1. Bwakinyi abitungu tukookyele Yehowa?

ABITUNGU tukookyele Yehowa mwanda mmupangi etu. Nyi bwakinyi, aye nyi mulombene kwitulungula kyakukita. (Kibaf. 4:11) Anka kangi kabingilo kakumukookyela nka’shii, mushindo waye wa kunkunkusha wibuwa. Kubanga kala, bantu bebungi abaadi na bukome na matalwa pe bangi. Anka patupwadjikisha kukunkusha kwabo na kwa Yehowa, atumono’shi, Yehowa nyi mukunkushi sha binangu, kifulo, na lusa.—Efi. 34:6; Lom. 16:27; 1 Yo. 4:8.

2. Mukanda wa Beena-Ebelu 12:9-11, awitupa tubingilo kinyi twa kukookyela Yehowa?

² Yehowa akumiina’shi tumukokyele, kushi mwanda wa moo nya, anka mwanda twibamufule na atumwanta bu Nshetu sha kifulo. Mu mukanda ubaadi mutumine Beena-Ebelu, Mpoolo apatuula bwakinyi abitungu ‘tukishekishe kukôkyela Nshetu a mwiilu,’ mwanda kwete kwitulongyesha “bwa buwa bwetu”—Badika Beena-Ebelu 12:9-11.

3. (a) Mushindo kinyi watudi balombene kulesha’shi atukookyela Yehowa? (b) Nkonko kinyi yatukyebe kwaluula?

³ Atukookyela Yehowa patukitshi mwetu moso na kupela kwikulupila nsaa yatwata bitshibilo. (Nki. 3:5) Abitubofwila bwa kukookyela Yehowa nsaa yatulongo pabitale ngikashi yaye yakukanya. Bwakinyi? Mwanda nyikashi yaye ayimwenekyela mu byoso byakwete kukita. (Mis. 145:9) Su atulongo bibungi pabitale Yehowa, kifulo kyetu akinyisha kutama. Su twibafule Yehowa, tatwikala na lukalo lwa mulongo wa miiya ayitulungula kya  kukita na kishii kya kukita. Twikaleyi atunangushena na kutompa kupusha akikyebe Yehowa’shi, tukite na tusukye kukita bubi. (Mis. 97:10) Anka ingi nsaa, mbilombene kwitukyela bukopo bwa kukookyela Yehowa. Bwakinyi byabya? Bakulu, ba nshe bana, na ba nyina bana mbalombene kulongyela kinyi ku bileshesho bya Mukunkushi Neemiya, Nfumu Daavide, na Mariya nyinaye na Yesu? Uno mwisambo awaluula ku ino nkonko.

4-5. Muyiile Beena-Looma 7:21-23, bwakinyi bi kwikala bukopo bwa kukookyela Yehowa?

⁴ Kabingilo kakata aketukutshishwa kukookyela Yehowa nyi mwanda wa mulwisho na kukutwa kwa kupwidjika kwatudi bapyane. Nyi bwakinyi nsaa yoso tatukwete kukookyela Yehowa. Nsaa ibaadi Adame na Eeva bakutwe kukookyela Yehowa pa kudya kikuba, abaadi baate kitshibilo pabitale kibuwa na ki bubi. (Kib. 3:22) Lelo uno, bantu bebungi bakwete kwilwankana Efile Mukulu nka bu bibakitshine Adame na Eeva.

⁵ Sunga tatwi bu baaba bantu mwanda atwiuku na twi bafule Yehowa, mbilombene kwitwikela bukopo bwa kukita kyakyebe. Mpoolo mutumibwa badi mufumankane na uno mwanda. (Badika Beena-Looma 7:21-23.) Anka bu Mpoolo, atukumiina kukita bibuwa ku meso kwa Yehowa. Kadi abitungu tulwe na kyoso akitutakula mu kukita myanda ibubi.

6-7. Nkabingilo kinyi ka kabidi akalesha bwakinyi mbikumbene kwikala bukopo bwa kukookyela Yehowa? Tusha kileshesho.

⁶ Kabingilo ka kabidi akalesha bwakinyi bi kwikala bukopo bwa kukookyela Yehowa mpa mwanda wa bipikwa na mweneno a bantu ba mbalo yatudi bakudile. Mweneno a bantu bebungi mwikutwene na akikyebe eshimba dya Yehowa, na mbilombene kwikala bu ngoshi y’efuku dyoso bwa kupela kulonda mweneno aabo. Banda kutala kino kileshesho.

⁷ Mu ma mbalo ebungi abatakulaa ba nsongwa bwabadya kwipana mu muwa wabo ooso mu kukimba kwa makuta ebungi. Mungi mukwetu abetamina bu Mary * badi na luno lukalakashi. Kumpala kwa kulonga pabitale Yehowa, badi mutwele mu kalasa kakata ka mwiumbo dyabo. Mary babadi abamutakula kwi kifuko kyaaye bwadya kukimba mudimo wa makuta ebungi, bwabadya kwikala abamunemeka kwi bantu. Aye namu badi akumiina byabya. Anka, kunyima kwa kulonga pabitale Yehowa na abanga kumufula, bashintulwile binangu byaye. Kadi tabibadi bibofule bwaye nya, amba’shi: “Ingi nsaa namonaa mishindo ibuwa ya kupeta makuta ebungi, anka nauku’shi ngilombene kunkutshisha kufubila Yehowa mu mushindo wankwete kumufubila binobino. Pa mwanda wa mushindo wabadi bankushe, abinyikelaa bukopo bwa kupela. Abitungu ntekye Yehowa bwashi ankwashe nkambile kitompwanga kya kukumiina mudimo ukumbene kunkutshisha kwipana mu kumufubila.”—Mat. 6:24.

8. Nkinyi kyatukyebe kutaluula binobino?

⁸ Muyiile bibatulongo, bibuwa tukookyele Yehowa. Kadi baba be na matalwa kampanda, bu bakulu, ba nshe bana, na ba nyina bana, be na kangi kabingilo ka kulonda bukunkushi bw’Efile Mukulu; mmushindo wa kukwasha bangi. Tubande kutala bingi bileshesho bya mu Bible abitulongyesha mushindo wa kufuba na matalwa etu mu kipaso akisangasha Yehowa.

9. Neemiya badi mufumankane na nkalakashi kinyi?

⁹ Yehowa mupe bakulu bushito bwa kulama  mwilo waaye. (1 Mp. 5:2) Bakulu mbalombene kulongyela ku kileshesho kya Neemiya mushindo ubadi akunkusha mwilo wa Yehowa. Pabaadi bu mukunkushi a mu Yuda, Neemiya badi na matalwa ebungi. (Ne. 1:11; 2:7, 8; 5:14) Banda kunangushena ku ingi nkalakashi ibapetele Neemiya. Bapushishe’shi mwilo ngulwishe ntempelo na taubadi aukwasha bena Leevi na makuta bu bibabidi bifundjibwe mu Mwiya. Bena Yuda tababadi abanemeka mwiya wa Yehowa pabitale Sabato, na bangi ba kwabadi babadi bebakile bakashi ba bingi bisamba. Mukunkushi Neemiya badi na kya kupudisha uno mwanda.—Ne. 13:4-30.

10. Mushindo kinyi ubadi Neemiya mupudishe nkalakashi ibadi mupete?

¹⁰ Neemiya tabadi mufube bibubi na matalwa abadi nao bwa kutakula mwilo wa Yehowa pa bukopo bwaudya kulonda mweneno aaye nya. Pamutwe pa kukita byabya, bakimbile bukunkushi bwa Yehowa mu luteko, n’aye nkulongyeshe mwilo Miiya ya Yehowa. (Ne. 1:4-10; 13:1-3) Na kwiyisha kooso Neemiya bafubile pamune na mwilo,bwa kwiukwasha mpa na mu kwibakuula kwa midimba ya Yeelusaleme.—Ne. 4:15.

11. Muyiile 1 Beena-Tesalonika 2:7, 8, bakulu abitungu bakitshine bena kakongye myanda mu mushindo kinyi?

¹¹ Pangi bakulu t’abafumankana na myanda imumune na ibadi nayo Neemiya nya, anka mbalombeene kumwambula mu mishindo ilekene. Kileshesho, abafubu ngofu bwa kukwasha bakwabo. Anka tabeata na muulo ukilekile mwanda wa matalwa abadi nao nya. Kadi, abakwasha bakwabo na kalolo kooso. (Badika 1 Beena-Tesalonika 2:7, 8.) Kifulo kyabo na kwiyisha kwabo abimweneka mu mushindo w’abesamba na bangi. Andrew mungi mukulu bapu kukisha bipwa bibungi, amba’shi: “Ne mumone’shi nsaa i mukulu e na kalolo na muloo, bino abikumaa mashimba a bakwetu ngofu. Ino ngikashi ayitakula kakongye bwakadya kufuba pamune na bakulu.” Mungi mukwetu abetamina bu Tony bapu kupwa bipwa bibungi  bu mukulu mu kakongye, amba’shi: “Natompaa kutumikila elango di mu Beena-Fidipe 2:3 na netatshisha ngofu bwa kumona bangi bu bankile. Bino abinkwasha bwa kupela kukitshisha bantu myanda pa bukopo.”

12. Bwakinyi bi na muulo bwa’shi bakulu bekale na kwiyisha?

¹² Abitungu bakulu bekale beyishe, anka bi Yehowa mmwiyishe. Sunga Yehowa nyi Mukunkushi mukata a eyilu na nsenga, “ayinama muushi” bwa ‘kwibwesha mubofule mupone mu nsenga.’ (Mis. 18:36; 113:6, 7) Anka, Yehowa mushikwe baba basha kwitatula.—Nki. 16:5.

13. Bwakinyi abitungu mukulu “ataluule byakula na mushindo webyakula”?

¹³ Mukulu akookyela Yehowa bibuwa “ataluule byakula na mushindo webyakula.” Su tamukite byabya, mukumbene kwikala na ngakwilo ebubi su muntu tamumunemekye. (Shak. 1:26; Nga. 5:14, 15) Andrew atubesambila kunundu, amba’shi: “Ingi nsaa nadi nakumiina kwalula mukwetu bibubi su ta mmunemekye aku namu ne mukulu. Anka, ne munangushene ku bileshesho bya balume basha lulamato bi mu Bible, na bino bibadi binkwashe bwa kuuka muulo wa kwikala na kwiyisha.” Bakulu abaleshaa’shi abakookyela Yehowa nsaa yabadi na kifulo na kalolo nsaa y’abesamba na bena kakongye, mpa na bakulu nabo.—Kol. 4:6.

14. Yehowa mupe ba nshe bana mudimo kinyi, na ebatekye’shi bakite kinyi?

¹⁴ Yehowa mmutule nshe bana bu mutwe wa kifuko, na Efile Mukulu amutekye bwadya kulongyesha, na kunkukusha bana. (1 Kod. 11:3; Ef. 6:4) Anka nshe bana ta mukumbene kufuba na matalwa aye mooso mwakyebela nya. Yehowa nyi Mupangi a kifuko, byabya ba nshe bana kwete kwibatala mushindo oso wabakitshina bifuko byabo myanda. (Ef. 3:14, 15) Ba nshe bana abalesha’shi abakookyela Yehowa nsaa yabafubisha matalwa aabo mu mushindo ausangasha Yehowa. Mbalombene kulongyela bibungi ku kileshesho kya Nfumu Daavide.

15. Bwakinyi Nfumu Daavide nyi nkileshesho kibuwa kwi ba nshe bana?

¹⁵ Yehowa badi mutule Daavide kushi penda bu mukunkushi a kifuko kyaaye, kadi bu mukunkushi a mwilo ushima wa Isaleele. Bu bibaadi Nfumu, Daavide badi na matalwa ebungi. Ingi nsaa badi mufube bibubi na matalwa abadi nao aye nkukita bilubilo bikata. (2 Sam. 11:14, 15) Anka badi mukookyele kwi Yehowa pa kukumiina dinyoka. Balungwile Yehowa byoso bi mwishimba dyaaye mu luteko. Na aye nkukita mwaye mooso bwa kukookyela elango  dya Yehowa. (Mis. 51:3-6) Badi na kwiyisha dingi pa kukumiina elango dibuwa kushii penda dya bana balume kadi mpa na dya bana bakashi. (1 Sam. 19:11, 12; 25:32, 33) Daavide balongyeele ku bilubilo byaaye na aye nkukita mwaye mooso bwa kutuula kufubila Yehowa bu kintu kina muulo ukata mu nshalelo aaye.

16. Ba nshe bana mbalombene kulongyela kinyi kwi Daavide?

¹⁶ Banda kutala dimune dya ku malongyesha alombene kupeta ba she bana kwi Nfumu Daavide: Tokumanga kufubisha bibubi matalwa abadi bakupe kwi Yehowa. Kumiina bilubilo byobe, kumiina elango dya mu Bible dyabakupa kwi bangi. Su bokitshi byabya, kifuko kyobe akikunemeka bwa kwiyisha koobe. Nsaa yokwete kuteka pamune na kifuko kyoobe, lungula Yehowa bi mwishimba dyobe—bena kifuko bapushe mushindo odi mutule lukulupilo loobe mwadi. Na dingi, mudimo ofubila Yehowa wikale na muulo ukata mu nshalelo oobe. (Miy. 6:6-9) Kileshesho kyobe kibuwa nyi nkya buntu kikata kyodya kupa kifuko kyoobe.

17. Yehowa mupe ba nyina bana bushito kinyi?

¹⁷ Yehowa mupe nyina bana oso bushito bukata mu kifuko, na mumupe angi matalwa kwi bana. (Nki. 6:20) Abikitshi nyina bana na byakula bi na bukitshishi kwi bana baaye munda mwa mafuku abo oso a muwa. (Nki. 22:6) Tala kilombene ba nyina bana kulongyela kwi Mariya, nyinaye na Yesu.

18-19. Ba nyina bana mbalombene kulongyela kinyi kwi Mariya?

¹⁸ Mariya badi auku Bifundwe kalolo. Badi na kanemo kakata kwi Yehowa na bukuuku bwibuwa naaye. Badi akumiina kukita akikyebe Yehowa, sunga mbibadi abitungu kushintuluka kampanda mu nshalelo aaye.—Luk. 1:35-38, 46-55.

¹⁹ Anwe ba nyina bana, nwi bakumbeene kwambula Mariya mu mishindo ibungi. Naminyi? Wa kumpala, mpa kulama kipwano kyenu na Yehowa ku bukwashi bwa kwilongyela Bible na kwela kwa nteko pa bupenka. Wa kabidi pa kukumiina kushintuula ingi myanda mu nshalelo enu bwa kusangasha Yehowa. Kileshesho, pangi mbakukushe kwi baledi abakwataa nsungu bukidi na abakulaa bana babo bishima bibubi. Pangi we mukumbene kupwandikisha’shi kukitshina bana bobe myanda mu uno mushindo kwibuwa. Sunga kunyima kwa kulonga abitekye Yehowa bwashi okitshine bana bobe myanda, we mulombene kwibimona bu bi bukopo bodya kukumiina, na kwikala na lwishinko kwi bana bobe, bikishekishe nsaa yodi mukookye abo namu tabakupushisha.  (Ef. 4:31) Mu yaaya nsaa, bibuwa otekye bukwashi kwi Yehowa. Mungi nyina bana abetamina bu Lydia amba’shi: “Ingi nsaa, natekaa ngofu bwa kupela kwakula na nsungu su nsongwalume ande bakutwa kunkookyela. Natshibi mwisambo bwa kuteka bukwashi kwi Yehowa mundamunda. Luteko alufukamishaa eshimba dyande.”—Mis. 37:5.

20. Bangi ba nyina bana be na lukalakashi kinyi, na mbalombene kwilupudisha naminyi?

²⁰ Lungi lukalakashi lukumbene kupeta ba nyina bana ndwa’shi, bi bukopo bwabadya kulesha bana babo’shi mbebafule. (Tt. 2:3, 4) Bangi bana bakashi mbakudile mu mashibo mushibaadi baledi mu kipwano kibuwa na bana babo. Su bino nyi byabadi bakukushe, tokumanga kukita bilubilo bibadi baledi bobe bikite. Nyina mwana akookyela akikyebe Yehowa mukumbene kulonga mushindo wadya kulesha bana baye kifulo. Mbilombene kumwikela bukopo bwadya kushintuula mweneno aaye, byapusha na bikitshino byaye. Anka mbilombene kukitshika, na kwakwa kushintuluka nkulombene kutwesha muloo mu kifuko.

21-22. Muyiile Yeeshaya 65:13, 14, mbukwashi kinyi bwatupete pa kukookyela Yehowa?

²¹ Nfumu Daavide badi auku muulo wa kukookyela Yehowa. Bafundjile’shi: ‘Eyi dya Yehowa ndipwidikye, adipanaa muwa, eyi dya Yehowa tadi mpaka, adipa shyeeyele mwiyilu [sunga’shi sh’etatula] tudingi. Adimunyikila mufubi oobe namwinyi; mu kwidilama mmwapetela buuwa.’ (Mis. 19:8, 11) Lelo uno, twi bakumbene kumona kwilekena kwi pankatshi pa muntu akookyela Yehowa na yawa apele elango dyaye dya kifulo. Baaba abakookyela Yehowa “abeele tukundakunda bwa muloo awikala mu mashimba aabo.”—Badika Yeeshaya 65:13, 14.

²² Nsaa i bakulu, ba nshe bana na ba nyina bana abakumiina kukookyela Yehowa, nshalelo aabo alongama, bifuko byabo bina muloo, na kakongye kashima akekala mu buumune. Kikile byoso, abasangasha eshimba dya Yehowa. (Nki. 27:11) Uno nyi muloo watudi balombene kwikala nao!