Sara amba’shi: “Nekalaa muumiine kubanga nka ku butandwa bwande, * dingi nemonaa bu shii bi benami boso. Byabya, napushaa bibubi nsaa yandi na bantu be bukyelo. Kadi, napushaa bibuwa nsaa yandi na muntu mupopeele na mwiyishe. Muntu e byabya ngi andi mulombene kwisamba naye na kumulungula byampusha, na myanda yande. Bantu be byabya ngi ba kuuku bande.”

Myanda yakule Sara ayilesha’shi su twekala bapopeele, bangi bantu abakumiina kwikala bu ba kuuku betu. Dingi kupopeela akusankishaa Yehowa. Eyi dyaye adiamba’shi: “Ikalayi na . . . kipopeelo.” (Kol. 3:12, EEM) Kupopeela nkinyi? Mbikunyi bibaadi Yesu muleshe kupopeela? Na mbikunyi bilombene dino eyikasha kwitwikasha na muloo?

Kupopeela nyi eyikashi adimwekaa kwi muntu sha kufukama. Muntu mupopeele akitshinaa bangi myanda na kalolo, na ashalaa muumiine nsaa yabamufitshisha munda.

Muntu mupopeele te ntshikye nya. Kishima kya mu kina Greke kyabadi baluule bu ‘kupopeela,’ abaadi abekifubisha bwa kulesha mpunda mupopeele. Mpunda baadi kii’nka na bukome, kadi bu byabadi bamulongyeshe, auku bya kwipoosha. Mu mushindo umune, nsaa yatudi bapopeele, atuuku bya kupoosha binangu byetu bikutwe kupwidika na kwikala mu butaale na bangi.

Pangi atwambaa’shi: ‘kubanga ku bukinga bwande tangikalaa mupopeele.’ Twi mu nsenga mwi bantu be bukyelo na bashi na lwishinko, byabya twi kumona bu bibukopo kwikala na kupopeela. (Lom. 7:19) Eyendo’shi, abitungu kukita bukome bwa kwikala na kupopeela, kadi, kikudi kya Yehowa akitukwasha bwa kulombasha kaka kepatshila. (Nga. 5:22, 23) Bwakinyi abitungu tukite bukome bwa kwikala na kupopeela?

Kupopeela nyi eyikashi adikakaa bantu. Nka bu byabaleshanga kwi Sara, atutemunanga kunundu, atupushaa bibuwa nsaa yatudi na bantu basha kupopeela. Yesu nyi kileshesho kikata kya kupopeela na kalolo. (2 Kod. 10:1) Sunga bana bashi bamuubiile abaadi abafiki kwadi.​—Mak. 10:13-16.

Kupopeela kwi buwa bwetu mpaa na bwa bantu betwifunyishe. Su twekala bapopeele, tatwibalombene kufita munda bukidi bukidi nya. (Nki. 16:32) Tatwikala atwitopeka kwishimba bu abikitaa muntu nsaa yatentekyesha’shi batapa muntu kwishimba​—bikishekishe su  mmuntu atudi bafule. Dingi kupopeela akukwasha bantu betwifunyishe mwanda tatwikala atwibatapa ku mashimba nya.

Sunga mbibaadi na mashito ebungi na myanda ibungi ya kukita, Yesu baadi mupopeele kwi bantu boso. Aa mafuku, bantu bebungi abaadi abetatshisha na bushito, na abaadi na lukalo lwa kiikiisho. Abaadi banyingishibwe ku mashimba ngofu pabaadi Yesu mwibalungule’shi: “Fikaayi kwandji . . . Mwanda nee mupopeele dingi ne mwiyishe kwishimba”!​—Mat. 11:28, 29.

Mbikunyi byatudya kwikala na kupopeela bu kubaadi nako Yesu? Atulongaa Eyi dy’Efile Mukulu bwa kuuka bibaadi Yesu akitshina bangi myanda na kibaadi akitshi pabaadi mu nshalelo i bukopo. Akupu, nsaa yatufumankana na myanda ayitompo kupopeela kwetu, atwitatshisha bwa kwambula Yesu. (1 Mp. 2:21) Tutaluuleyi myanda isatu ibaadi ikwashe Yesu bwadya kwikala mupopeele.

Yesu baadi mwiyishe kwishimba. Yesu bambile’shi: ‘mmupopeele na mmwiyishe.’ (Mat. 11:29) Bible atemuna ino ngikashi pamune mwanda kupopeela nkwipushene na kwiyisha. (Ef. 4:1-3) Bwakinyi byabya?

Kwiyisha akwitukwasha bwa kupela kutapika kwishimba bukidibukidi. Yesu baadi akitshi naminyi nsaa ibabadi abamwamba bibubi kushi mwanda bu “sha-budyaafu” na “buntomi”? Baadi mutadiile bwashi mwikelo waye uleshe’shi bibabadi abamwamba mbya madimi, dingi bakwile na kwiyisha koso’shi “kinangu kibaadi kitundulwe bu kilulame, muyiile bikitshino byakyo.”​—Mat. 11:19.

Be nkwamba bibubi pabitale kabila kobe, kalasa kodi mulongye, sunga byodi bu mwana mukashi sunga mwana mulume, bibuwa twitatshishe bwa kwaluula na kwiyisha. Peter, ungi mukulu mwina Kidishitu a mu Afrique du Sud amba’shi: “Nsaa yanfitshi munda mwanda wa byabangamba kwi bangi, neyipushaa’shi ‘Yesu badya kukita kinyi?’” Alombasha’shi: “Naadi netatshisha bwa kupela kufiita munda.”

Yesu baadi auku’shi bantu mbakutwe kupwidika. Balongi ba Yesu abaadi abakumiina kukita bibuwa, kadi, mwanda wa kukutwa kupwidika kwabo, tababaadi abebikitshi nya. Bu kileshesho, bufuku bwa muladilo wa lufu lwa Yesu, Mpyeele, Shake na Yowano tababaadi bapasukye bu bibaadi mwibatekye. Yesu bapushishe bwakinyi abaadi balale nsaa ibakwile’shi: “Kikudi nkyuule na katshintshi, anka mbidi ngibofule.” (Mat. 26:40, 41) Pa mwanda baadi auuku byabya, Yesu tabaadi mufitshile balongi baye munda nya.

Ungi mukwetu mukashi abetaminaa bu Mandy, baadi muukibwe bu sha twipu, kadi binobino kwete kukita mwaye mooso bwa kwambula kileshesho kya Yesu kya kupopeela. Amba’shi: “Nabangile kutentekyesha’shi bantu boso mbakutwe kupwidika na naadi natuulu binangu ku ngikashi y’abo i buwa bu abikitaa Yehowa.” Mushindo ubaadi Yesu alesha bantu be na nkalakashi lusa, ngulombene nkukwasha namu bodya kukitshina bangi myanda na kupopeela su?

Yesu baadi atuulu myanda yoso mu masa a Efile Mukulu. Yesu baadi anyingiila myanda ya kukutwa kwa kululama ibabadi abamukitshina pabadi pa nsenga. Abaadi abamupusha bibubi, abamubepula, na kumukyengyesha. Sunga mbyabya, baadi nka mwiyishe mwanda baadi ‘eetuulu mu maasa a Nsushi mululame.’ (1 Mp. 2:23) Yesu baadi auku’shi Nshaye e mwiyilu amukwasha bwa kunyingila na kunyoka baba boso abamukitshina myanda ibi.

Su twafita munda na kutompa kulwa na kukutwa kwa kululama kwa muntu, twi kunyisha kulwisha myanda. Nyi bwakinyi bifundwe abitutentekyesha’shi: “Nsungu ya muntu tangilombeene kukita kilulame kumpala kw’Efile Mukulu.” (Shak. 1:20) Sunga twekala na kabingilo ka kufita munda, kukutwa kwetu kwa kupwidika nkulombene kwitutwala mu kukita kintu ki bubi.

Ungi mukwetu mukashi a mu Allemagne abetaminaa bu Cathy ambeya’shi ‘su opela kwikalwila obe nabene, takwi muntu mulombene nkukalwila.’ Kadi nsaa ibaadi mulongye bya kukulupila kwi Yehowa, mweneno aaye baadi mushintulukye. Amba’shi: “Binobino, ntshi mulombene kwiobwela, kadi abikyebe ngikale mupopeele, mushinkamishe’shi, Yehowa akalumbuula myanda yoso ibubi pa nsenga.” Nsaa yabakukitshina myanda ya kukutwa kwa kululama,  kwambula kileshesho kya Yesu kya kukulupila Efile Mukulu, akukukwasha bodya kwikala mupopeele.

Yesu baadi muleshe’shi su atukumiina kwikala na muloo, abitungu twikale bapopeele. Nyi bwakinyi bakwile’shi: “Baba bapopeele be na mwaabi [muloo].” (Mat. 5:5) Tala bilombene nkunkwasha kupopeela mu ino myanda ayilondo.

Kupopeela akupudisha bilumbu mwiyibakishi. Ugi mukwetu a mu Australie abetaminaa bu Robert amba’shi: “Nadi mwambe mukashi ande myanda ibubi yanshinadi napwandikisha. Anka kunyima kwa muntu kwakula myanda ibubi mu nsungu, tamulombene kutuna’shi tamwambe kintu nya. Napushishe bibubi byabya nsaa inaadi mumumone bibabidi bimukalakashe.”

“Atwe boso atulubâ” mu ngakwilo, na myanda yatwakula kushii kwela binangu ngilombene kutusha bilumbu mu dibaka. (Shak. 3:2, EEM) Mu yaya nsaa, kupopeela nkulombene kwitukwasha bwa kushaala baumiine na kunangushena kumpala kwa kwakula.​—Nki. 17:27.

Binobino, Robert kwete kwitatshisha bwa kwikala na butontshi bwa mbidi. Mbipeta kinyi bitukye? Amba’shi: “Lelo uno, nsaa yatudi na bilumbu na mukashi ande, n’etatshishaa bwa kumuteemesha kalolo, kwakula na butale boso na kupela kufiita munda. Kipwano kyande na mukashi ande kibanyisha kulumbuluka.”

Kupopeela akwitukwasha bwa kwipusheena na bangi. Bantu bebungi abafitaa munda bukidi, tabakambaa kupeta ba kuuku. Anka kupopeela akwitukwasha bwa ‘kulama buumune . . . abwitubungu pamune mu butaale.’ (Ef. 4:2, 3) Cathy atutemunanga kuunundu amba’shi: “Kupopeela nkumpe bukome bwa kwikala na muloo nsaa yandi na bangi, sunga byekala bukopo bwa kwikala n’abo.”

Kupopeela akwitupa butaale bw’eshimba. Bible akwila “binangu bya mwiyilu” pamune na kupopeela na butaale. (Shak. 3:13, 17) Muntu sha kupopeela e na “eshimba difukame.” (Nki. 14:30) Martin baadi etatshisha bwa kwikala na eyikashi dya kupopeela amba’shi: “Binobino, ntshikii bukyelo na ntshikya nkimbaa’shi myanda ikitshikye nka byankyebe nya, anka ne na eshimba difukame na ne na muloo.”

Eyendo’shi, abitungu tukite mwetu moso bwa kwikala n’eyikashi dya kupopeela. Ungi mukwetu amba’shi, angi mafuku afitaa munda. Kadi Yehowa, etutekye bwa kutungunuka na kwikala bapopeele, etukwasha mu ino ngoshi. (Yesh. 41:10; 1 Tim. 6:11) ‘Aketwikasha balombanyîne’; na ‘aketukankamika.’ (1 Mp. 5:10) Paapa, nka bu Mpoolo mutumiibwa twi kwambula “kupopeela na kalolo bya Kidishitu.”​—2 Kod. 10:1.