Baledi bande abalongyele bya binyibinyi kumpala kwa’shi beyibakishene mu bipwa 1920. Nadi mutandikwe ku mbangilo kwa kipwa kya 1939. Pa nadi nki mwana mukinga, tubadi bashale mu Angleterre, na nadi nende ku bisangilo na baledi bande, kunyima nadi mwifundishe mu Kalasa ka mudimo wa Teokrasi. Mpa na lelo, nkyatentekyesha nsaa i nadi mukamine ku kantu bwa kumona bantu boso pa nadi nakitshi mudimo wande wa kumpala mu Kalasa ka mudimo wa Teokrasi. Nadi na bipwa bisamombo na nadi napusha moo pa nadi natala bantu boso abadi bashale.

Bwa bulungudi, Papa badi mmunfundjile mayi apelepele ku ka karte a bya kubanga mwisambo. Nadi na bipwa mwanda nsaa inayile ku kibelo kya muntu bwa kulungula mukandu wibuwa bupenka. Nadi na muloo ngofu pabadi sha nshibo mukumine kubadika mayi abadi pa karte na kukumina kwata mukanda wa “Que Dieu soit reconnu pour vrai !” Nadi mwalukile lubilo mu kilayi bwa kulungula Papa. Mudimo wa bulungudi na bisangilo bibadi bimpe muloo, na bibadi binkwashe bwa kutamisha lukalo lwande lwa kufubila Yehowa mu mudimo wa nsaa yoso.

Nadi mubangye kufula bya binyibinyi ngofu nsaa ibadi Papa munfudishe bwa’shi nekalanga napete Kitenta kya Mulami. Nadi nekibadika kyoso nsaa ibakidi akifiki. Lukulupilo lwande mwi Yehowa lubadi alwende na kutama na lubadi luntakule bwa kwilambula kwadi.

Mu kipya kya 1950, ami na kifuko kyande tubayile ku kikongeno kibadi kikitshikye mu New York, kibadi na mutwe wa mwanda awamba’shi, Accroissement de la théocratie. Mu dya kananka 3/8/1950 mutwe wa mwanda w’efuku ubadi awamba’shi “Journée des missionnaires.” Dyadya efuku, mukwetu Carey Barber mufube kunyima bu  mwina Kasaka ka Bakunkushi-Bakulu, nyi badi mwele mwisambo wa lubatshisho. Ku nfudilo kwa mwisambo waye, nsaa ibetwelele nkonko ibidi, nami namu nadi mwalule’shi, “Oolo.” Nadi na bipwa 11, anka natundwile’shi nele etabula di na muulo. Kadi nadi na moo wa kutwela mu mema mwanda ntshi nadi nauku kuywa. Anka mwina a Papa batwelele nami mu mema na anshikamisha’shi ta kwi kintu akikukitshikila. Na dingi, mikolo yande tayibadi ifikye pashi mwanda mema abadi bula na abadi aakidi lubilo ngofu. Bakwetu balume abadi banyitambikishene; kunyima kwabo kumbatshisha, ungi badi mwabukye nami. Kubanga nka mu dyadya efuku, Yehowa badi mutungunukye na kulumbula mashinda ande.

Nsaa i napwile kalasa, nadi nakumina kwikala mbala-mashinda, anka balongyeshi bande abadi abantakula bwandya kutungunuka na tulasa tukata. Pa mwanda wa lwalwa lukalakashi lwabo, nadi mukumine kwenda ku kilongyelo kikata, anka natundwile’shi ntshi nadya kwikala munyingye mu bya binyibinyi, aku namu ne mutume binangu byande ku kalasa; nyi bwakinyi natshile kitshibilo kya kukatuka. Nadi mutekye Yehowa pabitale uno mwanda na ami nkufundila balongyeshi bande mukanda, nebapatulwila na kanemo koso’shi nakatuka ku nfudilo kwa kipwa kya kumpala. Na lukulupilo loso mwi Yehowa, nadi mubangye mudimo wa bu mbala-mashinda.

Mu mweshi wa 7/1957, nabangile mudimo wa nsaa yoso mu ka kibundji k’abetamina bu Wellingborough. Nadi mutekye bakwetu ba ku Betele a ku Londres su be kutuma mbala-mashinda mupwe kufuba bipwa bi bungi mudimo wa bu mbala-mashinda, bwatudya kufuba naye pamune. Mukwetu mulume Bert Vaisey badi mmundongyeshe myanda i bungi, badi mulungudi sha kisumi na badi munkwashe bwandya kwikala na programe e buwa a bulungudi. Mu kakongye, tubadi pend’ami, Vaisey na bakwetu bakashi basamombo abadi bapwe kukula. Kulumbula bisangilo na kutusha myalulo mwanka, kubadi kumpe mishindo i bungi ya kunyingishe lukulupilo lwande mwi Yehowa na kulesha lukumino lwande.

Kunyima kwa kukisha mafuku apela mu lukano, pa mwanda wa kupela mudimo wa busalayi, nadi mwimonene na Barbara mukwetu mukashi mbala-mashinda a nsaa yoso. Tubadi beyibakishene mu kipwa kya 1959, na tubadi na lukalo lwa kwenda mbalo yoso yabetutumu. Kya kumpala, abadi betutume mu ka kibundji ka Lancashire dya kunundu kwa Angleterre. Mu mweshi wa 1/1961, abangitamine bwa nkatwela mu École de Formation Ministérielle bwa mweshi umune ku Betele a mu Londres. Mwanda wa kukanya, ku nfudilo kwa kalasa abantudile bu mukunkushi a kifunda. Munda mwa mbingo ibidi, mukunkushi a kifunda bapu kufuba bipwa bi bungi, badi mundongyeshe bya kufuba kalolo mu mudimo wa kifunda mu ka kibundji ka Birmingham, na abadi bakumine’shi Barbara ekale nami. Kunyima tubalukile mu ka kibundji ka Lancashire na Cheshire mubatudi atufubila.

Patubadi mu konje mu mweshi wa 8/1962, tubapetele mukanda wa filiale. Mu envelope, mubadi formilere a ku Galaade! Kunyima kwatwe  kuteka, Ami na Barbara, tubadi bamuushe na atwe nkumwalusha bukidibukidi nka bu bibadi abikumina filiale. Kunyima kwa myeshi itano, tubayile ku Brooklyn mu New York bwa nkatwela mu kalasa ka 38 ka Galaade bwa myeshi Ekumi.

Mu kalasa ka Galaade, ta tubadi penda balongye pabitale Eyi dy’Efile Mukulu na ndumbulwilo aye nya, tubadi dingi balongye pabitale bakwetu balume na bakashi be mu nsenga ishima. Sunga bi nadi na bipwa 24, Barbara na 23, tubalongyele bi bungi kwi bangi balongi. Nadi na muloo wa kufuba ku Betele efuku dyoso pamune na mukwetu mulume Fred Rusk, umune a ku balongyeshi betu. Badi ashimika kasele pa muulo wa kutusha malongo e buwa, kwamba’shi malango emene pa Bifundwe. Bakwetu abadi abafiki mu kwitwelela misambo pabatudi mu kalasa abadi na kiukilo ki bungi, bu ba Nathan Knorr, Frederick Franz na Karl Klein. Tubadi balongye bi bungi pabitale kileshesho kya kwiyisha kya mukwetu mulume Alexander Hugh Macmillan, badi mwitulongyeshe pabitale mushindo ubadi Yehowa mupashe mwilo waye kubanga mu kipungo kya 1914 na ku 1919!

Ku nfudilo kwa kalasa, mukwetu Nathan Knorr betulungwile’shi, anukafubila mu Burundi kibundji kya mu Afrique. Tubayile bukidibukidi mu biblioteke bya Betele bwa kutala mu Annuaires bungi bwa balungudi abadi mu Burundi aa mafuku. Mwanda wa kukanya, ta tubadi bamone mbalo su ngimune! Eyendo, tubadi na kya kwenda mu teritware abasha lungwile mukandu wibuwa, mu kontina a Afrique atush’atwiuku kalolo. Bibadi bitwinyongoshe! Anka, nteko ibatudi atwele n’eshimba dyetu dyoso, ibadi itukwashe.

Mu mbalo yetu ya mudimo ipya, tubapetele myanda ibungi ipya​—climat, bipikwa na ludimi. Bibadi abitungu’shi tulongye Français. Lungi lukalakashi lubadi lwa kupeta mbalo ya kushala. Mafuku abidi kunyima kwatwe kufika, umune a ku balongi betu ba ku Galaade, Harry Arnott badi mufikye mu kwitutembela pabadi akidi bwa kwenda mu Zambie mu babadi bamutume bwa nkafubila. Badi mwitukwashe bwa kupeta nshibo ya kufutshila, ibadi ifikye nshibo ya kumpala ya ba misionere. Mafuku apela kunyima, tubabangile kupeta kubingwabingwa kwi bakata ba mbulamatadi, ba shi badi abuku kintu su nkimune pabitale ba Temwe ba Yehowa. Nka n’atwe kubanga kupeta muloo mu mudimo wetu, bakata ba mbulamatadi abetulungwile’shi, t’anushala kwanu’shi na mukanda wi buwa aulesha’shi nwi bya kufubila muno. Mwanda  wa malwa, bibadi abitungu’shi twende mu dingi eumbo, mu Uganda.

Bibadi bitukalakashe bwa kwenda mu Uganda ku shi visa, anka tubadi bakulupile kwi Yehowa. Ungi mukwetu mulume a mu Canada bafikile mu kufubila mu Uganda, mbalo ibadi na lukalo lwa balungudi be bungi, badi mupatulwile mukata atala myanda ya kutwela na kutuka mwiumbo mwanda wetu na yawa mukata nkwitupa myeshi ipela bwa’shi tupete mukanda awitupa matalwa a kushala mwanka. Bino bibadi bileshe’shi Yehowa kwete etukwasha.

Mu Uganda, myanda ibadi ilekene ngofu na mu Burundi. Mudimo wa kulungula mukandu wibuwa ubadi upwe kubanga, sunga bibatudi ba Temwe ba Yehowa 28 mwiumbo dishima. Mwanka, tubadi bapete bantu be bungi abakulaa Anglais. Tubadi batundule’shi bwa kukwasha bantu abasankila bya binyibinyi bwa kwenda kumpala, bi badi abitungu tulongye su ndumune lwa ku ndimi ya butadwa y’abakulaa yaya mbalo. Tubabangile kulungula mukandu wibuwa mu Kampala, mbalo ibabadi abakamba kwakula ludimi lwa Luganda; nyi bwakinyi tubatshile kitshibilo kya kwilulonga. Bibadi bitwate bipwa bi bungi bwa kwilwakula kalolo, anka lubadi lwitukwashe bwa kupeta bipeta bi buwa mu bulungudi! Tubabangile kupusha kalolo nkalo ya mu kikudi ya balongi betu ba Bible. Nsaa ibamwene balongi betu ba Bible by’atwibapasukila, ababangile kwitukulupila na kwitulungula by’abapusha pabitale by’abalongo.

Tubadi na muloo wa kukwasha bantu bwa kulonga bya binyibinyi, na tubadi na muloo wi bungi nsaa y’abetutekyele bwa nkakita mudimo wa kifunda mwiumbo dishima. Ku bukunkushi bwa filiale a Kenya, tubadi bakite “ngyendo na ka motoka” ketu bwa nkatala ma mbalo abadi na lukalo lwa ba mbala-mashinda ba nsaa yoso. Misango i bungi, mbetukukile kwi bantu ba sha mwene dingi ba Temwe ba Yehowa. Abadi abetukukila kalolo, mpa na kwitutekyela bya kudya.

Tubadi bakite ingi ngyendo. Nakatukile mu Kampala, atwe nkukita mafuku abidi mu mashuwa a ndjandja bwa nkafika mu ka kibundji ka Mombasa mu Kenya, akupu natshile mashuwa a mema bwa kwenda ku Seychelles, ka kisangisangi ka mu Océan Indien. Kunyima, kubanga mu kipwa kya 1965 na ku kya 1972 na bangile kwenda na Barbara ku Seychelles. Mu aa mafuku, kubadi penda balugundi ba mukandu wibuwa babidi, kunyima abafikile kasaka, akupu kakongye. Nadi mukite ingi “ngyendo” bwa nkakunka bakwetu mu Érythrée, Éthiopie na Soudan.

Mu Uganda, myanda ibadi ishintulukye nsaa ibabangile kukunkusha basalayi. Bipwa bibalondele bibadi bukopo bukile, na nalongyele’shi abitungu kukokyela elango di mu Bible dya kukokyela mbulamatadi. (Mak. 12:17) Ungi musango, abatekyele benyi boso bashale mu Uganda bwabadya nkefundisha ku biro bya ba mpulushi bi pepi na mashibo abo. Tubadi bakokyele kushi kushingakana. Mafuku apela, pabatudi atutambuka na ka motoka mu Kampala, ba mpulushi abadi betwimikye ami na bangi ba misionere. Atwe nkubanga kususa ngofu! Abadi betwambe’shi twi ba mpuupa na abo nkwenda netu ku biro bikata bya ba mpulushi, kwa tubadi bebapatulwile’shi twi ba misionere, bantu be na butaale. Tubadi bebalungule’shi twibapwe kwifundisha ku biro bya ba mpulushi, anka t’abadi betupushishe nya. Abadi betwele mu motoka, benda netu ku biro bya ba mpulushi bibadi pepi na nshibo ya ba misionere. Mashimba abadi etutale nsaa ibatufikile kwi mukata a ba mpulushi, a biro bibadi pepi na nshibo ya ba misionere,  badi mupwe kuuka’shi twi bapwe kwifundisha. Aye nkwitutundula na nkutumina ba mpulushi eyi bwabadya kwitufungula!

Mu aa mafuku, tubadi atupete ino myanda pabatudi atufiki mbalo ishikye basalayi, bikishekishe nsaa y’abetwimika kwi basalayi bapwe kukolwa. Nsaa yoso tubadi atutekye na kwipusha kalolo pababadi abetukisha kushi kwitukita kintu. Mwanda wa malwa, mu kipwa kya 1973 abadi babingye boso ba misionere mu Uganda.

Abadi betushintule mbalo ya kufubila, betutuma mu Côte d’Ivoire kupona nguba kwa Afrique. Kuno kushintuluka kubadi akwitutekye kulonga bipikwa bipya, kubanga kwakula dingi Français, na kwiubidishena na nshalelo a bu misionere mu maumbo elekene. Twi bamone abituludika Yehowa kwi bantu ba sha mashimba alulame abakumina mukandu wibuwa bukidibukidi. Tubadi bamone dingi bi kukulupila Yehowa a kulumbula mashinda etu.

Musango umune, abadi bakwate Barbara na mukumbo wa cancer. Sunga bibatudi atwalukila mu Europe misango i bungi bwa’shi bamubukye kalolo, mu 1983, tubamwene’shi ta twi na dingi mushindo wa kutungunuka na kufubila mu Afrique. Bino bibadi bitukalakashe ngofu!

Cancer ka Barbara kabatungukile na kutama pa tubadi ku Betele a mu Londres na aye nkufwa. Kifuko kya bena Betele kibadi ki nkwashe ngofu. Bikishekishe, ungi mulume na mukashi abankwashishe bwa kukambila kinyongwa na kutungunuka na kufubila Yehowa. Kunyima namwene mukwetu mukashi badi afiki mu kukwasha ku Betele, na badi mufube bu mbala-mashinda a nsaa yoso na kifulo kyaye bwa Yehowa kibadi akilesha’shi nyi muntu munyingye mu kikudi. Mu kipwa kya 1989, tubadi beyibakishene na Ann. Kubanga nka paapa, tubadi bafube ku Betele a Londres.

Kubanga mu kipwa kya 1995 na ku kya 2018, ne mupete mwabi wa kufuba bu muntu alesha mpala ya biro byetu bya nsenga ishima mu maumbo pepi na 60. Mwiumbo dyoso, nemumone mushindo wi Yehowa apasukila bafubi baye sunga bekala na nkalakashi ilekene.

Mu kipwa kya 2017, mu lumune lwa ku ngyendo nadi mwalukile mu Afrique. Na nadi na muloo wa kulesha Ann mu Burundi. Tuboso tubadi bakanye pa kumona bungi bwa bantu abadi bakumine bya binyibinyi mu Burundi! Mwishinda munadi nakamba kulungula mukandu wibuwa ku nshibo na nshibo mu kipwa kya 1964, nyi mutamudi lelo uno Betele e buwa byabya na mwiumbo tamudi balungudi bakile pa 15 500.

Nadi na muloo ngofu nsaa i napetele programe a ngyendo a kipwa kya 2018. Mu maumbo mubadi amutungu kwenda, mubadi Côte d’Ivoire. Pa tubafikile mu Abidjan, mwipata dy’eumbo tubadi nka bu’twe abafikile mwiumbo dyetu. Pa nadi natala kwisaki dibadi na ma nimero a telefone a bakwetu bena Betele, namwene’shi mukwetu badi mu kyumba kibadi pepi na kya benyi mubatudi, nyi mukwetu Sossou. Nadi mutentekyeshe’shi badi Surveillant de ville mafuku a nadi mu Abidjan. Anka nadi mwidimbe. Badi ungi Sossou​—mwan’aye.

Yehowa akumbashaa milayilo yaye. Myanda yandi mupete, ngi ndongyeshe’shi nsaa yatukulupila Yehowa, aye namu alumbula mashinda etu. Binobino, natungunuka mwishinda aditwala ku muwa wa loso mu nsenga ipya.​—Nki. 4:18.