1-2. Nkileshesho kinyi kilombene kwitukwasha bwa kupusha mayi e mu 1 Mpyeele 2:21?

PWANDJIKISHA’SHI we mu kisaka kya bantu akitambuka mwishinda di matekye. Umune a kwanudi e kumpala na anulondo mwamwa mwende na kwashina mwamwa mw’ashina kutshina’shi muntu apona esakula. Sunga yawa muntu e kumpala enushimina ku meso, anwende nka na kulonda mu byashino byaye.

² Uno ndumbulwilo e bubi atudi, e nka bu mbalo i matekye e busene na atwe bena Kidishitu ba binyibinyi, twi nka bu kisaka kya bantu abemutambukila. Mwanda wa muloo, Yehowa mmwitupe mukunkushi e buwa​—Mwan’aye Yesu Kidishitu atudi balombene kulonda mu matabula aye. (1 Mp. 2:21) Ungi mukanda aupatula myanda ya mu Bible awamba’shi, mu uno verse Mpyele apwandjikisha Yesu na mukunkushi. Nka bu bi mukunkushi alekaa byashino, Yesu mmwitulekyele byashino sunga matabula mwatudya kulonda. Twaluleyi ku nkonko isatu pabitale kulonda mu matabula a Yesu. Kulonda mu matabula a Yesu akupushisha kinyi? Bwakinyi abitungu twibikite? Na mushindo kinyi watudya kwibikita?

3. Kulonda mu matabula a muntu akupushisha kinyi?

³ Kulonda mu matabula a muntu, akupushisha kinyi? Mu Bible, kishima “kutambuka” na kishima “ngwaa,” abipushisha ingi nsaa nshalelo a muntu sunga bikitshino byaye. (Kib. 6:9; Nki. 4:26, NWT) Kileshesho kilekye muntu ki’nka bu matabula  sunga byashino byadi mulekye. Byabya, kulonda mu matabula a muntu akupushisha kulonda kilesheho kyaye sunga kumwambula.

4. Kulonda mu matabula a Yesu akupushisha kinyi?

⁴ Byabya, kulonda mu matabula a Yesu akupushisha kinyi? Mu kwakula kwa kalolo, akupushisha kwambula kileshesho kyaye. Mu kifundwe kyetu kya mutwe wa mwanda, Mpyele mutumibwa esambila pabitale kileshesho ki buwa kitulekyele Yesu, mwanda badi munyingile makyenga; anka twikumwambula mu ingi myanda i bungi. (1 Mp. 2:18-25) Eyendo, Yesu mmwitulekyele kileshesho kya kulonda mu myanda ibadi mwakule na mukite mu nshalelo aye oso.

5. Bantu bakutwe kupwidjika, mbalombene kwambula kileshesho kya Yesu kipwidjikye su? Patuula.

⁵ Sunga byatudi bakutwe kupwidjika, twikwambula kileshesho kya Yesu su? Olo, twikwikyambula. Tentekyesha’shi Mpyele etukankamika bwatudya “kulonda mu matabula a [Yesu]”​—kushi mu mushindo upwidjikye. Su twalonda mu matabula aye kalolo, na kukita mwetu moso sunga byatudi bantu bakutwe kupwidjika, atukokyela elanga dya mutumibwa Yowano adyamba’shi: “Tungunukayi na kutambuka . . . nka bu bibaadi’ye [Yesu] mutambukye.”​—1 Yo. 2:6.

6-7. Bwakinyi twi kwamba’shi kulonda mu matabula a Yesu akwitukwasha bwa kwifubwila pepi na Yehowa?

⁶ Kulonda mu matabula a Yesu akwitukwasha bwa kwifubwila pepi na Yehowa. Bwakinyi atwamba byabya? Kya kumpala, Yesu mmwitulekyele kileshesho kikilekile buwa akilesha mushindo watudya kwikala na nshalelo asankisha Efile Mukulu. (Yo. 8:29) Byabya, pa kulonda mu matabula a Yesu, atusankisha Yehowa. Na twikale bashinkamishe’shi, Nshetu e mwiyilu efubwila pepi na baba boso abakitshi  mwabo moso bwa kwikala ba kuuku baye.​—Shak. 4:8.

⁷ Kya kabidi, Yesu badi mwambule Nshaye mu mushindo upwidjikye. Nyi bwakinyi Yesu bakwile’shi: “Mummone mmumone Yaaya.” (Yo. 14:9) Twikwambabula nyikashi ya Yesu na mushindo ubadi akitshina bangi myanda. Bu kileshesho, badi muleshe muntu badi na mukumbo wa nsudi lusa, badi mwitule pa mbalo ya mwana mukashi badi na mukumbo wi bukopo, na badi mwinyongole na bantu abadi bafwishe bakwabo. Nsaa y’atwambula Yesu, tukwete kwambula Yehowa. (Mak. 1:40, 41; 5:25-34; Yo. 11:33-35) P’atwambula nyikashi ya Yehowa, atunyisha kwifubwila pepi naye.

8. Patula bwakinyi kulonda mu matabula a Yesu akwitukwasha bwa ‘kutshimuna’ nsenga.

⁸ Kulonda mu matabula a Yesu akwitukwasha bwa kupela kuumbakashwa na uno ndumbulwilo e bubi. Mu bufuku bwaye bwa nfudilo pano pa nsenga, Yesu bakwile’shi: “Nantshimuna nsenga.” (Yo. 16:33, Kilombeeno kipya 2014) Badi akyebe kwakula’shi, ta mutadile binangu, bipatshila na bikitshino bya uno ndumbulwilo bwa’shi bimukumbakashe. Yesu ta badi mwilwe’shi, kyabadi bamutumine pa nsenga bwa kutumbisha eshina dya Yehowa. Atwe namu? Mu ino nsenga, mwi myanda i bungi ilombene kwitukumbakasha. Nka bu Yesu, su twatula binangu byetu mu kukita kikyebe ky’eshimba dya Yehowa, natwe namu ‘atutshimuna’ nsenga.​—1 Yo. 5:5.

9. Nkinyi akitungu’shi tukite bwa kushaala nka mwishinda aditwala ku muwa wa loso?

⁹ Kulonda mu matabula a Yesu akwitutwala ku muwa wa loso. Nsaa ibadi nsongwalume mpeta mwipushe kyadya kukita bwa kupeta muwa wa loso, Yesu bamwalulwile’shi: ‘Ndonde.’ (Mat. 19:16-21) Balungwile bangi bena Yuda ba’shibadi abamukumina bu Kidishitu’shi: “Mikooko yande . . . ayindondo. Ami neeyipa muuwa wa looso.” (Yo. 10:24-29) Yesu badi mulungule Nikodeme mwina Sanedrine badi akumina kuuka bi bungi pabitale malongyesha aye’shi, boso “abakumiina mwadi” abakekala na “muuwa wa iikalayika.” (Yo. 3:16) Atulesha lukumino mwi Yesu p’atutumikila bibadi mulongyeshe na kwambula kileshesho kyaye. Su twakita byabya, atwikala nka mwishinda aditwala ku muwa wa loso.​—Mat. 7:14.

10. Nkinyi akitungu kukita bwa kuuka Yesu kalolo? (Yowano 17:3)

¹⁰ Kumpala kwa kulonda mu matabula a Yesu, abitungu tulongye bwa kumuuka. (Badika Yowano 17:3.) Kulonga bwa kuuka Yesu, nyi nkintu akitungu’shi tutungunukye na kukita. Abitungu tutungunukye na kulonga bi bungi pabimutale​—kwamba’shi nyikashi yaye,  ngyelelo aye a binangu na miya yaye. Sunga twekala bapwe kukita bipwa bi bungi bwi naminyi mu bya binyibinyi, abitungu tutungunukye na kulonga bwa kuuka Yehowa na Mwan’aye.

11. Myanda kinyi i mu ma evanjile?

¹¹ Bwa kwitukwasha bwa’shi tulongye bwa kuuka Mwan’aye, Yehowa mmufundjishe Mwiyi dyaye, evanjile inanka. Evanjile ayakwila nshalelo a Yesu na mudimo waye wa bulungudi. Ayilesha bibadi Yesu mwakule, bibadi mukite na bibadi eepusha. Ayitukwasha bwa ‘kutuma binangu’ ku kileshesho kya Yesu. (Eb. 12:3) Mu ano ma evanjile, mwi matabula etulekyele Yesu. Byabya, p’atwiyilongo, atuuku Yesu kalolo. Bu kipeta, twibalombene kulonda mu matabula aye kalolo.

12. Nkinyi kyatudya kukita bwa’shi myanda y’atubadika mu ma evanjile itukwashe?

¹² Bwa’shi myanda i mu ma evanjile itukwashe, t’abitungu penda kwiyibadika nya. Abitungu twate nsaa ya kwiyilonga kalolo na kwiyinangushena ngofu. (Pwandjikisha na Yooshwa 1:8.) Binobino, tutaluleyi mayele abidi alombene kwitukwasha bwa kunangushena pa myanda y’atubadika mu ma evanjile na byatudya kwiyitumikila.

13. Mushindo kinyi odya kumona myanda y’obadika mu evanjile bu ayikitshika yaya nsaa y’obadika?

¹³ A kumpala, mona myanda i mu evanjile bu ayikitshika yaya nsaa y’obadika. Nangushena bu’be kwete amono na kupusha byoso abikitshika paapa. Bwa kwibikita, kimbula mu mikanda itushe ndumbulwilo a Yehowa. Badika myanda i kumpala sunga kunyima kwa mwanda w’okwete kwilongyela. Kimbula myanda i bungi pabitale bantu na ma mbalo abakwila. Pwandjikisha mwanda okwete kulonga wi mumune na wi mu ungi evanjile. Ingi nsaa, mufundji a ungi evanjile mmufunde myanda yaba’shi bafunde kwi ungi.

14-15. Twi kukita kinyi bwa kutumikila myanda y’atulongo mu ma evanjile mu muwa wetu?

¹⁴ A kabidi, tumikila myanda ya mu evanjile  mu nshalelo obe. (Yo. 13:17) Kunyima kobe kulonga kalolo mwanda wi mu evanjile, eyipushe’shi: ‘Mwi dilongyesha kampanda dyandi mulombene kutumikila mu muwa wande su? Nekufubisha uno mwanda bwa kukwasha ungi muntu naminyi?’ Kimba muntu kampanda ouku, na pa nsaa ilombene omulungule dilongyesha dibopete na mayele oso.

¹⁵ Tutaleyi kileshesho akitukwasha bwa kufubila ano mayele abidi. Atutalula mwanda wa mukashi a mu lufwila ababadi bamono kwi Yesu mu ntempelo.

16. Pushisha mwanda wi mu Maako 12:41.

¹⁶ Mona mwanda bu aukitshika. (Badika Maako 12:41.) Nangushena abikitshika. Twi mwifuku dya 11, mweshi wa Nisane mu kipwa kya 33 B.B.,​—mafuku apela kumpala kwa’shi Yesu afwe. Yesu bapu kukisha nsaa i bungi mu ntempelo kwete kulongyesha. Anka beshikwanyi baye bakata ba bipwilo, t’abekalanga bamubofwishe myanda. Kumpala, bangi ba kwabadi, bekele bamwipushe akufiki bukome bwaye. Bangi abadi abamwele nkonko bwa kumutee kasele. (Mak. 11:27-33; 12:13-34) Binobino, Yesu bende mu kingi kipindji kya ntempelo. Pangi mwabetamina bu mu kadimbo ka bana bakashi​—mwamwa bamono kashete ka bya buntu ke ku mudimba. Bashala na babanga kutala bantu kw’abele bya buntu byabo mu kashete. Bamono ba mpeta be bungi, abele makuta e bungi. Pangi munshale pepi bya kupusha tuleo twa aa makuta a byamo nsaa y’aapono mu kashete.

17. Muyile Maako 12:42, nkinyi kibadi kikite mukashi mulanda mufwishe mulume?

¹⁷ Badika Maako 12:42. Kunyima kwa kapindji, Yesu bamono mukashi “mulanda baadi mufwishe mulume.” (Luk. 21:2) Badi na nshalelo e bukopo, pangi ta badi na makuta akumbane, bwa kuula byakudya bibadi nabyo lukalo. Anka, bayile mbufyefye, akela tukuta twaye twa byamo mu kashete, pangi tu’shibadi twele tulelo twi bukopo mu kashete. Yesu bamwene bibadi mwele​—tukuta tubidi twa byamo twabetamina bu lepta, tubabadi abafubisha mu aa mafuku. T’aabadi makuta sunga alombane a kuula ka kimusodya kamune bwa kudya.

18. Muyile Maako 12:43, 44, Yesu badi mwakule kinyi pabitale kya buntu kya mukashi kilele?

¹⁸ Badika Maako 12:43, 44. Yesu badi mukanye ngofu bwa uno mukashi kilele. Nka paapa, aye nkwitamina balongi baye, nkufunka mukashi kilele, na aye nkwaba’shi: ‘Uno mukashi mulanda mufwishe mulume beele bikile bya booso.’ Akupu bakwile’shi: “Baba bangi boso [bikishekishe ba mpeta] abálambula mmono isubukye pa nkalo yâbo, ank’ê mu bulanda bwê, balambula koso k’aikalanga n’ako, koso kapwandjile kumukwasha mu mûwa wê.” Nsaa ibadi uno mukashi kilele sha lulamato mwele koso kabadi nako dyadya efuku, badi mukulupile’shi Yehowa amupasukila.​—Mis. 26:3.

19. Mayi a Yesu pabitale mukashi mulanda mufwishe mulume aetulongyesha kinyi?

¹⁹ Tumikila uno mwanda mu nshalelo obe. Eyipushe’shi: ‘Mayi a Yesu pabitale mukashi mulanda mufwishe mulume, aandongyesha kinyi?’ Nangushena pabitale uno mukashi a mu lufwila. Kushi mpaka, badi akumina kupa Yehowa bi bungi. Anka, badi mukite kyakya kibadi na bya kukita, badi mupe Yehowa kyakya ki na muulo bwaye. Na Yesu badi muukye’shi kya buntu kyaye ki na muulo ku meso kwa Nshaye. Pano, pe dilongyesha di na muulo bwetu: Yehowa asankaa nsaa y’atumupa kyakya ki buwa bwetu​—kwamba’shi:  Mudimo watukitshi n’eshimba dyetu dyoso. (Mat. 22:37; Kol. 3:23) Yehowa asangalaa nsaa y’etumono atukitshi kyoso akitungu bwa kumufubila. Bino mbitale nsaa na bukome by’atutusha bwa kumulangwila, bu kwenda mu bulungudi na kutwela mu bisangilo.

20. Mushindo kinyi odya kutumikila dilongyesha di mu mwanda utale mukashi a mu lufwila? Tusha kileshesho.

²⁰ Mushindo kinyi odya kutumikila dilongyesha di mu mwanda utale mukashi a mu lufwila? Tentekyesha bantu bouku abatungu kunyingisha pa kwibatentekyesha’shi Yehowa, asanka nsaa y’abakitshi kyoso akitungu kukita bwa kumusankisha. Bu kileshesho, ouku mukwetu mukashi bapu kununupa, pangi epusha bu’shiki na muulo mwanda taki na mbidi bukome bwa kukita bi bungi mu mudimo wa bulungudi bu bibadi akitshi kumpala? Sunga’shi, ouku mukwetu mulume e na mukumbo usha’upu na mubofule kwishimba mwanda’shi te na mushindo wa kwenda ku bisangilo byoso su? Kwasha bano bakwetu pa kwibalungula ‘mayi aebakankamika.’ (Ef. 4:29) Ebalungule mayi aanyingisha atubalongo ku mwanda wa mukashi mulanda mufwishe mulume. Mayi obe aanyingisha, aebashinkamiisha’shi Yehowa asanka nsaa y’atumupa bintu byetu bya muulo. (Nki. 15:23; 1 Tes. 5:11) Nsaa y’otumbula bangi mwanda’shi abakitshi mwabo moso bwa kufubila Yehowa, sunga abimweneka bu bipela, okwete kulonda mu matabula a Yesu.

21. Wena kitshibilo kya kukita kinyi?

²¹ Twina lutumbu mwanda’shi ma evanjile aetulesha bi nshalelo a Yesu na aetukwasha bwa kumwambula na kulonda mu matabula aye. Kita programe a kwilongyela ma evanjile bupenka sunga mu lulangwilo lwa mu kifuko. Tutentekyesheyi’shi, bwa’shi myanda y’atulongo mu ma evanjile itukwashe, abitungu twiyimone bu ayikitshika yaya nsaa y’atwiyibadika na twiyitumikile mu nshalelo etu. Kukatusha kwambula bibadi Yesu mukite, abitungu tutemeshe bibadi mwakule. Mu mwisambo aulondo, atukamono kyatudi balombene kulongyela ku mayi a nfudilo a Yesu kumpala kwa’shi afwe.