MWISAMBO WA KULONGA 38
“Fikaayi kwandji, . . . Neenupa kikiisho”
“Fikaayi kwandji, anwe booso bafwambukye na bushito, ami neenupa kikiisho.”—MAT. 11:28.
LOONO 17 “Nakumiina”
KYABAKWILA MWANKA *
1. Muyile Mateo 11:28-30, Yesu baadi mwitamine bantu bwakinyi?
LWITAMIINO lwa Yesu lubaadi buwa bukile kwi bantu abaadi abamutemesha. Bambile’shi: “Fikaayi kwandji, . . . neenupa kikiisho.” (Badika Mateo 11:28-30.) Luno lwitamino talubaadi penda bwa kwisankisha nya. Bu kileshesho, tentekyesha bibaadi mukitshine ungi mwana mukashi baadi na maladi ebukopo.
2. Yesu bakitshine kinyi bwa mwana mukashi baadi akumbu?
2 Uno mwana mukashi shikibaadi na lukulupilo, baadi na lukalo lwa bukwashi. Baadi mwende kwi ba doktere bebungi, na lukulupilo lwa’shi apanda. Baadi mukumbe munda mwa bipwa 12, anka takubaadi muntu su ngumune baadi mumupashe. Muyile mwiya ubaadi Yehowa mupe Moyiise, uno mwana mukashi baadi bu e butete. (Lv. 15:25) Pabapushishe’shi Yesu kwete kupasha basha mikumbo, bayile kwadi. Pabafikile kwadi, bakumine lwembe lwa kilamba kyaye, na mususa umune baadi mupashibwe! Yesu tabaadi penda mumupashe nya, mwanda mushindo ubaadi mumukitshine myanda, baadi mwipushe’shi mbamufule na abamunemeka. Bu kileshesho, baadi muleshe’shi mumufule na kumunemeka pa kumwitamina bu “mwan’ade mukashi.” Kushi mpaka, uno mwana mukashi baadi mupete kikiisho na baadi munyingishibwe!—Luk. 8:43-48.
3. Nkonko kinyi yatukyebe kwaluula?
3 Lamiina’shi uno mwana mukashi baadi mwende kwi Yesu. Baadi mwitatshishe bwa kwenda kwi Yesu. Bimumune na lelo uno, abitungu twitatshishe bwa “kwenda kwi” Yesu. Mu ano etu mafuku, Yesu takwete kupasha bantu “abafiki” kwadi mukilegeleshi nya. Anka kwete kutungunuka na kwitwitamina. Amba’shi: “Fikaayi kwandji, . . . neenupa kikiisho.” Mu uno mwisambo, atwaluula nkonko itano: Nkinyi kyatudya kukita bwa “kwenda kwi” Yesu? Yesu badi akyebe kwakula kinyi pabambile’shi: “Etentekyeyi kiita kyande?” Nkinyi kyatudi balombene kulongyela kwi Yesu? Bwakinyi mudimo wadi mwitupe aupa bantu kikiisho? Na mushindo kinyi watudi balombene kutungunuka na kupeta kikiisho ku bukwashi bwa kiita kya Yesu?
“FIKAAYI KWANDJI”
4-5. Mishindo kinyi yatudi balombene “kwenda kwi” Yesu?
4 Mushindo wa “kwenda kwi” Yesu nyi kulonga bibungi pabitale myanda ibaadi mwakule na ibaadi mukite. (Luk. 1:1-4) Takwi muntu su ngumune mulombene kukita bino pa mbalo yetu—abitungu tulongye ino myanda atwe banabene. Dingi “atwende kwi” Yesu pa kwata kitshibilo kya kubatshibwa na kwikala bu balongi ba Kidishitu.
5 Ungi mushindo wa “kwenda kwi” Yesu nyi mpa kwenda kwi bakulu ba mu tukongye nsaa yatudi na lukalo lwa bukwashi. Yesu kwete kufubisha bano “bantu bekale bya buntu” bwa kupasukila mikooko yaye. (Ef. 4:7, 8, 11; Yo. 21:16; 1 Mp. 5:1-3) Abitungu twitatshishe bwa kuteka bukwashi bwabo. Tatutengyela’shi bakulu babadikye bi mwatudi bwa kwiuka kyatudi nakyo lukalo nya. Tutaluuleyi bibaadi byakule ungi mukwetu abetamina bu Julian, amba’shi: “Nadi mwate kitshibilo kya kutuka ku Betele mwanda wa mukumbo unadi nao, anka ungi kuuku ande baadi mundungule bwa’shi su ne kwitamina bakulu bwabadya kunyingisha. Musango wa kumpala, tshinadi na nangushena’shi ne kwikala na lukalo lwa bukwashi bwa’bo. Kadi kunyima, nebatekyele bukwashi, na bukwashi bwa’bo bubaadi bu kyabuntu kyanshinaadi mubande kupeta.” Bakulu basha lulamato, bu bano babidi abayile mukutembela Julian, mbalombene kwitukwasha bwa kwiuka bi “kinangu kya Kidishitu” bwa’shi tupushe na kwambula ngyelelo aye a kinangu. (1 Kod. 2:16; 1 Mp. 2:21) Nsaa yabetukwasha mu uno mushindo, nyi kyabuntu kikile buwa kya betupa.
“ETENTEKYEEYI KIITA KYANDE”
6. Nkinyi kibaadi Yesu akyebe kwamba pabakwile’shi: “Etentekyeeyi kiita kyande”?
6 Pabakwile Yesu’shi: “Etentekyeeyi kiita kyande” baadi akyebe kwamba’shi “kuminayi bukunkushi bwande.” Baadi dingi akyebe kwamba’shi “tutwaleyi booso kikiita, na tufubile Yehowa booso. Bino bishima byooso abilesha’shi abitungu tufube.
7. Muyiile Mateo 28:18-20, mudimo kinyi wabadi betupe bwa kukita, na nkinyi kyatudya kushinkamisha?
7 Atukumiina lwitamino lwa Yesu nsaa yatulambula myuwa yetu kwi Yehowa na kubatshishibwa. Yesu mmwitamine bantu boso bwabadya kwenda kwadi, na tapele muntu su ngumune akumiina kufubila Efile Mukulu. (Yo. 6:37, 38) Balongi boso ba Kidishitu be na kineemo kya kukita mudimo ubaadi Yehowa mupe Yesu bwa kukita. Tushinkamisheyi’shi Yesu akekala nka kwanka bwa kwitukwasha bwa’shi tukite uno mudimo.—Badika Mateo 28:18-20.
“NULONGYELE KWANDJI”
Petesha bangi kikiisho bu yesu (Tala kikoso 8-11) *
8-9. Bwakinyi bantu beyishe abayile kwi Yesu, na nkonko kinyi ayitungu’shi twiyipushe?
8 Bantu boso beyishe abayile kwi Yesu. (Mat. 19:13, 14; Luk. 7:37, 38) Bwakinyi? Tutaleyi kwilekena kwi pankatshi pa Yesu na Bafadisee. Bano bakata ba bipwilo taabaadi na kifulo nya, dingi abaadi na kwitatuula. (Mat. 12:9-14) Yesu baadi na kifulo na baadi mwiyishe. Bafadisee abaadi abakumiina kwenda nkumo na abaadi abetatula mwanda wa mwasu wabo. Yesu baadi mutoshe balongi baye buno bwikashi. Baadi mwibalongyeshe bwabadya kwikala beyishe na abafubila bangi. (Mat. 23:2, 6-11) Bafadisee abaadi abakitshisha bantu myanda pabukopo, mwanda bantu abaadi abebatshinyi’shi tabeuku kikwibakitshikila su bapela kwibakookyela. (Yo. 9:13, 22) Yesu baadi anyingisha bangi na bikitshino byaye bya kifulo na mayi aye a kalolo.
9 Bolongyela ino myanda kwi Yesu su? Eyipushe’shi: “Bangi bakwete nkumona bu muntu sha kalolo na mwiyishe su? Nkwete kukita midimo ishadile bwa kukwasha bangi su? Nekalaa na kalolo kwi bantu su?”
10. Eyikashi kinyi dibaadi Yesu mwikashe munkatshi mwa bantu babadi abafubu naaye?
10 Yesu baadi mwikashe butaale munkatshi mwa bantu babaadi afubu nabo, na baadi na muloo wa kwibalongyesha. (Luk. 10:1, 19-21) Baadi munyingishe balongi baye bwabadya kwela nkonko, na baadi akumiina kupusha mweneno abo. (Mat. 16:13-16) Nka bu abikulaa mutshi wabakalwila kalolo mu lupango, balongi ba Yesu abaadi abende na kukula. Abaadi abatumikila bibaadi Yesu mulongyeshe na kupa bikuba mu midimo ibuwa.
Ikala muntu a bantu
Ikala na kisumi mu bulungudi
Ikala mwiyishe na kufuba ngofu *
11. Nkonko kinyi ayitungu’shi twiyipushe?
11 We na matalwa su? Su mbyabya, eyipushe’shi: ‘Eyikashi kinyi dyankwete kutwesha ku nshibo na ku mudimo? Nkwete kwikasha butaale su? Nkwete kunyingisha bangi bwadya kwela nkonko su? Napusha mweneno abo su?’ t’atukumiina kwikala bu Bafadisee, abaadi abashikwa bantu abaadi abebele nkonko na kubingabinga baba boso abaadi abatusha mweneno mwilekene na abo.—Mak. 3:1-6; Yo. 9:29-34.
“ANUPETE KIKIISHO”
12-14. Bwakinyi mudimo ubaadi Yesu mwitupe ngwikale bu kikiisho?
12 Bwakinyi mudimo ubaadi mwitupe awitupa kikiisho? Kwi tubingilo twibungi, anka tutaluuleyi ndambo.
13 Twi na mukunkushi ebuwa. Yehowa Mukunkushi etu mukile Bukata ekalaa na lutumbu bwa bafubi baye na ta ntomboshi. Ataa na muulo mudimo watukitshi. (Eb. 6:10) Na kwete kwitupa bukome bwatudi nabo lukalo bwa kukita mudimo wadi mwitupe. (2 Kod. 4:7; Nga. 6:5) Nfumwetu Yesu mwitulekyele kileshesho. (Yo. 13:15) Bakulu bakwete kwitutabalela, bakwete kwambula Yesu, “mulami mukata.” (Eb. 13:20; 1 Mp. 5:2) Bakwete kukita mwabo moso bwa kwikala netu kalolo, kwitunyingisha, na kwikala banyingye eshimba bwa kwitulongyesha, kwituludika na kwitukalwila.
14 Twi na ba kuuku bebuwa. Takwi mwilo su ngumune wi na kifulo bu kyetu na bena uno mudimo ukile buwa watudi nao. Banda kunangushena: Tukwete kufuba pamune na bakwetu bena Kidishitu be na mwikelo wibuwa, kadi bashikwete kunangushena’shi mbakile bangi. Be na ngobesha ibungi kushi kwitatula, bakwete kumona bangi bu bebakile. Tabakwete kwitwata penda bu bakwetu bena Kidishitu nya, kadi abetwata bu ba kuuku. Bwabwa bu kuuku bwi bukopo mu kipaso kyabakumiina mpa na kutuusha myuwa yabo bwetu!
15. Mbikunyi abitungu’shi tupushe pabitale mudimo watukwete kukita?
15 Twi na mudimo wibuwa. Tukwete kulongyesha bantu bya binyibinyi pabitale Yehowa na kulesha patoka madimi a Diabulu. (Yo. 8:44) Satana kwete kubofusha bantu na madimi bwa’shi bepushe bu bashi na lukulupilo. Bu kileshesho, akyebe tukumine’shi Yehowa tetufwila lusa bwa milwisho yetu na’shi tamwitufule. Ano mmadimi akilekile mwanda akwete kubofusha bantu. Nsaa ‘y’atwende kwi’ Yesu, abetufwila lusa bwa milwisho yetu. Na Yehowa mwitufule ngofu. (Lom. 8:32, 38, 39) Kukwasha bantu bwabadya kukulupila mwi Yehowa na kumona abishintuluka nshalelo abo, bi muloo wikashaa!
TUNGUNUKA NA KUPETA KIKIISHO KU BUKWASHI BWA KIITA KYA YESU
16. Mushindo kinyi wi bushito abwitutekye Yesu bwa kutwala, mbwilekene na bushito boso bwatudi balombene kutwala?
16 Bushito abwitutekye Yesu bwa kutwala, mbwilekene na bushito boso bwatudi balombene kutwala. Bu kileshesho, ku nfudilo kw’efuku dya mudimo wa ku mbidi, bebungi abekalaa bakokye na tabekalaa na muloo nya. Anka, kunyima kwa kukisha nsaa ibungi mu kufubila Yehowa na Yesu, atwikalaa na muloo wi bungi. Twi kwikala bakookye kukyolwa atwe abapu mudimo, kadi atwikitshishaa bwa kutwela mu bisangilo kyakya kyolwa. Misango ibungi patwalukaa ku bisangilo, atwikalaa banyingishibwe. Bino bi mumune na nsaa yatwitatshishaa bwa kulungula mukandu wibuwa na kwilongyela Bible. Efuto dyatupetaa ndikile bukome bubatutusha.
17. Bwakinyi abitungu twikale na nkatshinkatshi na badimukye?
17 Oso a kwatudi abitungu ekale na nkatshinkatshi bwa kusangula bya kukita na bukome bwaye. Byabya abitungu tudimukye pabitale kyatukyebe kukita. Bu kileshesho, twi kulwisha bukome bwetu pa kukimba bintu bya ku mbidi. Tentekyesha kibaadi Yesu mulungule ungi nsogwalume mpeta baadi mumwipushe’shi: “Nkite kinyi bwa kupeta muuwa wa looso?” uno nsongalume baadi nka a kookyela mwiya. Baadi muntu ebuwa mwanda evanjile a Maako alesha’shi Yesu baadi ‘mumufule.’ Yesu baadi mulungule uno nfumu mukinga’shi: “Nda, opaane kyooso kyodi nakyo, . . . akupu ondonde. Uno muntu baadi akumiina kulonda Yesu, anka tabaadi akumiina kuleka bupeta bwaye. (Mak. 10:17-22) Nyi bwakinyi bapelele kiita kibaadi Yesu mumulungule bwa kutwala, aye nkutungunuka na kwikala bu mpika a “fwalanga.” (Mat. 6:24) Obe okumiina kusangula kinyi?
18. Nkinyi akitungu’shi tukite efuku dyoso, na bwakinyi?
18 Efuku dyoso abitungu tunangushene pabitale kyatudi batuule kumpala mu muwa wetu. Bwakinyi? Bwashi tushinkamishe su tukwete kufubisha bukome bwetu kalolo. Ungi mukwetu abetaminaa bu Mark amba’shi: “Munda mwa bipwa bibungi, naadi na nshelelo mupelepele. Nadi mbala-mashinda, anka naadi na nangushena efuku dyoso pabitale kwikala na makuta bwa kwikala na nshalelo mukile buwa. Anka nabangile kwiyipusha bwakinyi nshalelo ande babangile kwela bukopo. Ami nkutundula’shi nkwete kukimba buwa bwande kumpala, kunyima napa Yehowa nsaa na bukome abishala.” Mark baadi mushintuule ngyelelo aye abinangu na kwipana mu mudimo wa Yehowa. Mark amba’shi: “Ingi nsaa naadi nekalakasha mwanda wa makuta, anka kubukwashi bwa Yehowa na Yesu, ne mukambile nkalakashi inadi nayo.”
19. Bwakinyi kwikala na mweneno ebuwa kwi na muulo?
19 Atutungunuka na kupeta kikiisho ku bukwashi bwa kiita kya Yesu, su atukitshi bintu bisatu. Kya kumpala, kulama mweneno ebuwa. Tukwete kukita mudimo wa Yehowa, nyi bwakinyi abitungu tukite abikyebe Yehowa. Atwe twi be na mudimo, Yehowa dyo mukata. (Luk. 17:10) Su twakita mudimo waye bu byatukyebe, abitwikela bukopo bwa kusemuna kiita. Sunga ngombe ebukome mulombene kwitapa sunga kukooka su apeela kulonda buludiki bwa mukunkushi aye. Nyi bwakinyi su twalonda buludiki bwa Yehowa twi balombene kukambila kitompwanga kyoso sunga kyekala naminyi. Tentekyesha’shi muntu su ngumune ta mulombene kwimika mpàngo yaye yakyebe kubanga kulombasha!—Lom. 8:31; 1 Yo. 4:4.
20. Binangu byetu abitungu bikale naminyi pabitale kutwala kiita kya Yesu?
20 Kya kabidi, fuba na binangu bibuwa. Kabingilo ketu nka kutumbisha Yehowa, Nshetu sha kifulo. Mu mafuku a kala, bantu be bungi abaadi na lwabi, abaadi abakumiina kupeta bintu kwi Yesu, abaadi bakutwe muloo na abo nkusumbula kiita kya Yesu. (Yo. 6:25-27, 51, 60, 66; Fid. 3:18, 19) Mu kwilekena na bano bantu, bano babaadi bafule Efile Mukulu na bakwabo, abaadi na muloo wa kutwala kiita munda mwa mafuku aabo a muwa pa nsenga, na lukulupilo lwa nkafuba mwiyilu na Yesu. Atutungunuka na kwikala na muloo bubo pa kutwala kiita kya Yesu na binangu bibuwa.
21. Muyiile Mateo 6:31-33, nkinyi kyatukulupila’shi Yehowa akitshi?
21 Kya kasatu, kulupila’shi Yehowa ekwanka bobe. Twibesumine ingi miloo mu nshalelo, na twi na mudimo wibukopo. Yesu baadi mwitudimushe’shi abaketubingabinga. Anka tushikamisheyi’shi, Yehowa aketupa bukome bwatudya kunyingiila nkalakashi. P’atunyingiila ngofu, atwikala na bukome bwibungi. (Shak. 1:2-4) Tukulupile dingi’shi Yehowa aketupa kyoso kyatudi nakyo lukalo bwa kwikala banyingye, Yesu kwete kwitulama, na bena Kidishitu netu bakwete kwitunyingisha. (Badika Mateo 6:31-33; Yo. 10:14; 1 Tes. 5:11) Twi na byoso abitungu bwa kunyingiila nkalakashi!
22. Bwakinyi abitungu twikale na lutumbu?
22 Mwana mukashi ababaadi bapaashe kwi Yesu baadi mupeta kikiisho dyadya efuku dibabadi bamupashe. Anka baadi na kya kupete kikiisho bwa mafuku oso su bafikile mulongi sha lulamato a Kidishitu. Onagushena’shi baadi mukite kinyi? Su baadya kukumiina kutwala kiita kya Yesu, banda kutala efuto dibadya kupeta—badya kwikala na Yesu mwiyilu! Takwi kintu su nkimune kibadya kukita kya kupwandikisha na ino myabi. Sunga twekala na lukulupilo kinyi—lwa kushala bwa loso mwiyilu sunga pa nsenga, twi balombene kwikala na lutumbu bwa lwitamino lwa Yesu, mwanda alo nyi alwitupa lukupilo lwa kwikala na muwa bwa looso.
LOONO 13 Kidishitu, nkileshesho kyetu
^ par. 5 Yesu etwitamina bwa kwenda kwadi. Nkinyi akintugu’shi tukite bwa kukumiina lwitamino lwaye? Uno mwisambo awaluula luno lukonko, na awituntentekyesha kyatudya kukita bwa kunyingishibwa patufubu pamune na Kidishitu.
