mukandu wibuwa. (Luk. 8:1; Bik. 4:29) Pabaadi akula pabitale mudimo wa bulungudi bwa ba Temwe ba Yehowa mu Union Soviétique, Emily Baran mufundji a myanda ya kala bambile’shi: “Pabaadi mbulamatadi mulungule ba Temwe ba Yehowa’shi balekye kulungula bangi bantu mukandu wibuwa, ba Temwe abatungunukile na kulungula bena mudimo nabo, bekungishanyi nabo, na ba kuuku babo mukandu wibuwa. Mwanda wa byabya, abaadi bebele mu lukano, kadi ba Temwe nkutunguka na kulungula bena lukano nabo.” Sunga pabaabadi bemikye mudimo wabo wa kulambukisha, bakwetu ba mu Union Soviétique tababaadi balekye kulungula mukandu wibuwa nya. Su mudimo wa bulungudi mbeukandjikye mbalo yoodi, ambula kileshesho kyabo!

14. Mukanda wa Misambo 39:2, ngulombene kwitukwasha bwa kupela kupona mu muteo kinyi?

¹⁴ Ikala mudimukye pabitale myanda yolungula bangi bantu. Nsaa yabadi bakandjikye mudimo wetu, abitungu tuukye nsaa ya “kuumiina.” (Mul. 3:7) Abitungu tulame myanda yetu ifwame, bu mashina a bakwetu balume  na bakashi, mbalo yatutwelela mu bisangilo, mushindo watukwete kukita bulungudi, na byatukwete kupeta bidibwa bya mu kikudi. Tatwi balombene kulungula bakata ba mbulamatadi ino myanda nya; sunga kwiyilungula bakwetu ba mu kifuko batudi nabo mwiumbo dimune sunga bashalele mu angi maumbo. Su twapona mu uno muteo, atutulu muwa wa bakwetu mu masaku.​—Badika Misambo 39:2.

15. Satana akatompo kwitukita kinyi, na mbikunyi byatudya kusuuka kaka kateo?

¹⁵ Tatulekyeelanga tu bilumbu tupeela bwatudya kwitutshibuula. Satana auku’shi kifuko kiitshibuule ta nkilombene kunyinga. (Mak. 3:24, 25) Kwete kukimba bya kutwesha kwiabuula munkatshi mwetu. Nsaa y’akitshi byabya, e na lukalo lwa’shi twikale atwikutwena munkatshi mwetu pamutwe pa kulwa naaye.

16. Mukwetu Gertrud Poetzinger mmwitulekyele kileshesho kinyi?

¹⁶ Sunga bena Kidishitu banyingye abitungu badimukile uno muteo. Banda kutala kino kileshesho kya bakwetu babidi bedibwe mwimu, Gertrud Poetzinger na Elfriede Löhr. Babadi bebeele mu lukano lwa ba Nazi na bangi bena Kidishitu bakashi. Gertrud babangile kukwatshila Elfriede kyutu mwanda badi anyingisha bangi bakwetu bakashi abaadi mu lukano. Kunyima, Gertrud bapushishe buufu na ateka Yehowa bwa’shi amukwashe. Bafundjile’shi: “Twi na kya kukumiina bangi nsaa yabadi na mashito ebungi kwitukila.” Badi mukambile kyutu naminyi? Gertrud badi mutuule binangu ku ngikashi ibuwa ya Elfriede na bu muntu bwaye. Pabakitshine byabya, badi mwalushe kipwano kyaye kibuwa na Elfriede. Boso abatukile mu lukano na abatungunukile na kufubila Yehowa mpa na ku lufu lwabo. Su twetatshisha bwa kupudisha tu bilumbu na bakwetu, atukambila kateo ka kwitshibuula.​—Kol. 3:13, 14.

17. Bwakinyi abitungu twikale atulondo bukunkushi bwa ndumbulwilo a Yehowa?

¹⁷ Ikala olondo bukunkushi. Bwa kusuuka nkalakashi, bibuwa tulonde bukunkushi bwatupete kwi bantu batudi bakulupile, bakwetu abetukunkusha. (1 Mp. 5:5) Kileshesho, mu maumbo abaabadi bakandjikye mudimo wetu, bakwetu abakunkusha babadi baate mpàngo ya’shi balungudi tabekalanga abaabila mikanda mu bulungudi. Anka, mungi mukwetu mbala-mashinda bapelele kulonda bwabwa bukunkushi aye nkubanga kwabila mikanda. Nkinyi kibakitshikile? Kapindji kapeela kunyima kwa’ye na bangi bakwetu kukita bulungudi bwa mu mpukapuka, babadi bebemikye kwi ba mpulushi. Abimweneka’shi bakata ba mbulamatadi babadi abebalondo na babamwene mikanda ibabadi abaabila. Bino abitulongyesha kinyi? Bibuwa tulonde bukunkushi sunga nsaa y’atumono’shi byatukitshi bibuwa. Yehowa  asangalaa nsaa yatukwatshishena bakwetu baadi mutuule bwa kwitukunkusha.​—Eb. 13:7, 17.

18. Bwakinyi tatwi balombene kwelela bangi miiya ishi na muulo?

¹⁸ Tanwelanga miiya ishii na muulo. Su bakulu abeele miiya ishi na muulo, abanyenyeka bangi bushito bwa bisumanga. Mukwetu Juraj Kaminský atentekyesha kibadi kikitshikye mu mafuku ababadi bakandjikye mudimo wetu mu Tchécoslovaquie a kala, amba’shi: “Kunyima kw’abo kukwata bakulu bebungi, bangi bakulu abashele abakunkusha midimo ya mu tukongye na mu bifunda, ababangile kwelela balungudi miiya pabitale kyabadya kukita na kyabasha kukita.” Yehowa tamwitupe matalwa a kwatshila bangi bitshibilo nya. Muntu eele miiya ishi na muulo t’akalwila bakwabo nya​—ekala nka bu mukunkushi a lukumiino lwa bakwabo.​—2 Kod. 1:24.

19. Muyiile bi mu 2 Myanda 32:7, 8, bwakinyi abitungu twikale banyingye sunga Satana akita kinyi?

¹⁹ Mwishikwanyi etu mukata Satana Diabulu, t’akalekye kubingabinga bafubi ba Yehowa basha lulamato nya. (1 Mp. 5:8; Kibaf. 2:10) Satana na bantu boso bakwete kumukwatshishena abakakimbi bya kukandjika lulangwilo lwetu bwa Yehowa. Anka tatwi na kya kupusha moo nya! (Miy. 7:21) Yehowa e kulupese lwetu, na atungunuka na kwitukwatshishena sunga nsaa yabadi bakandjikye mudimo wetu.​—Badika 2 Myanda 32:7, 8.

20. We na kitshibilo kinyi?

²⁰ Twikaleyi na kitshibilo bu kibaadi nakyo bakwetu ba mu siekele a kumpala, babadi balungule bakunkushi baabo’shi: “Sangulayi su mbikumbane ku meeso kw’Efile Mukulu kwinupushiisha’nwe, pe kupushiisha Efile Mukulu. Mwanda bw’atwe, tatwibalombeene kukutwa kwakula bwa bintu biatudi bamone na biatudi bapushe.”​—Bik. 4:19, 20, Kilombeeno kipya 2014.