Bwakinyi Yesu badi mwakule mayi a Davide e mu Misambo 22:2 kumpala kwa kufwa?

Kumpala kwa’shi Yesu afwe, badi mwakule mayi e mu Mateo 27:46 aamba’shi: “Efile Mukulu ande, Efile Mukulu ande, bwa-kinyi bonsumbusheena?” P’aye kwakula bino, Yesu badi mukumbashe mayi a Davide e mu Misambo 22:2. (Mak. 15:34) Bi bubi su twamba’shi, Yesu badi mwakule ano mayi mwanda badi apangayika sunga’shi badi mushimishe lukumino bwa kapindji kapela. Yesu badi auku kalolo bwakinyi abitungu’shi afwe, na badi akumina kwibikita. (Mat. 16:21; 20:28) Badi dingi auku’shi pa nsaa ya lufu lwaye, Yehowa akatusha “lupango” kwamba’shi t’amukalwila. (Yob. 1:10) Yehowa badi mulekye kumukalwila, bwa’shi Yesu aleshe’shi ashaala na lukumino sunga akyenga naminyi kumpala kwaye kufwa.​—Mak. 14:35, 36.

Byabya, bwakinyi Yesu badi mutemune mayi e mu uno musambo? Sunga ta twibebishinkamishe kalolo, tubande kutalula tungi tubingilo. *

Pa kwakula ano mayi, Yesu badi ashimika kasele’shi Yehowa t’amukwasha nsaa ya lufu su? Bibadi abitungu’shi Yesu atushe nkuulo kushi bukwashi bwa Yehowa. Badi nka na mbidi ya bu muntu na bibadi abitungu’shi afwe bwa ‘kufwila muntu oso.’​—Eb. 2:9, Esambi dipya 2015.

Pa kutemuna mayi apela e mu musambo, Yesu badi akumina’shi bantu boso banangushene pa verse yoso i mu uno musambo? Mu mafuku a Yesu, bena Yuda be bungi abadi abalamina ma verse e bungi e mu mukanda wa  misambo. P’abo kumupusha atemuna verse umune, abadi balombene kutentekyesha musango umune ma verse e mu musambo ushima. Su bino nyi bibadi abikumina Yesu’shi bakite, badi mukwashe balongi baye bena Yuda bwa’shi batentekyeshe matemuki e bungi e mu uno musambo pabitale lufu lwaye. (Mis. 22:8, 9, 16, 17, 19, 25) Na dingi, verse ya nfudilo ya uno musambo ayitumbisha Yehowa, na ayimulesha bu Mfumu e kunundu kwa byoso.​—Mis. 22:28-32

Pa kutemuna ano mayi a Davide, Yesu badi pangi akyebe kulesha’shi ta musoole mwanda? Kumpala kwa’shi bamwipee, bena Sanedrine abadi bamusambishe kushi kulonda miya, na bamutshibila kimu bu muntu musabule Efile Mukulu. (Mat. 26:65, 66) Bena Sanedrine abadi bebungye bukidibukidi bufuku na abo nkusambisha kilumbu kushi kulonda miya. (Mat. 26:59; Mak. 14:56-59) Pa kwiyela luno lukonko lwa’shi “Efile Mukulu ande, Efile Mukulu ande, bwa-kinyi bonsumbusheena?” Yesu badi akyebe pangi kulesha’shi ta mukite mwanda wi bubi na’shi ta be na kabingilo ka kumwipaa.

Yesu badi atentekyesha bangi’shi, sunga bibadi Davide mufundji a uno musambo mukyengye, t’abipushisha’shi ta badi mukuminyibwe na Yehowa. Lukonko lwa Davide t’alulesha’shi badi mukutwe lukumino. Kunyima kwaye kwela luno lukonko, badi muleshe’shi mukulupile mu bukome bwa Yehowa bwa kupasha, na bibadi Yehowa mutungunukye na kumwelela myabi. (Mis. 22:24, 25, 28) Mu mushindo umune, sunga bibadi Yesu “Mwana aa Daavide” mukyengye ku mutshi, t’abilesha’shi Yehowa badi mumusumbushene.​—Mat. 21:9.

Yesu badi alesha kinyongwa kya’shi Yehowa balekye kumukalwila bwa’shi aleshe lulamato lwaye su? Mpángo ya Yehowa ya ku mbangilo, t’ayibadi ya’shi Mwan’aye akyengye na afwe nya. Bino bibadi na muulo nka penda kunyima kwa Adame na Eve kutomboka. Yesu ta badi mukite mwanda wi bubi su ngumune, anka bibadi abitungu’shi akyengye na afwe bwa kwalula ku nkonko ibadi Satana mwibweshe, na kutusha muwa waye bu nkuulo bwa kuula kyakya kibadi Adame mushimishe. (Mak. 8:31; 1 Mp. 2:21-24) Bino bibadya kukumbana nka su Yehowa badi mulekye kukalwila Yesu bwa kapindji kapela, na bwa musango wa kumpala mu muwa waye.

Yesu badi akyebe kukwasha balongi baye, bwa’shi banangushene bwakinyi Yehowa badi mutadile’shi afwe ku mutshi wa makyenga? * Yesu badi auku’shi kufwa lufu lwa bu ntomboshi ku mutshi wa makyenga, akukokosha bantu be bungi. (1 Kod. 1:23) Su balongi baye abadi banangushene kalolo pabitale lufu lwaye, abadya kupusha kalolo ky’alulesha. (Nga. 3:13, 14) Abadya kumumona bu mupashi aabo, kushi bu ntomboshi.

Sunga’shi Yesu badi mwakule ano mayi bwa kabingilo kampanda, badi auku’shi p’afu ku mutshi wa makyenga, akitshi kikyebe ky’eshimba dya Yehowa. Kunyima kwaye kutemuna ano mayi e mu uno musambo, Yesu bakwile’shi: “Byooso bibaalombana!” (Yo. 19:30; Luk. 22:37) P’aye kuleka kukalwila Yesu bwa kapindji, Yehowa badi mukwashe Yesu bwa’shi akumbashe mudimo ubadi mumutume bwa’shi akite pa nsenga. Badi mumukwashe dingi bwa kukumbasha myanda yabadi bafude pabimutale mu ‘mwiya wa Moise, mu [mikanda ya] batemuki, na mu Misambo.’​—Luk. 24:44, Kilombeeno kipya 2014.