MU BIBLE mwi bileshesho bya bantu be “nka bu’twe.” (Shak. 5:17) Bu kileshesho, twi balombene kupusha kibaadi akikyebe kwakula Mpoolo mu mayi e mu mukanda wa Beena-Looma 7:21-24, pabambile’shi: “Misûsa yoso yandji na lukalo lwa kukita bi buwa, bubi nyi abwibo munda mwande. . . . Nyi na malwa!” Nsaa yatulu na bilubilo byetu, abitunyingisha pa kumona’shi muntu bu Mpoolo baadi namu apusha byabya.

Mpoolo baadi mwakule dingi pabitale bingi bibaadi apusha. Mu Beena-Ngalatea 2:20, bakwile’shi: “Mwana a Efile Mukulu . . . banfudile kifulo mpâ na kupâna mûwa wê pa mwanda wande.” Okwete kupusha namu nka byabya su? Pangi nya.

Su twekala atwitopeka pa mwanda wa milwisho yetu ibatukitshine kala, twi kukutwa kukumiina’shi Yehowa mwitufule na’shi mwitufwile lusa, na bino bikwitwikela bukopo bwa kumona’shi mwitutushishe mulambu. Yesu akumiina’shi tumone mulambu mu kino kipaso su? Su mbyabya, nkinyi ki kwitukwasha bwa kwibikita? Tutaluuleyi ino nkonko ibidi.

Yesu akumiina’shi tumone mulambu waye bu kya buntu kyadi mwitupe. Mbikunyi byodi mulombene kwibishinkamisha? Nangushena ku mwanda wabadi baleshe mu mukanda wa Luka 23:39-43. Muntu ababadi bakokole ku mutshi peepi na Yesu, baadi akumiina’shi mmukite mulwisho. Mulwisho waye ubadi ukile bukata mwanda kibao kyaye kibadi kikile bukata. Uno muntu ntomboshi, baadi mwiyayile Yesu’shi : “Otenkyeshe namu . . . , pokafiki mu bufumu bwobe.”

Yesu baadi mu mwalule naminyi? Banda kunangushena busungu bubaadi Yesu mupushe pabadi mwialuule bwa kutala uno ntomboshi. Sunga bibaadi apusha busungu, Yesu baadi munyingishe uno muntu na muloo oso. Aye nkumulungula’shi: ‘Lelo uno nankulungula’shi, okeekala nami mu mpaladisu.’ Yesu badya penda kutentekyesha yawa muntu’shi ‘mwana a muntu mmufikye bwa kupaana muwa waye bwa kukuula mwilo.’ (Mat. 20:28) Kadi pamutwe wa byabya, baadi mufubishe mulambu waye kwi yawa muntu. Baadi mwisambe naye n’eyi dya kalolo, na afubisha bishima “okekala” na “nami.” Na balungwile yawa muntu’shi akekala na muwa mu mpaladiiso pa nsenga.

Kushi mpaka, Yesu baadi akumiina’shi uno muntu aukye’shi mulambu waye aumukwasha n’aye. Su Yesu baadi mufwile ntomboshi shi baadi mufubile Efile Mukulu lusa, mulombene kufwila mwina Kidishitu mubatshibwe kwete kufubila Efile Mukulu lusa. Nkinyi kilombene kwitukwasha bwa kukumiina’shi, mulambu wa Kidishitu awitukwasha sunga twekala bakite milwisho kala?

Bu bibadi Yesu mupe Mpoolo mudimo wa bulungudi, Mpoolo baadi mupushe’shi Yesu baadi mumufwile. Bwakinyi? Apatuula’shi: “Nátumbula  Nfumwetu Kidishitu Yesu, yawa mumpe bukome bwa kumufubila, mwanda mmuñgate bu muntu mulombene kukulupilwa, ê pa kuntûla ku mufubo wê, aku kwibedi kwa kumwiûka, na musâmbuulanga na ku mumwesha malwa mpâ na kumukâ.” (1 Tim. 1:12-14, EEM) Bu bibaadi Yesu mupe Mpoolo uno mudimo sunga bibaadi mukite myanda ibubi, bibadi bimushiinkamishe’shi Yesu mmumufwile lusa, mmumufule, na baadi mumukulupile. Yesu mmupe oso a kwatudi mudimo wa kulungula mukandu wibuwa. (Mat. 28:19, 20) Uno mudimo wa bulungudi wi kwitukwasha bwa kupusha’shi Yesu mmwitufwile su?

Albert, abekele batushe pasha pa kakongye, kadi abamwalusha kunyima kw’aye kukita bipwa 34, amba’shi: “Nkyantentekyeshaa milwisho inakitshine. Kadi, nsaa yandi mu bulungudi, napushaa nka bu bibapushishe Mpoolo’shi, mbampe mudimo wa kulungula mukandu wibuwa kwi Yesu. Abimpaa muloo na kungikasha na binangu bibuwa pabintale’mi nabene, na pabitale nshalelo ande lelo uno, na mu mafuku aafiki.”​—Mis. 51:3.

Allan, baadi ntomboshi na bakitshine bibeshi bibungi kumpala kwa kulonga bya binyibinyi, amba’shi: “Nkyantentekyeshaa myanda yoso ibubi inaadi mukitshine bantu. Ingi nsaa bibaadi abinginyongosha. Kadi natumbula Yehowa p’aye kukumiina’shi ami muntu sha milwisho ntwale namu mukandu wibuwa kwi bangi. Nsaa, yamono byabasankila mukandu wibuwa kwi bantu, abintentekyesha’shi Yehowa e buwa na e na kifulo. Abinshinkamisha’shi kwete kufuba nami bwandya kukwasha baaba be na nshalelo bu anaadi naye.”

Nsaa yatudi mu bulungudi, atukitshi mwanda wibuwa na atunangushena ku myanda ibuwa. Abitushinkamiisha’shi Yesu e na lusa, kifulo, na mmwitukulupile.

Mashimba eetu aekala nka aetutopeka bwa bilubilo byetu bya kala, mpa na pabakabutula uno ndumbulwilo e bubi a Satana. Nkinyi akiketukwasha bwa kulwa na byabya binangu?

Jean, kwete kulwa na binangu bya kwitopeka mwanda wa nshalelo e bubi abaadi naye pabaadi nsongwakashi, amba shi: “Nemufule mayi aamba’shi: “Efile Mukulu mmukile mashimba eetu ku bukata.”” (1 Yo. 3:19, 20) Nka bu Jean, atwe namu twi kupusha bibuwa pa kuuka’shi Yehowa na Yesu abauku’shi twi basha milwisho. Tentekyeshayi’shi, mbatushe mulambu wa nkuulo na kifulo kyoso, kushi bwa bantu bapwidikye nya, kadi bwa basha milwisho abelanga ku mashimba.​—1 Tim. 1:15.

Nsaa yatunangushena mu luteko kipaso kibaadi Yesu mukitshine bantu bakutwe kupwidika myanda, na nsaa yatwitatshisha bwa kulungula mukandu wibuwa wabadi betupe, atushinkamisha mu mashimba eetu’shi, Yesu baadi mwitufwile. Su twakita byabya, twi kwamba nka bu Mpoolo’shi Yesu “banfudile kifulo mpâ na kupâna mûwa wê pa mwanda wande.”