1. Nkinyi kibakwile Yesu pabitale bupeta bwa mwiyilu?

TWIBALOMBENE kumona bya buntu byoso. Kadi, bya buntu bi na muulo ukata, tatwibimonaa nya. Mu mwisambo waye wa pa mwengye, Yesu baadi mwakwile pabitale bya buntu bi na muulo ukata kukila bupeta. Akupu bakwile bino’shi: “Mwanda kwakwa kwi bupeta bwobe, ngi akukeekala n’eshimba diobe.” (Mat. 6:19-21) Eshimba dyetu ndilombene kwitutakula bwa kukimba bintu byatumono’shi bi na muulo ukata kwatudi. Twi balombene kuungwisha “bupeta mwiyilu” pa kwikala na nkumo ibuwa kwi Efile Mukulu. Yesu baadi muleshe’shi bwabwa bupeta tambalombene kwibulwisha sunga kwibwiba.

2. (a) Muyile 2 Beena-Kodinda 4:17, 18, Mpoolo etutekye bwatudya kushimika meso eetu ku kinyi? (b) Mmyanda kinyi yatukyebe kwakwila mu uno mwisambo?

² Mpoolo mutumiibwa etutekye bwatudya ‘kushimika meeso [eetu] pa . . . bintu bishaabimweneka.’ (Badika 2 Beena-Kodinda 4:17, 18.) Bino bintu bishabimweneka, nyi mbupeta, kwamba’shi myabi yatukapete mu ndumbulwilo mupya a Efile Mukulu. Mu uno mwisambo, atukyebe kutaluula bintu binanka bish’abimweneka byatudi balombene kupeta binobino​—bu kuuku na Yehowa, kya buntu kya luteko, bukwashi bwa kikudi ky’Efile Mukulu, na bukwashi bwatupetela kwi Yehowa, Yesu na ba miikeyilu nsaa yatudi mu bulungudi. Atukyebe kutaluula dingi kipaso kyatudya kulesha’shi twi na lutumbu bwa bino bya buntu bish’abimweneka.

3. Kya buntu kikata kishakimweneka nkinyi, na bi kukitshika naminyi?

³ Kya buntu kikata kishakimweka nyi kipwano kyetu na Yehowa Efile Mukulu. (Mis. 25:14) Mbikunyi bilombene Yehowa kudya bu kuuku na bantu ba sha milwisho na kutungunuka na kwikala e selele? E kudya bu kuuku na bantu, mwanda mulambu wa nkuulo wa Yesu ‘ngushimishe milwisho ya baa pano pa nsenga.’ (Yo. 1:29) Yehowa baadi mupwe kuuka’shi mpàngo yaye ya kutuusha mupaashi a bantu ayilombana. Nyi bwakinyi Efile Mukulu baadi adi bu kuuku na bantu abaadi kwanka kumpala kwa’shi Kidishitu afikye mu kufwa.​—Lom. 3:25.

4. Tusha Bileshesho bya bantu abaadi bafikeye ba kuuku b’Efile Mukulu kumpala kwa’shi Yesu aafikye.

⁴ Banda kutala bantu abaadi badye bu kuuku n’Efile Mukulu kumpala kwa’shi Kidishitu afikye. Abrahame baadi na lukumiino lunyingiye ngofu. Bipwa bikile pa 1 000 kunyima kwa lufu lwa Abrahame, Yehowa bamwitamiine bu “kuukw’ande.” (Yesh. 41:8) Byabya, sunga lufu ta ndulombene kutshiba bu kuuku bwetu n’Efile Mukulu. Mu binangu bya Yehowa, Abrahame e na muwa. (Luk. 20:37, 38) Kingi kileshesho nkya Yoobo. Kumpala kwa’shi Yehowa abangye kisangilo na miikeyilu mwiyilu, baadi mwisambe pabitale Yoobo kushii Yoobo kuuka. Yehowa baadi mumwitamine bu ‘muntu sha lulamato na mululame, atshinyi Efile Mukulu, dingi eekumbaa bubi.’ (Yob. 1:6-8) Na mushindo kinyi ubaadi upushe Yehowa pabitale Ndanyele, baadi mumufubile na lulamato loso munda mwa bipwa 80 mu kibundji kya ba mpangano? Misango isatu ishima, miikeyilu ibaadi ishinkamiishe uno muntu mununu’shi “mmufudibwe” n’Efile Mukulu. (Nda. 9:23; 10:11, 19) Twikale bashinkamishe’shi Yehowa akumiina kusaangula ba kuuku baye baadi mufule.​—Yob. 14:15.

5. Nkinyi akitungu kukita bwa kudya bu kuuku na Yehowa?

⁵ Mbantu bungi kinyi bakutwe kupwidika be mu bu kuuku na Yehowa lelo uno? Be midiyo. Atwakula byabya mwanda kwi bantu bebungi, balume, bakashi na baana mu nsenga ishima abalesha ku mwikelo wabo’shi abakumiina kwikala ba kuuku b’Efile Mukulu. Yehowa “nyi nkuku a balulame.” (Nki. 3:32) Mbibofule bwabadya kudya bu kuuku n’Efile Mukulu mwanda be na lukumiino mu mulambu wa nkuulo wa Yesu. Ku bukwashi bwa wawa mulambu, nyi kwatudi balombene kwikala ba kuuku ba Yehowa, kwilambula kwadi na kubatshishibwa. Nsaa yatwele ino ntaba i na muulo, atwisanga pamune na midiyo ya bena Kidishitu belambule na babatshishibwe be mu ‘bu kuuku’ na Muntu mukile bukata mwiyilu na pa nsenga!

6. Mbikunyi byatudya kulesha lutumbu bwa bu kuuku bwetu n’Efile Mukulu?

⁶ Mbikunyi byatudya kulesha’shi tukwete kwata bu kuuku bwetu n’Efile Mukulu na muulo? Nka bu Abrahame na Yoobo abaadi bashale na lulamato kwi Efile Mukulu munda mwa bipwa nkama, abitungu tushale na lulamato​—sunga twekala bapwe kukita bipwa bibungi na kufubila Yehowa mu uno ndumbulwilo. Nka bu Ndanyele, abitungu twate bu kuuku bwetu n’Efile Mukulu na muulo kukila muwa wetu. (Nda. 6:7, 10, 16, 22) Na bukwashi bwa Yehowa, twi balombene kunyingiila nkalakashi yatupete na kulama kipwano kyetu naye ki bukopo.​—Fid. 4:13.

7. (a) Muyile Nkindji 15:8, Yehowa apushaa naminyi pabitale nteko yetu? (b) Yehowa aluulaa nteko yetu mushindo kinyi?

⁷ Kingi kya buntu kishakimweka nyi luteko. Ba kuuku befule, abakumiinaa kwilungushena bi mu binangu byabo. Bi kukitshika namu byabya mu bu kuuku bwetu na Yehowa su? Oolo!  Yehowa esambaa netu kukiila ku Eyi dyaye, na mwanka etulungula bi mu binangu byaye, na byapushaa. Atwisambaa naye mu luteko, na kumulungula myanda i mu binangu byetu mpaa na yaya ifwame i mwishimba dyetu. Yehowa akumiinaa kuteemesha nteko yetu. (Badika Nkindji 15:8.) Bu byadi Kuuku eetu sha kifulo, Yehowa tatemeshaa penda nteko yetu nya, aluulaa ku yanka. Ingi nsaa e kwitwaluula kushii kunyengakana. Ingi nsaa namu, abitungu’shi tutungunukye na kwela nteko pabitale mwanda kampanda. Sunga mbyabya, twikale bashinkamishe’shi lwaluulo alufiki nka kufika pa nsaa na mu kipaso kibuwa. Eyendo, lwaluulo lw’Efile Mukulu lwi kwikala lwilekene na byatukulupilanga. Bu kileshesho, pamutwe pa kukatusha lukalakashi, e kwitupa kinangu na bukome bwa ‘kwilukambila.’​—1 Kod. 10:13, Kilombeeno kipya 2014.

8. Twi kulesha naminyi’shi twi na lutumbu bwa kya buntu kya luteko?

⁸ Mushindo kinyi watudi balombene kulesha lutumbu lwetu bwa kya buntu kya luteko? Atulesha’shi twi na lutumbu pa kulonda elango dy’Efile Mukulu dya ‘kuteka kushi kukôka.’ (1 Tes. 5:17, EEM) Yehowa t’etukitshisha pabukopo bwa kumuteka. Mwanda anemekaa bulungantu bwetu na etunyingishaa bwatudya kwikala ‘atutekye na mufwaka.’ (Lom. 12:12, EEM) Byabya, twi kulesha lutumbu pa kuteka efuku dyoso, misusa yoso yatukyebe. Eyendo’shi, abitungu twikale atutumbula na kutumbisha Yehowa mu nteko yetu.​—Mis. 145:2, 3.

9. Ungi mukwetu apusha naminyi pabitale luteko, obe namu opushaa naminyi?

⁹ Patufubila Yehowa na kumona mushindo waluula nteko yetu, atunyisha kulesha lutumbu bwa kya buntu kya luteko. Tala kileshesho kya Chris, mukwetu mulume mufube bipwa 47 mu mudimo wa nsaa yoso. Amba’shi: “Nakumiina kubuuka namashika bwee bwa kuteka Yehowa. Kwisamba na Yehowa kwi buwa nka bu nsaa ayikupila nsembwe ya ngumba ku lume! Bino abintakulaa bwa kumutumbula bwa bya buntu byaye byoso, mpa na kineemo kya kumuteka. Kunyima kw’ami kuteka kumpala kwa kulala, nalalaa na kondo k’eshimba katokane.”

10. Bwakinyi abitungu twate na muulo kikudi kiselele ky’Efile Mukulu?

¹⁰ Kikudi kiselele ky’Efile Mukulu nyi kingi kya buntu kishaa kimweneka akitungu’shi twate na muulo. Yesu etunyingisha bwa kutungunuka na kuteka bukwashi bwa kikudi kiselele. (Luk. 11:9, 13) Kubukwashi bwa kikudi kyaye, Yehowa kwete kwitupa bukome​—“bukome bushii bwa kupwandjikisha nabo kintu.” (2 Kod. 4:7; Bik. 1:8) Kubukwashi bwa kikudi ky’Efile Mukulu, twi balombene kunyingiila lukalakashi loso lwatudya kufumankana nalo.

11. Mushindo kinyi ulombene kwitukwasha kikudi kiselele ky’Efile Mukulu?

¹¹ Kikudi kiselele nkilombene kwitukwasha bwa kukumbasha mudimo w’Efile Mukulu. Kikudi ky’Efile Mukulu nkilombene kwitukwasha bwa kuluumbula ngobesha yetu. Atuuku’shi bipeta bibuwa byatupete mu mudimo w’Efile, nyi nkubukwashi bwa kikudi kiselele.

12. Muyile Misambo 139:23, 24, twi kuteka bwa’shi kikudi kiselele kitukwashe tukite kinyi?

¹² Twi kulesha dingi’shi atwata kikudi kiselele na muulo, pa kwela luteko bwa’shi kitukwashe tutundule binangu bibubi sunga nkalo ibubi i mwishimba dyetu. (Badika Misambo 139:23, 24.) Su twateka bwa bino bintu, kubukwashi bwa kikudi kyaye, Yehowa mulombene kwitukwasha bwa kutundula binangu sunga nkalo ibubi. Na nsaa yatutundula bino, abitungu tutekye bukwashi bwa kikudi ky’Efile Mukulu bwa’shi tupete bukome bwa kukambila byabya binangu sunga nkalo ibubi. Paapa atulesha’shi twi na kitshibilo kya kusuuka kintu kyoso kilombene kukita bya’shi Yehowa apele kwitukwasha ku bukwashi bwa kikudi kyaye kiselele.​—Ef. 4:30.

13. Mushindo kinyi watudi balombene kunyisha kulesha lutumbu bwa kikudi kiselele?

¹³ Twi balombene kunyisha kulesha lutumbu lwetu bwa kikudi kiselele nsaa yatunangushena pa myanda yakitukwasha bwa kukita lelo uno. Kumpala kwa’shi ende mwiyilu, Yesu baadi mulungule balongi baye’shi: “Anka anukatambula bukome apakafiki kikudi kiselele panudi; na anukeekala tumonyi twande . . . mpaa na ku nfudiilo a nsenga.” (Bik. 1:8, Esambi dipya 2015)  Bino nyi bikwete kukitshika lelo uno. Ku bukwashi bwa kikudi kiselele, bantu bafikye ku midiyo mwanda na kipindji bakwete kulangwila Yehowa. Na dingi, atusangela mpaladiso a mu kikudi, mwanda kikudi ky’Efile Mukulu akitukwasha bwa kwikala na ngikashi ibuwa bu kifulo, muloo, butaale, lwishinko, kalolo, buuwa, lukumiino, kupopeela, na butontshi bwa mbidi. Ino ngikashi nyi ayikitshi “kikuba kya kikudi kiselele.” (Nga. 5:22, 23, Esambi dipya 2015) Kikudi kiselele nyi kya buntu kikile buwa!

14. Mbukwashi kinyi bushabumweneka bwatupetaa nsaa yatudi mu bulungudi?

¹⁴ Twi na kya buntu ki na muulo ukata kishakimweneka kya “kufuba pamune” na Yehowa mpa na kipindji kya ndumbulwilo aaye ki mwiyilu. (2 Kod. 6:1) Atufubaa nabo nsaa yoso yatukitshi mudimo wa bulungudi. Mpoolo bakwile bwaye na bwa baaba boso abalungulaa mukandu wibuwa’shi: “Tukwete kufuba pamune n’Efile Mukulu.” (1 Kod. 3:9) Nsaa ya twende mu bulungudi, tukwete dingi kufuba pamune na Yesu. Tentekyesha’shi kunyima kw’aye kulungula balongi baye bwabadya ‘kwenda mu miilo yoso na kwikasha bantu bu balondji,’ Yesu bakwile’shi: “Nee neenu.” (Mat. 28:19, 20) Kadi twi kwamba kinyi bwa ba miikeyilu? Twi na lutumbu lukata pa kuuka’shi ba mikeyilu abetukunkushaa nsaa yatulungula “mukandu wibuuwa wa looso wa kuukisha kwi bano bashaale pa nsenga”!​—Kibaf. 14:6.

15. Tusha kileshesho kya mu Bible akilesha mudimo ukata winao Yehowa mu mudimo wa bulungudi.

¹⁵ Buno bukwashi bwatupete abufiki mwiyilu, bukwete kwitukwasha bwa kukita kinyi? Bu byatukwete kukuna mukandu wa Bufumu, ingi mbyo ikwete kupona mu mashimba ebuwa na ayikulu. (Mat. 13:18, 23) Nnanyi kwete kukusha ino mbyo ya bya binyibinyi na kutuusha bikuba? Yesu baadi muleshe’shi takwi muntu mulombene kufika mulongi aaye su “Yaaya . . . tamumukakye.” (Yo. 6:44) Mu Bible mwi bileshesho abibishinkamisha. Tentekyesha musango ubaadi Mpoolo alambukisha kisaka kya bana bakashi pasha pa kibundji kya Fidipe. Bible akula pabitale umune a ku baba bana bakashi ababadi abetamina bu Lidii’shi: “Yehowa baadi mufungule eshimba dyaaye bwa kuteemesha kalolo bishima bya Mpoolo.” (Bik. 16:13-15) Nka bu Lidii, midiyo ya bangi bantu bakwete kukakibwa na Yehowa.

16. Nnanyi atungu’shi tutumbishe bwa bipeta byoso bibuwa byatupete mu bulungudi?

¹⁶ Nnanyi atudya kutumbisha bwa bipeta bibuwa byatukwete kupeta mu bulungudi? Mpoolo baadi mutushe lwaluulo nsaa ibaadi mufundjile kakongye ka mu Kodinda ano mayi: “Ami nee mukune; Apolose mmumyaamine meema; anka Efile nabeene ngi baakushanga bintu. Byaabya akunu tee kintu, amyaamina meema tee kintu bwaye; Efile buupenka ngi ee na muulo aye akusha.” (1 Kod. 3:6, 7) Nka bu Mpoolo, abitungu tutumbishe Yehowa bwa bipeta byoso byatupete mu bulungudi.

17. Mushindo kinyi watudi balombene kulesha lutumbu bwa kya buntu kya “kufuba pamune” n’Efile Mukulu, Kidishitu, na ba mikeyilu?

¹⁷ Mushindo kinyi watudya kulesha lutumbu bwa kya buntu kya “kufuba pamune” n’Efile Mukulu, Kidishitu na ba mikeyilu? Twi kukita bino pa kulungula mukandu wi buwa na kisumi nsaa yoso yakudi mushindo. Kwi mishindo ibungi yatudi balombene kukita bino, bu kulungula mukandu pa mambalo “aûle bantu mpâ na ku nshibo na nshibo.” (Bik. 20:20, EEM) Balungudi bebungi abasangela bulungudi bwa mu mpukapuka. Nsaa yabakana na muntu mwenyi, abamwimuna na muloo oso na abatompa kubanga mwisambo. Su yawa muntu akumiina kwisamba,  na mayele oso abamulungula mukandu wa Bufumu.

18-19. (a) Mushindo kinyi watudya kumyamina mbyo ya bya binyibinyi meema? (b) Tusha kileshesho akilesha mushindo ubaadi Yehowa mukwashe ungi mulongi a Bible.

¹⁸ Bu bya “tukwete kufuba pamune n’Efile Mukulu,” tabitungu penda’shi tukune mbyo ya bya binyibinyi nya, anka abitungu twiyimyamine meema. Nsaa ayikumiina muntu, abitungu tukite mwetu moso bwa kumwalukiila sunga’shi twi kwisamba na ungi mulungudi bwadya kubanga kulonga Bible na yawa muntu. Atwikala na muloo nsaa yatumono’shi Yehowa kwete kukwasha mulongi a Bible bwadya kushintula binangu byabye na byapusha.

¹⁹ Tala kileshesho kya Raphalalani baadi mpaki a manga mu Afrique du Sud. Babangile kufula bibaadi alongo mu Bible. Anka bibaadi bukopo bwadya kukumiina abyamba Eyi dy’Efile Mukulu pabitale kwisamba na bafwe. (Miy. 18:10-12) Mmwenda mafuku, baadi mutadiile bwa’shi Efile Mukulu alumbuule binangu byaye. Ku nfudilo a byoso, balekyele bu mpaki a manga, sunga mbibaudi bu mudimo waye. Binobino, Raphalalani tadi na bipwa 60 amba’shi: “Natumbula ba Temwe ba Yehowa, mwanda mbankwashe mu mishindo ibungi, bu kileshesho, mbankwashe bwa kupeta mudimo. Bikishekishe, natumbula Yehowa mwanda mmukwashe bwa kushintuula nshalelo ande, binobino nkwete kulungula mukandu wibuwa bu Temwe a Yehowa.”

20. Bwaata kitshibilo kya kukita kinyi?

²⁰ Mu uno mwisambo, tubamono bya buntu binanka bishabimweneka. Kya buntu kikata ku bino byoso, nyi nkineemo kya kwikala mu bu kuuku na Yehowa. Bino abitukwasha bwa kupeta bino bingi bya buntu​—kumuteka, kupeta bukwashi bwa kikudi kiselele na kupeta bukwashi abufiki mwiyilu bwa kwitukwatshishena mu bulungudi. Twikaleyi na kitshibilo kya kunyisha kulesha lutumbu bwa bino bya buntu bishabimweneka. Na tutugunukyeyi na kutumbula Yehowa p’aye kwikala kuuku ebuwa.