Umune wa ku mifubo ibabadi abakitshi kwi bena kisamba kya Leevi bashibaadi ba tshite mwakwidi ubaadi wa kufuba nka bu ba mpulushi. Abaadi abeukunkusha kwi mukata a ku ntempelo. Philo, mufundi a bena Yuuda alesha bibaadi mudimo wabo’shi: “Bangi ba ku baaba [bena Leevi] abaadi abemana ku kiibi bu balami, nka peepi na kibelo, bangi abaadi mu ntempelo kumpala kwa mbalo ya kishila (sanctuaire) bwa kutosha bantu bashabauku mwiya bwashi tabekwendanga, byabikala mu kukumiina sunga kushii mu kukumiina kwabo. Bangi abaadi abalama mu lupango na kwikomboshena aba kutooka, aba bufuku.”

Bena Sanedrine abaadi abebatekye bwa’shi bebakwashe. Nka penda baaba ba mpulushi nyi bababadi bakumiine kwi bena Looma’shi bekale kwanka.

Ungi muntu atalaa myanda ya kala Joachim Jeremias, amba’shi: “Pabaadi ba mpulushi bakwate Yesu, bebepwishe’shi bwakinyi tababaadi bamukwate palongyeshanga mu ntempelo. (Mat. 26:55) Yesu tabadya kwibela lwalwa lukonko su tababaadi ba mpulushi ba ku ntempelo.” Uno muntu umune amba’shi bantu abaadi bakyebe kukwata Yesu mususa wa kumpala abaadi dingi ba mpulushi ba ku ntempelo. (Yo. 7:32, 45, 46) Ba mpulushi na mukata aabo abaadi bebatume bwa kwenda na Yesu ku Sanedrine, dingi abimweka’shi abaadi munkatshi mwa bantu abaadi batuushe Mpoolo mutumiibwa pasha pa ntempelo.​—Bik. 4:1-3; 5:17-27; 21:27-30.