MWISAMBO WA KULONGA 25
“Naafiki mu kukimba’mi nabeene kisaka kyande kya nyema”
“Naafiki mu kukimba’mi nabeene kisaka kyande kya nyema, bwa kwikibamba.”—Es. 34:11.
LOONO 105 “Efile Mukulu nyi nkifulo”
KYABAKWILA MWANKA *
1. Bwakinyi Yehowa epwandjikisha bu nyina mwana?
“NYINA mwana mmulombêne ailwankana mwan’ê akyomesha su?” Luno lukonko, Yehowa baadi mwilwele mu mafuku a mutemuki Yeeshaya. Efile Mukulu balungwile mwilo waye’shi: “Sunga nambutwile ailwa mwan’ê, ami tankenwila, ooo.” (Yesh. 49:15, EEM) Yehowa takambaa kwipwandjikisha na nyina mwana nya. Anka pano mwibikite. Yehowa mmupwandjikishe byapusha bwa bafubi baye na kifulo kibukopo ki pankatshi pa nyina mwana na mwan’aye, mwanda akumiina’shi bafubi baye baukye’shi mmwibafule ngofu. Ba nyina bana bebungi abapushaa nka bu uno mukwetu mukashi abetaminaa bu Jasmin, amba’shi: “Nsaa yomesha mwan’obe, onyingisha kifulo akishala bwa looso.”
2. Yehowa apusha naminyi nsaa ayilekye umune a ku bana baye kumufubila?
2 Yehowa auuka nsaa ayilekye umune a ku bafubi baye kutwela mu bisangilo na kukita mudimo wa bulungudi. Apushaa bibubi ngofu p’akumona binunu bya bafubi baye bash’abafubu dingi na kutwela mu bisangilo * ku kipwa kyoso.
3. Yehowa akumiina kinyi?
3 Bebungi ba ku bano bakwetu balume na bakashi bash’abafubu dingi na kutwela mu bisangilo mbaalukye mu kakongye, na atwikalaa na muloo ngofu wa kwibamona! Yehowa akumiina’shi baalukye, mpa n’atwe naamu. (1 Mp. 2:25) Twi kwibakwasha naminyi bwabadya kwaluukila? Bwa kwaluula luno lukonko, bibuwa tuukye bwakinyi bangi mbalekye kutwela mu bisangilo na kulungula mukandu wibuwa.
BWAKINYI BANGI BALUNGUDI ABEMIKAA KUFUBILA YEHOWA?
4. Nkinyi kikitshikile bangi mwanda wa midimo yabo?
4 Bangi mbepane ngofu mu mudimo wa ku mbidi. Hung, * ungi mukwetu e mu Asie amba’shi: “Nemukishe nsaa ibungi na bukome mu mudimo wa ku mbidi. Naadi mukutwe kinangu p’ami kupwandjikisha’shi su nekala na makuta ebungi, nafubila Yehowa kalolo. Nyi bwakinyi naadi nakisha nsaa ibungi ku mudimo. Nabangile kupisha bisangilo mpa na binalekyele kwimutwela. Abimweka’shi Satana kwete kufubisha nsenga bwa kukumba binangu bya bafubi b’Efile Mukulu kapela-kapela mpa na byabalekye kufubila Yehowa.”
5. Mukwetu mukashi baadi mukite kinyi pabaadi mupete myanda ibungi?
5 Bangi bakwetu balume na bakashi mbapete myanda ibungi ibabofushe ku mashimba. Anne a mu Angleterre e na bana batano amba’shi: “Umune a ku bana bande baadi mutandjikye na kilema. Kunyima kwa mafuku, ungi mwan’ande mukashi baadi mutushiibwe mu kakongye, ungi mwan’ande nkukumba maladi a mu binangu. Naadi mwinyongole ngofu, ami nkuleka kutwela mu bisangilo na kulungula mukandu wibuwa.” Twi bafule Anne na kifuko kyaye nka bu byatudi bafule baba boso bakwete kupeta nkalakashi ibu y’abo.
6. Bwakinyi kupela kutumikila mayi e mu Beena-Kolose 3:13 nkulekyeshe bangi kutwela mu bisangilo?
6 Badika Beena-Kolose 3:13. Bangi bafubi ba Yehowa mbafite munda mwanda wa bibakitshine ungi mwina Kidishitu. Mpoolo mutumiibwa baadi auuku’shi ingi nsaa twi kwikala na ‘kabingilo ka kwidila pabitale bibabetukitshina’ kwi mukwetu mulume sunga mukashi. Mbalombene kwitukitshina myanda kushi kululama. Byabya, su tatwi badimukye twi kwibafitshila munda. Nsaa i muntu na nsungu, mmulombene kuleka kutwela mu bisangilo. Tala kileshesho kya Pablo, mukwetu mulume a mu Amérique du sud. Abaadi bamudimbile’shi bakitshi kintu ki bubi, pa mwanda wa byabya, Pablo baadi mushimishe mashito mu kakongye. Baadi mukite kinyi? Amba’shi: “Naadi mufite munda ngofu, kapela-kapela ami nkuleka kutwela mu bisangilo.”
7. Nkinyi kilombene kukitshikila muntu kwete kwinyongola bwa mulwisho wadi mukite?
7 Su muntu baadi mukite mulwisho ukata, mmulombene kwikalakasha pa kupwandjikisha’shi te na muulo ku meeso kw’Efile Mukulu. Sunga baadi mwilangye bamufwila lusa, mulombene kwimona bu shii na muulo wa kwikala umune a ku bafubi b’Efile Mukulu. Ungi mukwetu abetaminaa bu Francisco baadi mupushe nka bino. Amba’shi: “Abaadi bansashile mu kakongye mwanda naadi mutambukye lusandji. Sunga binaadi natungunuka nakutwela mu bisangilo, naadi nenyongola bikata na kwimona bu shii na muulo munkatshi mwa bafubi ba Yehowa. Kondo kande k’eshimba kabaadi akankalakasha, na ami nkumona’shi Yehowa ta munfwile lusa. Mwenda mafuku, nalekyele kulungula mukandu wibuwa na kutwela mu bisangilo.” Opushaa naminyi pabitale bakwetu balume na bakashi bakwete kupeta nkalakashi ibatupu kwisambila? We kwitula pa mbalo yabo su? Bikishekishe Yehowa, apushaa naminyi bw’abo?
YEHOWA MMUFULE MIKOOKO YAYE
Mulami a mikooko a mu Isalele baadi apasukila ngofu mukooko upambukye (Tala kikoso 8-9) *
8. Yehowa, ekuluba baba boso bamufubile su? Patuula.
8 Yehowa tayilwankana baaba boso bamufubile kadi babande kwimika kutwela mu bisangilo na mwilo waye nya, sunga kuluba mudimo wabadi bamukitshine. (Eb. 6:10) Mutemuki Yeeshaya mufunde kileshesho ki buwa akilesha mushindo aupasukilaa Yehowa mwilo waye. Bafundjile’shi: “Ee buu mulami a mikooko adiisha lombe lwaye lwa nyema; eeyibungu na mboko yaaye; atwala twana twa mikooko mu kyaadi kyaaye.” (Yesh. 40:11) Yehowa, Mulami a mikooko Mukata apushaa naminyi nsaa i umune wa ku mikooko yaaye awende kula na lombe? Yesu baadi muleshe byapushaa nsaa ibaadi mwipushe balongi baye’shi: “Anumono naminyi? Su muntu ee na mikooko lukama, dingi su umune wa ku yanka wapambuka, taakalekye ingi makumi kitema na kitema mu mwengye, bwa kwenda mu kukimba wawa upambukye su? Byabya, su akeusangana, eyendo neenushikwila’shi eeusangeela kukila yaaya makumi kitema na kitema ishii-ipambukye.”—Mat. 18:12, 13.
9. Mu mafuku a kala, mulami e buwa baadi akitshina nyema yaye myanda naminyi? (Tala kifwatulo kya ku kipusu.)
9 Bwakinyi atupwandjikisha Yehowa na mulami a mikooko? Mwanda mu mafuku a kala, mulami baadi apasukila mikooko yaye ngofu. Bu kileshesho, Daavide baadi mulwe na ntambwe na kimuungu bwa kukalwila lombe lwaye. (1 Sam. 17:34, 35) Mulami ebuwa baadi auku apashimina sunga mukooko umune. (Yo. 10:3, 14) Yawa mulami sha kalolo, baadi alekye mikooko 99 mu kikutu ki buwa sunga kwiyilekyela ungi mulami mulombene kwiyipasukila bwa kwenda mu kukimba wawa ushimine. Yesu baadi mufubishe kino kileshesho bwa kulongyesha mwanda wi na muulo: ‘Nshami e mwiyilu t’akumînâ’shi sunga ngumune a ku bano be bu bâna bakinga ashimine, ooo.—Mat. 18:14, EEM.
Mulami a mikooko a mu Isaleele a kala kwete kupasukila mukooko awikalanga ushimine (Tala kikoso 9)
YEHOWA AKIMBI MIKOOKO YAAYE
10. Muyile Esekyele 34:11-16, Yehowa mmulee bwa kukita kinyi bwa mikooko yaye ishimine?
10 Yehowa mufule oso akwatudi, mpa na bano be bu “bâna bakinga” bende kula na lombe. Ku bukwashi bwa mutemuki Esekyele, Efile Mukulu baadi mulee’shi akakimbi mikooko yaye ishimine na kwiyikwasha bwayidya kupetuula kipwano kyayo n’aye. Na baadi muleshe myanda yakitshi imumune na ibaadi ayikitshi mulami mwina Isaleele nsaa ibaadi ayishimina mukooko. (Badika Esekyele 34:11-16.) Wa kumpala, mulami baadi ende mu kukimba mukooko. Bino bibaadi abimutekye nsaa na bukome bwibungi. Wa kabidi, su beumono, aluka nao mu kikutu. Wa kasatu, su ngutapikye sunga’shi wi na nsala, na kifulo kyoso, mulami aanya p’elonda na kwiudiisha. Abitungu bakulu, balami ba “mikooko y’Efile Mukulu,” bakite nka bino bwa kukwasha baba boso balekye kutwela mu bisangilo. (1 Mp. 5:2, 3) Bakulu bende mu kwibakimba, bebakwashe bwa kwalukiila mu kakongye, na bebaleshe kifulo pa kwibakwasha bwabadya kwalusha bu kuuku bw’abo na Yehowa. *
11. Mulami ebuwa baadi auku kinyi?
11 Mulami ebuwa atundula’shi, mukooko ubashimina. Na su mukooko ubakatuka munkatshi mwa ikwabo, mulami tabaadi eunyooko nya. Tala kileshesho kitulekyele Yehowa nsaa ibaadi mukwashe bangi ba kubafubi baye bashibaadi bakite bibaadi mwibatekye bwa kukita.
12. Yehowa baadi mukitshine Yoona myanda naminyi?
12 Mutemuki Yoona baadi mupele kwenda ku Ninive kubaadi Yehowa mumutume. Sunga mbyabya, Yehowa tabaadi mumusumbushene nya. Nka bu mulami ebuwa, Yehowa baadi mukwashe Yoona na kumupa bukome bubaadi nabo lukalo bwa kulombasha mudimo waye. (Yon. 2:7; 3:1, 2) Kunyima, Yehowa baadi mufubishe mulundo bwa kumupushiisha kalolo muulo winao muntu oso yawa. (Yon. 4:10, 11) Bino abitulongyesha kinyi? Tabitungu’shi bakulu basumbushene bukidi-bukidi baba boso balekye kulungula mukandu wibuwa na kutwela mu bisangilo nya. Anka, bibuwa baukye bwakinyi mukooko ngulekye kufubila Yehowa. Nsaa y’awaluka kwi Yehowa, bakulu abatugunuka na kwiulesha kifulo na kwiupasukila.
13. Bibakitshine Yehowa pabitale mweneno a mufundji a Misambo 73 abitulongyesha kinyi?
13 Mufundji a Misambo 73, baadi mubofule kwishimba nsaa ibaadi mumone’shi myanda ya bantu babi ikwete kwenda kumpala. Baadi mwiyipushe su kufubila Efile Mukulu kwi na muulo. (Mis. 73:12, 13, 16) Yehowa bakitshine naminyi? Tabaadi mumutopekye nya. Anka, Efile Mukulu baadi mufundjishe mayi aaye mu Bible. Mufundji a misambo, bamwene’shi kwikala mu kipwano kibuwa na Yehowa kwi na muulo ukata kukila kingi kintu kyooso, akwikasha muwa na muulo. (Mis. 73:23, 24, 26, 28) Bino abitulongyesha kinyi? Tabitungu’shi bakulu bekale na bukidi bwa kutopeka baaba abeyipusha su kufubila Yehowa kwi na muulo. Pamutwe pa kwibatopeka, bakulu abitungu betatshishe bwa kupusha bwakinyi abakula na kukita byabya. Kukita byabya akwibakwasha bwabadya kuuka Kifundwe kyabadi balombene kunyingisha nakyo yawa muntu.
14. Bwakinyi Eliya badi na lukalo lwa bukwashi, na mushindo kinyi ubadi Yehowa mumupe bwanka?
14 Mutemuki Eliya basukile Ndalamumba Yesabele. (1 Bf. 19:1-3) Baadi mupwandjikishe’shi takubaadi kushaale muntu su ngumune afubila Yehowa bu mutemuki nya, na aye nkupwandjikisha’shi mudimo waaye ngwa bisumanga. Eliya badi mukalakashwe, aye nkuteka mpa na lufu. (1 Bf. 19:4, 10) Pamutwe pa kutopeka Eliya, Yehowa baadi mumushinkamiishe’shi te bupenka nya, na’shi abitungu atuule lukulupilo lwaye mu bukome bw’Efile Mukulu, na kumulesha dingi’shi kukii mudimo wibungi wadya kukita. Yehowa baadi muteemeshe binangu bya Eliya na kalolo kooso aye nkumupa midimo ipya. (1 Bf. 19:11-16, 18) Bino abitulongyesha kinyi? Atwe booso, bikishekishe bakulu, abitungu bekale abakitshina mikooko myanda na kalolo kooso. Su muntu akula myanda ibubi sunga kwipusha bu abashii balombene kufwila lusa kwi Yehowa, bakulu abamuteemesha nsaa yakwete kwakula byoso bi mwishimba dyaaye. Akupu abakimbi bya kushinkamiisha mukooko ushimine’shi wi na muulo ku meso a Yehowa.
TWI KUPUSHA NAMINYI BWA MIKOOKO Y’EFILE MUKULU ISHIMINE?
15. Muyile Yowano 6:39, Yesu badi apusha naminyi pabitale mikooko ya Nshaaye?
15 Yehowa akumiina’shi tupushe naminyi pabitale mikooko yaaye ishimine? Yesu mwitulekyele kileshesho kibuwa. Baadi auku’shi mikooko ya Yehowa yoso i na muulo ku meso kwaye, byabya Yesu baadi etatshisha bwa kukwasha “mikooko ishimine ya mu nshibo ya Isalele” bwa’shi yalukiile kwi Yehowa. (Mat. 15:24; Luk. 19:9, 10) Bu byadi mulami a mikooko ebuwa, Yesu baadi akitshi mwaye mooso bwa kupela kushimisha mikooko ya Yehowa.—Badika Yowano 6:39.
16-17. Abitungu’shi bakulu bapushe naminyi pabitale kukwasha baaba bapambukye? (Tala kashibo akamba’shi: “ Mushindo awipushaa mukooko ushimine.”)
16 Mpoolo mutumibwa baadi munyingishe bakulu ba mu kakongye ka Efeso bwa kwambula kileshesho kya Yesu. ‘Abitungu nukwashe babofule, na kutentekyesha mayi a Nfumu Yesu, aye nabene bambile’shi: Muloo wa kupaana ngukile wa kupebwa.’ (Bik. 20:17, 35) Abipushika kalolo’shi, lelo uno bakulu be na bushito bukata pabitale uno mwanda. Salvador, mungi mukulu a mu Espagne amba’shi: “Nsaa yanangushena pabitale mushindo aupasukilaa Yehowa mikooko yaaye ishimine, nepusha’shi abitungu nkite mwande mooso bwa kwiyikwasha. Bu byandi mulami a mu kikudi, nashinkamisha’shi Yehowa akumina’shi nneyikwashe.”
17 Booso babadi batemune mu uno mwisambo babaadi balekye kulungula mukandu wibuwa na kutwela mu bisangilo mbebakwashe bwa kwalukiila kwi Yehowa. Bwa binobino, bebungi ba kwabadi be na lukalo lwa kwalukiila. Mu mwisambo aulondo atukataluula myanda yatudya kukita bwa kwibakwasha balukiile kwi Yehowa.
LOONO 139 Emone mu nsenga ipya
^ par. 5 Bwakinyi bantu bafubile Yehowa na lulamato loso munda mwa bipwa mbalekye kumufubila? Yehowa apusha naminyi bw’abo? Uno mwisambo awaluula ku ino nkonko. Awisambila dingi mushindo watudya kulongyela ku bibaadi Yehowa mukwashe bangi abaadi balekye ku mufubila mu mafuku a kala.
^ par. 2 KISHIMA KYABADI BAPATUULE: Mulungudi sh’afubaa dingi na mulekye kutwela mu bisangilo nyi mulungudi taadi myeshi isamombo sunga ikile paapa kushii kutusha rapore yaye ya mudimo wa bulungudi na kutwela mu bisangilo. Sunga byabya, mulungudi sh’afubu dingi na kutwela mu bisangilo, ki nka mukwetu mulume sunga mukwetu mukashi, na twibamufule ngofu.
^ par. 4 Amo mashina mbeashintuule.
^ par. 10 Mwisambo aulondo aupatuula mushindo ulombene bakulu kulonda ino myanda isatu.
^ par. 60 BI MU KIFWATULO: Nsaa yadi mukalakashwe pabitale mukooko ushimine, mulami a mikooko a mu Isaleele baadi na kya kwenda mu nkeukimba bwa kwiwalusha mu loombe lwa mikooko. Balami ba mu kikudi lelo uno bakwete kukita nka byabya.
^ par. 64 BI MU KIFWATULO: Nsaa i mukwetu mukashi mupwe kuleka kulungula na kutwela mu bisangilo atengyela bwashi motoka ubangye lwendo, bamono ba Temwe babidi abakitshi bulungudi bwa pa mbalo i bantu be bungi na muloo oso.
