MUISAMBO WA KULONGA 33
Sankila mashito odi nao
“Mbikile buwa kusepêla na byabya byodi nabyo pe kulonda eshimba dya lwabi.”—MUL. 6:9, EEM.
LOONO 111 Myanda ayitusankisha
KI’ABAKUILA MUANKA *
1. Mushindo kinyi awikitshisha bantu be bungi bua kukita bi bungi mu mudimo wa Yehowa?
TUI na bi bungi bia kukita bu bikuete kuifubuila nfudilo a uno ndumbuluilo. (Mat. 24:14; Luk. 10:2; 1 Mp. 5:2) Atue boso atukuminaa kufubila Yehowa ngofu muyile ngobesha yetu. Be bungi bakuete kutamisha mudimo wabo. Bangi abakulupilaa bua kufuba bu ba mbala-mashinda. Bangi abakulupilaa ubua kufuba ku Betele sunga ku luibako lua mashibo a Bufumu. Na bakuetu be bungi balombashe ngikashi itekibue bakuete kufuba bu bafubi ba midimo sunga bu bakulu. (1 Tim. 3:1, 8) Yehowa e na muloo wi bungi nsaa y’amono mushindo wi muilo waye aukumina kumufubila!—Mis. 110:3; Yesh. 6:8.
2. Tui kuipusha naminyi su kepatshila ketu ka kufubila Yehowa nta nkalombane?
2 Tui kubanga kutshoboloka p’atumono’shi mafuku aakidi bungi bipatshila bietu bia mu kikudi nta mbilombane. Sunga’shi tui kubanga kutshoboloka muanda wa bipua sunga ingi mianda, na bua angi mashito atushi dingi na ngobesha ya kulombasha. (Nki. 13:12) Uno ngi muanda ubadi ufumankane nao Melissa. * Badi mufule kufuba ku Betele sunga kutuela ku kalasa ka balungudi ba Bufumu. Amba’shi: “Bipua biande mbipue kukila biabadi batshibe. Buande’mi, kupeta ano mashito oso takudi bu kilotua. Ingi nsaa natshobolokaa.”
3. Matabula kinyi aatungu’shi bangi bakite bua kulombasha ngikashi itekibue bua kupeta mashito?
3 Bangi baki bansongua na be na mbidi bukome be na lukalo lua kutama mu kikudi, na kulombasha ngikashi itekibue kumpala kuabadia kupeta angi mashito. Ku lungi lupese, mbalombene kuikala na kapatupatu, bitshibilo bi buwa na katshintshi; ku lungi lupese namu, be kuikala na lukalo lua kulonga bia kuikala na luishinko lui bungi na kanemo. Su okimba bia kulombasha ino ngikashi abakupa mashito a kufuba na olombasha kiakia ki’abakutekie bua kukita. Tubande kutala kibadi kifikile Nick. Pabaadi na bipua 20 badi mutshobolokie ngofu muanda tababadi bamupe mashito a bu mufubi a midimo. Akula’shi: “Nadi namono bu muanda wi bubi ngofu.” Anka Nick nta mulekie kuikitshisha bua kulombasha ngikashi itekibue nya. Bino mbimukuashe buadia kupeta mashito e bungi adi nao lelo uno. Binobino, kuete kufuba bu muina comite a Filiale.
4. Nkinyi ki’atukesambila mu uno muisambo?
4 We mutshobolokie muanda wa’shi tue mulombashe bingi bipatshila bia mu kikudi su? Su mbiabia, teka Yehowa. (Mis. 37:5-7) Kukatusha biabia, teka binangu kui bakuetu banyingye mu kikudi bakuleshe biodia kulumbula mushindo odia kufubila Efile Mukulu, na dingi ekitshishe bodia kutumikila elango diabo. Su bokitshi bino, opete mashito na kulombasha bipatshila biobe. Nka bu muanda wa Melissa atudi bapue kutemuna kunundu, mashito okuete kukimba bua binobino, tue mulombene kuiapeta nya. Buakinyi atuamba biabia? We kulama muloo oobe naminyi? Bua kualula ku ino nkonko, uno muisambo aukesambila (1) Kodi mulombene kukimbila muloo, (2) mushindo wa kutamisha muloo oobe, na (3) bipatshila biodia kuiatshila bua kutamisha muloo oobe.
KODI MULOMBENE KUKIMBILA MULOO
5. Bua kuikala na muloo, abitungu kutula meso etu ku kinyi? (Mulungudi 6:9)
5 Muyile Mulungudi 6:9, we kupeta muloo su we ukimba mbalo i buwa. (Badika.) Muntu e na muloo “asepêlaa na kiadi nakio” lesha lutumbu ku biabia biodi nabio mu yaya nsaa muyile mianda yodi nayo. Sunga mbiabia, kunyima muntu e kutungunuka na kuiyipusha su e kupeta kintu kampanda kadi kiashi mulombene kupeta. Bino abitulongiesha kinyi? Bwa kupeta muloo, abitungu kutula meso etu ku kiakiatudi nakio na ku kiakia kiatudi balombene kuikala na ngobesha ya kwikipeta.
6. Ndukindi kinyi luatukiebe kutalula binobino?
6 Mu binyibinyi mbibofule bua kusepêla na kiodi nakio su? Kunyima kua biabia bioso, apende mafuku na kukila, atufumankanaa na nkalakashi ipia. Oolo, mu binyibinyi mbibofule. Tui kuikala na muloo kushi pamuanda wa bintu “biatudi nabio.” Tui kuiwupeta naminyi? Bua kuiwupeta, tutaluleyi lukindi lua Yesu lua ntalanta lui mu Mateo 25:14-30. Atukesambila kilombene lukindi kuitulongiesha, pa bitale mushindo wa kupeta muloo na kuiwutamisha mu miabi yatudi nayo lelo uno.
MUSHINDO ODIA KUTAMISHA MULOO OOBE
7. Akula mu kikoso pa bitale lukindi lua Yesu lua ntalanta.
7 Mu luno lukindi, abakuila muntu badi akiebe kuenda mu luendo. Kumpala kuadia kuenda bayitamine ba mpika baye na aye nkupa oso a kuabadi ntalanta ya kusunga nayo. * Bebapeele muyile ngobesha yabo, mpika a kumpala bamupeele ntalanta itano, a kabidi bamupeele ntalanta ibidi, na a kasatu amupa talanta umune. Ba mpika babidi ba kumpala babafubile ngofu, abo nkupa mukata aabo makuta e bungi. Anka uno a kasatu, tabadi mukite kintu su nkimune na makuta ababamupeele nya, na ta badi muate mudimo wa mfumu’aye na muulo.
8. Buakinyi mpika a kumpala a mu lukindi badi mulombene kuikala na muloo?
8 Mpika a kumpala pabatambuile ntalanta itano kui mfumu’aye, bapushishe’shi e na kinemo kikata. Badi na lutumbu lukata bua makuta na bibadi abilesha’shi mfumu’aye badi mumukulupile ngofu! Nkinyi kibadi kikitshikie bua mpika a kabidi? Tabadi mubofule kuishimba muanda’shi ta bapetele ntalanta ibungi bu mpika a kumpala nya. Kadi nkinyi kibakitshine?
Tui balombene kupeta malongiesha kinyi ku mpika a kabidi a mu lukindi lua Yesu? (1) Mfumu’aye bamupeele ntalanta ibidi. (2) Bafubile ngofu buadia kupa mfumu’aye makuta e bungi. (3) Badi mufuimiishe mfumu’aye ntalanta misusa ibidi (Tala kikoso 9-11)
9. Nkinyi kishi kiakule Yesu pabitale mpika a kabidi? (Mateo 25:22, 23)
9 Badika Mateo 25:22, 23. Yesu ta badi muambe’shi mpika a kabidi badi mufiite munda sunga kuikala na kiutu muanda’shi batambuile penda ntalanta ibidi nya. Na Yesu ta badi muleshe mpika bu badi edidi’shi ‘ngi nka kioso kinapete? Sunga’shi n’ami namu ne na ngobesha nka bu ya uno mukuetu mupete ntalanta itano! Ta muambe’shi su mukata ande nta munkaanyishe ne kushiika ino ntalanta ibidi na natungunuka na kufuba midimo yande nya.’
10. Mpika a kabidi bakitshine kinyi na ntalanta yaye?
10 Nka bu a kumpala, mpika a kabidi badi muate na muulo bushito bubabamupeele na aye nkufuba ngofu mudimo wa mfumu’aye. Bu kipeta, badi mufuimishe ntalanta ya mfumu’aye misusa ibidi. Uno mpika sha katshintshi na bukome bapetele efuto. Mfumu’aye ta basankile nka penda n’aye nya, anka bamuatshile na kinemo amutentekiela angi mashito e bungi!
11. Tui kutamisha muloo wetu naminyi?
11 Mu mushindo umune, tui kutamisha muloo wetu p’atue kuipana bua kukita mudimo oso wabetupa mu mudimo wa Yehowa. Abitungu kuipana mu mudimo wa mukandu wi buwa na mu midimo ya mu kakongye. (Bik. 18:5; Eb. 10:24, 25) Bua kuenda mu bisangilo, abitungu kuilumbula bua kutusha ngalulo i buwa ayinyingisha ayitukila mu mukanda watulongo. Ata mudimo oso wabakupa wa bisangilo bia munkatshi a lubingo na muulo. Su oteka bua’shi bakukuashe na ingi midimo ya mu kakongye, wekala weyilombasha kalolo pa nsaa. Tomonanga mudimo oso wabadi bakupe bu aukuata nsaa nya, ikala weukitshi kalolo. (Nki. 22:29) P’onyisha kuipana mu midimo ya mu kikudi na mu midimo yabakupa, onyisha kuenda kumpala na muloo oobe autama. (Nga. 6:4) Okamono’shi mbibofule bua kusanka na bangi p’abapete mashito odilanga kupeta.—Lom. 12:15; Nga. 5:26.
12. Matabula kinyi abadi ba Temue babidi bele bua kutamisha muloo wabo?
12 Otentekiesha Melissa, mukuetu mukashi badi na lukalo lua kufuba ku Betele sunga lua kutuela mu kalasa ka balungudi ba Bufumu su? Bu biashi badi dingi na ngobesha ya kulombasha nkalo yaye, bakuile’shi: “Nkuete kuikitshisha bua kulombasha mudimo wa bu mbala-mashinda na kupetekielua mu ingi midimo kampanda i pa buayo. Mbingikashe na muloo ukata.” Mushindo kinyi ubadi Nick munyingile kutshoboloka kuaye pababadi ta bamupeele mashito a bu mufubi a midimo mu kakongye? Amba’shi: “Nadi mutule binangu biande ku mashito anadi na ngobesha ya kulombasha bu kuikala nende mu mudimo wa bulungudi na kutusha ngalulo i buwa mu bisangilo. Nadi muushe formilere a nkafuba ku Betele na kipua kibalondele babadi bangitanyine.”
13. Okapete kinyi su we pana mu mudimo wabadi bakupe lelo uno? (Mulungudi 2:24)
13 Su buepana ngofu mu midimo yabadi bakupe lelo uno, we nkapeta mashito e bungi mu mafuku aafiki su? Bino bi nkufikila nka bu bibabidi bifikile Nick. Su nta mbiabia, nka bu Melissa, we mulombene kupeta muloo wibungi na wa binyibinyi bua mudimo okuete ofubila Yehowa. (Badika Mulungudi 2:24.) Biabia, t’okekala na mpaka ya kupeta muloo wibungi p’okawuku’shi kuikitshisha kobe kukuete kusankisha Mfumu’etu Yesu Kidishitu.
BIPATSHILA BIA KUIATSHILA BUA KUTAMISHA MULOO WETU
14. Nkinyi akitungu’shi tutentekieshe nsaa yoso, p’atunangushena ku bipatshila bietu mu mudimo wa Yehowa?
14 Kutula binangu ku midimo yatudi nayo lelo uno, akulesha’shi ta tui bia kukimba bua kutamisha mudimo wetu bua Yehowa su? Ta mbiabia nya! Abitungu tuikale na bipatshila bia mu kikudi abitukuasha bua kutungunuka na kuitatshisha buatudia kufuba ngofu mu mudimo wa bulungudi, na kukuasha bakuetu balume na bakashi. Atobesha pa kuikala na binangu na kuuka mikalo yetu na kuikitshisha bua kukuasha bangi kushi nka atue banabene.—Nki. 11:2; Bik. 20:35.
15. Mbingi bipatshila kinyi bilombene nkukuasha bua kutamisha muloo oobe?
15 Mbipatshila kinyi bibuwa biodi mwiatshile? Teka Yehowa bua’shi akukuashe owukie kepatshila ke buwa kodia kulombasha. (Nki. 16:3; Shak. 1:5) We kutompa kulombasha kamune ka ku bipatshila biatudi batemune mu kikoso kia kumpala kia uno muisambo we kufuba bu mbala-mashinda mukuashi sunga a mieshi yoso, kufuba ku Betele sunga ku luibako lua mashibo a Bufumu su? We kupeta mushindo wa kulonga ludimi lupia bua kupalakasha mukandu wi buwa sunga nkalungula mu terituare mupia. We kulonga bi bungi pabitale bipatshila pa kubadika shapitre a 10 a mukanda wa Belumbuule bwa kukita akikyebe Yehowa na pa kuisamba na bakulu ba mu kakongye kenu. * Nsaa yuetatshisha bua kulombasha bino bipatshila, bangi abamono’shi okuete kutama mu kikudi na muloo oobe autama.
16. Nkinyi kiodia kukita su lelo uno tue na ngobesha ya kulombasha kepatshila sunga nkamune?
16 We kukita kinyi su lelo uno twe na ngobesha ya kulombasha sunga nkimune kia ku bipatshila bitatupuile kutemuna? Ki na muulo nkukimba bingi bipatshila biodi na ngobesha ya kulombasha. Tutalule ingi mishindo yatudia kuibikita.
Nkepatshila kinyi kodi mulombene kukumbasha? (Tala kikoso 17) *
17. Muyile 1 Timote 4:13, 15, mukuetu mulume e kukita kinyi bua kufika mulongieshi e buwa?
17 Badika 1 Timote 4:13, 15. Su we mukuetu mulume mupue kubatshishibua abitungu olumbule ngobesha yobe ya kuakula na ya kulongiesha. Buakinyi? Muanda nsaa yuepana mu kubadika kalolo, kuakula kalolo na kulongiesha kalolo abikuasha baba abakutemesha. Ekitshishe bua kuikala na kepatshila ka kubadika na kutumikila eyikashi dioso diabadi besambile mu broshire a Epaane mu kubadika na kulongyesha. Weditumikile puelumbula ku nshibo na okedileshe p’otokakitshi muisambo oobe. Teka malango kui mukulu alangaa bantu sunga kui ungi mukulu ‘muipane ngofu mu mudimo wa bulungudi na wa kulambukisha.’ * (1 Tim. 5:17) Tuemenanga nka penda pa kutumikila malango e mu broshire nya, anka abitungu okuashe abakutemesha buabadia kunyingisha lukumino luabo na kuibatakula buabadia kutumikila biabalongo. Su bokitshi bino, otamisha muloo oobe na wabo namu.
Nkepatshila kinyi kodi mulombene kukumbasha? (Tala kikoso 18) *
18. Nkinyi kilombene kuitukuasha bua kukumbasha bipatshila bietu mu mudimo wa bulungudi?
18 Atue boso tui na mudimo wa kulambukisha na kuikasha bantu bu balongi. (Mat. 28:19, 20; Lom. 10:14) Buakinyi abitungu olumbule mayele oobe mu uno mudimo wi na muulo? Eatshile kepatshila ke pabuako ka kulonga na kutumikila biolongo mu Broshire a Kulongyesha. We kupeta bingi binangu bia kutumikila mu Programe a Bwina Kidishitu na Mudimo wetu na ma video a byakubanga mwisambo abaleshaa mu bisangilo bia munkatshi a lubingo. Etatshishe bua kushintula binangu bua kumona bia kufuba kalolo. P’otumikila ino mianda yoso, ofiki mulongieshi e buwa na opete muloo wi bungi.—2 Tim. 4:5.
Nkepatshila kinyi kodi mulombene kukumbasha? (Tala kikoso 19) *
19. We kutamisha ngikashi ya buina Kidishitu naminyi?
19 Tue mulombene kuiluankana kepatshila sunga nkamune ka ku bipatshila bi na muulo—biodia kuata bua kutamisha ngikashi ayisankisha Efile Mukulu nya. (Nga. 5:22, 23; Kol. 3:12; 2 Mp. 1:5-8) We kukita kinyi? Banda kuata kileshesho kia’shi, okumina kunyingisha lukumino. We kubadika miisambo mu mikanda yetu ayikupa malango a kutumikila bua kunyingisha lukumino lobe. We kupeta bukuashi nsaa y’otala miisambo i mu JW ayilesha bakuetu balume na bakashi baleshe lukumino luabo sunga mbiabadi na nkalakashi ilekenelekene. Na dingi tala mushindo odi mulombene kuambula lukumino luabo mu nshalelo oobe.
20. Tui kutamisha muloo wetu na kupeelesha tuinyongoshi mushindo kinyi?
20 Kushi mpaka atue boso atukuminaa kukita bi bungi mu mudimo wa Yehowa, ngi biatudia kukita lelo uno. Mu nsenga ipia atukekala na ngobesha ya kumufubila nsaa yoso. Biabia su tubakitshi muetu moso bua kukita kioso kiatudi na ngobesha ya kukita binobino, atutamisha muloo wetu, atupeelesha tuinyongoshi na t’atubofula kuishimba nya. Na ki na muulo ngofu, atutumbisha na kusankisha Yehowa “Efile Mukulu etu a muloo.” (1 Tim. 1:11) Biabia tusankileyi mashito atudi nao!
LOONO 82 “Etaata dyenu ditembe”
^ par. 5 Tui bafule Yehowa ngofu, n’atukuminaa kukita kioso akitungu kukita mu mudimo waye. Na uno muanda mu binangu, tui kuenda ingi mbalo bua kutamisha mudimo wetu, sunga kukita bi bungi mu mudimo wa bulungudi na mu kakongye. Anka, tui kukita kinyi su kuikitshisha kuetu koso, ta tui bobeshe bia kulombasha bipatshila bietu? Nkinyi ki bia kuitukuasha bua kulama kisumi na muloo wetu mu mudimo wa Yehowa? Atupete lualulo mu kileshesho kia Yesu kia ntalanta.
^ par. 2 Angi mashina mbeashintule.
^ par. 7 BISHIMA BIABADI BAPATUULE: Ntalanta umune, badi muulo w’efuto dia muina mudimo mupue kufuba mund’a bipua 20.
^ par. 15 Bakuetu balume babatshishibue mbanyingishibue buabadia kulombasha ngikashi itekibue bua kufuba bu bafubi ba midimo na bu bakulu. Bua kuuka ngikashi itekibue, tala shapitre a 5 na a 6 a mukanda wa Belumbuule bwa kukita akikyebe Yehowa.
^ par. 17 BISHIMA BIABADI BAPATUULE: Conseiller adjoint nyi mukulu abadi basangule bua kupa bakulu na bafubi bamidimo malango pa bupenka, p’abakitshi mudimo wabadi bebape mu kakongye.
^ par. 64 BI MU KIFUATULO: Bua kulombasha kepatshila ka kuikala mulongieshi e buwa abitungu bakuetu balume bakimbule mu mikanda yetu.
^ par. 66 BI MU KIFUATULO: Kunyima kua mukuetu mukashi kulungula mukandu wi buwa pabamueneka mushindo, apa yawa muntu karte ka jw kalombene kumukuasha.
^ par. 68 BI MU KIFUATULO: Bu bibadi na lukalo lua kulesha ngikashi ya bu muina Kidishitu, mukuetu mukashi bayile mu kutembela mukuetu na amutuadila kia buntu.
