1-2. Muyile Misambo 40:5, mbya buntu kinyi byabadi betupe kwi Yehowa, na bwakinyi atukyebe kwibitaluula?

YEHOWA nyi Efile Mukulu apanaa. Banda kunangushena ku bya buntu byadi mwitupe: nsenga yetu i buwa bukile; bongo bwetu bwadi mukite mu kipaso kya kukaanya, na Bible, Eyi dyaye dikile buwa. Ku bukwashi bwa bino bya buntu bisatu, Yehowa mmwitupe mbalo ya kushala, ngobesha ya kunangushena na kwisamba, na mmwitwaluule ku nkonko ibungi yatwiyipushaa.​—Badika Misambo 40:6.

² Mu uno mwisambo, atukyebe kutaluula mu kikoso bino bya buntu bisatu. Nsaa yatunangushena ku bino bya buntu, atunyisha kwikala na lutumbu, na atwikala na lukalo lwi bukopo lwa kusankisha Mupangi eetu Yehowa. (Kibaf. 4:11) Atwikala dingi belumbuule bwa kukwasha baaba babadi balwishe na malongyesha a madimi aamba’shi bintu mbituukile.

3. Bwakinyi planète eetu mmwilekene na angi ma planète?

³ Patutala kipaso kyadi mupangye nsenga, abilesha patooka’shi Efile Mukulu nyi sha binangu. (Lom. 1:20; Eb. 3:4) Planète eetu kwete kwifunya nguba nka bu angi ooso, anka mmwilekene nao mwanda e na bintu byoso abikwasha muntu bwa’shi ekale na muwa.

4. Bwakinyi atwamba’shi nsenga i buwa kukila mashuwa a meema abaadi bakite kwi bantu?

⁴ Ku lungi lupese, nsenga i nka bu mashuwa e pa meema a kalunga. Kadi kwi kwilekena kukata pankatshi pa mashuwa a meema abadi bakite kwi bana ba bantu, na nsenga yetu. Bu kileshesho, su bibadya kwikala’shi bantu be mu mashuwa a meema abetuushishaa oxygène, bidibwa, na meema, na’shi tabakwete kusumbula butshaafu mu mashuwa, abadya kwikala na  muwa munda mwa mafuku anga? Bantu be mu aa mashuwa be kufwa kushii kwisha. Mu kwilekena na byabya, nsenga ngitwale midiyo na midiyo ya bipangwa bi na muwa. Ikwete kutuusha oxygène, bidibwa, na meema, na tabikwete kupwa nya. Sunga’shi butshafu boso bwi nka pa nsenga; ikii nka buwa bwa’shi bantu bemushala. Bwakinyi byabya? Yehowa mmupangye nsenga na ngobesha ya kwisuula. Atukyebe kwakwila ndambo pabitale abisuula oxygène na meema.

5. Kwisuula kwa oxygène nkinyi na akushinkamisha kinyi?

⁵ Oxygène nyi ndupapi lwi buwa alukwashaa bingi bipwangwa bi na muwa, mpa n’atwe bantu. Mbaleshe’shi bipangwa bii na muwa abikakaa midiyo nkama ya tone ya oxygène ku kipwa nsaa yabikwete kupuwa. Kadi, abituusha lupapi lwi butshaafu lwabetamina bu Dioxyde de carbone. Anka, bino bipangwa bi na muwa tabikwete kobesha kupwa oxygène oso nya, na atmosphère tamulwile mwanda wa lwalwa lupapi “lwibubi” lwa dioxyde de carbone nya. Bwakinyi? Mwanda Yehowa mmupangye mitshi ilekenelekene ayata dioxyde de carbone na kutuusha oxygène. Mu kwakula kwa kalolo, kwisuula kwa oxygène akushinkamisha mayi e mu Bikitshino 17:24, 25, aamba’shi: “Efile Mukulu . . . ngi apeyaa byooso muuwa.”

6. Kwifunya kwa meema nkinyi, na byabya abilesha kinyi? (Tala kashimbo akamba’shi “ Kwifunya kwa meema nyi nkya buntu kya Yehowa.”)

⁶ Meema ngasungulukye pa nsenga mwanda nsenga mbeyituule pa bula bulombane na nguba. Su nsenga ibadya kwikala ifubwile peepi na nguba kapeela, meema abadya kuuma, mubadya kwikala kibobo kikile na tamubadya kwikala kipangwa kii na muwa. Su nsenga ibadya kwifubwila kula kapeela na nguba, meema oso abadya kukwatakana nka bu ebwe, na kwikasha nsenga yoso nka bu ebwe. Kwifunya kwa meema kukwete kukwasha bipangwa mwanda Yehowa mmutuule nsenga pa bula bulombane. Nsaa aikupila nsembwe ya ngumba mu meema na pa nsenga, meema aakamina mwiyilu bu miishi na aakitshi makumbi. Ku kipwa kyoso, meema aendaa mwiyilu bu miishi e midiyo na midiyo ya milangi. Ano meema aakitaa mafuku pangi ekumi kumpala kwa’shi anokye bu mpeshi sunga bu milemba. Meema aefunyaa, kwamba’shi aende mwiyilu, akupu aaluka dingi pa nsenga mu tulunga na mmyela. Yehowa mmukite kwifunya kwa meema bwa’shi nsenga ikale nka na meema na bino abilesha kinangu na bukome bwaye.​—Yob 36:27, 28; Mul. 1:7.

7. Mishindo kinyi yatudya kulesha’shi twi na lutumbu bwa bya buntu bi mu Misambo 115:16?

⁷ Mushindo kinyi watudi balombene kulesha lutumbu bwa nsenga na bintu byoso bi mwanka? (Badika Misambo 115:16.) Mushindo umune, ngwa kunangushena pa bintu bikite Yehowa. Kukita bino, akwitutakula mu kumutumbula efuku dyoso bwa bintu byoso byadi mwitupe. Dingi atulesha’shi twi na lutumbu bwa nsenga pa kulama mbalo yatudi i mankenda.

8. Bwakinyi atwamba’shi bongo bwetu mbwa kukaanya?

⁸ Mushindo wabadi bakite bongo bwa bantu aukanyisha. Nsaa iboodi munda mwa nyinobe, bongo b’obe bubaadi abwende na kukula muyile bibabaadi bebukite, na midiyo ya ma cellule apya abaadi aatandikwa ku munite oso wawa. Bantu abakimbuulaa myanda abapwandikisha’shi bongo bwa muntu mukulu bwi na midiyala peepi 100 ya ma cellule e pa bwao abetaminaa bu neurone. Ano ma cellule nyi akite bongo bwetu bwi na bushito bwa 1.5 kg. Tubandeyi kutaluula penda ipeela ya ku ngobesha ya bongo bwetu bwa kukaanya.

9. Kinyi akikushinkamiisha’shi ngobesha yeetu ya kwakula nyi kya buntu kitupe Efile Mukulu?

 ⁹ Ngobesha yeetu ya kwakula nkilengyeleshi. Banda kunangusheena pabitale akikitshikaa nsaa yatwakula. Kishima kyooso kywakula, bongo boobe abutakula misamba ifikye ku 100 ya ludimi, mudibu, milomo, mbangambanga na kyadi kyoobe bwayidya kusanasana. Bwashi wakule bishima kalolo, ino misamba ayisanaa mu kipaso kya’shi kishima kipushikye. Pabitale ngobesha ya kwakula ndimi, mu 2019 bantu abakimbuulaa myanda mbaleshe’shi mwana kyatandikwa mmulombene kuuka na kukita bishima byaye nabeene. Kuno kukimbuula akunyingisha nkumiino ya bantu bebungi abakimbuula​—ayileesha’shi twi batandjikwe na ngobesha ya kutundula na kulonga ndjimi. Eyendo’shi, ngobesha yeetu ya kwakula nyi kya buntu kitupe Efile Mukulu.​—Efi. 4:11.

10. Twi kulesha lutumbu bwa kya buntu kya kwakula kitupe Efile Mukulu naminyi?

¹⁰ Mushindo umune wa kulesha’shi twi na lutumbu bwa kya buntu kya kwakula, mpa kupushiisha bano abetwipusha bwakinyi tatukumiinaa dilongyesha dya bintu bituukile’shi twi bakumiine mwi Efile Mukulu mupangi a bintu byoso. (Mis. 9:1; 1 Mp. 3:15) Bantu abakwatshishena dino dilongyesha, abakumiina kwitukuminyisha’shi bintu mbituukile. Su twafubisha Bible, na ingi myanda yatubakwila mu uno mwisambo, twi balombene kwakwila Nsheetu e mwiyilu na kupushiisha booso abakumiina kwituteemesha bwakinyi twibashinkamishe’shi Yehowa nyi Mupangi a eyilu na nsenga.​—Mis. 102:25; Yesh. 40:25, 26.

11. Kabingilo kinyi kamune aketukanyisha pabitale bongo bwetu?

¹¹ Ngobesha yeetu ya kutentekyesha ayikanyisha. Mu mafuku a kala, ungi muntu akimbuulaa baadi mupwandjikiishe’shi bongo bwa muntu bwi na ngobesha yakutentekyesha myanda ifikye ku midiyo 20. Anka, binobino amba’shi twi balombeene kutentekyesha myanda ikile paapa bungi. Ngobesha kinyi ipabwayo inayo bantu?

12. Mushindo kinyi watudi belekeene na nyema mwanda wa ngobesha yeetu ya kulonga myanda?

¹² Mukantshi mwa bipangwa byooso bi pa nsenga, penda bantu mbekale na ngobesha ya kulonga myanda itale mwikeelo wibuwa, pa kutentekyesha na kutaluula myanda ipwe kukila. Bu kipeta, twi kulonga miiya kalolo na kushintula nshaleelo na mushindo wetu wa kunangusheena. (1 Kod. 6:9-11; Kol. 3:9, 10) Byabya, atulongyesha kondo keetu k’eshimba bya kutundula ki buwa na ki bubi. (Eb. 5:14) Twi balombeene kulonga bya kulesha kifulo, na lusa. Na kulonga bya kwambula kululama kwa Yehowa.

13. Muyile Misambo 77:11, 12, mbikunyi byatudya kufubisha kya buntu kyetu kya kulamiina myanda?

¹³ Kipaso kimune kyatulesha’shi twi na lutumbu bwa kyabuntu kitupe Yehowa kya ngobesha ya kulamiina myanda, mpa kwikala atutentekyesha nsaa yoso mushindo ubaadi  mwitukwashe na kwitunyingisha kala. Paapa atwikala bashinkamishe’shi aketukwasha mu mafuku aafiki. (Badika Misambo 77:11, 12; 78:4, 7) Kingi kipaso kyatudya kwikala na lutumbu, mpa kutentekyesha myanda ibuwa yabadi betukitshine kwi bangi. Bantu abakimbuulaa myanda abamba’shi, muntu e na lutumbu ekalaa na muloo. Dingi abitungu twambule Yehowa, pa kwikala atukatusha ingi myanda ku mashimba. Bu kileshesho, Yehowa alamiinaa myanda mu kipaso kipwidikye, kadi su twelanga kwishimba, etufwilaa lusa na kuluba milwisho yetu. (Mis. 25:7; 130:3, 4) Byabya, akumiina’shi tukitshine namu bangi’nka byabya nsaa yabetutekye lusa bwa bilubilo byabetukitshina.​—Mat. 6:14; Luk. 17:3, 4.

14. Mbikunyi byatudya kulesha lutumbu bwa bongo bwetu bwa kukaanya?

¹⁴ Twi kulesha lutumbu bwa bongo, kya buntu kya kukaanya kyabadi betupe, pa kufuba nabo bwa kutumbisha Yawa mwitupe bwanka. Bangi mbasangule bwa kufubisha bongo bwabo nka penda bwa kulombasha nkalo yabo’bo banabene​—bwa kwiatshila bitshibilo pabitale kii buwa na kii bubi. Kadi, mwanda Yehowa ngi mwitupangye, abitungu tuukye’shi nka penda miiya yaye nyi ibuwa kukila ingi miiya yoso yatudi balombene kwielela. (Lom. 12:1, 2) Nsaa yatulondo miiya yaye, atwikala na kufukama mu nshalelo. (Yesh. 48:17, 18) Na atwikala baukye akikumiina Yehowa’shi tukite patukii na muwa​—bwa kutumbisha na kusangasha Mupangi eetu na Nshetu.​—Nki. 27:11.

15. Kya buntu kya Bible akilesha naminyi’shi Yehowa mmufule bantu?

¹⁵ Bible nyi kyabuntu kyabadi betupe kwi Efile Mukulu sha kifulo. Nshetu e mwiyilu baadi mupe bantu bukome bwa kikudi bwabadya kumufunda, mwanda kwete kupasukila bana baye be pa nsenga ngofu. Ku bukwashi bwa Bible, Yehowa kwete kwaluula ku nkonko ya mu nshalelo i na muulo ukata yatudi balombene kwiyipusha, bu: Twi batuukye kunyi? Bwakinyi ne na muwa? Na mmyanda kinyi  ayitutengyela mu mafuku aafiki? Yehowa akumiina’shi bana baye boso bapete ngaluulo ku ino nkonko, nyi bwakinyi munda mwa bipwa bibungi, baadi mutakule bantu bwabadya kwaluula Bible mu ndjimi ibungi. Lelo uno, Bible mushima sunga bipese e mu ndjimi ikile pa 3000! Bible nyi mukanda wabadi baluule na kumwabila bantu kukila mikanda yoso. Sunga bantu bekala bashale mbalo kinyi, abakula ludjimi kinyi, bantu bebungi be na mushindo wa kulonga mukandu wa mu Bible mu ludjimi lwabo.​—Tala kashibo akamba’shi “ Kwikasha Bible mu ndjimi ya mu Afrique.”

16. Muyile Mateo 28:19, 20, mbikunyi byatudya kulesha lutumbu bwa Bible?

¹⁶ Atulesha’shi twi na lutumbu bwa Bible nsaa yatumubadika na kunangushena ku byalongyesha efuku dyoso, na kukita mwetu moso bwa kutumikila byatubadika. Dingi, atulesha lutumbu kwi Efile Mukulu pa kwitatshisha bwa kulungula bantu bebungi mukandu wibuwa.​—Mis. 1:1-3; Mat. 24:14; badika Mateo 28:19, 20.

17. Mbya buntu kinyi bibatutaluula mu uno mwisambo, na mbyabuntu kinyi byatukataluula mu mwisambo aufiki?

¹⁷ Mu uno mwisambo tubataluula bya buntu bibungi byabadi betupe kwi Efile Mukulu bu nsenga; bongo bwetu bwa kukaanya; na Bible Eyi dyaye difundjibwe ku bukome bwa kikudi. Anka kwi bingi bya buntu byabadi betupe kwi Yehowa bishabimweka na meso. Atukakwila byabya bya buntu bishabimweka mu mwisambo aulondo.