1. Yehowa amonaa basha kwiyisha naminyi? Patuula.

YEHOWA mmufule bantu beyishe. Anka penda bantu beyishe binyibinyi nyi bakumbene kwikala mu kipwano kibuwa naaye. Anka, “atundwilaa ku bula ooso sha kwitatula.” (Mis. 138:6) Atwe boso atukuminaa kusangasha Yehowa na kwikala mu kifulo kyaaye, nyi bwakinyi bibuwa twikale beyishe.

2. Atukataluula nkonko kinyi mu uno mwisambo?

² Mu uno mwisambo atutalula ngaluulo ku ino nkonko: (1) Kwiyisha nkinyi? (2) Bwakinyi abitungu twikale na dino eyikashi? (3) Nsaa kinyi yabidi bilombene kwitwikeela bukopo bwa kwikala beyishe? Anka byatukyebe kwibimona, nsaa yatudi na kwiyisha, atusangasha eshimba dya Yehowa, na kupeta myabi.—Nki. 27:11; Yesh. 48:17.

3. Kwiyisha nkinyi?

³ Muntu sha kwiyisha tapwandikishaa’shi e na kineemo kukila bangi nya. Te na kwitatula nya. Bible alesha’shi muntu sha kwiyisha e na mweneno ebuwa pabitale kipwano kyaye na Yehowa Efile Mukulu mpa na bantu naaye. Muntu sha kwiyisha ashingulaa’shi bangi bantu mbamukile mu ungi mushindo.—Fid. 2:3, 4.

4-5. Bwakinyi twi kwamba’shi muntu amweneka bu mwiyishe te na kwiyisha kwa binyibinyi?

⁴ Bangi bantu abamwenekaa bu beyishe, aku namu ta mbeyishe binyibinyi nya. Mbalombene kwikala baasha kumiina. Sunga’shi mbalombene kwikala na bukalanga sunga kanemo kwi  bangi mwanda baledi babo mbebalongyeshe bwa kwikala byanka. Anka munda mwabo mbalombene kwikala na kwitatula. Lelo sunga maloba mbakumbene kulesha bi mwabadi.—Luk. 6:45.

⁵ Ku lungi lupese, namu bantu abamweneka bu bekulupile na abalesha byabapwandikisha tabekalaa nka na kwitatula nya. (Yo. 1:46, 47) Anka, bantu basha buufu mbalombene kupela kwikala abekulupila bwashi tala bekala na kwitatula. Byatwikala atuuku kwakula kalolo sunga na ngobesha kampanda, boso bwetu abitungu twitatshishe bwa kwikala beyishe.

6. Bu byabidi mu 1 Beena-Kodinda 15:10, nkinyi akitulongyesha kileshesho kya Mpoolo mutumibwa?

⁶ Banda kutala kileshesho kya Mpoolo mutumibwa. Yehowa badi mufube naaye ngofu bwa kutula tukongye mu bibundji bilekene. Pangi aye mmukite midimo ibungi kukila bangi batumibwa ba Yesu Kidishitu booso. Anka Mpoolo tabadi na kwitatula munkatshi mwa bakwabo nya. Na kwiyisha kooso bambile’shi: “Ne mukile bupeela a ku batumibwa booso ami shii mulombeene kwitaanyinwa bu mutumibwa mwanda napombeshanga kipwilo ky’Efile Mukulu.” (1 Kod. 15:9) Akupu, Mpoolo bakwile kalolo’shi badi na kipwano kibuwa na Yehowa penda mwanda Yehowa badi mumuleshe kalolo kakata, kushii mwanda wa ngikashi yaaye sunga bwa bintu bibadi mukite nya. (Badika 1 Beena-Kodinda 15:10.) Dino nyi elango dikata dya kwiyisha dibadi Mpoolo mutushe mu mukanda ubadi mutumine bena Kodinda—bikishekishe nsaa yatutentekyesha’shi bangi balume ba mu kakongye babadi abakimbi kwilesha bu be kunundu kwa Mpoolo!—2 Kod. 10:10.

7. Mushindo kinyi ubadi bangi bakwetu ba ano mafuku abawukibwa ngofu baleshe kwiyisha? Tusha kileshesho.

⁷ Bafubi ba Yehowa bebungi mbanyingishibwe  na kileshesho kya mukwetu Karl F. Klein, badi mu Kasaka ka Bakunkushi-Bakulu. Mu mwisambo waaye, mukwetu Klein badi mushinkamishe na kwiyisha kooso’shi badi mupete nkalakashi ibadi anyingiila munda mwa bipwa. Kileshesho, mu bipwa 1920 bibadi abimwikela bukopo bwa kukita bulungudi bwa ku nshibo na nshibo, nyi bwakinyi balekyele kwibukita munda mwa bipwa bibidi bishima. Kunyima, pabadi afubu ku Betele, mungi mukwetu bamupele elango aye nkushaala mumufitshile munda. Bakumbile dingi maladi a mu binangu kunyima aye nkupanda. Anka, bapetele dingi mashito ebungi. Mukwetu Klein badi na kwiyisha binyibinyi, bino bibadi bimwenekye nsaa ibadi mwakwile kubofula kwaye sunga mbibaadi muwukibwe ngofu! Bakwetu bebungi abatentekyeshaa na muloo oso mwisambo wa mukwetu Klein. *

8. Mushindo kinyi wi mukanda wa 1 Mpyeele 5:6 awitukwasha bwa kumona’shi kwiyisha akusangasha Yehowa?

⁸ Kabingilo kakata aketutakula bwa kwikala beyishe nyi mwanda wa kusangasha Yehowa. Mpyeele mutumibwa badi muleshe byanka patoka. (Badika 1 Mpyeele 5:6.) Mukanda wa “Viens suis moi” awakula pabitale mayi a Mpyeele’shi: “Kwitatula kwi nka bu lulenga. Nkulombene kutusha bipeta bikile bubi. Muntu sha kwitatula mukumbene kukutwa kwikala na muulo ku meso a Efile Mukulu. Anka, sunga muntu shi na ngobesha ibungi mukumbene kwikala na muulo ku meso a Yehowa su e na kwiyisha. Yehowa akupa bwedi nka su we mwiyishe.” * Eyendo, kintu ki na muulo kyatudya kukita nkusangasha Yehowa!—Nki. 23:15.

9. Bwakinyi bangi bantu abakuminaa kwikala peepi netu su twibeyishe?

⁹ Kukaasha kusangasha Yehowa, atupete myabi ibungi nsaa yatudi na kwiyisha. Su twi beyishe bangi bantu abefubwila peepi netu. Bwakinyi byabya? Etule pa mbalo ya bantu bokumiina kwikala nabo. (Mat. 7:12) T’atukumiinaa kwikala na muntu akumiinaa nka’shi bakite byakyebe na shapushishaa ungi muntu. Mu kwilekena na yawa muntu, atwikalaa na muloo wa kwikala na bena Kidishitu netu nsaa ‘y’abekwasheena bu baana na baana, abesambeena, mbeeyishe.’ (1 Mp. 3:8) Bino nyi byatupushaa pabitale bantu beyishe na atwikalaa na muloo wa kwikala pamune nabo.

10. Kwiyisha akubofushaa nshalelo etu naminyi?

¹⁰ Dingi kwiyisha akubofushaa nshalelo etu.  Mu kwakula kwa kalolo, twi bakumbene kufumankana na myanda mu nshalelo etu y’atumono’shi tayibuwa nya. Nfumu Salomone sha binangu bakwile’shi: “Ne mumone bapika pa nfwalasa na baana-buwa abatambuka lwa mikoolo buu bapika.” (Mul. 10:7) Ingi nsaa baaba be na ngobesha ibungi t’abapetaa kineemo nya. Na bano be na ngobesha ipela, ingi nsaa abapetaa kineemo. Sunga mbyabya, Salomone bamwene’shi bibuwa tukumiine nshalelo nka byabya byadi kushi kwinyongola su myanda tayende kalolo mu nshalelo etu. (Mul. 6:9) Su twibeyishe, abikala bibofule bwatudya kukumiina myanda ya mu nshalelo ish’ayitusangasha.

11. Abitungu tukite kinyi nsaa y’abetupa elango?

¹¹ Efuku dyoso atwikalaa na mishindo ibungi ya kulesha kwiyisha. Banda kutala bino bileshesho bipeela. Nsaa y’abetupa elango. Bibuwa tushinguule’shi su muntu baata nsaa ya kwitupa elango, pangi twi bakite kilubilo kyatushii batundule. Nsaa y’abetupa elango binangu abitufwilaa bwa mususa wa kumpala mbya kwidipela. Twi balombeene kubanga kutopeka yawa betupa elango sunga kutopeka bibakula. Anka su twibeyishe, atwitatshisha bwa kwikala na mweneno ebuwa.

12. Muyiile Nkindji 27:5, 6, bwakinyi abitungu tusangale nsaa ayitupa muntu elango? Tusha kileshesho.

¹² Muntu sha kwiyisha atambulaa elango. Twate kileshesho: Banda kupwandikisha’shi we ku bisangilo bya bena Kidishitu. Kunyima kwa kwisamba na bakwetu bebungi, umune a kwabadi bakukaka ku lupese bwa nkulesha’shi kwi kantu kakupatame mu meno. Kushi mpaka, we mukumbene kupusha buufu. Twe mulombene kusangala mwanda bakulungula byabya su? Eyendo’shi bodya kupusha buwa su kwikele muntu mukuleshe byanka kubanga ku mbangilo! Bi mumune, bibuwa tusangale nsaa ayinyingi mukwetu eshimba bwa kufika mu kwitupa elango nsaa yatudi nadyo lukalo. Yawa muntu atumwata bu kuuku, kushii bu mwishikwanyi netu.—Badika Nkindji 27:5, 6; Nga. 4:16.

13. Twi balombene kulesha kwiyisha naminyi nsaa ayipete bangi mashito?

¹³ Nsaa ayipete bangi mashito. Mungi mukulu abetamina bu Jason alesha’shi: “Pamono bangi abapete mashito, ingi nsaa neyipusha bwakinyi ta mbansangule namu.” Opushaa namu bino su? Tabi bubi kukimba kufubila Yehowa ngofu nya. (1 Tim. 3:1) Anka, bibuwa tudimukye pabitale byatupwandikisha. Su tatwi badimukye, kwitatula nkulombeene kutama  mu mashimba etu. Kileshesho, mwina Kidishitu mulume mukumbene kupwandikisha’shi nka penda aye nyi mukumbashe myanda itekibwe bwa mudimo kampanda. Sunga mukashi mwina Kidishitu mukumbene kupwandikisha’shi, ‘Mulume ande mukumbene kukita uno mudimo kukila uno mukwetu mungi!’ Byabya, su twi beyishe, tatwi bakumbene kwikala na uno mweneno nya.

14. Nkinyi kyatulongyela ku bibakitshine Moyiise nsaa ibapetele bangi mashito?

¹⁴ Twi kulongyela ku bibakitshine Moyiise nsaa ibapetele bangi mashito. Moyiise badi ata mudimo waye wa kukunkusha mwilo wa Isaleele na muulo ukata. Anka nsaa ibadi Yehowa mupe bangi mushindo wa kukita ingi midimo ibadi ayikitshi Moyiise, bakitshine kinyi? Tabadi mukwate kyutu nya. (Mb. 11:24-29) Badi na kwiyisha na atadiila bangi bwabadya kumukwasha ku mudimo wa kusambisha mwilo. (Efi. 18:13-24) Paapa bena Isaleele babadi na bana balume bebungi bakumbene kwibakwasha, na tabibadi abitungu’shi batengyele nsaa ibungi bwabadya kusambisha bilumbu byabo nya. Bino abilesha’shi Moyiise tabadi mutule mashito aaye kumpala kwa nkalo ya bangi nya. Nyi nkileshesho kibuwa bwetu! Tushinguule’shi su atukumina kwikala na muulo kwi Yehowa, kwiyisha kwetu bibuwa kukile ngobesha yetu. Sunga “Yehowa ekala mwiyilu mwi bula naminyi, amono ooso mwiyishe.”—Mis. 138:6.

15. Mushindo kinyi ushintulukye midimo ya bakwetu bebungi?

¹⁵ Nsaa ayishintuluka mudimo wetu. Mu bipwa bishale, bakwetu bebungi abekalanga bafubile Yehowa ngofu bekele bapete angi mashito. Kileshesho, mu 2014, ndumbulwilo ayikalanga mwate kitshibilo kya’shi takwikala dingi bakunkushi ba distrike, bano bakwetu na bakashi babo babebatekyele bwa kukumina angi mashito. Kubanga mu kyakya kipwa,  bakunkushi ba bifunda su abalombasha bipwa 70 mudimo wabo awimana. Na bakwetu balume be na bipwa 80 ta mbalombene dingi kwikala bu bakunkushi ba kasaka ka bakulu nya. Dingi mu bipwa bishaale, bantu bebungi be mu ma Betele abekalanga bebalushe mu tukongye. Bangi mbemikye mudimo wa nsaa yooso wi pabwao mwanda wa mikumbo, mashito a mu kifuko, sunga bwa ingi myanda.

16. Mushindo kinyi wi bakwetu balume na bakashi mbaleshe kwiyisha pa kukumiina midimo ipya?

¹⁶ Kushintuluka kwi bino takubadi bu mwanda upelepele kwi bano bakwetu bwa kwiubidishena nako. Bebungi abekalanga bapete angi mashito bekele nka bafule mudimo ubabadi abafubu kumpala munda mwa bipwa bibungi. Mbapete “kenyongoshi” nsaa y’abakimbi bya kwiubidishena na mudimo wabo upya. Mu kwenda kwa mafuku mbafikye mu koobesha. Bwakinyi? Kintu kikata kibakwashe nyi nkifulo kyabo bwa Yehowa. Abaukanga’shi mbelambule kwi Efile Mukulu—ta mbelambule ku mudimo sunga bushito kampanda. (Kol. 3:23) Be na muloo wa kutungunuka na kufubila Yehowa na kwiyisha kooso sunga bekala na mudimo kinyi. Bakwete ‘kumulubwila mpombo [yabo] yooso,’ abauku’shi aye kwete kwibapasukila.—1 Mp. 5:6, 7.

17. Bwakinyi twina lutumbu bwa abitunyingisha Bible bwatudya kwikala beyishe?

¹⁷ Twina muloo wibungi mwanda Bible kwete kwitunyingisha bwa kwikala beyishe. Nsaa yatudi beyishe, bangi abekala na muloo wa kwikala netu. Atwikala na ngobesha ya kunyingiila myanda ya mu nshalelo. Mwanda wi na muulo, atwifubwila peepi na Nshetu a mwiyilu. Twi na muloo wibungi wa kwiuka’shi aye e “kuunundw’a byooso,” mmufule na ataa bafubi baye beyishe na muulo!—Yesh. 57:15.