1-2. Muyile Mateo 5:11, mushindo kinyi autungu’shi tumone nkalakashi?

YESU badi mulee batumiibwa baye’shi abakekala na muloo wi bungi. Badi dingi mulungule boso bamufule’shi abakapete nkalakashi. (Mat. 10:22, 23; Luk. 6:20-23) Atupete muloo wa kwikala balongi ba Kidishitu. Anka, atupushaa naminyi nsaa y’abakyebe kwitukutshisha kufubila Yehowa kwi bena kifuko netu sunga nsaa y’abetubingabinga kwi mbulamatadi, nsaa i bena mudimo sunga bena kalasa netu abetutakula mu kukita kintu ki bubi? Kushi mpaka, ino myanda ngilombene kwitwinyongosha.

² Bantu be bungi t’abamonaa kubingwabingwa bu kabingilo ka kwikala na muloo. Anka, nyi akitutekye Bible’shi tukite. Bu kileshesho, mulongi Shake bafundjile’shi pamutwe pa kwikalakasha bikilekile nsaa yatudi mu nkalakashi, abitungu twikale na muloo. (Shak. 1:2, 12) Yesu bambile’shi abitungu twikale na muloo sunga bekala abetubingabinga. (Badika Mateo 5:11.) Mushindo kinyi watudi balombene kulama muloo mu nkalakashi? Twi kulonga bi bungi pa kutalula myanda ibadi Shake mufundjile bena Kidishitu ba kumpala. Kya kumpala, tubande kutala nkalakashi ibabadi bapete.

3. Nkinyi kibakitshikile mafuku apela kunyima kwa Shake kufika bu mulongi a Kidishitu?

³ Mafuku apela kunyima kwa Shake mukwabo na Yesu kufika bu mulongi aye, ababangile kubingabinga bena Kidishitu abadi mu Yelusaleme. (Bik. 1:14; 5:17, 18) Na nsaa ibabadi baase mulongi Etshyene mabwe, bena Kidishitu be bungi abasukile, na “babaapaasukiile mu bipindji bya nsenga bya Yuudeya naa Samariya,” kula na Yelusaleme bu ku Shipre na ku Antyoshe.  (Bik. 7:58–8:1; 11:19) Twi kupwandjikisha bungi bwa nkalakashi ibadi ipete balongi. Anka abatungunukile na kulungula mukandu wibuwa ma mbalo oso ababadi abende, na abo nkukwasha bwa kutula tukongye ma mbalo e bungi. (1 Mp. 1:1) Kadi kubadi nkalakashi i bungi ibadi aitengyela bena Kidishitu ba kumpala.

4. Ingi nkalalakashi kinyi ibadi inyingile bena Kidishitu ba kumpala?

⁴ Bena Kidishitu ba kumpala abadi bapete nkalakashi ilekene. Bu kileshesho, pangi mu kipwa kya 50 B.B., Amperere a mu Loma Kloode badi mutume eyi dya’shi bena Yuuda boso bakatukye mu Loma. Nyi bwakinyi bena Yuuda abadi bafikye bena Kidishitu, abadi balekye mashibo aabo bwa kwenda angi ma mbalo. (Bik. 18:1-3) Pangi mu kipwa kya 61 B.B., Mpoolo badi mufunde’shi bakwabo bena Kidishitu, abadi abakayibwa, kwedibwa mu nkano na kunyengibwa bintu. (Eb. 10:32-34) Na nka bu bangi bantu, bena Kidishitu abadi na kya kunyingila bulanda na maladi.​—Lom. 15:26; Fid. 2:25-27.

5. Nkonko kinyi y’atwalula mu uno mwisambo?

⁵ Nsaa ibadi Shake mufunde mukanda waye kumpala kwa kipwa kya 62 B.B., badi auku kalolo nkalakashi ibadi nayo bakwabo balume na bakashi. Yehowa badi muyokyele Shake bwadya kwibafundjila na kwibapa malango abadya kwibakwasha bwa kulama muloo sunga mu nkalakashi. Tutaluleyi mukanda wa Shake na twalule ku ino nkonko: Muloo kinyi ubadi Shake akwilaa? Nkinyi kilombene kukutshishwa bena Kidishitu uno muloo? Na mushindo kinyi ulombene kinangu, lukumino na kunyinga kw’eshimba kwitukwasha bwa kulama muloo wetu sunga twapeta nkalakashi i naminyi?

6. Muyile Luka 6: 22, 23, bwakinyi mwina Kidishitu e kwikala na muloo nsaa y’akyenge?

⁶ Bantu abapwandjikisha’shi mbalombene kwikala na muloo nka su be na mbidi bukome, makuta e bungi na muloo mu kifuko. Anka muloo ubadi Shake akwila nyi kipindji kya ku kikuba kya kikudi ky’Efile Mukulu na tautalaa nshalelo a muntu. (Nga. 5:22) Mwina Kidishitu mulombene kwikala na muloo wa binyibinyi, pa kuuka’shi asankisha Yehowa na kulonda kileshesho kya Kidishitu. (Badika Luka 6:22, 23; Kol. 1:10, 11) Twi kupwandjikisha muloo wetu na ludimi lwa kaalo lwi mwilampi. Ludimi lwa kaalo ndulamibwe ku lupapi sunga ku mpeshi bwa’shi lutungunukye na kutemba. Natwe namu twi kutungunuka na kwikala na muloo sunga twapeta nkalakashi i naminyi mu nshalelo etu. T’atwiushimisha nsaa yatudi na maladi sunga makuta apela. Na atwikala nka nao nsaa yabetuka kwi bantu sunga kwitukyengyesha kwi kifuko kyetu. Pamutwe pa kubofula, atwikala nka na muloo wi bungi nsaa ayikyebe beshikwanyi betu kwitushimishisha wanka. Nkalakashi yatukwete kupeta pa mwanda wa lukumino lwetu ayilesha’shi twi balongi ba Kidishitu ba binyibinyi. (Mat. 10:22; 24:9; Yo. 15:20) Nyi bwakinyi Shake bafundjile’shi: ‘Bakwetu, panukafumankana na bitompwanga bilekene ebimoneyi bu mwanda wa muloo.’​—Shak. 1:2.

7-8. Mushindo kinyi ulombene kunyinga lukumino lwetu nsaa y’alutompibwa?

⁷ Shake akwikala kangi kabingilo akatakula bena Kidishitu bwa kunyingila nkalakashi i bukopo. Amba’shi: “Anuwuku’shi kutompwa kwa lukumiino lwenu akwinupa katshintshi mu mpombo.” (Shak. 1:3) Nkalakashi inka bu kaalo k’abafubisha bwa kupwa kyamo ki mashi. Nsaa y’abekyele mu kaalo ke bukopo akupu abekyele mu mema, kyamo akifiki bukopo ngofu. Mushindo umune, nsaa y’atunyingila nkalakashi, lukumino lwetu alunyingi ngofu. Nyi bwakinyi Shake bafundjile’shi: “Katshintshi naamu keekale kanyingye mu mifubo yeenu bwa’shi nwikale . . . bakumbane bashii kakyeshi sunga nkamune.” (Shak. 1:4) Nsaa y’atumono’shi nkalakashi anyingisha lukumino lwetu, twi balombene kwiyingila na muloo.

⁸ Mu mukanda waye, Shake alesha ingi myanda ilombene kwitushimishisha muloo. Nkalakashi kinyi, na mushindo kinyi watudi balombene kwiyikambila?

9. Bwakinyi twi na lukalo lwa kinangu?

⁹ Lukalakashi: Kukutwa kuuka kya kukita. Nsaa yatudi mu nkalakashi, bi buwa tukimbe bukwashi bwa Yehowa bwa’shi twate bitshibilo abimusankisha, abikwasha bakwetu balume na  bakashi na abitukwasha bwa kulama lulamato lwetu. (Yel. 10:23) Twi na lukalo lwa kinangu bwa kuuka kya kukita na kya kwakula nsaa y’abetubingabinga. Su t’atwiuku kya kukita twi kwipusha bu ba shi na bukwashi, na twi kushimisha muloo wetu bukidibukidi.

10. Bwa kupeta kinangu, Shake 1:5 etutekye bwatudya kukita kinyi?

¹⁰ Kya kukita: Teka Yehowa kinangu. Su atukumina kunyingila nkalakashi na muloo, abitungu tutekye Yehowa kinangu bwa kwata bitshibilo bi buwa. (Badika Shake 1:5.) Twi kukita naminyi su twamona’shi Yehowa t’alula nteko yetu bukidibukidi? Shake amba’shi abitungu “tutungunukye na kwibiteka” kwi Efile Mukulu. T’abitondaa Yehowa nsaa y’atutungunuka na kumuteka kinangu. Na t’etutopekaa nya. Nshetu e mwiyilu etupa byanka “n’eshimba dya kalolo” nsaa y’atumutekye bwa kupeta binangu abitukwasha bwa kunyingila nkalakashi. (Mis. 25:12, 13) Amonaa nkalakashi yatudi nayo na apushaa bi bubi nsaa y’etumono atukyenge, na ena lukalo lwa kwitukwasha. Kushi mpaka, bino abitupa muloo! Mushindo kinyi awitupeyaa Yehowa muloo?

11. Nkinyi kingi akitungu’shi tukite bwa kupeta kinangu?

¹¹ Yehowa etupa kinangu ku bukwashi bw’Eyi dyaye. (Nki. 2:6) Bwa kupeta kino kinangu, abitungu tulongye Eyi dyaye na mikanda ayipatula Bible. Anka, t’abitungu twikale penda na kiukilo nya. Abitungu tukite byabya abitutekye Efile Mukulu. Shake bafundjile’shi: “Tumikilayi eyi, tanwikalanga’nka peenda anwiditeemesha.” (Shak. 1:22) Nsaa y’atutumikila elango dy’Efile Mukulu, atunyisha kwikala na butaale, nkatshinkatshi na lusa. (Shak. 3:17) Ino nyikashi, ayitukwasha bwatudya kunyingila lukalakashi loso lulombene kwitushimishisha muloo.

12. Bwakinyi kuuka Bible kalolo kwi na muulo ngofu?

¹² Eyi dy’Efile Mukulu di nka bu lumweno aditukwasha bwa kumona akitungu’shi tulumbule na mushindo wa kwibikita.  (Shak. 1:23-25) Bu kileshesho, kunyima kwa kulonga Eyi dy’Efile Mukulu, twi kutundula’shi abitungu nkambile nsungu. Na bukwashi bwa Yehowa, twi balongye bya kwikala na kupopela nsaa i bantu sunga ingi myanda aitufiitshisha munda. Su twi bapopele, atukidi na myanda kalolo. Atwikala na ngobesha ya kunangushena kalolo na kwata bitshibilo bi buwa. (Shak. 3:13) Nyi bwakinyi kuuka Bible kalolo kwi na muulo ngofu!

13. Bwakinyi abitungu tulongye bileshesho bi mu Bible?

¹³ Ingi nsaa atulongaa kyatusha kukita nka penda kunyima kwatwe kukita bilubilo. Anka uno nyi mushindo wi bubi wa kulonga. Mushindo wi buwa wa kupeta kinangu nyi kulonga bileshesho bi mu Bible bya bantu abadi bakite bi buwa na bi bubi. Nyi bwakinyi Shake etunyingisha bwa kulonga bileshesho bya bantu bu Abrahame, Rahabe, Yoobo na Eliya. (Shak. 2:21-26; 5:10, 11, 17, 18) Bano bafubi ba Yehowa ba sha lulamato, abadi na bya kunyingila nkalakashi ibadya kwibashimishisha muloo wabo. Bileshesho byabo bya kunyingila abileesha’shi, na bukwashi bwa Yehowa twi kukita namu nka bu’bo.

14-15. Bwakinyi abitungu tupwe mpaka yatudi nayo?

¹⁴ Lukalakashi: Nsaa yatudi na mpaka pabitale myanda yatudi bakumine. Ingi nsaa, bikwitwelela bukopo bwa kupusha myanda i Mwiyi dy’Efile Mukulu. Sunga’shi Yehowa ta mwalule nteko yetu mu mushindo w’atukuminanga. Bino bilombene kwibwesha mpaka. Su twalengula, ino mpaka ngilombene kubofusha lukumino lwetu na kulwisha kipwano kyetu na Yehowa. (Shak. 1:7, 8) Na ngilombene mpa kwitushimishisha lukulupilo lwetu bwa mafuku aafiki.

¹⁵ Mpoolo mutumiibwa apwandjikisha lukulupilo bwa mafuku aafiki na nyindo a mashuwa a mema. (Eb. 6:19) Nyindo alamaa mashuwa a mema nsaa i kipapi ki bukopo sunga kwi emika nsaa y’aakyebe nkekupila kwibwe. Anka nyindo ekalaa na muulo nka su lukano lwabadi bamwanye ku mashuwa lwi buwa. Nka bu by’ababofushaa lukano lwa nyindo a mashuwa kwi nkutu, byabya mpaka ishi ipwe ayibofushaa lukumino. Nsaa y’atompibwa, muntu sha mpaka mulombene kushimisha lukulupilo lwa’shi, Yehowa alombasha milayilo yaye. Su twashimisha lukumino, atushimish’anyi mpa na lukulupilo. Nka bu abibilesha Shake, muntu sha mpaka e nka “bu mbundambunda ya meema akata, yabeboosha kwi lupunga, yatakuulwanga aku n’aku.” (Shak. 1:6, Kilombeeno kipya 2014) Muntu e bino, ta mulombene kwikala na muloo su ngupela!

16. Nkinyi akitungu’shi tukite su twi na mpaka?

¹⁶ Kya kukita: Pwa mpaka; onyingishe lukumino. Ata kitshibilo. Mu mafuku a mutemuki Eliya, mwilo wa Yehowa ubabangile kwikala na mpaka pabitale myanda ibabadi bakumine. Eliya bebalungwile’shi: ‘Anùkumbàkana byaabya na ku nguba kinyi? Su nyi Yehowa mwikale Efile Mukulu a binyibinyi mulondeeyi; su Baale mulondeeyi.’ (1 Bf. 18:21) Bi mumune na lelo uno. Abitungu tukimbule mu mikanda yetu bwa kushinkamisha’shi Yehowa nyi Efile Mukulu, Bible Eyi dyaye, na’shi ba Temwe ba Yehowa mmwilo waye. (1 Tes. 5:21) Kukita bino byoso akukatusha mpaka na akunyingisha lukumino lwetu. Su atukumina kupwa mpaka yatudi nayo, twi kuteka bakulu bukwashi. Abitungu twate kitshibilo su atukumina kulama muloo wetu wa kufubila Yehowa!

17. Nkinyi kilombene kukitshika su twabofula kwishimba?

¹⁷ Lukalakashi: Kubofula kwishimba. Eyi dy’Efile Mukulu adyamba’shi: “Su obofula mwifuku dya mpombo, byabya bukome bwobe mbupela.” (Nki. 24:10) Kishima kya mu kina Ebelu kyabadi balule bu “kubofula” akipushisha “kubofula kwishimba.” Su twabofula kwishimba atushimisha bukidibukidi muloo wetu.

18. Kunyingila akupushisha kinyi?

 ¹⁸ Kya kukita: Teka Yehowa bwadya nkupa eshimba dinyingye bwa kunyingila. Abitungu tunyingye eshimba su atukumina kunyingila nkalakashi. (Shak. 5:11) Kishima kyabadi bafubishe kwi Shake bu “kunyingila” akilesha muntu mwimane ashidila pepo. Bino abitutakula mu kunangushena kwi musalayi mwimane pa mbalo yaye n’eshimba dinyingye na sh’asuku nsaa ayifiki beshikwanyi naye bwa kulwa naye.

19. Nkinyi kyatudi balombene kulongyela ku kileshesho kyabadi betulekyele kwi Mpoolo mutumiibwa?

¹⁹ Mpoolo mutumiibwa mwitulekyele kileshesho ki buwa kya kunying’eshimba na kunyingila. Ingi nsaa badi epusha mubofule. Anka badi bya kunyingila mwanda badi mukulupile’shi Yehowa amupa bukome bubadi nabo lukalo. (2 Kod. 12:8-10; Fid. 4:13) Twi kupeta natwe bukome na kunying’eshimba nka su twakulupila na kwiyisha koso’shi Yehowa nyi etukwasha.​—Shak. 4:10.

20-21. Nkinyi akitungu’shi tushinkamishe?

²⁰ Tushinkamishe’shi nkalakashi y’atupete ta ndinyoka adifiki kwi Yehowa. Shake etushinkamisha’shi: “Muntu su ngumune paabamutompo, tambanga’shi ‘kitompwanga kyande akifiki kwi Efile Mukulu.’ Mwanda Efile Mukulu tammulombeene kunangusheena kukita bubi na taatompaa muntu su ngumune.” (Shak. 1:13) Su twibashinkamishe bino, atwifubwila pepi na Nshetu sha kifulo e mwiyi.​—Shak. 4:8.

²¹ Yehowa “taalulukaa . . . sunga kushintuluka.” (Shak. 1:17) Badi mukwatshishene bena Kidishitu ba kumpala mu nkalakashi yabo, na akwasha oso akwatudi lelo uno. Mutekye n’eshimba dyobe dyoso bwa’shi akupe kinangu, lukumino, n’eshimba dinyingye. Aalula ku nteko yobe. Byabya, ikala mushinkamishe’shi akukwasha bodya kulama muloo obe mu nkalakashi!