1-2. Nkuulo nkinyi, na bwakinyi twinayo lukalo?

NSAA ibadi Adame muntu mupwidjikye mukite mulwisho, badi mushimishe muwa wa ikalayika, kushi penda bwaye, kadi mpa na bwa bana baye. Adame ta badi na kabingilo ka kukita byabya bibadi mukite. Badi musangule bwa kukita mulwisho. Twi kwamba naminyi bwa bana baye? T’abadi bakite kintu su nkimune ki bubi, sunga kumutakula bwa kwiukita. (Lom. 5:12, 14) Adame badi mulombene lufu bwa kibadi mukite, anka Yehowa badi mulombene kukita kintu kampanda bwa’shi bana ba Adame bapete mushindo wa kwikala na muwa wa loso su? Oolo! Nkaye kyakatuka mukulwisha, Yehowa babangile kulesha kapekapela bya kafungusha bana ba Adame ku bupika bwa mulwisho na lufu. (Kib. 3:15) Pa nsaa ilombane, Yehowa badya kutuma Mwan’aye “bwa kupaana muuwa waye bwa kukùula baa-miilo.”​—Mak. 10:45; Yo. 6:51.

² Yesu badi mutushe muwa waye bwa kuula kyakya kibadi Adame mushimishe. (1 Kod. 15:22) Bwakinyi twina lukalo lwa nkuulo? Mwanda Mwiya wa Yehowa wa kululama, ubadi autekye kutusha muwa kwa muwa. (Efi. 21:23, 24) Adame badi mushimishe muwa upwidjikye. Bwa kukumbasha Mwiya wa kuluma w’Efile Mukulu, Yesu badi mutushe muwa waye upwidjikye. (Lom. 5:17) Nyi bwakinyi mufikye “Yaaya a looso” bwa boso abalesha lukumino mu nkuulo.​—Yesh. 9:6; Lom. 3:23, 24.

3. Muyile Yowano 14:31 na 15:13, bwakinyi Yesu badi mukumine kutusha muwa waye upwidjikye?

³ Yesu badi mukumine kutusha muwa waye bu nkuulo mwanda mmufule Nshaye bikata na mmwitufule. (Badika Yowano 14:31; 15:13.) Pa mwanda wa kino kifulo, Yesu badi na kitshibilo  kya kulama lulamato lwaye mpa na ku nfudilo na kukumbasha kikyebe ky’eshimba dya Nshaye. Yesu mwibikite pa kushala na lulamato mpa na ku lufu. Pa mwanda wa bino, mpángo ya Yehowa ya ku mbangilo pabitale bantu na nsenga, aikumbana. Mu uno mwisambo, atulongo bwakinyi Efile Mukulu badi mutadile bwa’shi Yesu akyengye kumpala kwadya kufwa. Atutalula mu kitshibo bingi bileshesho bya bafundji ba Bible abadi bate nkuulo na muulo. Na ku nfudilo, atutalula byatudya kulesha lutumbu bwa nkuulo na mushindo watudi balombene kulesha’shi atwata na muulo kyakya kitukitshine Yehowa na Yesu.

4. Lesha bibadi bifwe Yesu.

⁴ Banda kupwandjikisha bibadi bikitshikye mwifuku dya nfudilo kumpala kwa’shi bepee Yesu. Sunga bibadi mulombene kwitamina kisaka kya ba mikeyilu bwakidya kumukalwila, badi mutadile’shi bamukwate kwi basalayi bena Loma, bamukupile kushi lusa. (Mat. 26:52-54; Yo. 18:3; 19:1) Abadi bafubishe lufimbo lubadi alumutapa nsaa ibabadi abamukupila. Kunyima, abamutwadishe mutshi wi bushito, aku mase afwa amunokanga. Yesu babanga ku kaka mutshi bwa kwenda nao pa mbalo y’abamwipayila, anka mu kapindji kapela, basalayi ba bena Loma abadi batumine ungi muntu eyi bwa’shi eutwale. (Mat. 27:32) Nsaa ibafikile Yesu mbalo y’abamwipayila, basalayi abamukokwele misumadi mu masa mpa na ku ngwa. Bushito bwa mbidi, abusana yaya mbalo yabadi bakokokwele yaya misumadi. Ba kuuku ba Yesu mbenyongole na nyin’aye kwete kudila, anka bakata ba bena Yuda abamusepe. (Luk. 23:32-38; Yo. 19:25) Yesu mmukyengye munda mwa nsaa i bungi. Eshimba dyaye na mafwafwa t’abifubila pa bukopo, na kupuuka kubanyisha kumwelela bukopo. Yesu badi muukye’shi balesha lulamato na kumpala kwa’shi afwe, batekyele Yehowa bwa musango wa nfudilo. Akupu, bayinyikile mutwe aye nkufwa. (Mak. 15:37; Luk. 23:46; Yo. 10:17, 18; 19:30) Eyendo’shi, ta lubadi lufu lwa mu kimpulunkamba, lubadi lwa makyenga na lwa bufu.

5. Bwa Yesu, nkinyi kibadi bubi kukila mushindo ubadi mwipayibwe?

⁵ Bwa Yesu, kibadi akimukalakasha ta mushindo ubadi mwipayibwe. Badi akamba kukalakashwa bwa mwanda ubabadi bamwipayile. Abadi bamudimbile’shi mmusabule Efile Mukuklu. (Mat. 26:64-66) Uno mwanda ubadi aumukalakasha ngofu mu mushindo ubadi akulupila’shi, Nshaye t’akuminanga’shi ayishibwe milongo mu uno mushindo. (Mat. 26:38, 39, 42) Bwakinyi Yehowa badi mukumine’shi Mwan’aye aadi mufule akyengye na afwe? Tutaluleyi tubingilo tusatu.

6. Bwakinyi bibadi abitungu’shi Yesu apudikwe ku mutshi wa makyenga?

⁶ Ka kumpala, bibadi abitungu’shi bakokole Yesu ku mutshi bwa kufungusha bena Yuda ku mulwa. (Nga. 3:10, 13) Abadi bakumine bwa kukokyela Mwiya w’Efile Mukulu, anka ta babadi bebikite nya. Abadi balombene kufwa mwanda bana ba Adame na dingi, abadi bedibwe mulwa. (Lom. 5:12) Mwiya ubadi Efile Mukulu mupe bena Isaleele ubadi awamba’shi, su muntu akita mulwisho ulombene lufu, abitungu kumwipa. Akupu, mbidi yaye beyipudikye ku mutshi. * (Miy. 21:22, 23; 27:26) Pa mwanda Yesu badi mupudikwe ku mutshi, bena Yuda abadi balombene kufungushwa ku  mulwa, na mulambu waye ubadi ulombene kwibakwasha sunga bibabadi ba musumbushene.

7. Kabingilo kinyi ka kabidi kabadi katakule Efile Mukulu bwa kutadila’shi Mwan’aye akyengye?

⁷ Tala kabingilo ka kabidi kabadi katakule Efile Mukulu bwa’shi atadile Mwan’aye bwadya kukyenga. Badi alongyesha Mwan’aye bya nkekala Tshite-mwakwidi etu mukata. Yesu badi mumone byabidi bukopo ku kokyela Efile Mukulu mu nkalakashi i bukopo. Badi mukyengye ngofu mu mushindo ubadi atekye na “kwela musaase na mpolo ku meeso” bwa’shi apete bukwashi. Kushi mpaka, pa mwanda Yesu mmupushe kano kenyongoshi ke bino, mulombene kupusha nkalo yetu na ‘kwitukwasha’ nsaa ‘yatudi mu kutompibwa.’ Twina lutumbu lukata mwanda Yehowa mmutule Tshite-mwakwidi mukata etu sha lusa mulombene “kufwambuka neetu mu kubofula kwetu.”​—Eb. 2:17, 18; 4:14-16; 5:7-10.

8. Kabingilo kinyi ka kasatu kabadi katakule Yehowa bwa’shi atadile Yesu atompibwe ngofu?

⁸ Ka kasatu, Yehowa badi mutadile’shi Yesu akyengye bwa kwalula lukonko lwi na muulo: Muntu mulombene kushaala na lulamato kwi Yehowa mu bitompwanga bi bukopo su? Satana amba’shi nya! Amba’shi bantu abafubila Efile Mukulu penda mwanda wa’shi ebape bintu. Ashinkamisha’shi ta mbafule Yehowa nka bu bibadi bibikite nshabo Adame. (Yob. 1:9-11; 2:4, 5) Bu bibadi mukulupile’shi Mwan’aye e na lulamato, Yehowa badi mutadile’shi Yesu atompibwe mu kipaso ki bukopo ngofu. Yesu badi mulame lulamato lwaye, aye nkulesha’shi Satana sha madimi.

9. Nkileshesho kinyi kitulekyele Yowano?

⁹ Dilongyesha dya nkuulo dibadi dinyingishe lukumino lwa bena Kidishitu be bungi. Abatungunukile na kulungula mukandu wibuwa sunga bibabadi abebabingabinga na kunyingila nkalakashi i bungi mu muwa wabo oso. Tutale kileshesho kya mutumibwa Yowano. Na lulamato loso, badi mulambukishe bya binyibinyi pabitale Kidishitu na nkuulo pangi munda mwa bipwa bikile pa 60. Pa tabadi alombasha bipwa lukama, mbulamatadi a bena Loma bamumwene bu muntu ebalwisha, nyi abo nkumwela mu lukano mu kisangisangi kya Patmose. Badi mukite mwanda wi bubi su? Nya. Badi ‘alungula mukandu w’Efile Mukulu na kutusha [bu kamonyi] pabitale Yesu.’ (Kibaf. 1:9) Yowano mwitulekyele kileshesho ki buwa kya lukumino na kunyingila!

10. Mikanda ya Yowano ayilesha naminyi’shi ata nkuulo na muulo?

¹⁰ Yowano badi muleshe’shi mufule Yesu ngofu, na’shi ata nkuulo na muulo mu mikanda yaye iyokyelwe. Mwimwakwile nkuulo sunga bintu bi buwa by’atupete ku bukwashi bwa nkuulo, misusa ikile pa 100. Bu kileshesho, Yowano bafundjile’shi: “Su muntu balwisha, twina mwimeenyi kwa Yaya, Yesu Kidishitu mululame.” (1 Yo. 2:1, 2, Kilombeeno kipya 2014) Mu mikanda yaye, Yowano ashimika dingi kasele pa muulo wa kutusha “buu-kamonyi bwa Yesu.” (Kibaf. 19:10) Abimweka patoka’shi, Yowano badi ata nkuulo na muulo. N’atwe namu twi kwibilesha naminyi?

11. Nkinyi kilombene kwitukwasha bwa kunyingila kutompibwa?

¹¹ Nyingila nsaa y’otompibwa bwa kukita mulwisho. Su atwata nkuulo na muulo, ta twi balombene kupwandjikisha’shi: ‘Ntshi na lukalo lwa kunyingila nsaa yantompibwa bwa kukita mulwisho. Ne kwiukita akupu nateka bwa’shi ba nfwile lusa.’ Anka,  nsaa y’atutompibwa bwa kukita kintu ki bubi, twambe’shi: ‘Kunyima kwa Yehowa na Yesu kunkitshina bino byoso, ntshi mulombene kukita bino nya.’ Bwa kunyingila, twisendele Yehowa, pa kumuteka’shi: ‘Tonfishanga mu kutompibwa.’​—Mat. 6:13.

12. Mushindo kinyi watudi balombene kutumikila elango di mu 1 Yowano 3:16-18?

¹² Fula bakwenu balume na bakashi. Nsaa y’atwibalesha kifulo, atulesha dingi’shi atwata nkuulo na muulo. Bwakinyi? Mwanda Yesu ta mwitufwile penda atwe nya, mufwile dingi bakwetu balume na bakashi. Su badi mukumine kwibafwila, abilesha patoka’shi ebataa na muulo. (Badika 1 Yowano 3:16-18.) Atulesha’shi twibafule bakwetu balume na bakashi mu mushindo w’atwibakitshina myanda. (Ef. 4:29, 31–5:2) Bu kileshesho, atwibakwasha nsaa yabadi na maladi, sunga nsaa yabadi na nkalakashi i bungi i bukopo, mpa na nsaa y’abapete masaku aatukila ku bintu bipangibwe. Anka twi kukita kinyi nsaa i mukwetu mulume sunga mukashi akula sunga kukita kintu akitutapa kwishimba?

13. Bwakinyi abitungu tufwile bangi lusa?

¹³ Abikwelela bukopo ingi nsaa bwa kufwila mukwetu mulume sunga mukashi lusa su? (Lv. 19:18) Su mbyabya, londa dino elango: “Ikalaayi na lwishinko kwi muntu na muntu, dingi su muntu ee na kilumbu na ungi, efwileneeyi lusa ku muntu na muntu bu biinufwile Yehowa lusa. Biinulekyele Yehowa, kitaayi byaa-mumune anwe naamu.” (Kol. 3:13) Nsaa yoso yatufwila mukwetu mulume sunga mukwetu mukashi lusa, atulesha Nshetu e mwiyilu’shi atwata nkuulo na muulo. Twi kutungunuka na kulesha’shi atwata na muulo kino kya buntu kya nkuulo kitupe Efile Mukulu naminyi?

14. Mushindo kinyi wa kumpala watudya kunyisha kulesha lutumbu bwa nkuulo?

¹⁴ Tumbula Yehowa bwa nkuulo. Mukwetu mukashi Joanna ena bipwa 83, mushale mu Inde amba’shi: “Namono’shi bi na muulo kutemuna nkuulo efuku dyoso mu nteko yande na kutumbula Yehowa bwa yanka.” Mu nteko yobe, nangushena ku milwisho ibokitshi munda mw’efuku na otekye Yehowa bwa’shi akufwile lusa. Anka, su bokitshi mulwisho ukata, abitungu otekye bukwashi kwi bakulu. Abakutemesha na abakupa malango aatukila Mwiyi dy’Efile Mukulu. Abatekye n’obe na batekye  Yehowa bwa’shi akufwile lusa na wekale dingi mu kipwano ki buwa naye.​—Shak. 5:14-16.

15. Bwakinyi abitungu twate nsaa ya kubadika na kunangushena pabitale nkuulo?

¹⁵ Nangushena pabitale nkuulo. Mukwetu mukashi ena bipwa 73 abetamina bu Rajamani amba’shi: “Nsaa yambadika pabitale bibadi Yesu mukyengye, mpolo ayingiki.” N’obe namu, abikutondaa nsaa y’obadika pabitale bibadi Mwan’Efile mukyengye. Anka, p’onyisha kunangushena pabitale mulambu ubadi Yesu mutushe, kifulo kyobe bwaye na bwa Nshaye, akinyisha kutama. Byabya, tula nkuulo bu mutwe wa mwanda wi na muulo ngofu, odya kwilongyela mu programe obe bwa kwiunangushena.

16. Kulongyesha bangi pabitale nkuulo akwitukwasha naminyi? (Tala kifwatulo kya ku kipusu.)

¹⁶ Longyesha bangi pabitale nkuulo. Nsaa yoso y’atulungula bangi pabitale nkuulo, lutumbu lwetu alunyisha kutama. Twina bina mudimo bi buwa byatudya kufubisha bwa kulongyesha bangi bwakinyi Yesu badi mwitufwile. Bu kileshesho, twi kufubisha dilongyesha dya 4 dya broshire a Mukandu wibuwa w’Efile Mukulu! Dino dilongyesha di na mutwe wa mwanda awamba’shi: “Yesu Kidishitu nnanyi?” Sunga twi kwakwila shapitre a 5 a mukanda wa A Nkinyi Akitulongyesha Bible? Uno shapitre ena mutwe wa mwanda awamba’shi: “Nkuulo​—Nkya buntu kikata ky’Efile Mukulu.” Ku kipwa kyoso, atutamisha lutumbu lwetu bwa nkuulo, pa kutwela mu Kitentekyesho kya lufu lwa Yesu Kidishitu, na pa kwitamina bangi na kisumi kyoso bwabadya kwimutwela. Yehowa mwitupe kinemo kikata kya kulongyesha bangi pabitale Mwan’aye!

17. Bwakinyi nkuulo nyi kya buntu kikata kyabadi bape bantu kwi Efile Mukulu?

¹⁷ Kushi mpaka, twina kabingilo ke buwa ka kutamisha na kulama lutumbu lwetu bwa nkuulo. Ku bukwashi bwa nkuulo, twi balombene kwikala mu kipwano ki buwa na Yehowa sunga twekala bantu bakutwe kupwidjika. Pa mwanda wa nkuulo, mifubo ya Diabulu ayikabutulwa. (1 Yo. 3:8) Pa mwanda wa nkuulo, mpángo ya Yehowa ya ku mbangilo pabitale nsenga ayikakumbana. Nsenga ishima ayikekala mpaladiso. Muntu oso okafumankana naye akekala mufule Yehowa na kumufubila. Byabya, efuku dyoso tukimbeyi mishindo yatudya kulesha lutumbu bwa nkuulo​—kya buntu kikata kyabadi bape bantu kwi Efile Mukulu!