1. Nkinyi ki kwikala na bukitshishi mu mushindo wi mulume a kitshina mukashi na bana baye myanda?

P’OPUSHA kishima “mfumu a kifuko” opwandjikisha kinyi? Bangi bantu bakwete kutadila bipikwa na byabadi bebakushe bwa’shi bakitshine bakashi sunga bana babo myanda. Pusha abyakula Yanita ungi mukwetu mukashi mushale mu Europe. Amba’shi: “Mbalo yandi mushale, bantu abamona bana bakashi bu bashadile pe bana balume na kwib’ata bu bena mudimo.” Ungi mukwetu mulume abetaminaa bu Luke mushale mu États-Unis amba’shi: “Bangi ba nshe-bana abalongyeshaa bana babo balume’shi, myanda ayakula bana bakashi ta ngya kulonda na’shi mweneno yabo ta i na muulo.” Anka Yehowa t’akumina’shi balume bakitshine bakashi babo ino myanda. (Pwandjikisha na Maako 7:13.) Binobino, mulume e kulonga bya kwikala bu mfumu a kifuko e buwa naminyi?

2. Abitungu mfumu a kifuko aukye kinyi, na bwakinyi?

² Bwa kwikala mfumu a kifuko e buwa, abitungu mulume aukye akikumina Yehowa’shi akite. Abitungu dingi aukye bwakinyi Yehowa mupe bangi bantu matalwa, na mushindo wadya kwambula kileshesho kya Yehowa na Yesu. Bwakinyi abitungu balume baukye ino myanda? Mwanda Yehowa mmupe ba mfumu ba bifuko ndambo ya matalwa na akumina’shi beifubishe kalolo.​—Luk. 12:48b.

3. Muyile 1 Bena-Kodinda 11:3, kinyi ky’atulongyela mu mushindo wilondene matalwa?

³ Badika 1 Bena-Kodinda 11:3. Uno verse, akwila mushindo wi Yehowa mulumbule kifuko kyaye ki mwiyilu na ki pa nsenga. Bu byadi “mfumu,” aye nyi e na matalwa oso, anka mmupe bangi bantu ndambo ya matalwa. Nyi bwakinyi  ba mfumu ba bifuko abakamulubwila mushindo w’abafubisha matalwa adi mwibape. (Lom. 14:10; Ef. 3:14, 15) Yehowa mmupe Yesu matalwa pa kakongye, nyi bwakinyi Yesu akamulubwila mushindo wa kwete kwitukitshina myanda. (1 Kod. 15:27) Yehowa mupe dingi mulume matalwa pe mukashi aye na bana baye, nyi bwakinyi mulume akalubwila Yehowa na Yesu mushindo w’ebakitshina myanda.​—1 Mp. 3:7.

4. Yehowa na Yesu be na matalwa kinyi?

⁴ Bu byadi Mfumu a kifuko ki mwiyilu na ki pa nsenga, Yehowa e na matalwa a kwela miiya pabitale mwikelo autungu’shi bana baye bekale nao, na kukamika bwa’shi bakokyele ino miiya. (Yesh. 33:22) Mu mushindo umune, bu byadi mfumu a kakongye ka bena Kidishitu, Yesu e na matalwa a kwela miiya na kwiyikamika.​—Nga. 6:2; Kol. 1:18-20.

5. Mfumu a kifuko e na matalwa kinyi, na e na mikalo kinyi?

⁵ Nka bu Yehowa na Yesu, mfumu a kifuko e na matalwa a kwata bitshibilo pabitale kifuko kyaye. (Lom. 7:2; Ef. 6:4) Anka matalwa aye e na mikalo. Bu kileshesho, abitungu miiya yaye imene pa mayi a kulonda e Mwiyi dy’Efile Mukulu. (Nki. 3:5, 6) Na mfumu a kifuko, te na matalwa a kwelela bantu ba shi mu kifuko kyaye miiya. (Lom. 14:4) Na dingi, nsaa i bana baye abakulu na kukatuka ku nshibo, abatungunuka nka na ku mu nemeka, anka ta baki dingi ku matalwa aye nya.​—Mat. 19:5.

6. Bwakinyi Yehowa mmupe bangi matalwa?

⁶ Yehowa mupe bangi matalwa mwanda mmufule kifuko kyaye. Nyi kya buntu akifiki kwadi. Matalwa aakwasha kifuko kya Yehowa bwakidya kwikala mu butaale, na’shi myanda yoso ikale mu mulongo. (1 Kod. 14:33, 40) Su ta kubadya kwikala bangi be na matalwa, kifuko kya Yehowa kibadya kwikala mu kafutakanyi na ki shi na muloo. Bu kileshesho, muntu su ngumune ta badya kuuka aata kitshibilo kya nfudilo na alondesha bwa’shi kyakya kitshibilo kilombane.

7. Muyile Bena-Efeso 5:25, 28, Yehowa akumina’shi balume bakitshine bakashi babo myanda naminyi?

⁷ Su mpángo ya Yehowa ya kupa bangi matalwa i buwa, bwakinyi bana bakashi be bungi bakwete kumona’shi balume babo abebakyengyesha, na’shi abebalondalonda mu tuntu toso twabakitshi? Mwanda balume be bungi, tabauku miiya ya Yehowa pabitale kifuko na bakwete kusangula bwa kulonda bipikwa byabo. Mbalombene kukyengyesha bakashi babo, mwanda wa kudila kwisankisha. Bu kileshesho, mulume e kufubisha matalwa aye bi bubi kwi mukashi aye bwa kutompa kukamisha kinemo kyaye, sunga bwa kulesha bangi’shi aye nyi “mwana mulume.” Ekunangushena’shi, ta mulombene kukitshisha mukashi aye bwadya ku mufula nya, anka e kumutshinyisha. Ekufubisha uno moo bwa kulondalonda mukashi aye. * Uno mweneno e bino na uno mwikelo wi bino t’aupa bana bakashi kinemo ki balombene, na mbikutwene bi bukopo na kikyebe ky’eshimba dya Yehowa.​—Badika Bena-Efeso 5:25, 28.

8. Mulume e kulonga bya kwikala mfumu a kifuko e buwa naminyi?

⁸ Mulume e kulonga bya kwikala mfumu e buwa a kifuko, pa kwambula mushindo ukwete Yehowa na Yesu kufubisha matalwa aabo.  Tutaluleyi penda ngikashi ibidi ya bakwete kulesha kwi Yehowa na Yesu, na mushindo ulombene mfumu a kifuko kwiyilesha mukashi aye na bana baye.

9. Yehowa aleshaa kwiyisha naminyi?

⁹ Kwiyisha. Yehowa nyi muntu sha binangu kukila muntu oso; anka atemeshaa mweneno a bafubi baye. (Kib. 18:23, 24, 32) Badi mukumine binangu bya bantu be mushi mwa matalwa aye. (1 Bf. 22:19-22) Yehowa mmupwidjikye, anka t’atengyelaa’shi tukite myanda mu kipaso kipwidjikye. Kadi, akwashaa bantu bakutwe kupwidjika abamufubila bwabadya kobesha. (Mis. 113:6, 7) Bible alesha Yehowa mpa na bu “mukwashi.” (Mis. 27:9; Eb. 13:6) Mfumu Davide badi auku’shi, mulombene kulombasha mudimo ukata ubabadi bamupe, penda mwanda wa’shi Yehowa e na kwiyisha na’shi amukwasha.​—2 Sam. 22:36.

10. Mushindo kinyi ubadi Yesu muleshe kwiyisha?

¹⁰ Banda kutala kileshesho kya Yesu. Sunga bibadi bu Mwanana na Mukunkushi a balongi baye, Yesu badi mwibatumpe ngwa. Bwakinyi Yehowa badi mukumine’shi uno mwanda beufunde mu Bible? Kushii mpaka, bwa’shi muntu oso mpa na ba mfumu ba bifuko balonde kileshesho kyaye. Yesu bambile aye nabene’shi: “Nénulêsha kilêshêsho bilombêne anwe namu nwakita bu byabya bi nákitshi kwanudi.” (Yo. 13:12-17, EEM) Sunga bibadi na matalwa e bungi, Yesu ta badi atengyela’shi bantu bamufubile. Anka badi afubila bangi.​—Mat. 20:28.

11. Mfumu a kifuko e kulongyela kinyi pabitale kwiyisha kwa Yehowa na Yesu?

¹¹ Ky’abitulongyesha. Mfumu a kifuko mulombene kulesha kwiyisha mu mishindo i bungi. Bu kileshesho, t’atengyela’shi mukashi aye sunga bana baye bakite myanda bu bantu bapwidjikye. Atemesha mweneno abo sunga ekala mwikutwene na aye. Marley mushale mu États-Unis amba’shi: “Ingi nsaa ami na mulume ande atwikalaa na mweneno mwilekene. Anka nauku’shi ne na muulo ku meso aye, na annemekaa pa kungipusha mweneno ande na amutalula kumpala kwa’shi ate kitshibilo.” Na dingi, mulume sha kwiyisha akitaa midimo ya mu nshibo, sunga bantu ba mbalo yadi mushale beyimona bu ya bana bakashi. Bino bi kwikala bukopo. Bwakinyi? Ungi mukwetu mukashi abetaminaa bu Rachel  amba’shi: “Mbalo yandi mutandjikilwe, su mulume akwasha mukashi aye bwa kusula malonga sunga kukomba mu nshibo, bankungishanyi netu sunga bena kifuko naye, abamwipusha su ‘mwana mulume binyibinyi.’ Be kupwandjikisha’shi te na matalwa kwi mukashi aye.” Su uno mweneno e mbalo yodi mushale, tentekyesha’shi Yesu badi mutumpe ngwa ya balongi baye, sunga bibabadi abeumono bu mudimo wa bapika. Mfumu a kifuko e buwa, t’akumina’shi bangi bapwandjikishe’shi aye e bukome na’shi e na muulo, anka akumina’shi mukashi na bana baye bekale na muloo. Kukatusha kwiyisha, dingi eyikashi kinyi di na muulo bwa mfumu a kifuko?

12. Kifulo akitakulaa Yehowa na Yesu bwa kukita kinyi?

¹² Kifulo. Nyi akitakulaa Yehowa bwa kukita kintu kyoso. (1 Yo. 4:7, 8) Na kifulo kyoso, kwete kulombasha nkalo yetu ya mu kikudi ku bukwashi bw’Eyi dyaye Bible na ndumbulwilo aye. Kwete kwitukwasha bwa kwipusha mu kukalwilwa pa kwitushinkamisha’shi mmwitufule. Twi kwamba naminyi bwa nkalo yetu ya ku mbidi? Yehowa ‘etupeyaa [bintu] byoso byatudya kusangala nabyo.’ (1 Tim. 6:17, Kilombeeno kipya) Nsaa y’atukitshi milwisho, etunyokaa, anka t’akokaa kwitufula. Bu byadi muule ndaa na kifulo, Yehowa batshile mpángo ya kwitukuula. Na Yesu, mmwitufule ngofu mwanda batushishe muwa waye bwetu. (Yo. 3:16; 15:13) Ta kwi kintu kilombene kukutshisha Yehowa na Yesu kufula baba bebalamate.​—Yo. 13:1; Lom. 8:35, 38, 39.

13. Bwakinyi abitungu mfumu a kifuko afule kifuko kyaye? (Tala dingi kashibo akamba’shi: “ Mulume kyakatuka mu kwibakila e kupeta kinemo kwi mukashi aye naminyi?”)

¹³ Ky’abitulongyesha. Abitungu kifulo kitakule mfumu a kifuko bwa kukita kintu kyoso. Bwakinyi bino bi na muulo ngofu? Mutumiibwa Yowano aluula’shi: “Shyaafulu mukwabo aamono [sunga kifuko kyaye] ta mulombeene kufula Efile Mukulu aashyaamono nya.” (1 Yo. 4:11, 20) Bikishekishe mulume mufule kifuko kyaye na akumina kwambula Yehowa na Yesu, akumbasha nkalo ya mu kikudi ya  kifuko kyaye, kwikikwasha bwakidya kwipusha mu kukalwilwa, na kukumbasha nkalo yakyo ya ku mbidi. (1 Tim. 5:8) Alongyesha na kunyoka bana baye. Atungunuka dingi na kulonga bya kwata bitshibilo abitumbisha Yehowa na bi buwa bwa kifuko kyaye. Tutaluleyi mwanda oso na tumone mushindo ulombene mfumu a kifuko kwambula Yehowa na Yesu.

14. Mfumu a kifuko e kukumbasha nkalo ya mu kifuko kyaye naminyi?

¹⁴ Lombasha nkalo ya mu kikudi ya kifuko kyobe. Nka bu Nshaye, Yesu badi akumina’shi batumiibwa bekale nka na lukumino lunyingye. (Mat. 5:3, 6; Mak. 6:34) Mu mushindo umune, mwanda wi na muulo autungu’shi mfumu a kifuko akite, nyi nkukwasha kifuko kyaye bwakidya kwifubwila pepi na Yehowa. (Miy. 6:6-9) Ebikitshi pa kwikala abadika Eyi dy’Efile Mukulu na kifuko kyaye, kutwela mu bisangilo, kulungula mukandu wibuwa, kunyingisha na kulama bu kuuku bwabo na Yehowa.

15. Mushindo kinyi ulombene mfumu a kifuko kukwasha kifuko kyaye bwakidya kwipusha mu kukalwila?

¹⁵ Kwasha kifuko kyobe bwakidya kwipusha mu kukalwilwa. Yehowa badi mulungule Yesu patoka’shi mumufule. (Mat. 3:17) Yesu badi muleshe’shi mmufule batumiibwa baye mu ngakwilo na mu bikitshino byaye. Nabo namu abadi abamulungula’shi mbamufule. (Yo. 15:9, 12, 13; 21:16) Mfumu a kifuko, mulombene kulesha mukashi aye na bana baye’shi mwibafule mu byakitshi bu, kulonga nabo Bible. Abitungu dingi ebalungule’shi mwibafule na’shi be na muulo ku meso aye sunga munkatshi mwa bantu.​—Nki. 31:28, 29.

16. Kingi kintu kinyi akitungu’shi mfumu a kifuko akite, na mushindo kinyi wadya kulama nkatshinkatshi?

¹⁶ Lombasha nkalo ya ku mbidi ya kifuko kyobe. Yehowa badi alombasha nkalo ya ku mbidi ya bena Isaleele sunga pabadi ebanyoko mwanda wa kukutwa kukokyela. (Miy. 2:7; 29:5) Kwete akumbasha dingi nkalo yetu lelo uno. (Mat. 6:31-33; 7:11) Mu mushindo umune, Yesu badi adiisha bantu abadi abamulondo. (Mat. 14:17-20) Badi apasha bantu abadi na mikumbo. (Mat. 4:24) Bwa kusankisha Yehowa, abitungu mfumu a kifuko alombashe nkalo ya ku mbidi ya kifuko kyaye. Anka abitungu ekale na nkatshinkatshi. T’abitungu ekale akisha nsaa i bungi ku mudimo mu mushindo wa’shi mulombene kulombasha nkalo ya mu kikudi ya kifuko kyaye na kwikikwasha bwakidya kwipusha mu kukalwilwa.

17. Nkinyi kyatulongyela kwi Yehowa na Yesu mu mushindo w’abetulongyesha na kwitunyoka?

¹⁷ Longyesha kifuko kyobe. Yehowa etulongyeshaa na kwitunyoka, mwanda akumina kwitukwasha. (Eb. 12:7-9) Anka bu Nshaye, Yesu alongyesha boso be ku matalwa aye na kifulo kyoso. (Yo. 15:14, 15) Atusha malango e bukopo kadi na kalolo koso.  (Mat. 20:24-28) Ashingula’shi twi bakutwe kupwidjika na’shi atukitaa milwisho.​—Mat. 26:41.

18. Mfumu a kifuko e buwa atentekyesha kinyi?

¹⁸ Mfumu a kifuko ambula Yehowa na Yesu atentekyesha’shi, mukashi na bana baye ta mbapwidikye. Tekalaa na “bukyelo” kwi mukashi sunga kwi bana baye. (Kol. 3:19, Kilombeeno kipya 2014) Anka, atumikila Eyi dya kulonda di mu Bena-Ngalatea 6:1 na kukimba bya kwibaludika na “kikudi kya kupopeela.” Atentekyesha’shi aye namu mmukutwe kupwidjika. Anka bu Yesu, ashingula’shi mushindo wi buwa wa kulongyesha, nkwikala bu kileshesho bwabo.​—1 Mp. 2:21.

19-20. Nsaa y’ata bitshibilo, mfumu a kifuko mulombene kwambula Yehowa na Yesu naminyi?

¹⁹ Ata bitshibilo abikwasha kifuko kyobe. Yehowa ataa bitshibilo bwa buwa bwa bangi. Bu kileshesho, batshile kitshibilo kya kupanga muwa, kushi bwa buwa bwaye’ye nabene nya, kadi bwa’shi atwe namu tusankye nao. Ta kwi muntu badi mutakule Yehowa bwadya kutuma Mwan’aye bwa’shi etufwile. Bebikitshine mwanda badi akumina kwitukwasha. Mpa na Yesu namu, badi aata bitshibilo bwa buwa bwa bangi. (Lom. 15:3) Bu kileshesho, pabadi mukokye badi mulongyeshe kibumbu kya bantu pamutw’a kwikisha.​—Mak. 6:31-34.

²⁰ Mfumu a kifuko e buwa, auku’shi kintu ki bukopo kukita, nyi kwata bitshibilo bi buwa bwa kifuko kyaye; nyi bwakinyi abitungu ate buno bushito na muulo. Abitungu adimukile kwata bitshibilo bwat’ate. Anka atadile Yehowa bwa’shi amulongyeshe bwadya kwata bitshibilo bi buwa. * (Nki. 2:6, 7) Mu uno mushindo, anangushena bya kusankisha bangi, kushi penda aye nabene.​—Fid. 2:4.

21. Nkinyi ky’atukesambila mu mwisambo aulondo?

²¹ Yehowa mupe ba mfumu ba bifuko mudimo wi bukopo, na atengyela’shi bakite mwabo moso bwa kwiulombasha kalolo. Byabya, su mulume akita mwaye moso bwa kwambula Yehowa na Yesu, ekala mfumu e buwa a kifuko. Na su mukashi alombasha mashito aaye a mu kifuko kalolo, abekala n’eyibakishi di buwa bukile. Abitungu mukashi amone matalwa a mulume aye naminyi na nkalakashi kinyi yadya kupeta? Mwisambo aulondo awalula ku ino nkonko.