1-2. Bu byabadi bebileshe mu Bikitshino 8:27-31, 35-38, nkinyi kibaadi kitakule mutungulwe mwina Etshopii bwa kubatshishibwa?

OKUMIINA kubatshishibwa bwa kwikala mulongi a Kidishitu su? Kifulo na lutumbu mbitakule bantu bebungi bwa kwata kyakya kitshibilo. Tubandeyi kutaluula kileshesho kya mwina mudimo a ndalamumba a mu Etshopii.

² Yawa mwina Etshopii batshile kitshibilo kya kubatshishibwa nka mususa umune kunyima kw’aye kulonga Bifundwe. (Badika Bikitshino 8:27-31, 35-38.) Nkinyi kibaadi kimutakule? Baadi na lutumbu bw’Eyi dy’Efile Mukulu; baadi abadika kifundwe kya mu mukanda wa Yeeshaya, pabaadi ende mmukaamine ku etempo. Na nsaa ibaadi Fidipe mwisambe naye, uno muntu baadi na lutumbu bwa bibaadi Yesu mumukitshine. Kadi, bwakinyi yawa mwina Etshopii bayile ku Yeelusaleme? Mwanda baadi mufule Yehowa. Bwakinyi atwamba byabya? Mwanda bayile mu kulangwila Yehowa ku Yeelusaleme. Pangi uno muntu baadi mulekye kipwilo kyaye kya ku butandwa, bwa kwibunga na mwilo ubaadi wilambule kwi Efile Mukulu a binyibinyi. Kyakya kifulo bwa Yehowa nyi kibaadi kimutakule bwa kwata kitshibilo kya kubatshishibwa na kufika bu mulongi a Kidishitu.​—Mat. 28:19.

3. Nkinyi kilombene kukutshishwa muntu bwa kubatshishibwa? (Tala kashibo akamba’shi “ Eshimba dyobe di bu nsenga kinyi?”)

³ Kifulo bwa Yehowa nkilombene nkutakula bwa kubatshishibwa. Kifulo nkilombene dingi nkukutshishwa kubatshishibwa. Mu mushindo kinyi? Banda kutala ndambo ya bileshesho.  We kwikala mufule kifuko kyenu na ba kuuku bobe bashi ba Temwe bikile, na we kubanga kwialashena’shi su obatshishibwa, abakushikwa. (Mat. 10:37) Sunga’shi we kwikala na byubishi byouku’shi Efile Mukulu mmwibishikwe, kadi, omono’shi bibukopo bwa kwibileka. (Mis. 97:10) Pangi kubanga ku bukinga bobe, bodi okitshi misangelo ya mu bipwilo bya madimi. We kwikala okyotentekyeshaa myanda ibaadi ayikusankisha mwanka. Pa mwanda wa byabya, we kwibimona bu bi bukopo bwa kuleka yaya misangelo ishayisankisha Yehowa. (1 Kod. 10:20, 21) Lukonko lodya kwiyipusha nduno, “Nkinyi sunga’shi nnanyi andi mufule ngofu?”

4. Nkinyi kya kumpala kilombene nkutakula mu kubatshishibwa?

⁴ We na bintu bibungi bibuwa bya kufula na bya kulesha lutumbu. Bu kileshesho, sunga kumpala kwa kulonga na ba Temwe ba Yehowa, bodi pangi na kanemo kakata bwa Bible. Na bodi mufule Yesu. Binobino, bouku ba Temwe ba Yehowa na okumiina kwibunga nabo. Kadi, t’anka penda byabya nyi bilombene nkutakula mu kukumiina kwilambula kwi Yehowa na kubatshishibwa nya. Kintu kya kumpala kilombene nkutakula mu kubatshishibwa, nyi kifulo bwa Yehowa Efile Mukulu. Su we mufule Yehowa kukila byoso, to kutadiila kintu sunga muntu kampanda bwa’shi akukutshishwe kumufubila. Kifulo bwa Yehowa akikukwasha bwa kubatshishibwa na kushala na lulamato kwadi kunyima kwa kubatshishibwa.

5. Nkinyi kyatukyebe kulonga mu uno mwisambo?

⁵ Yesu bambile shi abitungu tufule Yehowa n’eshimba, muwa, binangu, na bukome bwetu boso. (Mak. 12:30) Mbikunyi byodya kulonga bya kufula na kunemeka Yehowa ngofu? Su twanangushena mushindo witufule Yehowa, bino abitukwasha bwa kumufula namu. (1 Yo. 4:19) Byabya, mu uno mwisambo, okyebe kulonga myanda ayitungu’shi okite bwa kutamisha kifulo ki byabya bwa Yehowa na kubatshishibwa.

6. Muyile Beena-Looma 1:20, mmushindo kinyi umune odya kulonga pabitale Yehowa?

⁶ Longa pabitale Yehowa kukiila ku bipangwa. (Badika Beena-Looma 1:20; Kibaf. 4:11) Banda kunangushena pabitale mitshi na nyema byabadi bapangye kwi Yehowa na kipaso kyabilesha’shi e na binangu. Nangushena ku kipaso kyabadi bapangye mbidi yetu. (Mis. 139:14) Nangushena dingi pabitale bukome bwabadi bele mu nguba kwi Yehowa, aku namu nguba nyi mpenda lumune lwa ku midiyo ya nyenyenyi. * (Yesh. 40:26) Su okita byabya, kanemo kobe bwa Yehowa akatama ngofu. Anka kuuka’shi Yehowa e na binangu na bukome nyi ngimune ya ku myanda ilombene kunyingisha kipwano kyobe naye. Bwa kufula Yehowa ngofu, abitungu oukye myanda ibungi pabimutale.

7. Bwa kunyisha kufula Yehowa ngofu, nkinyi akitungu’shi oshinkamishe?

⁷ Ikala mushinkamishe’shi Yehowa mmukufule. Bi bukopo koodi bwa kushinkamisha’shi, Yehowa mupangi a eyilu na nsenga akwiuku su? Su naabyo, tentekyesha’shi Yehowa “t’e kula na muntu ese yawa, ooo.” (Bik. 17:26-28, EEM) “Atalûlâ mu mashimba oso,” Yehowa akushinkamishaa’shi “su omukimba, omumono.” (1 Mya. 28:9, EEM) Byabya, kabingilo akakutakula bwa kulonga  Bible binobino nka’shi, Yehowa akulungula’shi: “Naakukakila kwandi” (Yel. 31:3) Ponyisha kwikala na lutumbu bwa byoso bikukitshine Yehowa, onyisha kumufula ngofu.

8. Mbikunyi byodya kulesha’shi we na lutumbu bwa kifulo kya Yehowa?

⁸ Mushindo umune odya kulesha’shi we na lutumbu bwa kifulo kya Yehowa mpa kwisamba naye mu luteko. Nsaa yolungula Efile Mukulu myanda yobe na kumutumbula bwa byoso byakwete nkukitshina, kifulo kyobe bwaye akitama. Na nsaa yomono kipaso kyaluula ku nteko yobe, kipwano kyobe naye akinyingi. (Mis. 116:1) Wekala mushinkamishe’shi akuteemeshaa. Kadi bwa kwifubwila peepi na Yehowa, abitungu opushe bi binangu byaye. Abitungu dingi oukye kyakyebe kodi. Kintu kimune kilombene nkukwasha bwa kupeta kyakya kiukilo, nkulonga Bible, Eyi dyaye.

9. Mbikunyi byodya kulesha’shi we na lutumbu bwa Bible?

⁹ Longa bya kwikala na lutumbu bw’Eyi dy’Efile Mukulu, Bible. Nka penda mu Bible nyi mwi bya binyibinyi pabitale Yehowa na mpàngo yaye bobe. Bwa kulesha’shi we na lutumbu bwa Bible, abitungu omubadikye efuku dyoso, welumbuule kumpala kwa kulonga na mulongyeshi oobe na kutumikila myanda yolongo. (Mis. 119:97, 99; Yo. 17:17) We na programe a kwibadikila Bible su? Okwete kulonda yawa programe kalolo, na kushinkamisha’shi okwete kubadika Bible efuku dyoso su?

10. Mwanda kinyi wikashe Bible bu e pabwaye?

¹⁰ Mwanda umune awikasha Bible bu e pabwaye ngwa’shi, mbemulonde miisambo ya bantu abaadi bamone Yesu. Nka penda mu Bible nyi mwabadi bapatuule kalolo kibaadi Yesu mukukitshine. Nsaa yolongo pabitale bibaadi Yesu mwakule na mukite, abikutakula bwa kudya naye bu kuuku.

11. Mbikunyi byodya kulonga bya kufula Yehowa?

¹¹ Longa bya kufula Yesu, paapa kifulo kyobe bwa Yehowa akitama. Bwakinyi? Mwanda Yesu baadi muleshe bi ngikashi ya Nshaye mu  kipaso kipwidikye. (Yo. 14:9) Nsaa yolongo pabitale Yesu, opusha kalolo bi Yehowa na wekala na lutumbu kwadi. Banda kunangushena ku mushindo ubaadi Yesu apusha lusa bwa baaba babaabadi ababepuula​—balanda, basha mikumbo na baaba babofule. Nangushena dingi ku malango akwete nkupa na mushindo ukwete kulumbuluka nshalelo oobe nsaa yweatumikila.​—Mat. 5:1-11; 7:24-27.

12. Nsaa yolongo pabitale Yesu, abikutakula mu kukita kinyi?

¹² Kifulo kyobe bwa Yesu nkilombene kutama nsaa yonangushena ngofu pabitale mulambu ubaadi mutushe bwa kushimisha milwisho yetu. (Mat. 20:28) Nsaa yopusha’shi Yesu bakumiinyine nkufwila, abikutakula bwa kwilanga kwishimba na kuteka Yehowa bwa’shi akufwile lusa. (Bik. 3:19, 20; 1 Yo. 1:9) Su bofulu Yesu na Yehowa, wekala na mushindo wa kwifubwila peepi na baaba bebafule.

13. Yehowa mmukupe kinyi?

¹³ Longa bya kufula kifuko kya Yehowa. Bena kifuko, na ba kuuku bobe bashi ba Temwe tambalombene kupusha bwakinyi okumiina kwilambula kwi Yehowa nya. Be kubanga nkulwisha. Yehowa akupa kifuko kya mu kikudi. Su olamata kyakya kifuko kya mu kikudi, abakufulu na nkukwatshishena. (Mak. 10:29, 30; Eb. 10:24, 25) Pangi, mwenda mafuku, bena kifuko kyobe be kubanga kufubila Yehowa na kutumikila miiya yaye.​—1 Mp. 2:12.

14. Nka bu byabadi bebileshe mu 1 Yowano 5:3, nkinyi kyodi mumone pabitale miiya ya Yehowa?

¹⁴ Longa bya kwikala na lutumbu na kutumikila miiya ya Yehowa. Kumpala k’obe kuuka Yehowa, boodi na yoobe miiya, kadi binobino bomono’shi miiya ya Yehowa nyi ibuwa. (Mis. 1:1-3; badika 1 Yowano 5:3.) Nangushena pabitale malango e mu Bible pabitale balume, bakashi, ba nambutwile na bana. (Ef. 5:22–6:4) Nsaa yokwete kutumikila ano malango, kifuko kyobe nkikale na muloo su? Byubishi byobe mbilumbulukye nsaa yodi mulonde buludiki bwa Yehowa pabitale kusangula ba kuuku kalolo su? We muntu sha muloo su? (Nki. 13:20; 1 Kod. 15:33) Abimweka’shi lwaluulo lwi’shi, oolo.

15. Nkinyi kilombene nkukwasha bwa kutumikila mayi a kulonda a mu Bible?

¹⁵ Ingi nsaa, mbilombene nkwikela bukopo bwa kutumikila mayi akulonda a mu Bible odi mulongye. Nyi bwakinyi Yehowa kwete kutumika na ndubulwilo aye bwa kutusha mikanda ayipatuula Bible na ilombene nkukwasha bwa kutundula ki buwa na ki bubi. (Eb. 5:13, 14) Nsaa y’obadika na kwilongyela ino mikanda, omono’shi i na malango ebuwa na aakwasha, bino abikutakula mu kwifubwila peepi na ndumbulwilo a Yehowa.

16. Yehowa mmulumbuule mwilo waye mushindo kinyi?

¹⁶ Longa bya kufula na kukwatshishena ndumbulwilo a Yehowa. Yehowa mulumbule mwilo waye mu tukongye, mwan’aye Yesu nyi mwikale mutwe wato. (Ef. 1:22; 5:23) Yesu mmusangule kasaka kapela ka bedibwe mwimu bwakadya kukunkusha mudimo ukwete kukitshika lelo uno. Yesu etamina kano kasaka ka bantu bu “mpika a kishima na mudimukye,” mudimo wabo ngwa nkukwasha bwa’shi wefubwile peepi na Efile Mukulu na kulama kipwano kyobe naye. (Mat. 24:45-47) Umune wa ku mishindo yabakwete nkupasukila kwi mpika a kishima, mpa kutula bakulu balombane nkukunkusha na nkukalwila. (Yesh. 32:1, 2; Eb. 13:17; 1 Mp. 5:2, 3) Bakulu abakitshi  mwabo moso bwa nkunyingisha na bwa’shi onyishe kwikala peepi na Yehowa. Kadi kintu ki na muulo kyabadi balombene nkukitshina nyi nkukwasha bodya kulongyesha bangi pabitale Yehowa.​—Ef. 4:11-13.

17. Muyile Beena-Looma 10:10, 13, 14, bwakinyi abitungu olungule bangi pabitale Yehowa?

¹⁷ Kwasha bangi balongye bya kufula Yehowa. Yesu baadi mulungule batumibwa bwabadya kulongyesha bangi pabitale Yehowa. (Mat. 28:19, 20) Abitungu tukookyele wawa mwiya, mwanda nkitungo kyabadi betupe. Nsaa ayitama kifulo kyobe bwa Yehowa, opusha nka bibaadi Mpyeele mutumibwa bakwile’shi: “Tatwi balombeene kukutwa kwakula bwa bintu biatudi bamone na biatudi bapushe.” (Bik. 4:20, Kilombeeno kipya 2014) Atwikala na muloo wibungi su atukwasha bangi bwabadya kufula Yehowa. Banda kupwandikisha muloo ubaadi upushe Filipe nsaa ibaadi mukwashe mwina Etshopii bwa kulonga bya binyibinyi bi mu bifundwe na kubatshishibwa! Su wambula Filipe pa kukookyela mwiya wa Yesu wa kulungula mukandu wibuwa, olesha’shi okumiina kwikala Temwe a Yehowa. (Badika Beena-Looma 10:10, 13, 14.) Yaya nsaa, we kwiyipusha nka bu mwina Etshopii’shi: “A kya kunkutshishwa kubatshishibwa kinyi?”​—Bik. 8:36.

18. Nkonko kinyi yatukaluula mu mwisambo aulondo?

¹⁸ Kubatshishibwa nyi kitshibilo ki na muulo kywata mu muwa oobe. Bu byabidi’shi nkitshibilo ki na muulo, abitungu onangushene ngofu pabitale kyakipushisha. Nkinyi akitungu’shi oukye pabitale kubatshishibwa? Nkinyi akitungu’shi okite kumpala na kunyima kwa kubatshibwa? Atukaluula ino nkonko mu mwisambo aulondo.