1-2. Myanda kinyi i na muulo ukata kwi ba Temwe ba Yehowa?

MYANDA ina muulo lelo uno bwetu​—nyi Mbufumu na kutumbisha eshina dy’Efile Mukulu. Atwe ba Temwe ba Yehowa, twi bafule kwisambila ino myanda i na muulo ngofu. Byabya, bukunkushi bwa Yehowa na kwikasha eshina dyaye bu dya kishila​—nta myanda ibidi ilekene nya.

² Bibuwa oso a kwatudi aukye’shi abitungu kutumbisha eshina dy’Efile Mukulu. Twi balongye dingi’shi abitungu kulesha’shi Bufumu bwa Yehowa sunga mushindo waye wa kumunana, nyi ukile buwa. Ino myanda yooso i na muulo ukata.

3. Eshina dya Yehowa nditale myanda kinyi?

³ Eshina Yehowa nditale myanda yoso y’Efile Mukulu etu, mpa na mushindo waye wa kumunana. Byabya su atulesha’shi kukalwila eshina dya Yehowa tala bedisabuula nyi mwanda wi na muulo, yaaya nsaa tukwete kulesha dingi’shi kumunana kwa Yehowa kwibuwa bukile. Eshina dya Yehowa di mu kwipushena kukata na mushindo wa kwete kukunkusha bu Nfumu sha bukome booso.​—Tala kashibo akamba’shi: “ Myanda itale uno mwanda ukata.”

4. Mukanda wa Misambo 135:13 awakula naminyi pabitale eshina dy’Efile Mukulu, na nkonko kinyi yatukyebe kwaluula mu uno mwisambo?

⁴ Eshina Yehowa ndilekene na angi ooso. (Badika Misambo 135:13.) Bwakinyi eshina dy’Efile Mukulu di na muulo ukata? Mushindo kinyi wa kumpala ubaabadi balwishe nkumo yadyo? Mushindo kinyi awiditumbishaa Efile Mukulu? Na mushindo kinyi  watudya kukwasha mu kukalwila kw’eshina dyaaye? Tubandeyi kwalula ku ino nkonko.

5. Twi balombene kwiyipusha naminyi pabitale kutumbisha eshina dy’Efile Mukulu?

⁵ “Eshina dyoobe dyende ntumbo.” (Mat. 6:9) Nyi mwanda ubaadi Yesu mutemune kumpala mu luteko. Kadi mayi a Yesu aalesha kinyi? Kutumbisha kintu kampanda akulesha kukita bya’shi tabekisabuulanga. Bangi mbalombene kwiyipusha’shi, ‘eshina dya Yehowa di na muulo kukila angi mashina oso su?’ Bwa kupeta lwalulo, bibuwa tutale akipatuulaa eshina.

6. Nkinyi akikashaa eshina na muulo?

⁶ Eshina ta mpenda mwaku wa kufunda kwisaki sunga kuteemuna nya. Pusha abyamba Bible: “Nkumo [eshina NWT] ibuuwa ngikile buupeta ku muulo.” (Nki. 22:1; Mul. 7:1) Bwakinyi eshina di na muulo wi byabya? Pa mwanda nditale nkumo, mushindo aupwandikisha bangi pabitale yawa e na dyadya eshina. Byabya, nkumo y’eshina ntangitale mushindo wabedifundu​—sunga wabedibadika nya, ngitale mushindo aunangushena bantu nsaa yabamono sunga kupusha dyadya eshina.

7. Mushindo kinyi ubaabadi balwishe nkumo y’Eshina dy’Efile Mukulu?

⁷ Nsaa i bantu abadimbiila Yehowa, abalwisha nkumo yaaye. Nsaa yabalwisha nkumo yaaye, abakimbi bya kulwisha eshina dyaaye. Musango wa kumpala ubaabadi bakule myanda ya madimi pabitale Efile Mukulu na kutakula bantu mu kumwelela binangu bibubi nyi mu lupango lwa Edene. Banda kutala akitulongyesha uno mwanda.

8. Adame na Eeva babaadi abauku kinyi, na twi kwiyipusha nkonko kinyi?

⁸ Adame na Eeva abaadi abauku eshina dya Yehowa, abaadi abauku mpa na ingi myanda i na muulo imutale. Abaadi abamwiuku bu Mupangi, Yawa mwibape muwa, Mpaladiso mbalo yabo ya kushaala, na mwina dibaka mupwidikye. (Kib. 1:26-28; 2:18) Abaadi batungunukye na kunangushena pabitale bintu byoso bibaadi Yehowa mwibakitshine su? Babaadi batungunukye na kunyingisha kifulo na lutumbu lwabo bwa Muntu sha dyadya eshina su? Bibaadi bimwenekye kalolo nsaa ibaabadi bebatompe kwi mwishikwanyi.

9. Muyile Kibangilo 2:16, 17 na 3:1-5, nkinyi kibaadi Yehowa mulungule Adame na Eeva, na Satana baadi mutopekye bya binyibinyi naminyi?

 ⁹ Badika Kibangilo 2:16, 17 na 3:1-5. Pabakitshine bwa’shi bimwenekye bu nyoka kwete kwakula, Satana bayipwishe Eeva’shi: “Eyendo, Efile mwinulungule’shi: ‘tanudyanga bikuba bya ku mitshi yooso ii mu lupango?’” Mu lwalwa lukonko mubadi mufwame madimi pabitale Efile Mukulu, na Eeva babangile kwelela Efile Mukulu binangu bibubi. Efile baadi mwibalungule’shi mbalombeene kudya bikuba bya mitshi ibungi, kukaasha penda mutshi umune. Adame na Eeva babaadi balombene kudya bidibwa bya ku mitshi ilekene. (Kib. 2:9) Eyendo’shi Yehowa nsha kalolo. Anka, Efile Mukulu baadi mutoshe Adame na Eeva bwa’shi tabadyanga penda mutshi umune. Byabya, lukonko lwa Satana lubaadi alutopeka bya binyibinyi. Satana baadi akyebe kulesha’shi Efile Mukulu ta nsha kalolo. Eeva baadi pangi mwiyipushe’shi, ‘Efile mwitufwamishe kintu kibuwa su?’

10. Mushindo kinyi ubaadi Satana mulwishe nkumo y’eshina dy’Efile Mukulu, na mbitushe bipeta kinyi?

¹⁰ Yaya nsaa, Eeva badi nka akookyela Yehowa. Balungwile Satana bibaabadi bebalungule kwi Efile Mukulu. Bakumbeshe mpa na’shi ta mbalombene su nkwiukuma. Badi auku elango dy’Efile Mukulu dya’shi kupela kwa kukookyela akwibafwishila lufu. Anka Satana balulwile’shi: “Nya, taanufu’nwe.” (Kib. 3:2-4) Satana tabaadi penda akula’shi Yehowa mmudimbe nya. Baadi dingi asabuula eshina dy’Efile Mukulu, na kulungula Eeva shi Yehowa nsha madimi. Paapa Satana nkufika bu diabulu, sunga sha madimi. Eeva baadi mudimbibwe; aye nkukumiina bibaadi bimulungule Satana. (1 Tim. 2:14) Aye kukulupila Satana kukila Yehowa. Bino bibadi bifwishe Eeva mu kwata kitshibilo kikile bubi. Batshile kitshibilo kya kupela kukookyela Yehowa. Aye nkudya kikuba kibaabadi bamutoshe kwi Yehowa. Kunyima bapeele Adame kipese kibashadile.​—Kib. 3:6.

11. Baledi betu ba kumpala babadya kukita kinyi, kadi abakutshilwe kukita kinyi?

¹¹ Banda kunangushena bibaadi bilombene Eeva kulungula Satana. Pwandikisha’shi bamulungwile bino: “Ntankwiuku’mi, anka nauku Nshami, Yehowa, ne mumufule na kumukulupila. Mmupwe kwitupa bintu byooso. Bwakinyi ofiki mu kumwamba bibubi kwandi? Katuka paapa!” Yehowa badi mulombene kupusha muloo ukata pa kupusha aa mayi a mwan’aaye mukashi sha lulamato! (Nki. 27:11) Anka Eeva tabaadi na kifulo ki na lulamato kwi Yehowa nya; mpa na Adame dingi. Kukutwa kwa kifulo ki byabya bwa Nshaabo, Adame na Eeva babakutshilwe kukalwila eshina dyaaye kwi muntu edisabuula.

12. Mushindo kinyi ubadi Satana mutweshe mpaka mu binangu bya Eeva, na Adame na Eeva abakutshilwe kukita kinyi?

¹² Anka bu byatwibimonanga, Satana babangile kutwesha mpaka mu binangu bya Eeva. Bamutakwile mu kubanga kutopeka Yawa sh’eshina  dya bu Yehowa. Adame na Eeva abakutshilwe kukalwila eshina dya Yehowa na nkumo yaaye. Babaadi batadiile Satana ebatakula mu kutombokyela Nshaabo. Satana kwete kufuba na ano mayele lelo uno. Alu n’eshina dya Yehowa pa kulwisha nkumo yadyo. Bantu abakumina madimi a Satana, mbibofule bwa’shi bebatakule mu kupela bukunkushi bwibuwa bwa Yehowa.

13. Mushindo kinyi wi mukanda wa Esekyele 36:23 aushimika kasele pa mukandu ukata wi mu Bible?

¹³ Yehowa atadilaa ano madimi kushi kukita kintu kampanda su? Nya! Myanda i mu Bible mushima ngimene pa mushindo ukite Yehowa bwa kulesha’shi myanda ibubi ibaabadi bamwambe mu lupango lwa Edene ta ngya binyibinyi. (Kib. 3:15) Byabya twi balombene kulesha mukandu oso wi mu Bible mu kikoso: Yehowa atumbisha eshina dyaaye ku bukwashi bwa Bufumu bw’abakunkusha kwi Mwana aaye na kwalusha kululama na kufukama pa nsenga. Mu Bible mwi myanda ayitukwasha bwa kupusha mushindo aukalombasha Yehowa kutumbisha kw’eshina dyaaye.​—Badika Esekyele 36:23.

14. Yehowa mmukite naminyi kwitombo dya mu Edene bwa kutumbisha eshina dyaaye?

¹⁴ Satana mukite mwaye mooso bwa kwimika kulombana kwa mpàngo ya Yehowa. Anka ta moobeshe nya. Myanda i mu Bible ayilesha bibadi bikite Yehowa na kulesha’shi, takwi muntu e bi Yehowa Efile Mukulu. Eyendo, etombo dya Satana na boso be ku lupese lwaye ndinyongoshe Yehowa ngofu. (Mis. 78:40) Byabya, kwete kupudisha uno mwanda na binangu, na lwishinko, na kululama. Mmuleshe bukome bwaye bukile booso mu mishindo ikile bungi. Kifulo kyaaye nkimwenekye mu byoso byakwete kukita. (1 Yo. 4:8) Yehowa ta mukookye kutumbisha eshina dyaaye nya.

15. Mushindo kinyi ukwete Satana kusabuula eshina dy’Efile Mukulu lelo uno, na mbipeta kinyi abituku?

¹⁵ Satana kwete kutungunuka na kusabuula eshina dy’Efile Mukulu lelo uno. Atakula bantu mu kwelesha mpaka’shi Efile Mukulu te na bukome, ta mululame, te na binangu, na’shi te  na kifulo. Kileshesho, Satana kwete kutompa kushinkamiisha bantu’shi Yehowa ta Mupangi. Na su bantu abakumina’shi Efile Mukulu e kwanka, Satana atompo kwibatakula mu kukumina’shi Efile Mukulu na miiya Yaaye ibukopo na tayibuwa. Alongyesha mpa na bantu’shi Yehowa e na eshimba dibubi na’shi Efile Mukulu ntomboshi elaa bantu mwishiba dya kaalo. Nsaa yabakumiina aa madimi, be nka bu abakitshi kintu kya kabidi​—kupela kukumina bukunkushi bululame bwa Yehowa. Bu byabashi babande kubutala Satana, atungunuka nka na kupalakasha madimi aaye bwa’shi olekye kufubila Yehowa. Oobesha su?

16. Nkinyi kyodya kukita kibaadi kikutwe kukita Adame na Eeva?

¹⁶ Yehowa mupe bantu bakutwe kupwidika mushindo wa kutumbisha eshina dyaaye. Byabya, we mukumbene kukita kyakya kibakutshilwe kukita Adame na Eeva. Sunga wekala mu nsenga iwule bantu abadimbiila na kusabuula eshina dya Yehowa, we na mushindo wa kukalwila eshina dya Yehowa na kulungula bantu’shi​—Yehowa eselele, mululame, ebuwa na nsha kifulo. (Yesh. 29:23) We mulombene kulesha’shi okwete kukwatshishena bukunkushi bwaye. We mulombene kukwasha bantu bwabadya kuuka’shi nka penda Yehowa nyi mululame na’shi akafwisha butaale na muloo kwi bipangwa byooso.​—Mis. 37:9, 37; 146:5, 6, 10.

17. Yesu baadi muukishe eshina dya Nshaaye naminyi?

¹⁷ Nsaa y’atukalwila eshina dy’Efile Mukulu, atwambula kileshesho kya Yesu Kidishitu. (Yo. 17:26) Yesu tabaadi penda aukisha eshina dya Nshaye nya, baadi dingi akalwila nkumo yadyo. Bu kileshesho, batopekyele Bafadisee, babaadi abakimbi kulesha mu mishindo ibungi’shi Yehowa e na myanda ibukopo, e kula, na’shi te na lusa. Yesu badi mukwashe bantu bwabadya kumona Nshaye bu sha binangu bibuwa, lwishinko, kifulo na afwilaa bantu lusa. Baadi mukwashe dingi bantu bwabadya kushinguula bi Yehowa mu mushindo ubaadi mwambule ngikashi ya Nshaaye mu nshalelo aaye a kwifuku n’efuku mu kipaso kipwidikye.​—Yo. 14:9.

18. Mushindo kinyi watudya kulesha’shi mmyanda ibubi yabakula pabitale Yehowa nta ngya binyibinyi?

¹⁸ Anka bu Yesu, twi balombene kulungula bantu pabitale Yehowa, kulongyesha bantu’shi Efile Mukulu nsha kifulo na kalolo. Nsaa y’atukitshi  byabya, atukalwila Yehowa ku madimi ooso abamudimbiila. Atutumbisha eshina dya Yehowa, kwidiikasha diselele mu binangu na mu mashimba a bantu. Twi balombene kwambula Yehowa. Bino mbilombene kukitshika sunga twekala bakutwe kupwidika. (Ef. 5:1, 2) Nsaa i bishima na bikitshino byetu abilesha bantu bi Yehowa binyibinyi, atukwasha mu kutumbisha kw’eshina dyaye. Atukalwila dyadya eshina pa kukwasha bantu bwabadya kuuka bya binyibinyi pabitale Efile Mukulu. Atulesha dingi’shi bantu bakutwe kupwidika mbalombene kulama lulamato.​—Yob. 27:5.

19. Yeeshaya 63:7 etukwasha naminyi bwa kuuka kepatshila ka malongyesha eetu?

¹⁹ Kwi kingi kintu kyatudi balombene kukita bwa kutumbisha eshina dy’Efile Mukulu. Nsaa yatulongyesha bangi bya binyibinyi bya mu Bible, atushimikaa kasele pa bukunkushi bw’Efile Mukulu, atwamba’shi Yehowa e na matalwa a kukunkusha eyilu na nsenga, na bino mbya binyi. Anka, bu byabidi’shi abitungu tulongyeshe bantu miiya y’Efile Mukulu, kepatshila ketu kakata nka kwibakwasha bwa kufula Yehowa nshetu e mwiyilu, na kumulamata. Abitungu dingi twibalongyeshe ngikashi yaye ikata, na kushimika kasele pa kulesha’shi eshina Yehowa adilesha Kyadi. (Badika Yeeshaya 63:7.) Su twalongyesha byabya, atukwasha bangi bwabadya kufula Yehowa na kumukokyela mwanda abakumiina kumulamata.

20. Nkinyi kyatukalongo mu mwisambo aulondo?

²⁰ Kadi mbikunyi byatudya kwikala bashinkamishe’shi, mwikelo wetu na kipaso kyetu kya kulongyesha akikwasha bangi bwabadya kwikala na mweneno ebuwa pabitale Yehowa na kwifubwila naye peepi? Mwisambo aulondo awaluula ku luno lukonko.