1. Yehowa amonaa kinyi mwi mwilo waye?

YEHOWA Efile Mukulu “asangalâ na mwilo wê.” (Mis. 149:4, EEM) Bino abitusankisha ngofu! Yehowa amonaa nyikashi yetu i buwa; amonaa’shi atukela bantu be buwa na etukakaa kwadi. Su twashaala na lulamato kwadi, ekala kuuku etu bwa loso!​—Yo. 6:44.

2. Bwakinyi abyelelaa bangi bukopo bwa kukumina’shi Yehowa mwibafule?

² Bangi bekwiyipusha’shi: ‘Nauku’shi Yehowa mmufule mwilo waye mu kisaka, anka nekushinkamisha naminyi’shi Yehowa angataa na muulo pa bupenka? Nkinyi kilombene kutakula muntu bwa kwiyipusha luno lukonko? Oksana, * badi mukyengye ngofu pabadi mukinga amba’shi: “Nadi na muulo wi bungi nsaa inadi mubatshishibwe, na pa nabangile bu mbala-mashinda. Anka, pa nankumbeshe bipwa 15, nabangile kutentekyesha makyenga oso anapetele ku bukinga. Nadi mumone’shi Yehowa t’angataa na muulo na ta munfule.” Yua, mukwetu mukashi mbala-mashinda badi naye mukyengye ku bunkinga amba’shi: “Nadi mulambule muwa wande kwi Yehowa, mwanda nadi nakumina kumusankisha. Anka nadi mushinkamishe’shi ta mulombene kunfula.”

3. Nkinyi ky’atutalula mu uno mwisambo?

³ Nka bu bano bena Kidishitu basha lulamato babatukatuka mu kutemuna, we mufule Yehowa ngofu anka wealashena su mukufule. Bwakinyi abitungu oshinkamishe’shi Yehowa mukufule binyibinyi? Na kinyi kilombene nkukwasha nsaa y’onangushena’shi  Yehowa ta mulombene nkufula? Tutaluleyi lwalulo ku ino nkonko.

4. Bwakinyi kwikala na mpaka pabitale kifulo kya Yehowa nyi masaku?

⁴ Nsaa yatudi bashinkamishe’shi Yehowa mwitufule, atukitshi mwetu moso bwa kumufubila sunga twekala mu nkalakashi. Ku lungi lupese, su twina mpaka’shi Yehowa mwitufule, ‘bukome [bwetu] bwi kupela.’ (Nki. 24:10) Na nsaa y’atubofula kwishimba na kushimisha lukumino’shi Efile Mukulu mwitufule, t’atobesha kukambila bulwishi bwa Satana.​—Ef. 6:16.

5. Nkinyi kibadi kifikile bakwetu balume na bakashi abadi abapwandjikisha’shi Efile Mukulu ta mwibafule?

⁵ Bangi bena Kidishitu mbabofule mu kikudi, mwanda wa ino mpaka. Ungi mukulu abetaminaa bu James amba’shi: “Sunga binadi nafubu ku Betele, na kulungula mukandu wibuwa pamune na kangi kakongye ka ludimi lwenyi, nadi n’eyipusha su Yehowa asankila kwipana kwande. Angi mafuku, nabangile kwiyipusha su Yehowa apusha nteko yande.” Eva mukwetu mukashi e mu mudimo wa nsaa yoso amba’shi: “Ne mumone’shi bi masaku kupwandjikisha’shi Yehowa ta mwitufule, mwanda mbilombene kwikala na bukitshishi bwi bubi ku mudimo waye. Bino mbilombene nkukutshishwa bwa kukita myanda ya mu kikudi na kushimisha muloo obe wa kufubila Yehowa.” Michael mwikale mbala-mashinda na mukulu amba’shi: “Su t’okumina’shi Efile Mukulu mukufule, we kupambuka.”

6. Nkinyi akitungu’shi tukite su tubabanga kwikala na mpaka pabitale kifulo ky’Efile Mukulu?

⁶ Bino bileshesho abilesha’shi, bi masaku kunangushena’shi Efile Mukulu ta mwitufule. Nkinyi akitungu’shi tukite su tubabanga kwikala na mpaka pabitale kifulo ky’Efile Mukulu? Musango umune, abitungu tukatushe byabya binangu. Teka Yehowa akukwashe bwa’shi opyanyikishe “myalashêno” na ‘butaale bw’Efile Mukulu, abo butabukile binangu byooso, abulama eshimba dyoobe na binangu byoobe.’ (Mis. 139:23, EEM; Fid. 4:6, 7) Tentekyesha’shi twe bupenka. Bangi bakwetu balume na bakashi basha lulamato, bakwete abakalakashwa na uno ngyelelo a binangu e bubi. Mpa na bangi bafubi ba Yehowa ba kala, abadi nabo bapete luno lukalakashi. Tutalule kyatudya kulongyela ku kileshesho kya Mpoolo mutumibwa.

7. Nkalakashi kinyi ibadi Mpoolo mupete?

⁷ Tobopushishe bu’shi mashito abakukidi bungi, na’shi twena mushindo wa kwialombasha? Su mbyabya, kileshesho kya Mpoolo ki nkukwasha. Badi enyongola, kushi penda bwa kakongye kamune, anka “bwa tukongye toso.” (2 Kod. 11:23-28, Kilombeeno kipya 2014) We na mukumbo ushaupu, aukushimishisha muloo obe? Mpoolo badi na mwanda ubadi aumukyengyesha ngofu. Ubadi pangi mukumbo ubadi akyebe’shi umulekyele mbalo. (2 Kod. 12:7-10) We mubofule kwishimba bwa bilubilo byobe su? Ingi nsaa bibadi bifwile Mpoolo. Badi mwiambe bu “muntu a malwa,” mwanda badi atungunuka na kulwa bwa kukita bi buwa.​—Lom. 7:21-24.

8. Nkinyi kibadi kikwashe Mpoolo bwa kunyingila nkalakashi i badi mupete?

⁸ Sunga bibadi Mpoolo mupete ino yoso nkalakashi, batungunukile nka na kufubila Yehowa. Nkinyi kibadi kimupe bukome bwa kukita bino? Sunga bibadi ekalakasha ngofu bwa bilubilo byaye, badi na lukumino lwi bukopo mu nkuulo. Badi muukye mulayilo wa Yesu awamba’shi: ‘Muntu oso alesha lukumino mwi [Yesu] apete . . . muwa wa loso.’ (Yo. 3:16; Lom. 6:23) Mpoolo nyi umune a ku bantu abadi baleshe lukumino mu nkuulo. Badi mushinkamishe’shi Yehowa akumina kufwila baba abelanga lusa sunga bekala bakite mulwisho ukata.​—Mis. 86:5.

9. Nkinyi ky’atulongyela ku mayi a Mpoolo e mu Bena-Ngalatea 2:20?

⁹ Mpoolo badi na lukumino mwi Efile’shi mumufule ngofu, mwanda badi auku’shi Efile Mukulu badi mutume Yesu bwa kumufwila. (Badika Bena-Ngalatea 2:20.) Tala mayi aanyingisha e ku nfudilo kwa uno verse. Mpoolo amba’shi: “Mwan’Efile Mukulu mmufule, aye mwipane bwa mwanda wande.” Mpoolo ta badi mwimone bu’shi muntu mukile bubi, abashi balombene kufwila lusa kwi Efile Mukulu. Ta badi apwandjikisha’shi ‘Yehowa ekufula bakwetu, anka, ta mulombene ku nfula’mi.’ Mpoolo balungwile bena Loma’shi: “Kidishitu beetufwidiile pabaatudi tukii baa-sha-milwisho.” (Lom. 5:8) Ta kwi kintu kilombene kwimika Efile Mukulu bwa kwitufula!

10. Nkinyi kibatulongyela mu Bena-Looma 8:38, 39?

¹⁰ Badika Bena-Looma 8:38, 39. Mpoolo badi mushinkamishe’shi kifulo ky’Efile Mukulu ki bukome. Bafundjile’shi, “takwi kintu kilombeene kwitulamuna ku kifulo ky’Efile Mukulu.” Mpoolo badi auku mushindo  ubadi Yehowa muleshe bena Isaleele lwishinko. Badi dingi auku mushindo ubadi Yehowa mumuleshe lusa. Mu ungi ngakwilo, Mpoolo badi akula’shi, ‘Bu bikale’shi Yehowa mutume Mwan’aye bwadya kunfwila, ntshi mulombene kwelesha mpaka’shi mmufule.’​—Lom. 8:32.

11. Sunga bibadi Mpoolo mukite milwisho y’abalesha mu 1 Timote 1:12-15, bwakinyi badi mushinkamishe’shi Efile Mukulu mumufule?

¹¹ Badika 1 Timote 1:12-15. Abimweka’shi Mpoolo badi ekalakasha bwa myanda ibadi mukite kumpala kwa kwikala mwina Kidishitu. Eamba bu mulwishi “a kumpala.” Kumpala kwa kuuka bya binyibinyi, Mpoolo badi ende mu kibundji na kibundji bwa kubingabinga bena Kidishitu, kwibelesha mu nkano na kwipayisha bangi. (Bik. 26:10, 11) Banda kupwandjikisha bibadi Mpoolo epusha nsaa ibadi afumankana na mwina Kidishitu sha baledi babadi mwipayishishe. Badi enyongola bwa milwisho yaye, anka badi euku’shi ta mulombene kushintula bipwe kukila. Badi mushinkamishe’shi Yesu mumufwile na bafundjile’shi: “Bino byandi nee mwibiikeele ku buntu bw’Efile Mukulu.” (1 Kod. 15:3, 10) Bino abitulongyesha kinyi? Abitungu oshinkamishe’shi Yesu mukufwile na bino mbikukwashe bwa kwikala mu kipwano ki buwa na Yehowa. (Bik. 3:19) Kina muulo kwi Efile Mukulu, nkyatukwete kukita binobino na ky’atukitshi mu mafuku aafiki, ta milwisho yetu ya kala sunga twibeyikite atwe bapwe kwikala ba Temwe ba Yehowa sunga kumpala kwa kwibikala.​—Yesh. 1:18.

12. Mayi e mu 1 Yowano 3:19, 20, ekwitukwasha naminyi nsaa y’ atwipusha bu bantu ba’shi na muulo na bu ba’shi bafudibwe?

¹² Nsaa y’onangushena pabitale lufu lwa Yesu bwa kubwikila milwisho yobe, we kwamba’shi: ‘Ntshi mulombene kino kya  buntu nya.’ Bwakinyi wekwipusha bino? Eshimba dy’etu dikutwe kupwidjika di kwitudimba, dyetutakula bwa kwipusha bu bantu bashi na muulo na bashi bafudjibwe. (Badika 1 Yowano 3:19, 20.) Yaya nsaa, abitungu tutentekyeshe’shi “Efile Mukulu mmukile mashimba eetu ku bukata.” Sunga twapwandjikisha’shi Yehowa ta mulombene kwitufula na kwitufwila lusa, aye atungunuka nka na kwibikita. Abitungu tushinkamishe’shi Yehowa mwitufule. Twi kwibikita pa kwilongyela Eyi dyaye, kumuteka nsaa yoso, na kwibunga pamune na mwilo waye. Bwakinyi kukita ino myanda kwi na muulo?

13. Kulonga Eyi dy’Efile Mukulu kwikwitukwasha naminyi? (Tala kashibo akamba’shi: “ Bibadi bibakwashe Eyi dy’Efile Mukulu.”)

¹³ Longa Eyi dy’Efile Mukulu efuku dyoso, na omono bi bu muntu bwa Yehowa kalolo. Omono byadi mukufule kalolo. Kunangushena ku by’obadika efuku dyoso Mwiyi dy’Efile Mukulu, mbilombene nkukwasha bwa kumona myanda kalolo, “kulumbuula” bi mu binangu byobe na bi mwishima dyobe. (2 Tim. 3:16) Ungi mukulu abetaminaa bu Kevin badi emono bu shi na muulo, amba’shi: “Kubadika na kunangushena Misambo 103, nkukwashe bwa kulumbula binangu byande na kupusha kalolo bi binangu bya Yehowa pabintale.” Eva, atatupwile kutemuna amba’shi: “Nafudishaa efuku dyoso na kunangushena bi mweneno a myanda a Yehowa. Abimpeya butale mwishimba na kunyingisha lukumino lwande.”

14. Luteko lwi kwitukwasha naminyi?

¹⁴ Teka kushi kukoka. (1 Tes. 5:17) Kipwano akinyingaa pankatshi pa bantu babidi p’abesamba nsaa yoso na kwilungushena by’abepusha. Bi mumune na bwa kipwano kyetu na Yehowa. Nsaa y’atumulesha by’atwipusha na bi binangu byetu mu nteko, atulesha’shi twibamukulupile na atuuku’shi mwitufule. (Mis. 94:17-19; 1 Yo. 5:14, 15) Yua, atatupwile kutemuna amba’shi: “Nsaa yansambila, ntangimena nka penda pa kumulungula myanda ibakitshika munda mw’efuku. Namufungwilaa eshimba na kumulungula byanepusha. Mwenda mafuku, nabangile kumona Yehowa kushi bu mukata a sosiete kampanda, nka bu Nshe-bana mufule bana baye.”​—Tala kashibo akamba’shi: “ We mwiubadikye su?”

15. Yehowa aleshaa naminyi’shi kwete kupasukila oso akwatudi?

¹⁵ Kwikala na ba kuuku ba sha lulamato; nyi kya buntu kya Yehowa. (Shak. 1:17) Nshetu e mwiyilu muleshe’shi etupasukila, pa kwitupa kifuko kya mu kikudi kya bakwetu balume na bakashi abetulesha “kifulo mafuku ooso.” (Nki. 17:17, EEM) Mu mukanda ubadi mufundjile bena Kolose, Mpoolo esambila bangi bena Kidishitu abadi bamukwatshishene, amba’shi: ‘Mbamukankamikye bikata.’  (Kol. 4:10, 11, EEM) Sunga Yesu Kidishitu, badi na lukalo lwa bukwashi na badi musankile bukwashi bubadi mupete kwi ba kuuku baye, byabekala ba mikeyilu sunga bantu.​—Luk. 22:28, 43.

16. Ba kuuku be buwa be kwitukwasha bwa kwifubwila pepi na Yehowa naminyi?

¹⁶ Okwete kuteka na kukumina bukwashi bw’abakupa kwi ba kuuku mu kakongye su? Nsaa y’olungula kuuku obe munyingye mu kikudi myanda yobe, t’abilesha’shi lukumino lobe ndupela, anka mbilombene nkukalwila. James atatupwile kutemuna amba’shi: “Kudya bu kuuku na bena Kidishitu banyingye mu kikudi kubadi kunkwashe ngofu. Nsaa yankalakashwa na binangu bi bubi, bano ba kuuku be buwa abantemesha na lwishinko loso na kundungula’shi, twi nka ba kufule. Ku bukwashi bwabo, nashingula’shi Yehowa mmufule na ampasukilaa.” Nyi bwakinyi abitungu tutamishe na tulame kipwano kyatudi nakyo na bakwetu balume na bakashi.

17-18. Abitungu tutemeshe nanyi, na bwakinyi?

¹⁷ Satana ta kwete akumina’shi twikitshishe bwa kukita bi buwa. Akyebe tukumine’shi Yehowa ta mwitufule na’shi ta twina muulo ku meso kwaye. Nka byatubebimono, bino mbya madimi.

¹⁸ Yehowa mukufule. Wena muulo ku meso kwaye. Su bomukokyela, ‘okashaala mu kifulo kyaye’ bwa loso nka bu Yesu. (Yo. 15:10) Byabya, totemeshanga Satana sung’eshimba dyobe. Anka, temesha Yehowa kwete amono nyikashi i buwa ya oso a kwatudi. Ikala mushinkamishe’shi Yehowa “asangalâ na mwilo wê” mpa n’obe!