“Nsaa ibabangile mwana a muyomba ande kulwa n’ami, naadi mumufine mu nshingo. Nakyebele kumwipa.”​—Paul.

“Ku nshibo, naadi nafitshi munda mpa na bwa ka mwanda kapeela. Nadi nalwisha bintu bya mu nshibo, bintu bya maasha, sunga kintu kyoso kya mpete.”​—Marco.

Bebungi ba kwatudi, tabatombokaa bu bano bantu ba mu bino bileshesho bibidi nya. Sunga mbyabya, ingi nsaa atukutwaa kulesha butontshi bwa mbidi. Mwanda twi bapyane mulwisho wa Adame muntu akumpala. (Lom. 5:12) Nka bu Paul na Marco, abyelelaa bangi bukopo bwa kuposha nsungu y’abo. Bwa bangi, kuposha binangu byabo nyi mmwanda wi bukopo. Bu kileshesho, abatungunuka na kunangushena pa myanda ayibakwatshisha moo sunga ayibabofusha kwishimba. Bangi namu abibelela bukopo bwa kupela kutambuka lusandji, kutoma bintu abikolwanaa bu malwa, kabangi na bingi bintu.

Baba boso bash’abobeshaa kuposha binangu, nkalo na bikitshino byabo, mbalombene kulwisha nshalelo aabo. Kadi twi balombene kusuuka nshalelo e byabya. Mushindo kinyi ? Pa kwikala na butontshi bwa mbidi. Bwa kwidipeta, tubandeyi kutaluula ino nkoonko isatu: (1) Butontshi bwa mbidi kinyi? (2) Bwakinyi dino eyikashi di na muulo? (3) Mushindo kinyi watudi balombene kupeta dino eyikashi di mu “kikuba kya kikudi”? (Nga. 5:22, 23, Esambi dipya 2015) Akupu atutaluula dingi kilombene muntu nabene kukita nsaa yakutwa kulesha butontshi bwa mbidi.

Muntu sha butontshi bwa mbidi takita myanda mu nsungu. Na dingi t’akulaa sunga kukita mwanda kampanda ushausankisha Efile Mukulu.

Yesu mmwituleshe akipushisha kwikala na butontshi bwa mbidi. Bible amba’shi: “P’abábadi abamukâ, ta mwibalwishe namu, ooo. P’abamufwambwile, ta mmwibafunyine, nyâ. Anka, betûdile kwi Efile Mukulu, nsushi atshibâ myanda yoso mu kululama.” (1 Mp. 2:23, EEM) Yesu baadi muleshe butontshi bwa mbidi pababaadi bamusengye kwi beshikwanyi baye nsaa ibaabadi bamukookole ku mutshi wa makyenga. (Mat. 27:39-44) Akupu baadi muleshe butontshi bwa mbidi, nsaa ibaadi bakata ba bipwilo abamwele nkonko bwa kumona pa kumukwatshila. (Mat. 22:15-22) Baadi dingi mulekye kileshesho kikata nsaa ibaadi bena Yuuda basangule mabwe bwa kumwasa! Pamutwe pa kwibakitshina bibubi, “Yesu bafwamine na batuukile mu ntempelo.”​—Yo. 8:57-59, Kilombeeno kipya 2014.

Twi kwambula kileshesho kya Yesu su? Oolo, mu mishindo ibungi. Mpyeele mutumiibwa bafundjile’shi: “Kidishitu . . . bamwene malwa pa mwanda wenu, eenulekyela kileeshesho, bwa’shi nulonde etabula dyaaye.” (1 Mp. 2:21) Sunga mbyatudi bakutwe kupwidika, twi balombene kwambula kileshesho kya Yesu kalolo. Bwakinyi kukita bino kwi na muulo?

Twi na lukalo lwa butontshi bwa mbidi bwa kukuminyibwa na Yehowa. Sunga twekala bapwe kufubila Yehowa na lulamato munda mwa bipwa bi bungi, twi kulwisha bu kuuku bwetu naye su twakutwa kutala kalolo myanda y’atwakula na y’atukitshi.

Tala kileshesho kya Moyiise, angi mafuku baadi ‘muntu mwiyishe bikata, bishibaadi muntu su ngumune pa nsenga.’ (Mb. 12:3) Kunyima kw’aye kunyingila kwidila kwa bena Isaleele munda mwa bipwa, dingi efuku Moyiise baadi mukutwe butontshi bwa mbidi. Baadi mufiite munda nsaa ibabaadi dingi bedile pabitale mwanda wa meema. Baadi mulungule mwilo n’eyi dibukopo’shi: ‘Byaabya, temeeshayi, anwe bantomboshi! Twi balombeene mu luno lubwebwe kwinutuushiisha meema?’​—Mb. 20:2-11.

Moyiise baadi mukutwe butontshi bwa mbidi. Tabaadi mutumbishe Yehowa baadi mukite kyakya kilengyeleshi kya kwibatushisha meema nya. (Mis. 106:32, 33) Nyi bwakinyi, Yehowa tabaadi mumutadiile bwadya kutwela mu Nsega ya mulayilo. (Mb. 20:12) Abimweneka’shi, kubanga dyadya efuku mpa na kwifuku dyaye dya nfudiilo, Moyiise baadi enyongola bikata p’aye kukutwa kulesha butontshi bwa mbidi.​—Miy. 3:23-27.

Kyatulongyela ku uno mwanda. Sunga twekala mu bya binyibinyi takudi mafuku ebungi, abitungu twakule nka na kanemo kwi baba boso abetufitshisha munda sunga abitungu’shi twibaludikye. (Ef. 4:32; Kol. 3:12) Eyendo’shi, nsaa y’atwende na kukula, abibanga kwitwikela bukopo bwa kwikala na lwishinko. Anka tentekyesha Moyiise. T’atukumiina kulwisha nkumo yetu kwi Yehowa mwanda wa kukutwa butontshi bwa mbidi. Byabya, twi kukita kinyi bwa kwikala na butontshi bwa mbidi?

Teka kikudi kiselele. Bwakinyi? Mwanda butontshi bwa mbidi nyi eyikashi dya kikuba kya kikudi ky’Efile Mukulu, na Yehowa apeyaa baba boso abamutekye kikudi kyaye. (Luk. 11:13) Ku bukwashi bwa kikudi kyaye, Yehowa mmulombene kwitupa bukome bwa kulesha butontshi bwa mbidi. (Fid. 4:13) Mmulombene dingi kwitukwasha bwa kwikala na ingi ngikashi ya kikuba kya kikudi bu kifulo, akitukwasha bwa kulesha butontshi bwa mbidi.​—1 Kod. 13:5.

Suuka kintu kyooso kilombeene nkukutshishwa kulesha butontshi bwa mbidi. Bu kileshesho, suuka ma site a Internete na mishindo ya kukisha kapapi ayitakula bantu mu kwikala na mwikelo wi bubi. (Ef. 5:3, 4) Abitungu dingi tusuukye kintu kyoso kilombene kwitutakula mu kukita  kintu ki bubi. (Nki. 22:3; 1 Kod. 6:12) Bu kileshesho, muntu kwete kutompibwa bwa kukita kintu kampanda ki butete, mmulombene kwata kitshibilo kya kupela kubadika mikanda sunga kutala ma filme aebwesha malaka a lusandji.

Twi kumona kutumikila dino elango bu kwibukopo. Anka, su twakita mwetu moso, Yehowa etupa bukome bwatudi nabo lukalo bwa kwipoosha. (2 Mp. 1:5-8) Etukwasha bwa kulama binagu byetu, ngakwilo, na bikitshino byetu. Kileshesho kya Paul na Marco batutemunanga akibishinkamisha, mwanda oso a kwabadi mmulongye bya kwikala na butontshi bwa mbidi. Tala dingi kileshesho kya ungi mukwetu mulume chauffeur baadi afitshi munda sunga kutontoola na bangi ba chauffeur nsaa yatambusha mootoka. Nkinyi kibaadi mukite pabitale uno mwanda? Amba’shi: “Nadi natekye ngofu efuku dyoso. Nalongo mitwe ya myanda pabitale butontshi bwa mbidi na kulamiina bifundwe bya kunkwasha. Sunga napu kukita bino munda mwa bipwa, efuku dyoso kunakashika, natentekyeshaa’shi abitungu nkite mwande moso bwa kwikala mumiine. Nadi nabuku namashika bwee bwa kwenda ku mbalo yabantengyela.”

Ingi nsaa atukutwa butontshi bwa mbidi. Yaya nsaa twi kupusha buufu bwa kwifubwila peepi na Yehowa mu luteko. Aku namu ino nyi nsaa ayitungu’shi tutekye ngofu. Byabya teka Yehowa kushii kunyengakana. Mutekye lusa, teka bukwashi bwaye na wate kitshibilo kya kupela kukita dingi wawa mulwisho. (Mis. 51:9-11) Topwandikishanga’shi Yehowa tateemesha luteko lobe lodi mwele n’eshimba dimune bwa’shi akufwile lusa. (Mis. 102:18) Yowano mutumiibwa etutentekyesha’shi mase a mwan’Efile Mukulu “aetutoosha ku bubi booso.” (1 Yo. 1:7; 2:1, Kilombeeno kipya 2014; Mis. 86:5) Tentekyesha’shi Yehowa kwete kulungula bafubi baye bwabadya kwifwilena lusa misusa yoso. Byabya, shinkamisha’shi Yehowa akitshi namu nka byabya bwetu.​—Mat. 18:21, 22; Kol. 3:13.

Yehowa tabaadi musankye nsaa ibaadi Moyiise mukutwe butontshi bwa mbidi mu kabaka. Sunga mbyabya, baadi mumufwile lusa. Na Eyi dy’Efile Mukulu adilesha’shi Moyiise baadi muntu sha lukumino lwi bukopo atudya kwambula. (Miy. 34:10; Eb. 11:24-28) Yehowa tabaadi mutadiile Moyiise bwa’shi atwele mu Nsenga ya mulayilo nya, kadi amutadila bwadya kwikala na muwa mu Mpaladiso na kumupa lukulupilo lwa kwikala na muwa wa looso. Twi balombene n’atwe namu kukulupila muwa wa ikalaika su twatungunuka na kulesha dino eyikashi di na muulo, dya butontshi bwa mbidi.​—1 Kod. 9:25.